Daunim Laik Bilong Skin na Mekim Wok Bilong Jehova
“Sapos wanpela man i laik bihainim mi, orait em i mas daunim laik bilong em yet, na em i mas karim diwai [pos] bilong en na bihainim mi.”—MATYU 16:24.
1. Jisas i tok wanem long ol disaipel long i dai bilong em?
MAUNTEN HERMON i gat ais i save kamap long het bilong en, na klostu long dispela maunten Krais Jisas i tingim wanpela bikpela samting em i mas mekim. Klostu wanpela yia bihain em i mas i dai. Em i save, tasol lain disaipel bilong em nogat. Nau em i mas toksave long ol. Bipo em i bin givim hap tok tasol long ol long dispela samting, tasol nau em i mas tokaut klia long ol. (Matyu 9:15; 12:40) “Long dispela taim Jisas i stat long tokim ol disaipel olsem em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na bai ol i kilim em i dai, na long de namba 3 bai em i kirap bek.”—Matyu 16:21; Mak 8:31, 32.
2. Pita i mekim wanem long taim em i harim olsem Jisas i mas i dai? Jisas i tok wanem long Pita?
2 Liklik taim Jisas bai i dai. Tasol Pita i bel nogut long harim olsem. Em i no inap bilip olsem ol man bai kilim i dai Jisas, olsem na em i no tingting gut, na em i kirap na i tokim Jisas olsem: “Bikpela, nogat tru. Dispela samting i no inap kamap long yu.” Pita i sori long Jisas, tasol kwiktaim Jisas i sakim tok bilong Pita na i tok: “Satan, yu go baksait long mi. . . . Yu no bihainim tingting bilong God. Nogat. Yu bihainim tingting bilong ol man tasol.”—Matyu 16:22, 23.
3. (a) Pita i mekim wanem na i olsem em i kamap boi bilong Satan? (b) Olsem wanem tok bilong Pita i olsem samting bilong pundaunim man?
3 Pita i kamap olsem boi bilong Satan, tasol em i no save em i bin mekim olsem. Jisas i tok strong long em olsem Jisas i bin mekim long Satan long taim Satan i traim em na grisim em long kamap king bilong graun na bai em i no gat hevi moa. (Matyu 4:1-10) Pita i tokim Jisas long lukautim gut skin bilong em na bai pen o bagarap i no ken painim em, tasol Jisas i save, dispela i no laik bilong Papa bilong em. Em i mas daunim laik bilong em yet, na no ken bihainim laik bilong skin. (Matyu 20:28) Tok bilong Pita i olsem samting bilong pundaunim Jisas, maski Pita i gat gutpela tingting long helpim o mekim gut long Jisas.a Tasol Jisas i save, sapos em i tingting long abrusim ol hevi na pen na bai em i ken sindaun gut na i stap amamas tasol, Satan bai kalabusim em, na em bai lusim God, na God i no ken orait moa long em.
4. Bilong wanem Jisas i no harim tok bilong Pita long abrusim ol hevi?
4 Pita i mas stretim tingting bilong em. Tok em i givim long Jisas, dispela em i tingting bilong ol man bilong graun, na i no tingting bilong God. Jisas i laik bihainim tingting na laik bilong God tasol, maski hevi na pen i mas painim em. Jisas i save, em i no ken wok long inapim ol laik bilong skin na kisim gutpela sindaun na abrusim pen na hevi, na ol disaipel tu i no ken mekim. Olsem na em i tokim Pita wantaim ol narapela disaipel: “Sapos wanpela man i laik bihainim mi, orait em i mas daunim laik bilong em yet, na em i mas karim diwai [pos] bilong en na bihainim mi.”—Matyu 16:24.
5. (a) Bilong wanem i hatwok long i stap Kristen? (b) Wanem 3-pela samting Kristen i mas mekim?
