Krais—Em i Kamapim Ples Klia Strong Bilong God

 1. Bilong wanem Pol inap tok olsem “Krais i kamapim ples klia strong . . . bilong God”?

JEHOVA i yusim Jisas Krais long mekim ol bikpela wok we i kamapim klia bikpela strong bilong God. Fopela Gutnius Bilong Baibel i stori gut long sampela mirakel em Krais i bin wokim, na dispela inap strongim tru bilip bilong yumi. Em i mekim planti narapela mirakel tu. (Mat. 9:35; Luk 9:11) Jisas i kamapim klia strong bilong God. Olsem na i gat gutpela risen na aposel Pol i tok: “Krais i kamapim ples klia strong . . . bilong God.” (1 Kor. 1:24) Olsem wanem ol mirakel bilong Jisas inap stiaim yumi?

 2. Yumi inap kisim wanem skul long ol mirakel bilong Jisas?

² Aposel Pita i tok Jisas i wokim “ol narakain samting,” em ol mirakel. (Apo. 2:22) Taim Jisas i stap long graun, em i bin mekim ol wok i soim klia olsem em i gat bikpela strong. Ol dispela wok i olsem piksa bilong ol blesing em Jisas bai kamapim taim em i mekim wok king, na tu, ol i olsem piksa bilong ol mirakel em bai mekim taim God i kamapim nupela taim long graun! Ol mirakel bilong Jisas i helpim yumi long kliagut long pasin bilong em na ol pasin bilong Papa bilong em. Yumi ken skelim sampela mirakel bilong Jisas na kisim save long hau ol dispela mirakel inap helpim yumi long nau na long bihain.

 3. (a) Stori long ol samting i kamap taim Jisas i wokim namba 1 mirakel bilong em. (b) Taim Jisas i stap long ples Kana, olsem wanem em i kamapim klia pasin bilong em long givim ol samting?

³ Jisas i wokim fes mirakel bilong em taim em i stap long wanpela marit kaikai long Kana, em wanpela ples long Galili. Ating planti man tru i kam long dispela bung. Long taim bilong dispela kaikai, wain i pinis. Maria, em mama bilong Jisas, em i stap tu long dispela bung. Inap planti yia, Maria i tingim tingim olgeta tok profet i stori long pikinini bilong em, na em i save olsem ol bai kolim Jisas olsem “Pikinini bilong God Antap Tru.” (Luk 1:30-32; 2:52) Yu ting em i bilip olsem Jisas i gat strong bilong wokim mirakel? Long Kana, Maria na Jisas i sori long tupela nupela marit na ol i no laik bai dispela tupela marit i pilim sem. Jisas i save olsem em stretpela pasin long mekim gut long ol narapela. Olsem na Jisas i wokim mirakel na tanim 380 lita wara i kamap “gutpela wain.” (Ritim Jon 2:3, 6-11.) Yu ting em wok bilong Jisas long wokim mirakel? Nogat. Jisas i tingim tru ol manmeri na em i bihainim pasin bilong Papa long heven na givim ol samting long ol narapela.

4, 5. (a) Yumi kisim wanem skul long namba 1 mirakel bilong Jisas? (b) Olsem mirakel bilong Jisas long ples Kana i soim, wanem ol samting bai kamap long bihain?

⁴ Jisas i wokim mirakel na kamapim planti gutpela wain inap stret long bikpela lain i stap long dispela bung. Dispela mirakel inap lainim yumi long wanem samting? Sapos Jisas i amamas long wokim dispela kain mirakel, dispela i soim olsem em na Papa bilong em i pilim tru tingting bilong yumi. Jisas na Papa bilong em i no save bel nogut taim ol i givim samting long narapela. Tingim hau Jehova bai yusim strong bilong em long givim ol gutpela samting long “ol manmeri bilong olgeta kantri” long nupela taim.—Ritim Aisaia 25:6.

⁵ Tingim dispela! Taim bai kamap na God bai inapim laik bilong yumi olgeta wan wan na yumi bai i gat gutpela kaikai na gutpela haus. Yumi mas amamas moa yet na lukluk i go long planti blesing Jehova bai givim long yumi taim Paradais i kamap long graun.

