Sapta 21
De Bilong Kot na Bihain Long En
1. Sampela man i ting olsem wanem long De bilong Kot?
TAIM yu harim dispela tok “De bilong Kot,” yu save tingim wanem samting? Sampela man i tingim wanpela sia king na Bikpela Jas i sindaun long en. Na bikpela lain manmeri ol i sanap long pes bilong dispela sia, em ol i bin kirap bek long matmat. Olgeta wan wan i wokabaut i kam sanap long pes bilong Jas na Jas i lukim buk na skelim olgeta samting ol dispela man i bin mekim bipo, na em i makim ol bilong i go long heven o long bikpaia. Em, sampela man i ting olsem.
2. (a) Husat i makim dispela De bilong Kot i mas kamap? (b) Em i makim husat bilong i stap jas?
2 Tasol Baibel i no stori olsem long dispela De bilong Kot. Yumi no ken pret long dispela De. Baibel i tok: “[God] i makim pinis wanpela de bilong kot. Na long dispela kot bai em i skelim pasin bilong olgeta manmeri. Na kot bilong em bai i go stret olgeta. Na em i bin makim wanpela man bilong bosim dispela kot.” (Aposel 17:31) Dispela jas God i makim, em Krais Jisas.
3. (a) Olsem wanem yumi inap save, Krais bai mekim stretpela kot? (b) God bai skelim ol man long wanem samting?
3 Yumi save Krais bai mekim stretpela kot. Baibel yet i tok olsem long Aisaia 11:3, 4. Olsem na em i no ken skelim ol man long ol samting nogut bipo ol i bin mekim taim ol i no gat save long God. Long wanem Baibel i tok, taim man i dai ol rong bilong em i tekewe na God i no tingim moa. Baibel i tok: “Man i dai pinis, em i no pas moa long sin.” (Rom 6:7) Olsem na taim man i kirap bek God bai skelim em long ol samting em i mekim long taim bilong De bilong Kot. God i no ken skelim em long samting em i bin mekim taim em i no i dai yet.
4. (a) Dispela De bilong Kot em hamas yia? (b) Husat ol bai wok wantaim Krais long mekim kot?
4 Olsem na dispela De bilong Kot em i no wanpela de tru i gat 24 aua bilong en. Baibel i kamapim gut dispela samting taim em i stori long ol man ol bai wok wantaim Krais long mekim kot. (1 Korin 6:1-3) Baibel i tok: “Mi lukim sampela sia king i stap, na sampela man i sindaun long dispela sia. God i givim wok long ol bilong skelim pasin bilong ol man long kot.” Ol dispela jas em lain 144,000. Na Baibel i tok moa long ol, olsem: “Ol i stap king wantaim Krais inap long 1,000 yia.” Olsem na dispela De bilong Kot em i bikpela hap taim, inap olsem 1,000 yia. Na long dispela taim Krais wantaim ol 144,000 bai stap king long “nupela skai” na bosim “nupela graun.”—Revelesen 20:4, 6; 2 Pita 3:13.
5, 6. (a) Sam 96 i stori olsem wanem long dispela De bilong Kot? (b) Long taim bilong De bilong Kot wanem ol gutpela samting bai kamap long graun?
5 Lukim ol dispela pes hia na yu ken save long sampela gutpela samting bai kamap long dispela De bilong Kot. Baibel i stori long dispela gutpela taim, olsem: “Olgeta gaden, yupela wantaim olgeta kaikai i stap long yupela, yupela i mas amamas tru. Olsem na long ai bilong God, bai olgeta diwai bilong bus ol i mekim song bilong amamas. Long wanem, Bikpela i laik kam na bosim olgeta graun. Em bai i bosim olgeta manmeri long stretpela pasin. Na bai em i skelim ol long tok tru.”—Sam 96:12, 13.
