Sapta 3

Lotu Bilong Yu Em i Bikpela Samting

 1. Sampela manmeri i ting olsem wanem long lotu?

PLANTI man i save tok, ‘olgeta lotu i gutpela.’ Sapos God i orait long olgeta kain lotu, lotu bilong yumi i no bikpela samting. Tasol yu ting God i orait long olgeta kain kain lotu?

 2. (a) Ol Farisi i mekim wanem long Jisas? (b) Ol Farisi i tok husat em i papa bilong ol?

² Taim Jisas i stap long graun i gat wanpela lain bilong lotu ol i kolim Farisi. Ol Farisi i gat lotu bilong ol na ol i ting God i orait long en. Tasol ol dispela Farisi i painim rot bilong kilim i dai Jisas! Olsem na Jisas i tokim ol: “Yupela i mekim pasin bilong papa bilong yupela tasol.” Na ol i tok: “Mipela i gat wanpela Papa tasol. Em God.”—Jon 8:41.

 3. Tasol Jisas i tok wanem long papa bilong ol Farisi?

³ Tasol yu ting God em i papa bilong ol? Yu ting God i orait long lotu bilong ol? Nogat tru! Ol Farisi i gat Baibel na ol i ting ol i bihainim tok bilong en. Tasol Seten i giamanim ol. Olsem na Jisas i tok: “Yupela i pikinini bilong papa bilong yupela, Seten. Na yupela i strong long bihainim laik bilong bel bilong papa bilong yupela. Bipo yet em i man bilong kilim man i dai. Na em i . . . man bilong tok giaman.”—Jon 8:44.

 4. Jisas i ting olsem wanem long lotu bilong ol Farisi?

⁴ Lotu bilong ol Farisi i giaman. Em i bilong Seten, em i no bilong God. Olsem na Jisas i no orait long lotu bilong ol. Em i tokim ol: “Yupela i save pasim dua bilong kingdom bilong heven long pes bilong ol manmeri. Yupela yet i no save go insait. Na ol manmeri i laik i go insait, em yupela i pasim rot bilong ol.” (Matyu 23:13) Ol Farisi i bihainim lotu giaman, olsem na Jisas i tok ol i man bilong tupela maus na ol i olsem snek nogut. Ol i bihainim rot nogut na Jisas i tok bai ol i lus.—Matyu 23:25-33.

 5. Jisas i tok wanem na yumi ken save, ol kain kain lotu i no narapela narapela rot bilong bringim man i go long laip?

⁵ Olsem na Jisas i no tok olgeta lotu i gutpela na olgeta inap bringim yumi i go long laip. Nogat. Jisas i tok: “Yupela mas i go insait long liklik dua. Rot i go long ples bilong lus, em i bikpela na i op tumas. Na planti manmeri i save bihainim dispela rot. Tasol dua i go long laip, em i liklik, na rot i go long laip, em i gat hatwok. Na wanpela wanpela manmeri tasol i save painim dispela.” (Matyu 7:13, 14) Planti manmeri ol i no lotuim God long pasin i stret, olsem na ol i stap long rot bilong lus. Wanpela wanpela manmeri tasol i stap long rot i go long laip.

 6. Sapos yumi skelim lotu bilong ol Isrel yumi save long wanem samting?

⁶ Sapos yumi skelim ol samting God i mekim long lain Isrel bai yumi save, yumi mas lotu long God long pasin em i laikim. God i tok strong long ol Isrel i no ken insait liklik long lotu giaman bilong ol narapela lain. (Diuteronomi 7:25) Em ol i save kilim i dai pikinini bilong ol olsem ofa bilong god bilong ol. Na ol i save mekim kain kain pasin i gat sem, olsem pasin bilong Sodom samting. (Levitikas 18:20-30) God i tambuim ol Isrel long mekim ol dispela kain pasin. Taim ol i sakim tok na lotuim ol narapela god, em i givim strafe long ol. (Josua 24:20; Aisaia 63:10) Olsem na lotu bilong ol em i bikpela samting.

I GAT LOTU GIAMAN I STAP LONG NAU?

 7, 8. (a) Long taim bilong Namba Wan na Namba Tu Pait Bilong olgeta Hap, ol misin i mekim wanem? (b) Yu ting God i ting olsem wanem long dispela samting ol misin i bin mekim long taim bilong pait?

⁷ Olsem wanem long ol planti kain kain lotu i stap long nau? Ating yu tu yu lukim planti samting ol lotu i mekim i no stret long ai bilong God. I gat tupela bikpela pait i bin kamap long graun, na long taim bilong pait ol lotu i kirapim lain bilong ol long insait long pait na kilim i dai man. Wanpela bisop long Englan i tok: “Kilim i dai ol Jeman—yupela mas kilim ol i dai.” Na long ples bilong ol Jeman, bikpela bisop bilong Kolon i tok: ‘Long nem bilong God yupela i mas pait na redi long i dai tu bilong helpim ples bilong yumi.’