 6. (a) Jisas i bin wokim ol mirakel bilong helpim husat? (b) Olsem wanem yumi inap bihainim pasin bilong Jisas?

⁶ Taim Satan i laik traim Jisas long tanim ston i kamap bret, Jisas i no yusim strong bilong em long wokim mirakel bilong inapim laik bilong em yet. (Mat. 4:2-4) Tasol Jisas i yusim strong bilong em long wokim ol mirakel bilong helpim na inapim laik bilong ol narapela. Olsem wanem yumi inap bihainim pasin bilong Jisas long daunim laik bilong yumi yet na tingim ol narapela? Jisas i kirapim ol wokman bilong God long “bihainim pasin bilong givim ol samting.” (Luk 6:38) Yumi inap soim pasin bilong tingim tru ol narapela taim yumi singautim ol i kam kaikai wantaim yumi long haus na yumi ken strongim ol long sait bilong bilip. Bihain long miting, yumi ken lusim sampela haptaim long helpim ol narapela. Olsem: Yumi ken putim yau long wanpela brata husat i prektisim tok bilong em. Olsem wanem yumi ken helpim ol bratasista long sait bilong wok autim tok? Taim yumi givim ol samting long ol narapela bilong helpim ol long sait bilong mani na kaikai, na long sait bilong bilip, yumi soim olsem yumi kisim skul long pasin bilong Jisas.

 7. Wanem hevi bai i stap yet long dispela haptaim bilong nau em Satan i bosim?

⁷ Pasin bilong i stap rabis i bin i stap long bipo yet. Jehova i tokim lain Israel bilong bipo olsem oltaim bai i gat sampela rabisman i stap wantaim ol. (Lo 15:11) Planti handret yia bihain, Jisas i tok: “Oltaim ol rabisman bai i stap wantaim yupela.” (Mat. 26:11) Yu ting tok bilong Jisas i makim olsem oltaim bai i gat ol rabisman i stap long graun? Nogat. Tok bilong Jisas i makim olsem oltaim bai i gat ol rabisman i stap long dispela haptaim em Satan i bosim. Olsem na yumi amamas tru long kisim save olsem ol mirakel bilong Jisas i stap olsem piksa bilong gutpela sindaun bai kamap taim Kingdom i bosim dispela graun. Long dispela taim, olgeta manmeri bai i gat planti kaikai na ol bai i stap amamas tru!

8, 9. (a) Wanem samting i kirapim Jisas long wokim mirakel na givim kaikai long planti tausen manmeri? (b) Yu pilim olsem wanem long dispela mirakel bilong Jisas long givim kaikai long planti tausen manmeri?

⁸ Man bilong raitim song i tok long Jehova olsem: “Yu save opim han bilong yu na inapim laik bilong olgeta samting i gat laip.” (Sng. 145:16, NW) Krais i bihainim pasin bilong Papa, na em “i kamapim ples klia strong . . . bilong God,” na planti taim em i save opim han bilong em na inapim laik bilong ol disaipel. Jisas i no mekim olsem bilong soim olsem em i gat bikpela strong, nogat. Em i tingim tru ol narapela na dispela i kirapim em long helpim ol. Yumi ken skelim Matyu 14:14-21. (Ritim.) Ol disaipel i kam long Jisas na tokim em long hevi bilong kaikai. Ating ol i hangre, na tu, ol i tingim bikpela lain manmeri. Ol dispela manmeri i bin lusim ol taun bilong ol na wokabaut bihainim Jisas, olsem na ating ol i hangre na pilim taiet. (Mat. 14:13) Jisas bai mekim wanem?

⁹ Jisas i yusim 5-pela bret na 2-pela pis na em i wokim mirakel na givim kaikai long 5 tausen man, wantaim ol meri na ol pikinini! Yumi pilim tru pasin bilong Jisas long sori long ol famili na ol pikinini, na em i wokim mirakel bilong helpim ol. Dispela bikpela lain manmeri “i kaikai na ol i pulap.” Dispela i makim olsem ol i kisim planti kaikai. Jisas i givim planti kaikai bambai dispela inap strongim ol manmeri taim ol i wokabaut i go bek long ples. (Luk 9:10-17) Planti kaikai i stap yet, olsem na ol i bungim ol dispela kaikai long 12-pela basket!