5 Planti taim Jisas i tok, bai i hatwok long bihainim pasin Kristen. Em i Gopas bilong ol, na em yet i bin daunim laik bilong em na mekim wok bilong Jehova. Orait, bilong i stap disaipel bilong em, ol tu i mas mekim olsem. (Matyu 10:37-39) Olsem na Jisas i makim 3-pela samting em Kristen i mas mekim: (1) putim laik bilong em yet i go namba tu, (2) karim “diwai” bilong em yet, (3) bihainim lek bilong Jisas long olgeta taim.
“Sapos Wanpela Man i Laik Bihainim Mi”
6. (a) Man i mas mekim wanem bilong daunim laik bilong em? (b) Yumi mas tingting long mekim laik bilong husat?
6 Olsem wanem Kristen i ken “daunim laik bilong em yet”? I olsem em i mas kilim i dai dispela laik. Long tok Grik i olsem yumi mas tok “Nogat” long laik bilong yumi, o givim baksait long laik bilong yumi yet. Olsem na sapos yu kamap Kristen, yu mas orait nau long lusim tingting long inapim laik bilong yu yet na long painim ol gutpela samting bilong skin na ol samting bilong amamasim yu yet. I olsem yu givim yu yet wantaim laip bilong yu i go long God Jehova inap long olgeta taim bihain, na Jehova i kamap bos bilong yu. (1 Korin 6:19, 20) Taim yumi “daunim laik bilong” yumi, nau yumi stap bilong mekim ol samting God i orait long en. (Rom 14:8; 15:3) Long olgeta taim yumi mas tok “Nogat” long laik bilong yumi yet na yumi mas tok “Bai mi mekim” laik bilong Jehova.
7. Diwai ol Kristen i mas karim, em i wanem samting? Em i karim olsem wanem?
7 Na dispela tok, “karim diwai” bilong yumi, em i gat bikpela wok bilong en. I hatwok long karim pos diwai. Dispela kain pos i makim olsem yumi dai. Sapos hevi o pen o dai i laik painim Kristen, long wanem, em i bihainim Krais Jisas, Kristen i mas orait tasol long dispela samting. Jisas i tok: “Man i no karim diwai [pos] bilong en na bihainim mi, em i no inap i stap pren bilong mi.” (Matyu 10:38) Sampela man i gat hevi na pen, tasol ol i no karim dispela diwai Jisas i bin toktok long en. Planti hevi i save kamap long ol man nogut tu. (Song 32:10) Tasol taim Kristen i karim diwai bilong ol Kristen, em i mas lusim planti laik bilong em yet na bai em i ken mekim laik bilong Jehova.
8. Jisas i givim wanem wok long lain bilong em?
8 Na Jisas i tok, yumi mas bihainim em long olgeta taim. Yumi mas bilipim ol tok em i bin mekim, na yumi mas bihainim pasin bilong em long olgeta taim. Orait, wanem sampela pasin bilong em? Taim em i makim laspela wok bilong lain bilong em, em i tokim ol: “Yupela i mas i go mekim olgeta lain manmeri i kamap disaipel bilong mi . . . na yupela lainim ol long bihainim olgeta tok mi bin givim long yupela.” (Matyu 28:19, 20) Jisas i bin autim gutpela tok bilong Kingdom, na em i skulim ol man long dispela samting. Ol disaipel i bin mekim olsem tu, na ol Kristen bilong bipo tu. Ol i givim bel long mekim dispela wok, na ol i no insait long ol wok bilong dispela graun, olsem na ol man i birua long ol. Olsem na dispela “diwai” ol i mas karim em i hevi moa.—Jon 15:19, 20; Aposel 8:4.
9. Jisas i mekim wanem kain pasin long ol man?
9 Na narapela pasin bilong Jisas, em i save mekim gut long ol man. Em i tok: “Mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” Ol tok bilong em i save strongim bel bilong ol man i harim, na ol i amamas long i stap wantaim em. (Matyu 11:29) Em i no save tok strong long ol man o subim ol long bihainim em. Em i no putim planti lo long ol. Em i no kolim ol asua bilong ol o sutim tok long ol na bai ol i mas daun na bihainim tok bilong em. Maski ol disaipel i bin daunim laik bilong ol yet, ol i amamas. Ol i no olsem ol man bilong nau “long taim bilong las de” ol i save givim bel long inapim laik bilong ol yet!—2 Timoti 3:1-4.
