Bilong Wanem Yumi Mas Mekim Wok?

YU SAVE amamas moa long mekim wanem, wok o pilai?— Tru, i no gat rong long pilai. Baibel i stori long taun Jerusalem i ‘pulap long ol liklik mangi na ol i wok long pilai pilai i stap.’​—Sekaraia 8:5.

Bikpela Tisa i bin amamas long lukim ol pikinini i pilai. Paslain long em i kam long graun, em i bin tok: “Mi stap wantaim [God] na em i makim mi olsem saveman i bosim wok . . . mi bin amamas i stap oltaim long ai bilong Bikpela.” Baibel i kolim Jisas olsem “saveman i bosim wok” na dispela i makim olsem em i bin wok wantaim Jehova long heven. Na taim em i stap long heven, em i bin tok: “Mi bin amamas long lukim dispela graun na ol manmeri i stap long en.” Yes, olsem yumi bin kisim save pinis, Bikpela Tisa i bin tingim tru olgeta man, na ol pikinini tu.​—Sindaun 8:​30, 31.

Yu ting Jisas i bin pilai taim em i pikinini?— Ating em i bin mekim olsem. Long heven em i bin stap olsem “saveman i bosim wok,” olsem na yu ting long graun tu em i bin mekim wok?— Ol man i bin kolim Jisas olsem “pikinini bilong wanpela kamda,” olsem kapenta. Tasol ol man i bin kolim em tu olsem “wanpela kamda.” Dispela i makim wanem samting?— Josep, em i bin mekim bikpela long Jisas olsem pikinini bilong em, em i bin skulim Jisas. Olsem na Jisas tu i bin kamap kapenta.—Matyu 13:55; Mak 6:3.

Jisas i wanem kain kapenta?— Em i “saveman i bosim wok,” olsem em i gat save long mekim gut wok bilong em long heven, olsem na yu ting long graun em i bin kamap saveman tru bilong mekim wok kapenta?— Tingim bikpela wok bilong ol kapenta long dispela taim. Ating Jisas i mas go katim diwai, katim i go liklik liklik, karim i go long haus, na katim na stretim gut bilong wokim ol tebol, fom, na ol arapela samting.

Yu ting Jisas i bin kisim amamas long mekim dispela wok?— Olsem wanem? Bai yu amamas sapos yu inap wokim ol gutpela tebol na sia na ol narapela samting bilong ol man i ken yusim?— Baibel i tok i gutpela long man i ‘amamas long olgeta samting em i mekim.’ Pasin bilong mekim wok i save kamapim wanpela kain amamas em yu no inap kisim long pasin bilong pilai.​—Saveman 3:22.

Wok i save helpim tingting na bodi bilong yumi. Planti pikinini i save sindaun tasol na lukim TV o pilai ol vidio gem. Dispela i mekim na ol i pat tumas na ol i no gat strong, na ol i no amamas tumas. Na tu, ol i no mekim ol arapela i amamas. Yumi mas mekim wanem na bai yumi ken stap amamas?—

Long Sapta 17 bilong dispela buk yumi bin kisim save olsem pasin bilong givim na mekim samting bilong helpim ol arapela i save kamapim amamas. (Aposel 20:35) Baibel i kolim Jehova olsem “em i as bilong pasin tru bilong amamas.” (1 Timoti 1:​11) Na olsem yumi bin ritim long Buk Sindaun, Jisas i bin “amamas i stap oltaim long ai bilong Bikpela.” Bilong wanem Jisas i amamas?— Em i kolim wanpela as taim em i tok: “Papa bilong mi em i save wok oltaim i kam inap long nau. Na mi tu mi save wok.”​—Jon 5:​17.

Taim Jisas i stap long graun, em i no bin mekim wok kapenta long olgeta taim, nogat. God Jehova i gat wanpela narapela kain wok em i laik bai Jisas i mas mekim long graun. Yu save em wanem wok?— Jisas i tok: “Mi mas autim gutnius bilong kingdom bilong God . . . God i salim mi na mi kam bilong mekim dispela wok.” (Luk 4:43) Long sampela taim Jisas i autim tok long ol man, ol i bilipim em na tokim ol arapela tu long ol samting em i tokim ol long en, olsem dispela meri Samaria yu lukim long piksa i mekim.​—Jon 4:​7-​15, 27-​30.

