“Kam Bihainim Mi”

“Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.”​​—LU. 9:​23.

1, 2. (a) Jisas i singautim ol man long mekim wanem? (b) Yu yet i bin mekim wanem long dispela singaut bilong Jisas?

KLOSTU long pinis bilong wok bilong Jisas long graun, em i autim tok long Perea, em wanpela distrik long hapsait bilong wara Jordan, long hap not-is bilong Judia. Wanpela yangpela man i askim Jisas long em i mas mekim wanem bilong kisim laip oltaim. Taim Jisas i save olsem dispela yangpela man i bihainim Lo Bilong Moses, em i tokim em: “Yu go salim ol samting bilong yu, na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” (Mk. 10:21) Tingim​​—em wanpela singaut bilong bihainim Jisas, em dispela wanpela Pikinini tasol bilong God Antap Tru!

² Dispela yangpela man i sakim dispela singaut, tasol i gat sampela i amamas long bihainim. Paslain long dispela, Jisas i bin tokim Filip: “Yu kam bihainim mi.” (Jo. 1:​43) Filip i bihainim dispela singaut na bihain em i kamap wanpela aposel. Jisas i mekim wankain singaut long Matyu, na Matyu tu i bihainim. (Mt. 9:9; 10:​2-4) Tasol dispela singaut i no go long ol tasol, nogat, em i go long olgeta man i laikim stretpela pasin. Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.” (Lu. 9:​23) Olsem na olgeta man husat i gat laik tru long bihainim Jisas, ol inap mekim olsem. Olsem wanem? Yu yet i gat dispela laik? Planti bilong yumi i kirap pinis long bihainim dispela gutpela singaut bilong Jisas, na taim yumi autim tok yumi save tokim ol narapela long dispela singaut.

 3. Wanem samting bai helpim yumi na bai yumi no lusim pasin bilong bihainim Jisas?

³ Tasol sori tru, sampela husat i laikim tok i tru bilong Baibel na ol i kirap long stadi, bihain ol i slek na “lusim” pasin bilong bihainim Jisas. (Hi. 2:1) Wanem samting bai helpim yumi na bai yumi no mekim olsem? Yumi ken askim yumi yet: ‘I gat wanem as na mi bin kirap long bihainim Jisas? Pasin bilong bihainim em i makim wanem samting?’ Taim yumi tingim bekim bilong dispela tupela askim, dispela bai strongim yumi long wokabaut yet long dispela gutpela rot yumi bin makim long bihainim. Na tu, em bai helpim yumi long strongim ol arapela long bihainim Jisas.

Bilong Wanem i Gutpela Yumi Bihainim Jisas?

4, 5. Olsem wanem Jisas inap tru long i stap Lida bilong yumi?

⁴ Profet Jeremaia i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jer. 10:23) Ol samting i bin kamap long graun i soim klia olsem dispela tok bilong Jeremaia i stret​—ol man i gat sin ol i no inap bosim gut ol yet. Yumi harim singaut bilong Jisas na bihainim em, long wanem, yumi save olsem em inap tru long stap Lida bilong yumi​—i no gat wanpela man bilong graun inap i stap kain lida olsem. Tingim sampela mak em Jisas i inapim.

⁵ Namba wan, Jehova yet i bin makim Jisas long kamap Lida. Man Bilong Wokim yumi em i save yumi mas i gat wanem kain Lida! Namba 2, Jisas i gat ol pasin em yumi inap laikim na bihainim. (Ritim Aisaia 11:​2, 3.) Em i stap nambawan gutpela piksa tru. (1 Pi. 2:​21) Namba 3, Jisas i save tingim tru ol man i bihainim em; em i dai bilong helpim ol. (Ritim Jon 10:​14, 15.) Na em i wanpela gutpela wasman i stiaim yumi i go long gutpela laip, em laip i givim amamas long yumi long nau na i bringim yumi long laip i stap gut oltaim long bihain. (Jo. 10:​10, 11; KTH 7:​16, 17) Long ol dispela as na long sampela as moa, yumi bin makim gutpela rot long bihainim taim yumi kirap bihainim em. Tasol wanem ol samting i insait long pasin bilong bihainim em?