Bihainim Pasin Bilong Jisas na Daunim Laik Bilong Yumi Yet
10. (a) Olsem Filipai 2:5-8 i tok, olsem wanem Jisas i bin daunim em yet? (b) Sapos yumi bilong lain bilong Krais, yumi mas i gat wanem kain tingting?
10 Jisas yet i daunim laik bilong em. Em i karim diwai bilong em na mekim laik bilong Papa bilong em long olgeta taim. Pol i tokim ol Kristen long Filipai olsem: “Yupela i mas holim wankain tingting olsem Krais Jisas i bin holim. . . . Em i kamap olsem wokboi nating. . . . Na em i daunim em yet na i bihainim tok bilong God, i go inap long em i dai . . . long diwai [pos].” (Filipai 2:5-8) I no gat man inap winim Jisas long bihainim pasin daun olsem, a? Em i winim ol tru! Sapos yu bilong lain bilong Krais Jisas na yu laik bihainim em, yu mas i gat wankain tingting olsem bilong em yet.
11. Yumi mas daunim laik bilong yumi yet na bai yumi ken bihainim laik bilong husat?
11 Na aposel Pita i tok, Jisas i karim pen na em i dai bilong helpim yumi ol Kristen, olsem na yumi mas redi olsem soldia i save redi bilong pait, na yumi mas i gat wankain tingting olsem bilong Jisas. Pita i tok: “Krais i bin karim pen . . . , na yupela i mas holim wankain tingting olsem em i bin holim. . . . Sapos yu bin karim pen . . . , orait yu lusim pinis pasin bilong sin. Na . . . yu bai i no bihainim moa ol laik bilong olpela bel. Nogat. Yu bihainim laik bilong God tasol.” (1 Pita 3:18; 4:1, 2) Jisas i bin givim baksait long laik bilong em yet, na dispela i kamapim klia olsem em i gat tingting long bihainim laik bilong God tasol. Em i no gat tupela tingting. Em i givim bel olgeta long Jehova na em i putim laik bilong Papa bilong em i go antap long laik bilong em yet, maski em i mas karim pen na i dai bilong mekim olsem.—Matyu 6:10; Luk 22:42.
12. Jisas i bel nogut long daunim laik bilong em yet o olsem wanem? Stori long dispela samting.
12 Jisas i bin daunim laik bilong em yet, na dispela i givim bikpela hatwok long em, tasol em i orait long mekim olsem. Em i no bel nogut long en. Em i amamas long i stap aninit long laik bilong God. Long mekim wok bilong Papa bilong em, dispela i olsem kaikai bilong em. Em i amamas long mekim, olsem yumi amamas long kaikai gutpela kaikai. (Matyu 4:4; Jon 4:34) Olsem na sapos yu laik i stap amamas na pilim olsem yu mekim gutpela wok, orait, bihainim tingting na pasin bilong Jisas.
13. Pasin bilong laikim tru God, olsem wanem dispela i kirapim yumi long daunim laik bilong yumi yet?
13 Wanem samting i save kirapim man long daunim laik bilong em na bai em i ken mekim laik bilong God? Pasin bilong laikim tru God, em dispela tasol inap kirapim man. Jisas i tok: “ ‘Yupela i mas laikim God [Jehova], Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol [narapela man] olsem yu laikim yu yet.’ ” (Matyu 22:37-39) Kristen i no inap bihainim dispela tok sapos em i bihainim laik bilong em yet tasol. Sapos em i laik i stap amamas, em i mas laikim tru God na ol narapela man. Jisas i bin mekim olsem, na em i laik bai lain bilong em tu i mas mekim olsem.
14. (a) Wanem tupela samting yumi mas mekim, olsem Hibru 13:15, 16 i tok? (b) Wanem samting i kirapim yumi long givim bel long autim tok?
