I Stap na Wok Bilong Jisas
Em i Bekim Tok Long Ol Man i Sutim Tok Long Em
LONG de Sabat Jisas i oraitim wanpela man i gat sik inap long 38 yia. Tasol ol bikpela man bilong lotu Juda i sutim tok long em na i tok em i kalapim lo bilong Sabat. Jisas i bekim tok long ol, “Papa bilong mi em i wok inap long nau. Na mi tu mi wok.”
Ol Farisi i tok, lo bilong Sabat i tambuim dispela wok Jisas i mekim, tasol lo bilong Sabat i no tambuim dispela kain wok. God yet i givim wok long Jisas bilong autim tok na oraitim ol sikman, na em i bihainim pasin bilong God na mekim dispela wok long olgeta de. Tasol tok em i bekim long ol Juda i mekim ol i belhat moa yet, na ol i laik kilim em i dai. Bilong wanem ol i laik kilim em i dai?
Long wanem ol i ting Jisas i kalapim lo bilong Sabat; na i no dispela samting tasol−ol i ting Jisas i tok bilas long God, long wanem em i tok em i Pikinini bilong God. Tasol Jisas i no pret. Em i bekim tok long ol na kamapim sampela tok moa long God em i Papa bilong em. Em i tok: “Papa i laikim tumas Pikinini na i soim em olgeta samting em i save mekim.”
Na Jisas i tok moa, olsem: “Papa i save kirapim bek ol daiman na i givim laip long ol. Na olsem tasol Pikinini tu i save givim laip long ol man long laik bilong em yet.” Tru tumas, dispela Pikinini bilong God i kirap pinis long kirapim bek ol man i olsem ol i dai long spirit! Jisas i tok: “Man i harim tok bilong mi, na i bilip long dispela em i bin salim mi na mi kam, em i gat laip i stap gut oltaim oltaim. Em bai i no kamap long kot. Nogat. Em i lusim pinis dai, na nau em i stap laip.” Na em i tok: “Taim i laik kamap, na nau i kamap pinis, na bai ol daiman ol i harim maus bilong Pikinini Bilong God. Na ol man i harim, ol bai i kisim laip.”
Inap long taim Jisas i mekim dispela tok, i no gat sampela stori long Baibel i makim olsem Jisas i bin kirapim bek wanpela man i dai pinis. Tasol em i tokim ol dispela man i sutim tok long em, ol man i dai pinis bihain bai ol i kirap bek long matmat. Em i tok: “Yupela i no ken tingting planti long dispela. Taim i laik kamap na olgeta man i stap long matmat bai ol i harim maus em bilong em, na bai ol i lusim matmat na i kam ausait.”
Paslain long dispela taim Jisas i no bin tokim ol man long dispela bikpela wok em bai mekim bilong kamapim laik bilong God. Tasol ol man i sutim tok long em ol i bin harim tok bilong Jon tu, em Jon i tokaut long Jisas. Jisas i tok: “Bipo yupela i salim tok i go long Jon. Na em i tokaut pinis long tok i tru.”
Tupela yia paslain long dispela taim, Jon Bilong Baptais i bin tokim ol dispela bikpela man bilong lotu Juda long dispela Man em i mas kam bihain long em. Nau Jon i stap kalabus, tasol bipo ol i save litimapim nem bilong Jon, na Jisas i tok: “Jon i olsem lam i lait na i givim lait long ol man. Na bel bilong yupela i orait na yupela i amamas sotpela taim long lait bilong em.” Jisas i mekim dispela tok bilong kirapim tingting bilong ol bambai em i ken helpim ol na kisim bek ol. Tasol em i no tingim Jon tasol i tokaut long em.
Jisas i tok: “Olgeta wok Papa i bin givim long mi bilong mekim na pinisim, ol dispela wok mi save mekim. Na dispela wok yet i soim ol manmeri na nau ol i save, Papa i bin salim mi na mi kam.” Na em i tok: “Na Papa i bin salim mi na mi kam, em yet i tokaut long mi.” God i bin tokaut long Jisas long taim Jisas i kisim baptais, God i tok: “Dispela em i Pikinini bilong mi. Mi laikim em tumas.”
Tru tumas i no gat as na ol dispela man bilong sutim tok long Jisas ol i sakim em. Baibel yet, em ol i tok ol i wok long kisim save long en, em i tokaut long Jisas! Olsem na Jisas i tok: “Sapos yupela i bilipim tok bilong Moses, orait bai yupela i bilipim tok bilong mi tu. Long wanem em i bin raitim tok bilong mi. Tasol, sapos yupela i no bilipim tok em i raitim, olsem wanem bai yupela i bilipim tok bilong mi?” Jon 5:17-47; 1:19-27; Matyu 3:17.
◆ Bilong wanem wok Jisas i mekim em i no kalapim lo bilong Sabat?
◆ Jisas i tok wanem long bikpela wok em i mas mekim bilong kamapim laik bilong God?
◆ Bilong soim ol em i Pikinini bilong God, Jisas i tok husat i bin tokaut long em?