6 Long taim bilong dispela De bilong Kot, ol manmeri i winim pinis Amagedon bai ol i wokim ol gutpela gaden samting na bai graun i kamap gutpela ples paradais. Ol man i dai pinis bai ol i kirap bek long dispela paradais. (Luk 23:43) Taim ol i bung gen wantaim famili bilong ol, bai i gat bikpela amamas tru! Bai ol i amamas long i stap wanbel wantaim, na i no gat sik samting! Na bai ol i amamas long kisim save long laik bilong God! Baibel i tok: “Taim lo bilong yu i bosim graun, ol man bilong graun bai lain long bihainim stretpela pasin.” (Aisaia 26:9, NW) Long taim bilong dispela De bilong Kot, olgeta manmeri bai kisim save long Jehova, na bai ol inap bihainim tok bilong em na lotu long em.
7. Long taim bilong dispela De bilong Kot, wanem samting bai painim ol manmeri i mekim wok bilong God? Na wanem samting bai painim ol man i bikhet na i no laik mekim wok bilong God?
7 Long dispela gutpela taim bilong paradais, Krais Jisas wantaim ol 144,000 bai skelim ol manmeri bilong graun. Sampela manmeri bai mekim wok bilong Jehova na bai ol inap i stap oltaim. Tasol sampela bai bikhet na ol i no laik mekim wok bilong God. Olsem Baibel i tok: “Maski ol i mekim gut long man nogut, em i no ken lain long mekim stretpela pasin. Long ples i gat stretpela pasin long en em bai mekim pasin i no stret.” (Aisaia 26:10, NW) Ol dispela man nogut, bai ol i gat taim samting inap tru long ol i ken senisim pasin bilong ol na lain long bihainim stretpela pasin. Tasol sapos ol i stap man nogut yet, bai ol i bagarap. Sampela bai bagarap taim dispela De bilong Kot i no pinis yet. (Aisaia 65:20) God i no ken larim ol i stap na bagarapim gutpela ples paradais.
8. Ol man bilong Sodom i bihainim wanem kain pasin?
8 Ol man i kirap bek long bikpela De Kot bilong Jehova, em gutpela samting tru i painim ol. Tasol dispela gutpela samting i no inap painim olgeta man i dai pinis. Tingim ol lain i bin i stap long taun Sodom long bipo. Baibel i tok ol man bilong Sodom i laik mekim pasin pamuk nogut tru long “tupela man” i stap wantaim Lot. Bel bilong ol i kirap moa yet long mekim, olsem na maski ol i kamap aipas pinis ol i wok strong long painim dua bilong haus bambai ol i ken kisim dispela “tupela man” i stap wantaim Lot.—Jenesis 19:4-11.
9, 10. Tok bilong Baibel i makim olsem ol man nogut bilong Sodom inap kirap bek o nogat?
9 Olsem wanem? Olkain man nogut tru olsem ol bai kirap bek long De bilong Kot? Baibel i makim olsem ol i no ken kirap bek. Jut i Stori long ol ensel i bin lusim heven na kam daun long graun bambai ol inap mekim maritpasin wantaim ol meri bilong graun. Na bihain Jut i tok: “Bipo ol man bilong Sodom wantaim Gomora . . . i bin mekim pasin wankain olsem ol dispela ensel. Ol i bihainim pasin pamuk, na bel bilong ol i kirap na ol i wok long pilai nogut wantaim ol arapela manmeri nabaut. Olsem na God i bekim pe nogut long ol long paia i stap oltaim.” (Jut 6, 7; Jenesis 6:1, 2) Yes, ol man bilong taun Sodom i bin mekim narapela kain pasin pamuk nogut tru, olsem na ol i bagarap na yumi ken ting olsem ol i no ken kirap bek.—2 Pita 2:4-6, 9, 10a.
10 Sampela tok bilong Jisas tu i givim dispela tingting long yumi, olsem ol Sodom i no ken kirap bek. Em i Stori long taun Kapaneam, em wanpela taun em i bin wokim ol mirakel long en, na em i tok: “Sapos wanpela man i bin wokim mirakel long Sodom olsem mi bin wokim long ples bilong yupela [Kapaneam], orait nau tude bai Sodom i stap yet. Tasol mi tokim yupela, long de bilong kotim ol manmeri bai hevi bilong Sodom i no bikpela olsem hevi bai i painim yupela.” (Matyu 11:22-24) Jisas i laik kamapim klia bikpela asua bilong ol Kapaneam na em i mekim dispela tok. Em i save, ol Isrel i harim dispela tok bilong em, ol i save ting olsem ol Sodom i no ken kirap bek long De bilong Kot, long wanem ol i bin mekim pasin nogut tru.