14 Aposel Pol i save long dispela lo long laikim tumas God na ol narapela man. Em i tok: “Yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en. Na yupela i mas mekim gutpela pasin long ol manmeri. Na sapos sampela i sot long ol samting, orait yupela i mas . . . helpim ol. . . . Dispela kain ofa God i save laikim tru.” (Hibru 13:15, 16) Ol Kristen i no save ofaim ol animal samting long Jehova, olsem na i no gat wok long ol pris bilong graun i mas mekim ol samting bilong helpim ol manmeri long haus lotu long lotuim God. Long rot bilong Krais Jisas tasol yumi save mekim ofa long God long maus bilong yumi, olsem yumi litimapim nem bilong em. Na taim yumi mekim olsem, yumi autim nem bilong God long ol man, long wanem, yumi laikim tumas God na laikim ol man. Yumi no tingim laik bilong yumi yet, nogat. Yumi gat bikpela laik long God, na dispela laik i kirapim yumi long givim bel long autim gutpela tok bilong Kingdom long ol man, na yumi redi oltaim na bai “maus bilong yumi i mas litimapim nem bilong” God long rot bilong autim tok, na dispela i makim olsem yumi laikim ol man.
Daunim Laik na Kisim Gutpela Samting
15. Wanem ol askim yumi ken givim long yumi yet?
15 Tingim ol dispela askim hia: Ol samting mi mekim i kamapim klia olsem mi save daunim laik bilong mi na bai mi ken mekim laik bilong God? Na ol samting mi tingting long mekim long bihain, dispela i makim olsem mi laik putim laik bilong God i go paslain long laik bilong mi yet long bihain? Mi save daunim laik bilong mi na bai mi ken helpim famili bilong mi long ol samting bilong spirit? (Lukim 1 Timoti 5:8.) Olsem wanem long pikinini i no gat papa o mama, na meri em man bilong em i dai pinis? Mi save daunim laik bilong mi na bai mi ken helpim ol o nogat? (Jems 1:27) Mi inap givim bel moa long autim tok? Mi inap givim bel long kamap painia o wok long Betel o wok misineri o go long hap i sot long ol man bilong autim tok bilong Kingdom?
16. Sapos yumi wok strong long painim rot, olsem wanem yumi inap daunim laik bilong yumi yet na mekim laik bilong Jehova?
16 Sampela taim yumi mas wok strong long painim rot na bai yumi ken mekim bikpela wok moa bilong Jehova. Janet em wanpela painia oltaim long Ekwado, na em i wok olgeta de tu long wanpela wok mani. Bihain em i hatwok long inapim ol aua bilong em long wok painia. Em i tingting long askim bos long sotim aua bilong em long wok na bai em i gat hap taim moa bilong autim tok, tasol bos i no laik. Olsem na Janet i kisim Maria i go wantaim em bilong toktok gen wantaim bos. Maria i laik painim wanpela wok haptaim na bai em tu i ken kamap painia. Tupela i tokim bos, ol i laik wok haptaim long dispela wok, olsem wanpela long moningtaim i go inap belo, na wanpela i kirap long belo bek na i go inap long apinun, na bos i orait long dispela. Nau tupela sista i mekim wok painia oltaim. Kaffa tu i hatwok long wok oltaim long dispela kampani na mekim wok painia tu, olsem na em i kisim Magali i go toktok wantaim bos, na em i orait long tupela i ken mekim olsem narapela tupela i mekim. Nau i gat 4-pela sista painia i stap, tasol bipo i gat tupela tasol.
17-21. Tupela marit i bin mekim wanem? Wanem gutpela samting i bin kamap?
17 Inap 10-pela yia Evonne i bin putim laik bilong em yet i go namba tu, na long Me 1991 em i raitim pas i go long Sosaiti Was Taua na em i tok:
18 “Long Oktoba 1982 mi wantaim famili i raun lukim Betel long Bruklin, na dispela i kirapim laik bilong mi long wok long Betel. Wanpela askim long pepa bilong aplikesen i tok, ‘Long laspela 6-pela mun, wanem averes aua bilong yu? Sapos em i aninit long mak, bilong wanem em i olsem?’ Mi no inap bekim, tasol mi makim 5-pela mun bilong wok strong na bai mi ken kisim bikpela aua moa.
