Askim

Olsem wanem? Tok bilong Matyu 11:11 i makim olsem taim Jon Bilong Baptais i no i dai yet, Jisas i save Jon bai dai paslain long em?

Em i stret. Jisas i save, Jon bai i dai pastaim na bai em i no inap kamap wanpela Kristen God i makim bilong kisim laip long heven. Jisas i tok: “Mi tok tru long yupela, Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.”​—⁠Matyu 11:⁠11.

Taim ensel Gebriel i tokaut long Jon bai kamap, em i tok profet olsem Jon bai “kisim pasin na strong bilong Elaija na . . . redim ol man na ol i stap redi long Bikpela i kam.” Jon em i man bilong i go pas​—⁠em bai redim ol man na bai ol i stap redi long Mesaia, em dispela man God i tok long salim em i kam. Long dispela tokaut i kam long God, i no gat liklik hap tok i makim olsem Jon yet bai kamap wanpela disaipel bilong dispela man. Nogat. Na long tok profet bilong papa bilong Jon tu, em Sekaraia, i no gat kain tok olsem.​—⁠Luk 1:​17, 67-69.

Olsem na taim Jon i baptaisim pinis Jisas, bihain long dispela Jon i wok yet long autim tok na givim baptais long ol man; em i no lusim wok bilong em long redim ol man. God i givim save long Jon na em i save, Jisas bai baptaisim ol man long spirit holi, tasol Jon i no tok, em yet bai kisim spirit holi na kamap wanpela Kristen God i makim bilong kisim laip long heven. (Matyu 3:11) Na Jon i save, lain bilong em i mas wok long i go liklik, na lain bilong Jisas i mas go bikpela.​—⁠Jon 3:​22-30.

Taim Jisas i mekim dispela tok long Matyu 11:​11, Jon i stap pinis long kalabus. Taim Jon i no i dai yet, Jisas i tokaut olsem dispela profet i gutpela man, tasol man i stap liklik tru long lain bilong kamap king na pris long heven long bihain, em i winim Jon. Na i olsem Jisas i save, i no longtaim na bai Jon i dai, na bai em i no i stap long taim “nupela rot” i op, em rot bilong kisim laip long heven. (Hibru 10:​19, 20) Jon i no inap i stap inap long de Pentikos long yia 33 taim God i kirap long kapsaitim spirit holi long ol disaipel bilong Jisas na makim ol bilong kisim laip long heven. Olsem na tok bilong Jisas long Matyu 11:11 i makim tu olsem em i save Jon i no ken i go long heven.