I Stap na Wok Bilong Jisas

Narapela Raun Bilong Autim Gutnius Long Galili

Inap olsem tupela yia Jisas i bin wok strong long autim tok, olsem na ating nau bai em i lusim wok na malolo liklik? Nogat tru. Em i autim tok i go moa yet long rot bilong narapela raun, em namba tri raun bilong em long Galili. Em i raun long ol taun na liklik ples insait long dispela hap na em i wok long lainim ol manmeri insait long haus lotu bilong ol na em i autim gutnius bilong Kingdom bilong God. Ol samting em i lukim long taim em i mekim dispela raun i kirapim tingting bilong em na em i save tru ol i mas wok strong moa long autim gutnius.

Long olgeta hap Jisas i go long en em i lusim ol bikpela lain manmeri i hangre long kaikai bilong spirit na ol i stap nogut tru. Em i sori tru long ol, ol i olsem ol sipsip i no gat wasman bilong ol. Olsem na em i tokim ol disaipel bilong em olsem: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”

Jisas i singautim ol 12-pela aposel bilong em i kam. Em i bin makim ol klostu olsem wanpela yia i go pinis. Nau em i salim ol i go tupela tupela bilong autim tok. Na em i givim toktok long ol olsem: “Yupela i no ken i go long ol man bilong ol arapela lain. Na yupela i no ken i go insait long taun bilong ol Samaria. Nogat. Yupela i mas i go long ol sipsip bilong lain Israel, ol i lus pinis. Yupela go na autim tok olsem: ‘Kingdom bilong heven em i kam klostu pinis.’’’

Dispela Kingdom em ol i mas autim tok long en long ol lain Israel em dispela Kingdom Jisas i bin lainim ol disaipel long en long Beten Bilong Bikpela. Na Kingdom i kam klostu pinis, long wanem King em God i makim, em Jisas Krais, em i stap wantaim ol. Bilong soim olsem ol disaipel ol i man bilong bringim tok bilong dispela gavman bilong heven i go long ol man, Jisas i givim strong long ol bilong mekim orait ol sikman na kirapim ol man i dai pinis. Em i tokim ol long ol i no ken kisim pe long dispela wok ol i mekim.

Bihain em i tokim ol disaipel bilong em, ol i no ken redim sampela samting bilong skin bilong karim wantaim ol long taim ol i mekim dispela raun bilong autim gutnius. Em i tok: “Yupela i no ken karim gol o mani silva o mani kapa long poket bilong yupela. Taim yupela i wokabaut yupela i no ken karim hanbek. Na yupela i no ken kisim tupela siot na su na stik bilong wokabaut i go wantaim yupela. Nogat. Man i save wok, em ol i mas givim em ol kaikai samting bilong en.” Ol manmeri em ol i amamas long harim tok ol bai givim kaikai long ol na ples bilong slip. Olsem Jisas i tok: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man. Na yupela i mas i stap wantaim dispela man inap long taim yupela i lusim dispela ples.”

Jisas i givim toktok gen long ol disaipel bilong em long pasin bilong toktok wantaim man bilong haus long gutnius bilong Kingdom. Em i tok: “Sapos yupela i go insait long wanpela haus, orait yupela i mas tokim ol manmeri bilong haus olsem, ‘God i ken mekim gut long yupela.’ Na sapos ol manmeri bilong dispela haus i amamas long kisim yupela, orait gutpela tok bilong yupela i ken i stap long ol. Tasol sapos ol i no amamas long kisim yupela, orait yupela i kisim bek gutpela tok bilong yupela. Sapos wanpela man i no laik kisim yupela i go long haus bilong en, na i no laik harim tok bilong yupela, orait taim yupela i lusim dispela haus o dispela taun yupela i mas rausim pipia graun i stap long lek bilong yupela.”

Ol manmeri bilong wanpela taun i no laik harim gutnius na Jisas i tok: “Long de God i makim bilong kotim ol manmeri, hevi i kamap long ol manmeri bilong dispela taun [Kaperneam] bai i winim tru hevi i kamap long ol lain bilong Sodom na Gomora.” I no olsem Jisas i laik tok ol manmeri bilong Sodom bai kirap bek na i stap long De bilong Kot. Nogat. Em i save, ol Israel i harim dispela tok em i mekim ol i ting olsem ol Sodom i no ken kirap bek, long wanem ol i bin mekim pasin nogut tru. Olsem na Jisas i mekim dispela tok olsem hap tok piksa bilong kamapim long ples klia bikpela asua bilong ol manmeri bilong Kaperneam, em ol i no laik harim tok, na ol i ken pilim asua bilong ol. Matyu 9:​35–10:15; Mak 6:​6-12; Luk 9:​1-5.

◆ Jisas i kirap mekim namba tri raun bilong autim gutnius long Galili long wanem taim? Taim em i mekim dispela namba tri raun, nau em i save tru long wanem samting?

◆ Taim em i salim ol 12-pela aposel long autim tok, em i givim wanem kain toktok long ol?

◆ Bilong wanem i stret long ol disaipel i lainim ol manmeri olsem Kingdom i kam klostu pinis?