⁸ Olsem na Katolik i kilim i dai Katolik long pait na ol pris bilong ol i orait long en, na ol Talatala tu i mekim olsem. Wanpela pasto (Harry Emerson Fosdick) em i tok: “Long ol haus lotu tu yumi bin putim ol plak bilong pait . . . Long hap maus yumi litimapim nem bilong King Bilong Gutaim na long hap maus yumi mekim ol tok bilong helpim pait.” Sapos wanpela misin i tok ol i mekim wok bilong God, tasol ol i helpim pait, God i no ken amamas long dispela misin, a?

 9. (a) Ol manmeri bilong ol narapela narapela lotu ol i bin mekim kain kain pasin nogut na dispela samting i kirapim planti manmeri long ting olsem wanem? (b) Sapos wanpela lotu i insait long pasin bilong dispela graun, orait, yumi mas ting olsem wanem long en?

⁹ Ol manmeri bilong kain kain lotu ol i bin mekim planti pasin nogut long nem bilong God. Olsem na long nau planti manmeri i givim baksait long God na Krais. Ol i lukim ol misin i pait na ol i ting God i gat asua. Ol Katolik i bin pait wantaim ol Moslem, na long nau ol Moslem i pait wantaim ol Hindu, na ol Katolik i pait wantaim ol Talatala. Long nem bilong Krais ol i bin kilim i dai planti Juda. Na bipo misin Katolik i bin mekim nogut tru long ol man i no laik bihainim lotu bilong ol. Ol dispela man i tok God em i Papa bilong ol. Tasol Seten em i papa bilong ol, a? Ol i mekim pasin wankain olsem bilong ol Farisi, em Jisas i tok Seten em i papa bilong ol. Seten em i god bilong dispela graun. Em i bosim ol manmeri na ol lotu bilong ol tu.—2 Korin 4:4; Revelesen 12:9.

10. Wanem sampela samting ol misin i mekim na yu ting i no stret?

¹⁰ Planti samting ol misin i mekim ating yu pilim em i no stret. Planti taim yumi harim tok long ol man bilong lotu ol i pamuk samting na misin i no gat tok long ol. O ating yu save long sampela pris o pasto i mekim pasin i no stret, tasol ol i holim yet wok misin. Sampela bikpela man bilong misin i tok, i no gat rong long man i pilai nogut long narapela man, o ol meri i mekim dispela pasin i gat sem. Na ol i tok i no gat rong long ol singel i slip wantaim. Tasol ating yu save, Baibel i tambuim ol dispela pasin sem na pasin pamuk. God i tokim ol Isrel ol i mas kilim i dai ol manmeri i mekim kain pasin olsem. Na long dispela as tasol God i bagarapim ol Sodom na Gomora. (Jut 7) Liklik taim bai em i mekim olsem long olgeta lotu giaman bilong nau. Baibel i tok, olgeta lotu giaman i olsem wanpela pamukmeri, ol i pren wantaim “ol king bilong graun.”—Revelesen 17:1, 2, 16.

LOTU GOD I SAVE LAIKIM

11. Yumi mas mekim wanem na bai God i orait long lotu bilong yumi?

¹¹ God i no laikim olgeta lotu, olsem na yumi mas askim skin bilong yumi yet, olsem: ‘Mi save lotu long God long pasin em i laikim?’ Olsem wanem yumi ken save long pasin God i laikim? Ol man i no ken makim. God yet i mas makim. Yumi mas bihainim ol tok i tru bilong God long Baibel na bai yumi lotu long God long pasin God i laikim. Yumi mas i gat tingting olsem: “Olgeta man i save giaman, tasol God wanpela i save tok tru oltaim.”—Rom 3:3, 4.

12. Bilong wanem Jisas i tok God i no orait long lotu bilong ol Farisi?

¹² Ol Farisi i no gat tingting olsem. Ol i putim lo bilong ol yet na ol i no bihainim Tok Bilong God. Jisas i tok: “Yupela i save daunim tok bilong God na litimapim pasin bilong yupela yet. Yupela man bilong giaman! Profet Aisaia em i bin makim yupela gutpela tumas taim em i tok, ‘Dispela lain manmeri ol i save litimapim nem bilong mi long maus bilong ol, tasol bel bilong ol i stap longwe tumas long mi. Ol i save autim io bilong ol man tasol na i tok, “Dispela em i tok bilong God.” olsem na ol i lotu nating long mi.’ ” (Matyu 15:1-9; Aisaia 29:13) Olgeta tok yumi bilip long en i mas stret wantaim Baibel, na bai God i laikim lotu bilong yumi.