11. Long De bilong Kot bilong wanem “ol stretpela man” i no ken hatwok tumas olsem “ol man nogut”?
11 Olsem na yumi mas wok strong long wokabaut stret bambai God i ken amamas long yumi, na sapos yumi dai, bai yumi inap long kirap bek. Tasol ating yu laik save: Sampela man i kirap bek bai ol i hatwok long kisim save long stretpela pasin na bihainim, na sampela nogat? Orait, tingim ol “stretpela” manmeri bilong bipo, olsem Ebraham, Aisak, Jop, Debora, Rut, Danyel na ol narapela. Taim ol i stap laip yet, olgeta ol i wetim Krais i kam. Orait, taim ol i kirap bek long De bilong Kot bai ol i amamas tru long kisim save long em na save olsem em i stap king long heven! Olsem na taim ol dispela “stretpela man” i kirap bek, ol i no ken hatwok long bihainim stretpela pasin. Tasol “ol man nogut” bai hatwok.—Aposel 24:15.
KIRAP BEK NA “STAP LAIP” O “KOT”
12. Olsem Jon 5:28-30 i tok, husat i “kirap bek na i stap laip”? Na husat i “kirap bek na i kamap long kot”?
12 Jisas i stori long dispela De bilong Kot na em i tok: “Olgeta man i stap long matmat bai ol i harim maus bilong em, na bai ol i lusim matmat na i kam ausait. Ol man i bin mekim gutpela pasin, bai ol i kirap bek na i stap laip. Na ol man i bin mekim pasin nogut, bai ol i kirap bek na i kamap long kot.” (Jon 5:28-30) Husat bai ol i “kirap bek na i stap laip”? Na husat bai ol i “kirap bek na i kamap long kot”?
13. Ol manmeri i kirap bek, ol i mekim wanem na ol i “kirap bek na i stap laip”?
13 Yumi save pinis, taim ol manmeri i kirap bek long matmat, ol i no kot long ol samting ol i bin mekim bipo. Nogat. Ol bai kot long ol samting ol i mekim long taim bilong dispela De bilong Kot. Olsem na taim Jisas i tok long “ol man i bin mekim gutpela pasin” na “ol man i bin mekim pasin nogut,” em i toktok long ol gutpela samting o ol samting nogut ol bai mekim long taim bilong De bilong Kot. Planti bai ol i mekim gutpela pasin, na bai skin na tingting bilong ol i wok long kamap gutpela, na taim dispela De bilong Kot i pinis bai ol i gutpela olgeta. Olsem na ol dispela manmeri i kirap bek bilong “i stap laip,” long wanem ol bai kisim laip i stap gutpela olgeta na i no gat sin.
14. Ol manmeri i kirap bek, ol i mekim wanem na ol i “kirap bek na i kamap long kot”?
14 Tasol olsem wanem long ol manmeri “i bin mekim pasin nogut” long De bilong Kot? Ol i kirap bek bilong “kamap long kot.” Wanem insait bilong dispela tok? I olsem: Ol bai kot na Jas bai tok ol i mas i dai. Olsem na ol bai bagarap long taim bilong De bilong Kot o long pinis bilong De bilong Kot. As bilong en i olsem: Ol i bin mekim pasin nogut; ol i bikhet na ol i no laik kisim save long stretpela pasin na bihainim.