10. Wanem samting bai kamap long pasin bilong i stap rabis?

¹⁰ Long nau, ol man i no mekim stretpela wok bos, olsem na ol i no inapim ol manmeri long ol samting ol i nidim. Sampela brata bilong yumi i gat haus na kaikai, tasol ol i sot yet long planti samting. Klostu nau, ol stretpela manmeri bai i stap amamas long graun we i no gat moa pasin korapsen na pasin bilong i stap rabis. Sapos yu gat strong, yu ting yu bai inapim ol manmeri long ol samting ol i sot long en? God i gat bikpela strong na em i laik tru long inapim ol manmeri long ol samting ol i sot long en, na klostu nau em bai mekim olsem!—Ritim Song 72:16.

11. (a) Wanem samting i kirapim yu long bilip tru olsem Jisas bai yusim strong bilong em long helpim ol manmeri long olgeta hap bilong graun? (b) Dispela i kirapim yu long mekim wanem?

¹¹ Taim Jisas i stap long graun, em i autim tok long liklik teritori inap 3 na hap yia. (Mat. 15:24) Jisas em i King, olsem na em bai bosim olgeta hap bilong graun. (Sng. 72:8) Ol mirakel bilong Jisas i helpim yumi long bilip tru olsem klostu nau em bai yusim strong na namba bilong em long helpim yumi. Maski yumi no inap wokim ol mirakel, yumi inap stiaim tingting bilong ol man i go long Tok Bilong God. Ol tok profet bilong Baibel i strongim bilip bilong yumi olsem ol gutpela samting bai kamap long bihain. Yumi stap olsem ol Witnes Bilong Jehova na yumi gat stretpela save long ol blesing bai kamap long bihain, olsem na yumi gat wok long skulim ol narapela. (Rom 1:14, 15) Taim yumi tingim tingim ol dispela blesing, dispela bai kirapim yumi long tokim ol narapela long gutnius bilong Kingdom Bilong God.—Sng. 45:1; 49:3.

12. Olsem wanem yumi save olsem Jisas i kliagut long wok bilong olgeta samting i stap long graun?

¹² Jisas i stap olsem “saveman i bosim wok,” na em i bin i stap wantaim God taim God i wokim graun na olgeta samting i stap long en. (Snd. 8:22, 30, 31; Kol. 1:15-17) Olsem na Jisas i kliagut long wok bilong olgeta samting i stap long graun. Em i save gut long olsem wanem em bai yusim na kontrolim ol dispela samting.

13, 14. Stori long wanpela eksampel we Jisas i yusim strong bilong em long kontrolim win na ren.

¹³ Taim Jisas i stap long graun, em “i kamapim ples klia strong . . . bilong God” taim em i stopim strongpela win na ren. Tingim samting Jisas i mekim long strongpela win we i laik bagarapim ol disaipel. (Ritim Mak 4:37-39.) Wanpela saveman bilong Baibel i tok: “Tok Grik [ol i tanim olsem “traipela win” long Mak 4:37] i makim strongpela win na ren o saiklon. Dispela tok i no makim liklik win, nogat . . . em i makim strongpela win tru i kam wantaim ol blakpela klaut na traipela mama ren, na bagarapim tru ol samting.” Buk Matyu i stori olsem “bikpela win tru” i kamap long dispela taim.—Mat. 8:24.

¹⁴ Tingim samting i kamap: Krais i mekim bikpela wok bilong autim tok na em i pilim taiet. Ol bikpela weiv i kam paitim bot long sait sait na wara i go insait long bot. Win i mekim bikpela nois na sakim bot i go i kam, tasol Jisas i slip yet. Ol disaipel i pret tru na ol i kirapim Jisas na ol i tok: “Klostu bai mipela i dai!” (Mat. 8:25) Jisas i kirap na em i tok strong long win na solwara olsem: “Inap nau! No ken pairap!” na win i stop. (Mak 4:39) I olsem Jisas i tokim win na solwara long i stap isi. Wanem samting i kamap? “Win i dai na raunwara i stap isi tru.” Jisas i soim klia olsem em i gat bikpela strong!