13. Yumi mas mekim wanem na bai God i orait long yumi, olsem Jisas i tok?

¹³ Yumi no ken tok tasol yumi bilip long Krais na mekim pasin yumi ting em i stret. Nogat. Yumi mas bihainim laik bilong God. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ bai ol i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”—Matyu 7:21.

14. Maski yumi ting yumi mekim “gutpela wok,” tasol ating bilong wanem bai Jisas i tok yumi “man bilong mekim rong”?

¹⁴ Sapos yumi mekim ol wok yumi ting em i gutpela na yumi mekim long nem bilong Krais, tasol yumi no bihainim laik bilong God, ol dispela wok yumi mekim bilong lotu long God bai lus nating tasol. Bai yumi wankain olsem ol man em Krais i tokim ol: “Long dispela bikpela de bai planti manmeri i tokim mi, ‘Bikpela, Bikpela, . . . Long nem bilong yu mipela i bin wokim planti mirakel!’ Na long dispela taim bambai mi tokaut long ol olsem: ‘Mi no save liklik long yupela. Yupela man bilong mekim rong, yupela klia long mi!’ ” (Matyu 7:22, 23) Yumi inap mekim planti samting yumi ting em i gutpela—na ating bai ol man i tenkyu long yumi o litimapim nem bilong yumi—tasol sapos yumi no bihainim tok bilong God, bai Jisas i tingim yumi i olsem “man bilong mekim rong.”

15. Bilong wanem i gutpela sapos yumi bihainim pasin bilong ol Beria bilong bipo?

¹⁵ Planti misin long nau ol i no bihainim laik bilong God, olsem na yumi no ken bilip nating na ting ol tok bilong misin bilong yumi i stret wantaim Baibel. Na Sapos ol i kaunim sampela tok bilong Baibel long haus lotu, dispela samting tu i no makim olgeta tok na pasin bilong ol i stret wantaim Baibel. Nogat. Yumi yet yumi mas skelim, i stret wantaim Baibel o nogat. Yumi mas mekim pasin olsem ol Beria long bipo, em ol i skelim tok bilong Pol wantaim tok bilong Baibel bambai ol inap save, dispela tok i stret o nogat. (Aposel 17:10, 11) Lotu God i laikim em i mas stret olgeta wantaim Baibel. Ol manmeri i bihainim dispela lotu ol i no bilipim sampela tok tasol bilong Baibel na sampela, nogat. Ol i bilipim olgeta tok bilong Baibel.—2 Timoti 3:16.

GIVIM BEL TRU—DISPELA SAMTING TASOL I NO INAP

16. Jisas i tok wanem na yumi ken save, maski man i givim bel tru long lotuim God, tasol dispela samting tasol em i no inap?

¹⁶ Tasol sapos man i givim bel tru long lotu, maski dispela lotu i no stret, yu ting bai God i orait long em? Sampela man i ting ol i mekim wok bilong God, tasol Jisas i tok ol i “man bilong mekim rong.” (Matyu 7:22, 23) God tu em i no ken orait long kain man olsem. Jisas i tok: “Bihain bai taim i kamap na ol man i kilim yupela i dai, bai ol i ting ol i mekim gutpela wok bilong God.” (Jon 16:2) Ol man i kilim i dai ol Kristen, ating ol i givim bel tru na ol i ting ol i mekim gutpela wok bilong God, tasol nogat, a? God i no ken orait long dispela samting ol i mekim.

17. Taim Pol i no kamap Kristen yet, em i givim bel tru long lotu, tasol em i mekim wanem?

¹⁷ Taim Pol i no kamap Kristen yet, em i helpim ol man long kilim i dai Stiven. Bihain em i wok long painim rot bilong kilim i dai planti Kristen moa. (Aposel 8:1; 9:1, 2) Em i tok: “Mi man bilong kilim tru sios bilong God, na mi wok long bagarapim em olgeta. . . . Mi strong tumas long bihainim olgeta pasin bilong ol tumbuna bilong mi.” (Galesia 1:13, 14) Pol i givim bel tru long bihainim lotu bilong em, tasol dispela samting i no makim lotu bilong em i stret.

18. (a) Taim Pol i mekim nogut long ol Kristen em i bilong wanem lotu? (b) Bilong wanem Pol na ol narapela tu long taim bilong em ol i mas senisim lotu bilong ol?

¹⁸ Pol em i bilong lotu Juda. Dispela lotu i sakim Krais Jisas na God i sakim dispela lotu. (Aposel 2:36, 40; Provep 14:12) Olsem na Pol i mas senisim lotu bilong em bambai God i ken orait long em. Pol i stori long sampela manmeri ol i “strong tumas” long lotu long God, tasol ol i no gat stretpela save na ol i mekim. Olsem na God i no ken orait long ol.—Rom 10:2, 3.