TAIM DE BILONG KOT I KIRAP
15. Taim De bilong Kot i laik kirap, wanem samting i kamap pastaim?
15 Aposel Jon i lukim ol samting i kamap na wantu De bilong Kot i kirap, em i tok: “Mi lukim bikpela waitpela sia king i stap, na man i sindaun long dispela sia. Na graun wantaim skai i ranawe . . . Na em i skelim olgeta daiman.” (Revelesen 20:11, 12) Taim De bilong Kot i laik kirap, pastaim “graun wantaim skai” bilong nau, em dispela pasin bilong nau, bai pinis. Ol man i mekim wok bilong God ol tasol bai stap. Olgeta man nogut bai bagarap long Amagedon.—1 Jon 2:17.
16. (a) Long dispela De bilong Kot, ol man i dai pinis na husat moa bai ol i kot? (b) Ol bai kot olsem wanem?
16 Olsem na long De bilong Kot “ol daiman” i kirap bek na “olgeta man i stap laip,” em ol i bin winim Amagedon, na ol pikinini ol i kamapim, olgeta bai kot. (2 Timoti 4:1) Ol bai kot olsem wanem? Jon i tok: “[Jas] i lukim rait i stap long ol dispela buk, na em i skelim ol daiman, inap long olgeta pasin ol i bin mekim. Solwara . . . na Dai wantaim Hel i givim bek olgeta daiman i stap long dispela. Na Jas i skelim olgeta man wan wan, inap long ol pasin ol i bin mekim.”—Revelesen 20:12, 13.
17. Wanem “ol dispela buk” Jas i lukim taim em i skelim “olgeta man i stap laip” na “ol daiman”?
17 Wanem “ol dispela buk” Jas i lukim na em i skelim “ol daiman” na “olgeta man i stap laip”? I no Baibel tasol, ating em sampela buk moa. Spirit holi i kamapim tok bilong “ol dispela buk” i gat ol lo na tok bilong Jehova long en. Taim ol manmeri bilong graun i kaunim tok bilong ol dispela buk, olgeta inap save long laik bilong God. Na nau bai ol i kot long ol tok na lo bilong God i stap long ol dispela buk. Ol manmeri i bihainim dispela tok, ofa bilong Krais bai helpim ol na bai skin na tingting bilong ol i wok long kamap gutpela olgeta.
18. (a) Olsem wanem taim dispela De bilong Kot i pinis? (b) Taim dispela 1,000 yia i pinis, olsem wanem “ol daiman” i “kisim laip”?
18 Taim 1,000 yia bilong dispela De bilong Kot i pinis, bai i no gat wanpela man long graun em sin bilong Adam i bagarapim em na em i mas i dai. Bai olgeta manmeri i stap laip tru. Olsem Baibel i tok: “Ol arapela daiman [em ol i no bilong lain 144,000] i no kisim laip long dispela taim. Ol i wetim dispela 1,000 yia i pinis pastaim.” (Revelesen 20:5) I no olsem sampela man bai kirap bek long pinis bilong dispela 1,000 yia. Nogat. Tasol i olsem olgeta man i mas kamap gutpela olgeta pastaim na yumi ken tok, ol i “kisim laip.” Bai ol i kamap wankain olsem Adam tupela Iv long Iden. Na bihain bai wanem samting i kamap?
BIHAIN LONG DE BILONG KOT
19. Taim De bilong Kot i pinis, Krais i mas mekim wanem?
19 Krais Jisas i mekim pinis olgeta wok God i givim long em na bihain bai em i “putim kingdom long han bilong God Papa.” Krais bai mekim olsem taim dispela De bilong Kot bilong 1,000 yia em i pinis. Long dispela taim olgeta birua i bagarap pinis. Laspela birua em dispela dai Adam i bin putim long ol manmeri, na em bai pinis olgeta! Bihain nau God Jehova bai kisim Kingdom. Em yet bai stap King na bosim Kingdom.—1 Korin 15:24-28.
20. (a) Olsem wanem Jehova bai makim husat husat em bai raitim nem bilong ol long “buk bilong laip”? (b) Bilong wanem i stret wanpela traim moa i mas painim ol manmeri?
