‘Gutpela Bilas Bilong Ol Plaua i Winim Tru Bilas Bilong Solomon’
OL PLAUA i save kamap nating long bus olsem yu lukim long dispela pes, ol i save stap long arere bilong ol rot long sauten Afrika. Ol man i save kolim dispela plaua olsem kosmos na em i bilong ol ples hat bilong Amerika. Ol naispela plaua olsem inap kirapim yumi long tingim wanpela tok Jisas i bin mekim bilong skulim ol man. Planti bilong ol man i bin harim tok bilong em, ol i stap rabis na ol i save tingting planti long ol samting bilong skin ol i mas kisim, olsem kaikai na klos bilong ol.
Jisas i askim ol, “bilong wanem yupela i save tingting planti long ol klos samting? Yupela i mas lukim gut ol plaua i stap nabaut, ol i kamap olsem wanem. Ol i no save hatwok. Ol i no save wokim laplap. Tasol mi tokim yupela, bipo King Solomon i save putim olgeta gutpela bilas bilong en, tasol gutpela bilas bilong ol dispela plaua i winim tru bilas bilong Solomon.”—Matyu 6:28, 29.
Ol man i bin kamapim kain kain tok long wanem kain plaua stret Jisas i bin stori long en. Tasol Jisas i tok em i olsem gras samting i save kamap nating, em i tok: “Nau ol dispela gras samting i stap nabaut, na tumora tasol ol man bai i katim na tromoi i go long paia. Na kain gras nating olsem, em God i save bilasim. Olsem na yupela ol manmeri i gat liklik bilip tasol, yupela i ken save tru olsem, God bai i givim bilas long yupela tu.”—Matyu 6:30.
Tru, ol kosmos i no stap long kantri Israel, tasol ol i sapotim tok Jisas i skulim ol man long en. Maski man i sanap longwe o i sanap klostu bilong lukim dispela plaua, em i luk naispela tru na em i samting ol man bilong kisim poto na ol man bilong penim piksa i save laikim. Jisas i tok tru taim em i tok “gutpela bilas bilong ol dispela plaua i winim tru bilas bilong Solomon.”
Dispela i skulim yumi long wanem samting long nau? Ol lain husat i mekim wok bilong God i ken save tru olsem God bai helpim ol long kisim ol samting ol i mas kisim long taim nogut tu. Jisas i tok: “Mobeta yupela i tingting long larim God i stap king bilong yupela. Na bai em i givim ol dispela samting [olsem kaikai na klos] tu long yupela.” (Luk 12:31) Yes, yumi kisim ol gutpela samting taim yumi painim Kingdom bilong God. Tasol yu save Kingdom bilong God em i wanem samting na em bai mekim wanem long ol manmeri? Ol Witnes Bilong Jehova bai amamas long helpim yu long painim ol bekim i stap long Baibel.