LESEN 37
Tok Baibel i Mekim Long Wok na Mani
Sampela taim yu bin tingting planti long wok o mani? Em i no isi long mekim ol samting bilong lukautim yumi yet, na tu, mekim wok bilong Jehova long bel olgeta. Baibel i kamapim ol gutpela edvais bilong helpim yumi.
1. Baibel i tok wanem long wok?
God i laik bai yumi kisim amamas long ol wok yumi mekim. Baibel i tok “i no gat wanpela gutpela samting em man inap mekim, mobeta em i . . . kisim amamas long hatwok bilong em.” (Eklisiastis 2:24) Jehova em man bilong wok. Taim yumi bihainim pasin bilong em na givim bel long wok, yumi bai amamasim em na yumi yet tu bai amamas.
Wok em i bikpela samting. Tasol yumi no ken larim wok i kamap nambawan samting moa winim pasin bilong lotuim Jehova. (Jon 6:27) Em i tok promis olsem sapos yumi putim wok bilong lotuim em i stap namba wan samting long laip bilong yumi, em bai lukautim yumi long ol samting yumi nidim.
2. Yumi mas i gat wanem tingting long mani?
Tru, Baibel i tok olsem “mani i save lukautim man,” tasol em i givim tok lukaut tu olsem mani tasol i no inap mekim yumi i stap amamas. (Eklisiastis 7:12) Olsem na Baibel i kirapim yumi long no ken laikim tumas mani, tasol yumi mas ‘ting olsem ol samting yumi gat pinis em inap long yumi.’ (Ritim Hibru 13:5.) Taim yumi gat dispela tingting, yumi no inap bel hevi olsem yumi no gat planti samting. Yumi bai no gat dinau. (Provep 22:7) Na yumi bai abrusim pasin bilong pilai laki o insait long sampela wok bilong kisim kwik bikpela mani.
3. Olsem wanem yumi ken yusim mani long helpim ol narapela?
Jehova em God bilong givim ol samting, na yumi laik bihainim pasin bilong em long “amamas long givim ol samting, na redi long serim ol samting.” (1 Timoti 6:18) Yumi ken yusim mani bilong sapotim kongrigesen na helpim ol narapela i sot long ol samting, moa yet ol wanbilip bilong yumi. Astingting na yumi givim ol samting long narapela, dispela i bikpela samting long Jehova, i no hamas yumi givim. Taim bel i kirapim yumi long givim ol samting long ol narapela, yumi bai amamas na yumi bai mekim Jehova tu i amamas.—Ritim Aposel 20:35.
KISIM SAMPELA SAVE MOA
Luksave long ol gutpela samting i save kamap long pasin bilong holim stretpela tingting long wok na ol samting yumi gat pinis.
4. Givim ona long Jehova long rot bilong ol wok yu mekim
Pasin pren bilong yumi wantaim Jehova i mas stiaim tingting yumi gat long wok. Pilaim VIDIO, na stori long ol dispela askim.
Taim yu lukim vidio, yu laikim wanem samting long tingting na pasin bilong Jason long ples wok?
Em i mekim wanem samting na em i no larim wok i stap namba wan?
Ritim Kolosi 3:23, 24, na stori long dispela askim:
Wai na tingting yumi gat long wok i bikpela samting?
Wok em i bikpela samting. Tasol yumi no ken larim wok i kamap nambawan samting moa winim lotu bilong yumi long Jehova
5. Taim yumi tingim olsem ol samting yumi gat pinis em inap, dispela bai helpim yumi
Planti manmeri i laik bungim planti mani moa. Tasol Baibel i no tokim yumi long mekim olsem. Ritim 1 Timoti 6:6-8, na stori long dispela askim:
Baibel i tokim yumi long mekim wanem?
Maski yumi gat liklik samting tasol, yumi inap stap amamas. Pilaim VIDIO, na stori long dispela askim.
Maski ol dispela famili i no gat planti mani, wanem samting i mekim ol i amamas?
Olsem wanem sapos yumi gat planti samting, tasol yumi laikim yet planti samting moa? Jisas i mekim tok piksa i soim olsem dispela inap nogutim yumi. Ritim Luk 12:15-21, na stori long dispela askim:
Yu kisim wanem skul long tok piksa bilong Jisas? —Lukim ves 15.
Ritim na skelim Provep 10:22 na 1 Timoti 6:10. Na stori long ol dispela askim:
Yu ting wanem samting i bikpela samting moa? Stap pren bilong Jehova o gat planti mani? Bilong wanem?
Wanem ol hevi inap kamap long pasin bilong laikim tumas planti mani?
6. Jehova bai lukautim yumi long ol samting yumi nidim
Taim yumi gat hevi long wok o yumi no gat inap mani, dispela inap traim bilip bilong yumi long Jehova. Pilaim VIDIO bilong lukim olsem wanem yumi ken karim kain hevi we i traim bilip bilong yumi, na stori long ol dispela askim.
Long vidio, brata i bungim wanem ol hevi?
Em i mekim wanem bilong karim ol dispela hevi?
Ritim Matyu 6:25-34, na stori long dispela askim:
Jehova i tok promis long mekim wanem long ol man i putim em i stap namba wan long laip bilong ol?
SAMPELA MAN I TOK: “Mi mas wok strong long sapotim famili bilong mi. Mi no inap go long ol miting bilong kongrigesen long olgeta wik.”
Wanem skripsa i helpim yu long bilip tru olsem pasin bilong putim lotu bilong Jehova i stap namba wan dispela em gutpela disisen?
OL BIKPELA POIN
Yumi mas i gat mani na wok, tasol ol i no ken pasim yumi long lotuim Jehova.
Riviu
Wanem samting inap helpim yu long holim stretpela tingting long wok?
Olsem wanem pasin bilong ting olsem ol samting yu gat pinis em inap, dispela bai helpim yu?
Olsem wanem yu ken soim olsem yu trastim tok promis bilong Jehova long lukautim lain bilong em?
MEKIM WOK PAINIMAUT
Skelim sapos Baibel i tok mani em i samting nogut o nogat.
“Yu Ting Mani Em i As Bilong Olgeta Pasin Nogut?” (Atikol long websait)
Kisim save long wanem kain pasin bilong givim em God i amamas long en.
“Baibel i Tok Wanem Long Pasin Bilong Givim?” (Atikol long websait)
Yu ting pasin bilong pilai laki em i no inap nogutim yu?
Ritim stori long wanem samting i kirapim wanpela man i save pilai laki na mekim raskol pasin long senisim pasin bilong em.