Jisas i gat wanem tingting long dispela wok? Yu ting em i gat laik long mekim?— Jisas i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:​34) Olsem wanem? Ating yu save amamas tru long kaikai wanpela feiveret kaikai bilong yu, a?— Dispela inap helpim yu long save olsem Jisas i bin laikim tru dispela wok God i bin givim em long mekim.

God i wokim yumi na bai pasin bilong lain long mekim wok i helpim yumi long stap amamas. Em i tok presen em i givim long ol man em ol i mas ‘amamas long wok ol i mekim.’ Olsem na sapos yu lain long mekim wok taim yu liklik yet, bai yu stap amamas long laip olgeta bilong yu.​—Saveman 5:​19.

Dispela i no makim olsem liklik pikinini i ken mekim wok bilong bikpela man, nogat, tasol yumi olgeta i ken mekim sampela wok. Ating long olgeta de papamama bilong yu i save go wok bilong kisim mani na bai famili bilong yu i gat kaikai na haus bilong i stap long en. Na ating yu save olsem i gat planti wok bilong mekim long haus na bai ol samting i stap stret na haus i stap klin.

I gat wanem wok i stap em yu inap mekim bilong helpim famili olgeta?— Yu ken helpim long putim kaikai long tebol, wasim ol plet, kisim pipia i go ausait, klinim rum bilong yu, na putim gut ol toi. Ating yu save mekim sampela bilong ol dispela wok. Em ol gutpela wok tru bilong helpim famili.

Yumi ken stori long olsem wanem ol kain wok olsem i helpim ol arapela. Taim yu pilai pinis long ol toi, yu mas putim ol i go bek long ples stret bilong ol. Bilong wanem dispela i bikpela samting?— Haus bai stap stret, na ol eksiden i no ken kamap. Sapos yu no putim gut ol toi, ating wanpela taim mama bilong yu i karim planti samting na i krungutim wanpela toi. Em inap pundaun na kisim bagarap. Ating em i mas go long haus sik. Dispela i no gutpela samting, a?— Olsem na taim yu pilai pinis long ol toi na yu putim ol i go long ples bilong ol, dispela i helpim olgeta.

I gat narapela wok tu ol pikinini i mas mekim. Olsem: Skul wok. Long skul yu lain long rit. Sampela pikinini i amamas long rit, tasol sampela i ting i hatwok long mekim olsem. Maski sapos pastaim i hatwok, yu bai amamas sapos yu lain long rit gut. Taim yu save long rit, i gat planti gutpela samting em yu inap lainim. Bai yu inap long ritim buk bilong God yet, em Baibel. Olsem na taim yu mekim gut ol skul wok bilong yu, dispela bai helpim yu tru, a?—

I gat sampela man em ol i no laik mekim wok. Ating yu save long sampela man olsem. Tasol God i bin wokim yumi bilong mekim wok, olsem na yumi mas lain long amamas long en. Bikpela Tisa i bin amamas long wok bilong em olsem wanem?— Em i olsem pasin bilong kisim feiveret kaikai bilong em. Em i stori long wanem wok?— Em wok bilong tokim ol arapela long God Jehova na olsem wanem ol inap kisim laip oltaim.

Olsem na bilong helpim yumi long amamas long mekim wok, yumi ken askim yumi yet olsem, ‘I gat wanem as na mi mas mekim dispela wok?’ Taim yu save olsem wanpela wok i bikpela samting, dispela i mekim na yu no hatwok long mekim dispela wok. Na maski dispela wok i bikpela o liklik, yu mas mekim gut. Sapos yu mekim olsem, bai yu amamas long wok yu mekim long han bilong yu yet, olsem Bikpela Tisa i bin mekim.