20 Long dispela taim bai wanpela traim i painim olgeta manmeri na ol manmeri i winim dispela traim na sanap strong, Jehova bai raitim nem bilong ol long “buk bilong laip.” (Revelesen 20:12, 15) Taim traim olsem i painim Adam tupela Iv, tupela i pundaun; na taim traim olsem i painim Jop, em i sanap strong. Tasol i no gat wanpela samting i bin traim bilip bilong planti manmeri ol i stap inap long pinis bilong dispela 1,000 yia. Bipo, taim ol i no i dai yet, ol i no save long laik bilong God. Ol i insait long pasin nogut Seten i bin kamapim long graun. Ol i “man nogut.” Na taim ol i kirap bek ol i no hatwok long lotuim Jehova, long wanem ol i stap long Paradais na Seten i no i stap bilong pundaunim ol. Tasol taim ol i kamap gutpela olgeta, sapos Seten inap traim ol, bai ol i sanap strong na stap gut long Jehova o nogat? Bai Seten inap pundaunim ol olsem em i mekim long Adam tupela Iv?
21. (a) Jehova bai mekim wanem bilong traim ol manmeri? (b) Taim dispela traim i pinis, olsem wanem long ol manmeri i insait long en?
21 Bilong stretim ol dispela askim Jehova bai opim hul i no gat as na bai Seten wantaim ol ensel nogut i lusim dispela kalabus bilong ol. Orait, wanem samting bai kamap? Bai Seten i pundaunim sampela manmeri na ol i lusim Jehova. Ol dispela manmeri bai ol i olsem “wesan bilong nambis,” long wanem yumi no inap save hamas olgeta bai pundaun. Taim dispela traim i pinis, Seten wantaim ol ensel nogut na olgeta manmeri i no winim dispela traim, bai God i tromoi ol long “bikpela hul i gat paia,” em “namba tu dai,” na bai ol i pinis olgeta. (Revelesen 20:7-10, 15) Tasol ol manmeri God i raitim nem bilong ol long “buk bilong laip,” ol bai stap oltaim long gutpela ples paradais long graun. Ol inap kisim laip i stap oltaim, long wanem Jehova i skelim ol pinis long kot na em i lukim bel na tingting na skin bilong ol i stret olgeta na ol i no ken lusim Em.
DE BILONG KOT LONG NAU
22. Sapos yumi laik i stap na lukim dispela De bilong Kot na laspela traim bilong ol manmeri, nau yumi mas winim wanem samting?
22 Olsem na Baibel i tokim yumi long ol samting bai kamap inap 1,000 yia bihain na yumi no ken pret long en. Tasol bai yu stap long dispela taim bihain na amamas long ol gutpela samting God i laik mekim? Orait, yu mas winim wanpela de bilong kot em bai kamap pastaim, nau long taim bilong yumi. Em “de bilong kot i kamap long ol man i givim baksait long God, na bai ol i lus.”—2 Pita 3:7.
23. (a) Nau Krais i skelim ol manmeri na putim ol long wanem tupela lain? (b) Wanem samting bai painim dispela tupela lain? Bilong wanem dispela samting i mas painim dispela tupela lain?
23 Tru tumas, Krais i kam bek pinis na em i sindaun long sia king long heven na nau olgeta manmeri i stap long kot. Dispela “de bilong kot” bilong nau em i kamap paslain long bikpela De bilong Kot bilong 1,000 yia. Long dispela taim bilong kot long nau Krais i wok long skelim ol manmeri. Em i putim “ol meme” long han kais bilong em na “ol sipsip” long han sut. “Ol meme” bai bagarap, long wanem ol i no helpim ol “brata” wanlain bilong Krais long mekim wok bilong ol. Ol dispela “meme” i no tanim bel na lusim pasin nogut; ol i strong long bihainim ol pasin i no stret. Tasol “ol sipsip” bai kisim laip aninit long Kingdom, long wanem ol i sambai long ol “brata” bilong Krais long olgeta taim.—Matyu 25:31-46.
[Ol Piksa long pes 178]
Bilong wanem Jisas i tok, long De bilong Kot hevi i kamap long ol Kapaneam bai winim hevi i kamap long ol Sodom?