19. Sapos i gat narapela narapela tok, olsem wanem na i no inap tupela wantaim i stret?

¹⁹ Tok bilong ol misin i narapela narapela kain, tasol tok i tru i no narapela narapela kain. Nogat. Olsem: Sampela misin i tok yumi gat tewel na taim yumi dai, skin tasol i dai na tewel i stap laip yet. Orait, yumi gat tewel o yumi no gat tewel? Na graun bai stap oltaim o nogat? Na God bai pinisim pasin nogut o nogat? Wanem tok i stret? I no inap tupela tok wantaim i stret. Olsem na taim tupela tok i pait, wanpela tok tasol i stret na wanpela nogat. Sapos wanpela tok i no stret, maski yu bilip tru long en na yu givim bel long bihainim, tasol dispela samting i no inap mekim dispela tok i stret. Nogat.

20. Wanem samting i olsem “mep” bilong soim rot long yumi na bai yumi lotu long God long pasin i stret?

²⁰ Sapos yu save wanpela tok yu bilip long en em i no stret, yu mas mekim wanem? Yumi ken tok piksa olsem: Yu laik i go long wanpela hap yu no bin i go long en bipo. Yu gat mep, tasol yu no lukim gut pastaim. Yu bihainim tok bilong wanpela man em i bin tokim yu wanem rot yu mas bihainim. Yu ting dispela rot man i makim em i stret. Tasol sapos dispela rot i no stret. Na sapos wanpela man i tokim yu olsem, na em i makim mep bilong yu na yu lukim mep na nau yu save, dispela rot i no stret. Orait, bai yu mekim wanem? Bai yu bikhet na bihainim yet dispela rot? Olsem tasol, sapos yu lukim Baibel bilong yu na yu save dispela lotu yu bihainim em i no stret, orait yu mas lusim dispela rot. Yu mas klia long bikpela rot i go long ples bilong lus, na bihainim liklik rot i go long laip!

BIHAINIM LAIK BILONG GOD—EM BIKPELA SAMTING

21. (a) Yumi mas kisim save long tok i tru na mekim wanem samting moa? (b) Sapos yu save God i no orait long sampela samting yu mekim, bai yu mekim wanem?

²¹ Yu mas save long ol tok i tru bilong Baibel. Tasol sapos yu no lotuim God long pasin em i laikim, bai dispela save i no inap helpim yu. (Jon 4:24) Yu mas bihainim tok i tru, yu mas mekim laik bilong God, em bikpela samting. Baibel i tok: “Man i bilip nating na i no kamapim gutpela pasin tu, bilip bilong dispela man em i olsem i dai pinis.” (Jems 2:26) Lotu bilong yu i mas stret wantaim Baibel na em i mas bosim olgeta samting yu mekim, na bai God i amamas long lotu bilong yu. Olsem na sapos yu save yu mekim sampela samting God i tok i no stret, orait, yu mas lusim, a?

22. Sapos yumi lotu long God long pasin i stret, dispela samting bai helpim yumi olsem wanem long nau na long bihain?

²² Sapos yu bihainim laik bilong God, bai planti gutpela samting i painim yu. Dispela samting bai helpim yu long nau. Sapos yu bihainim lotu i stret bai yu kamap gutpela man o gutpela meri, gutpela papa o gutpela mama, gutpela pikinini. Bai yu bihainim ol pasin bilong God na bai ol man i lukim yu yu narapela kain, long wanem yu bihainim pasin i stret. Na bihain bai yu inap i stap oltaim na i stap amamas na i stap gutpela olgeta long gutpela ples paradais God bai kamapim long graun. (2 Pita 3:13) Tru tumas, lotu bilong yu em i bikpela samting!

[Piksa long pes 25]

Ol bikpela bos bilong lotu i laik kilim i dai Jisas, yu ting ol i mekim wok bilong God?

[Ol Piksa long pes 26, 27]

Jisas i tok planti manmeri ol i stap long rot bilong lus. Wanpela wanpela manmeri tasol i stap long rot i go long laip

[Piksa long pes 28, 29]

“Long maus ol i save tok olsem: ‘Mi save long God.’ Tasol long wokabaut bilong ol ol i save givim baksait long God.”—Taitas 1:16.

Long Maus

Long Wokabaut

[Piksa long pes 30]

Pol i gat narapela lotu, olsem na em i helpim wok bilong kilim i dai Stiven, em wanpela disaipel bilong krais

[Piksa long pes 33]

Sapos yu bihainim rot i no stret, bai yu bikhet na yu no laik lusim dispela rot?