15. Olsem wanem God i Gat Olgeta Strong i soim olsem em inap kontrolim win, ren, na solwara?

¹⁵ Jehova em God i Gat Olgeta Strong, na em i givim strong long Krais, olsem na yumi bilip tru olsem God inap kontrolim win na ren. Tingim sampela eksampel. Paslain long Bikpela Tait, Jehova i tok: “7-pela de i go pinis, orait bai mi salim ren i kam long graun long san na long nait, inap 40 de olgeta.” (Stt. 7:4) Na tu, Kisim Bek 14:21 i tok: “Bikpela i mekim strongpela win i kamap long hap sankamap . . . na win i sakim solwara i go bek.” Jona 1:4 tu i tok: “Bikpela i mekim strongpela win i kamap long solwara. Na dispela win wantaim ren i strong tumas, na sip i laik bagarap.” Yumi amamas long save olsem Jehova inap kontrolim win, ren, na solwara. Tru tumas, graun bai kamap gutpela olgeta.

16. Wai na yumi ken bilip tru olsem Krieta bilong yumi na fesbon Pikinini bilong em i gat strong long kontrolim win na ren?

¹⁶ Yumi amamas long tingim tingim bikpela strong bilong God na man i stap olsem “saveman i bosim wok.” Taim God na Jisas i kamapim ol blesing long graun insait long 1 tausen yia, olgeta manmeri bai i stap bel isi tru. Ol disasta bai pinis olgeta. Long nupela taim, yumi no inap pret moa long saiklon, sunami, volkeno, na ol bikpela guria. Yumi amamas tru long tingim taim bai kamap na ol bikpela win na ren i no inap moa long bagarapim o kilim ol man, long wanem, “haus sel bilong God [bai] i stap wantaim ol manmeri”! (Rev. 21:3, 4) Yumi ken bilip tru olsem insait long Wan Tausen Yia, Krais bai yusim strong bilong God long kontrolim win na ren.

17. Long nau, olsem wanem yumi inap bihainim pasin bilong God na Krais?

¹⁷ Yumi no inap kontrolim win na ren olsem Jehova na Jisas inap mekim, tasol yumi gat strong long mekim sampela samting. Olsem wanem yumi inap yusim strong bilong yumi? Wanpela rot em long bihainim tok i stap long Sindaun 3:27. (Ritim.) Taim ol brata bilong yumi i karim hevi, yumi inap mekim gut bel na tingting bilong ol, givim ol samting ol i nidim, olsem klos na kaikai, na strongim ol long sait bilong bilip. (Snd. 17:17) Ating yumi ken helpim na strongim ol lain em disasta i bin painim ol. Saiklon i bin bagarapim haus bilong wanpela wido, na em i tok: “Mi amamas tru long i stap insait long oganaisesen bilong Jehova na kisim helpim long sait bilong klos na kaikai, na kisim helpim tu long sait bilong bilip.” Tingim tok em wanpela singel sista i mekim taim traipela win i bagarapim tru haus bilong em. Taim em i kisim helpim, em i tok: “Mi no save mi bai tok wanem! I no gat wanpela tok inap kamapim gut bikpela tenkyu na amamas bilong mi . . . Tenkyu Jehova!” Yumi belgut olsem yumi insait long bikpela lain brata em ol i save tingim tru ol narapela long ol samting ol i sot long en. Tasol samting i mekim yumi amamas moa yet em olsem, Jehova na Jisas Krais i tingim tru ol manmeri bilong God.

18. Wanem samting i kirapim Jisas long wokim ol mirakel?

¹⁸ Taim Jisas i mekim wok autim tok, em i “kamapim ples klia strong . . . bilong God.” Tasol wanem samting i kirapim Jisas long mekim olsem? I no gat wanpela taim we Jisas i yusim strong bilong em long amamasim ol narapela o helpim em yet, nogat. Ol mirakel bilong Jisas i kamapim klia olsem em i laikim tru ol manmeri long graun. Yumi bai skelim dispela samting long neks stadi.