I Stap na Wok Bilong Jisas

Em i Mekim Bikpela Win i Dai

LONG san Jisas i mekim bikpela wok. Em i lainim ol man i bung long nambis, na bihain em i toktok wantaim ol disaipel tasol na stori gut long as bilong ol tok piksa em i bin mekim. Long apinun em i tok: “Yumi go long hapsait bilong raunwara.”

Long hapsait bilong Raunwara Galili i gat wanpela hap ol i kolim Dekapolis. Ol i kisim dispela nem long tupela tok Grik na insait bilong en i olsem “10-pela biktaun.” Long ol biktaun long hap bilong Dekapolis i gat planti Grik i stap, na i gat planti Juda tu i stap. Jisas i no bin mekim bikpela wok long dispela hap. Nau em i go long en, tasol long dispela taim tu wanpela samting i kamap na em i no inap i stap longtaim long dispela hap. Bihain yumi ken stori long dispela samting.

Taim Jisas i tokim ol disaipel, “Yumi go long hapsait bilong raunwara,” ol disaipel i kisim em i go long bot. Tasol planti man i lukim ol i go na ol tu i kalap long bot bilong ol wan wan na i go wantaim ol. I no longwe. Raunwara Galili i longpela inap 21 kilomita, na braitpela inap 12 kilomita.

Jisas i bin mekim bikpela wok, olsem na skin bilong em i les. Taim ol i lusim nambis i go, em i go long stan bilong sip na putim het long pilo na em i slip. Sampela aposel ol i man bilong solwara; ol i man bilong kisim pis na planti taim ol i bin raun kisim pis long Raunwara Galili. Olsem na ol i stiaim bot i go.

Tasol dispela taim ol i hatwok. Win long hap bilong raunwara i hat liklik, long wanem raunwara i stap daunbilo long ol maunten, na win long ol maunten i kolpela. Dispela samting i mekim na sampela taim strongpela win i lusim ol maunten i kam daun na i kirapim draipela bikwin long raunwara. Em nau, taim ol disaipel i kisim Jisas i go long bot, dispela samting i kamap. Draipela bikwin i kirap na si i sakim bot na kalap i go insait, na wara i laik pulap long bot. Tasol Jisas i slip i stap!

Ol disaipel i gat save long stiaim sip na ol i wok strong long stiaim i go. Ating bipo tu ol i bin i stap long raunwara long kain taim nogut olsem. Tasol nau ol i no inap moa, na ol i pret, nogut ol i lus long wara. Olsem na ol i kirapim Jisas, na ol i tok: “Tisa, klostu yumi laik lus, na ating yu no tingim?”

Jisas i kirap na em i krosim win, na em i tokim wara, “Inap nau! Yu pinis! Yu dai nau!” Na bikpela win i dai na wara i no mekim nais liklik. Na em i tokim ol disaipel: “Bilong wanem yupela i pret olsem? Olsem wanem na yupela i no gat bilip?”

Nau narapela kain pret i kisim ol disaipel na ol i tok namel long ol yet, olsem: “Dispela man em i husat, na win wantaim wara i save harim tok bilong em?”

Jisas i kamapim bikpela strong bilong em! Nau yumi save, King bilong yumi i gat strong long bosim win na wara samting tu, na dispela i strongim bilip bilong yumi na yumi save, taim Kingdom bilong em i bosim graun na em i putim olgeta tingting bilong em i kam long wok bilong bosim graun, bai olgeta manmeri long graun i stap gutpela na i no ken pret long bikpela win samting bai bagarapim ol!

Jisas i mekim i dai bikpela win na bihain liklik em wantaim ol disaipel bilong em i kamap gut long hapsait bilong raunwara. Ating bikpela win i no givim hatwok tumas long ol narapela bot na ol man long ol dispela bot ol i go kamap gut long ples bilong ol. Mak 4:​35–5:2; Matyu 8:​18, 23-28; Luk 8:​22-27.

◆ Wanem dispela hap ol i kolim Dekapolis?

◆ Wanem samting i mekim na sampela taim bikpela win i kirap long Raunwara Galili?

◆ Ol disaipel i gat save long stiaim sip, tasol taim ol i no inap moa, ol i mekim wanem?

[Piksa i karamapim pes olgeta long pes 8]