I Stap na Wok Bilong Jisas

Em i Lusim Haus Bilong Jairus na Go Bek long Nasaret

LONG dispela de Jisas i bin mekim planti wok—em i kam long sip long Dekapolis, na oraitim meri i save karim blut, na kirapim bek pikinini meri bilong Jairus. Tasol i gat sampela wok moa Jisas i mekim. Dispela de i no pinis yet. Taim Jisas i lusim haus bilong Jairus, tupela aipasman i bihainim em na ol i singaut: “Yu Pikinini Bilong Devit, yu mas sori long mitupela.”

Taim ol i kolim Jisas olsem “Pikinini Bilong Devit,” ol i kamapim bilip bilong ol, ol i bilip olsem Jisas em i tumbuna pikinini bilong kisim sia king bilong Devit, olsem na em i dispela Krais em God i tok promis long em bai kamap. Tasol Jisas i mekim olsem em i no bin harim singaut bilong ol, long wanem em i laik traim ol olsem ol i laik tru long Jisas i helpim ol o nogat. Tasol tupela man ol i no les. Ol i bihainim Jisas i go long ples em i save slip long en, na taim em i go insait long haus ol i bihainim em i go insait.

Ol i kam insait long haus na Jisas i askim ol: “Yutupela i bilip olsem mi inap mekim dispela samting, o nogat?”

Tupela i tok: “Yes, Bikpela.”

Orait Jisas i putim han long ai bilong tupela na em i tok: “Yutupela i bilip long mi. Olsem tasol dispela samting i ken kamap long yutupela.” Na ai bilong tupela i op. Na Jisas i givim strongpela tok long tupela olsem, “Yutupela i no ken tru larim wanpela man i save long dispela i bin kamap long yutupela.” Tasol tupela i amamas tru; ol i no tingim tok bilong Jisas na ol i go tokim ol manmeri long olgeta hap bilong dispela distrik long ol gutpela wok Jisas i save mekim.

Orait tupela man i wokabaut i go, na ol lain manmeri i kisim wanpela man i kam long Jisas. Dispela man i gat spirit nogut i stap long em na i mauspas. Jisas i rausim dispela spirit nogut na kwiktaim dispela man i toktok. Ol manmeri ol i kirap nogut long dispela ol mirakel na ol i tok: “Bipo i no gat kain samting olsem i kamap long kantri Israel.”

Ol Farisi tu i stap. Ol i no inap sakim ol dispela mirakel, tasol bel bilong ol i nogut na ol i no laik bilip long Jisas, olsem na ol i sutim tok long em long ol strongpela wok em i save mekim na ol i tok gen, olsem: “Em i save rausim ol spirit nogut long strong bilong hetman bilong ol spirit nogut.”

Bihain long dispela, Jisas i go bek long as ples bilong em, em Nasaret, na long dispela taim ol disaipel bilong em i go wantaim em. Bipo, olsem wanpela yia i go pinis, em i bin go long haus lotu na lainim ol man. Maski ol manmeri i kirap nogut long gutpela tok bilong em, bihain ol i bel nogut long tok em i autim na ol i traim long kilim em. Nau Jisas i marimari long ol na em i laik helpim gen ol wanples bilong em.

Taim Jisas i stap long ol narapela ples ol manmeri i bung i kam long Jisas, tasol long dispela ples ol i no mekim olsem. Olsem na long de Sabat, em i go long haus lotu long givim lo bilong God long ol manmeri. Na planti ol i kirap nogut long tok bilong em, ol i tok: “Dispela man em i kisim dispela save we? Na olsem wanem em inap wokim ol mirakel? Yumi save, dispela man em i pikinini bilong wanpela kamda, na Maria em i mama bilong en. Na Jems na Josep na Saimon na Judas, ol i brata bilong en. Na olgeta susa bilong em, ol i stap wantaim yumi. Olsem wanem na em inap mekim ol dispela samting?”

Ol i tok, ‘Jisas em i olsem yumi tasol. Mipela lukim em i kamap bikpela na mipela save long famili bilong em. Olsem wanem na ol i tok em i dispela Man mipela wetim em i kam?’ Maski ol i lukim bikpela save bilong em na ol wok mirakel bilong em, ol i sakim em. Ol wanhaus bilong em tu, ol i save gut long em, tasol ol i no bilip long em. Dispela i mekim na Jisas i tok: “Profet i gat nem long olgeta ples. Tasol long as ples bilong en, na namel long ol wanblut bilong en, na long haus bilong en stret, em i no gat nem.” Jisas i tingting planti long ol i no bilip. Olsem na em i no wokim planti mirakel long dispela hap, em i wokim wan wan tasol, olsem em i putim han bilong em long sampela sikman na oraitim ol. Matyu 9:27-34; 13:54-58; Mak 6:1-6; Aisaia 9:7.

◆ Taim ol aipasman i kolim Jisas olsem “Pikinini Bilong Devit,” ol i kamapim bilip bilong ol long wanem samting?

◆ Ol Farisi i tok i gat wanem as bilong ol strongpela wok mirakel bilong Jisas?

◆ Olsem wanem yumi ken tok, Jisas i mekim pasin marimari taim em i go bek na helpim ol lain long Nasaret?

◆ Taim Jisas i go long Nasaret, ol Nasaret i mekim wanem? Bilong wanem ol i mekim olsem?

[Piksa i karamapim pes olgeta long pes 9]