Olsem Wanem Ol Lotu Giaman i Bagarapim Nem Bilong God?

God i gat pasin laikim, so wai na ol lotu ol i tok ol i mekim ol samting long nem bilong em, ol i mekim planti pasin nogut? As na i olsem em ol i lotu giaman; ol i bagarapim nem bilong God. Hau ol i mekim olsem? God i pilim olsem wanem long dispela? Na em bai mekim wanem?

1. Olsem wanem ol tok ol lotu giaman i skulim ol man long en i bagarapim nem bilong God?

Ol lotu giaman i bilip long ol tok giaman na skulim ol man long ol tok giaman na i no tok i tru bilong God. (Rom 1:25) Olsem, planti lotu i no skulim ol man long nem bilong God. Tasol Baibel i tok ol man i mas yusim nem bilong God. (Rom 10:13, 14) Sampela bikman bilong lotu i tok, taim hevi i painim wanpela, dispela em laik bilong God. Tasol dispela em tok giaman. God i no as bilong pasin nogut. (Ritim Jems 1:13.) Sori tru, ol tok giaman bilong ol lotu i mekim na ol manmeri i no laikim God.

2. Olsem wanem ol pasin ol lotu giaman i mekim i bagarapim nem bilong God?

Lotu i no save mekim gutpela pasin long ol manmeri olsem Jehova i save mekim. Baibel i tok sin bilong lotu giaman i “hip i go antap olgeta long heven.” (Revelesen 18:5) Inap planti handret yia, ol lotu i insait long wok politik, sapotim ol woa, na ol i as bilong o ol i orait long ol man i kilim i dai planti tausen manmeri. Sampela bikman bilong lotu ol i laik kamap maniman so ol i fosim ol lotu lain bilong ol long givim mani long ol. Ol dispela pasin bilong ol i kamapim klia olsem ol i no save long God na i no stret ol i stap wokman bilong em.—Ritim 1 Jon 4:8.

3. God i ting olsem wanem long ol lotu giaman?

Sapos yu no amamas long ol samting ol lotu giaman i mekim, yu ting Jehova i pilim olsem wanem? Em i laikim ol manmeri, tasol em i no amamas long ol bikman bilong lotu em ol i bagarapim nem bilong em na ol i mekim nogut long lain bilong ol. Em i tok promis olsem lotu giaman bai bagarap na “ol man bai i no inap lukim em moa.” (Revelesen 18:21) Klostu nau, God bai pinisim olgeta lotu giaman.—Revelesen 18:8.

KISIM SAMPELA SAVE MOA

4. God i no orait long olgeta lotu

Planti manmeri i bilip olsem ol lotu ol i narapela narapela rot bilong stiaim yumi i go long God. Tasol yu ting dispela i tru? Ritim Matyu 7:13, 14, na stori long dispela askim:

• Baibel i stori olsem wanem long rot i go long laip?

Pilaim VIDIO, na stori long dispela askim.

VIDIO: Yu Ting God i Orait Long Olgeta Kain Lotu?—Hap Bilong En (3:22)

• Yu ting Baibel i tok God i orait long planti lotu?

5. Ol lotu giaman i no kamapim pasin laikim bilong God

Ol lotu giaman i mekim planti samting i bagarapim nem bilong God. Wanpela samting nogut ol i mekim em ol i insait long woa. Bilong lukim wanpela eksampel, pilaim VIDIO. Na stori long ol dispela askim.

VIDIO: Samting Lotu i Mekim Long Taim Bilong Wol Woa 2 (2:22)

• Ol lotu i mekim wanem long taim bilong Wol Woa 2?

• Yu pilim olsem wanem long samting ol i mekim?

Ritim Jon 13:34, 35 na 17:16. Na stori long ol dispela askim:

• Yu ting Jehova i pilim olsem wanem taim ol lotu i insait long woa?

• Ol lotu giaman i gat asua long planti samting nogut i kamap. Long wanem ol rot yu lukim ol lotu giaman i no kamapim pasin laikim bilong God?

6. God i laik helpim ol manmeri long lusim lotu giaman

Ritim Revelesen 18:4,a na stori long dispela askim:

• Taim yu kisim save olsem God i laik helpim ol man em lotu giaman i giamanim ol, yu pilim olsem wanem long dispela?

7. Wok yet long kisim save long God tru

Olsem wanem? Bai yu larim ol samting lotu giaman i mekim i stiaim tingting yu gat long God? Tingim wanpela pikinini man i sakim tok bilong papa bilong em. Na em i lusim haus na i go na em i mekim ol pasin nogut. Papa i no orait long pasin bilong pikinini bilong em. Wai na i no stret long sutim tok long papa long pasin bikhet pikinini bilong em i bihainim?

• Yu ting i stret long sutim tok long Jehova na stop long kisim save long em bikos long pasin lotu giaman i mekim?

OL BIKPELA POIN

Ol lotu giaman i bagarapim nem bilong God long ol tok giaman ol i skulim ol man long en na ol pasin nogut bilong ol. God bai bagarapim ol lotu giaman.

Riviu

• Yu pilim olsem wanem long ol tok ol lotu giaman i skulim ol man long en na pasin ol i bihainim?

• Jehova i ting olsem wanem long ol lotu giaman?

• God bai mekim wanem long lotu giaman?

MEKIM WOK PAINIMAUT

Kisim save long tupela samting planti lotu i mekim we God i no amamas long en.

“Olgeta Lotu i Wankain? Olgeta i Stiaim Ol Man i Go Long God?” (Atikol long websait)

Wai na Jehova i laik yumi bung wantaim ol arapela na lotuim em?

“Yu Ting i Stret Long Bung Wantaim Wanpela Lotu?” (Atikol long websait)

Wanpela pris i kisim tupela tingting long lotu bilong em. Tasol dispela i no pasim em long kisim stretpela save long God.

“Wanpela Pris i Lusim Lotu Bilong Em” (Kirap!, Februeri 2015)

Inap planti handret yia, ol lotu giaman i skulim ol man long ol tok giaman long God na dispela i mekim na ol man i bilip olsem em i no save tingim yumi na yumi no inap go klostu long em. Kisim stretpela save long 3-pela bilong ol dispela tok giaman.

“Ol Tok Giaman Olsem God i No Gat Pasin Laikim” (Wastaua, Novemba 1, 2013)