19 “Mi bin tingim sampela as na bai mi no inap kamap painia, tasol mi kaunim Yiabuk (1983 Yearbook of Jehovah’s Witnesses), na nau mi save, sampela pablisa i bin i gat ol hevi, winim bilong mi, na ol i ting ol i no inap kamap painia, tasol ol i painim rot na bai ol i ken mekim. Olsem na long Epril 1, 1983, mi lusim wok bilong skin, maski i gat bikpela pe bilong en, na mi kamap painia haptaim, na long Septemba 1, 1983, mi kamap painia oltaim.
20 “Long Epril 1985 mi maritim wanpela wokman bilong kongrigesen. Tripela yia bihain mipela go long kibung distrik na harim wanpela tok long wok painia, na man bilong mi i tokim mi, ‘I no gat wanpela samting i pasim rot bilong mi long kamap painia long Septemba 1, a?’ Olsem na mitupela i wok wantaim inap tupela yia long mekim wok painia.
21 “Man bilong mi i laik wok long konstraksen long Betel long Bruklin inap tupela wik, na bihain em i laik wok long Intenesenel Konstraksen, olsem na long Me 1989 mipela go long Naijiria inap wanpela mun bilong mekim wok konstraksen long brens. Long tumora mipela bai go long Jemani bilong kisim visa bilong i go long Polan. Mipela i amamas long mekim dispela wok bilong sanapim ol haus samting, em i narapela kain wok oltaim.”
22. (a) Olsem Pita i bin mekim, olsem wanem yumi inap kamap olsem samting bilong pundaunim painia? (b) Wanem samting i no makim tru olsem yumi daunim laik bilong yumi yet na mekim laik bilong Jehova?
22 Sapos yu yet yu no inap mekim wok painia, yu ken strongim ol painia long holimpas dispela wok, na helpim ol long mekim olsem. Tasol nogut sampela pren bilong painia o bilong famili bilong em ol i tokim em long malolo na lusim wok painia na bai em i ken i stap isi na mekim sampela laik bilong em na i stap amamas na i no gat hevi. Pita i bin tok olsem long Jisas. Kain tok olsem inap pundaunim painia. Tru, sapos painia i gat bikpela sik samting, o em i no mekim ol narapela wok ol Kristen i mas mekim, ating em i mas lusim wok painia. Sapos yumi gat nem olsem painia o man i wok long Betel, dispela i no makim olsem yumi man bilong givim bel long Jehova na daunim laik bilong yumi yet, nogat. Tasol tingting na wok bilong yumi, na pasin yumi mekim long narapela man, na pasin yumi bihainim, ol dispela i bikpela samting.
23. (a) Yumi mas mekim wanem na bai yumi ken i stap wanwok bilong Jehova? (b) Hibru 6:10-12 i givim wanem gutpela tok long yumi bilong strongim yumi?
23 Sapos yumi daunim laik bilong yumi yet, yumi ken amamas long i stap wanwok bilong God. (1 Korin 3:9) Bai yumi amamas long mekim gut bel bilong Jehova. (Sindaun 27:11) Na Hibru 6:10-12 i tok, Jehova i no ken lusim yumi sapos yumi stap gut long em.
[Ol Futnot]
a Long tok Grik, “samting bilong pundaunim man” (σκάνδαλον, skanʹda·lon), pastaim i olsem “hap bilong trap ol i putim abus long en na bai trap i ken holimpas wanpela animal samting.”—Vine’s Expository Dictionary of Old and New Testament Words.
Yu Gat Wanem Tingting?
◻ Pita i mekim wanem na dispela inap pundaunim Jisas na bai em i no daunim laik bilong em yet?
◻ Olsem wanem man i ken “daunim laik bilong em yet”?
◻ Kristen i ‘karim diwai bilong em’ olsem wanem?
◻ Olsem wanem yumi ken lain long daunim laik bilong yumi yet?
◻ Wanem samting i kirapim yumi long daunim laik bilong yumi yet?
[Piksa long pes 10]
Olsem wanem? Yu orait long daunim laik bilong yu yet na karim diwai na bihainim Jisas?