6. Wanem ol samting i insait long pasin bilong bihainim Jisas?

⁶ Bilong bihainim tru Krais, i no olsem yumi tok tasol yumi bihainim em, nogat. Inap 2 bilion manmeri long nau i tok ol i Kristen, tasol pasin bilong ol i kamapim klia olsem ol i “man bilong mekim pasin nogut.” (Ritim Matyu 7:​21-​23.) Taim ol man i soim olsem ol i laikim dispela singaut bilong bihainim Jisas, yumi helpim ol long save olsem ol Kristen tru i save bihainim ol tok na pasin bilong Jisas long olgeta wokabaut bilong ol​—na long olgeta de. Bilong kamapim klia dispela samting, tingim sampela samting bilong Jisas yumi save pinis long en.

Olsem Jisas i Bin Mekim, Bihainim Savetingting

7, 8. (a) Savetingting em wanem samting? Olsem wanem na Jisas i gat bikpela savetingting? (b) Olsem wanem Jisas i soim olsem em i gat savetingting, na olsem wanem yumi ken bihainim em?

⁷ Jisas i bin kamapim planti gutpela pasin, tasol yumi bai skelim 4-pela tasol: savetingting, pasin daun, pasin bilong givim bel tru long wok, na pasin laikim. Pastaim bai yumi skelim savetingting bilong em​​—em pasin bilong em long mekim gutpela wok long ol save em i bin kisim. Aposel Pol i tok: “Olgeta kain save na tingting . . . i pulap long Krais, olsem mani i pulap long beng.” (Kl. 2:3) Jisas i kisim we ol dispela savetingting? Em yet i tok: “Mi save autim olgeta tok olsem Papa i bin soim mi.” (Jo. 8:​28) Em nau, Jehova i bin givim dispela savetingting long em, olsem na yumi no kirap nogut long gutpela tingting Jisas i bihainim.

⁸ Olsem: Jisas i bihainim gutpela tingting taim em i makim rot em i laik bihainim. Em i no wok long kisim planti samting bilong skin, nogat, em i putim tingting i go long wanpela samting tasol: pasin bilong bihainim laik bilong God. Em i yusim taim na strong bilong em long helpim wok bilong Kingdom. Yumi bihainim pasin bilong Jisas taim ‘ai bilong yumi i gutpela’ na yumi no holim planti samting i save kisim taim na strong bilong yumi na i putim hevi long yumi. (Mt. 6:​22) Planti Kristen i bin lusim sampela samting bilong skin ol i holim bambai ol i ken lusim bikpela hap taim moa long mekim wok autim tok. Sampela i bin insait long wok painia. Sapos yu wanpela olsem, dispela em i gutpela samting tru. Pasin bilong ‘painim kingdom pastaim’ i mekim na man i save stap amamas na belgut tru.​​—Mt. 6:​33, Nupela Testamen na Ol Sam.

Bihainim Jisas Long Mekim Pasin Daun

9, 10. Wanem samting i soim olsem Jisas i gat pasin daun?

⁹ Namba tu pasin bilong Jisas yumi ken skelim, em pasin daun. Taim ol man bilong graun i kisim bikpela namba, planti ol i save hambak na ting ol i samting tru. Tasol Jisas i no olsem! Maski em i holim bikpela wok insait long ol samting Jehova i tingting pinis long mekim, em i no hambak liklik. Yumi tu i mas i gat pasin daun. Aposel Pol i tok: “Yupela i mas holim wankain tingting olsem Krais Jisas i bin holim. Em i stap [“kain olsem,” NW] God tru, tasol em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man.” (Fl. 2:​5-7) Wanem ol samting i insait long dispela?

¹⁰ Jisas i bin stap wantaim Papa bilong em long heven na dispela i wanpela gutpela samting tru, tasol em i orait long “lusim” olgeta samting em i bin holim. God i kisim laip bilong em na putim long bel bilong wanpela nupela meri Juda, na bihain long 9-pela mun em i kamap wanpela liklik bebi insait long famili bilong wanpela kamda nating. Bihain, long haus bilong Josep, Jisas i kamap liklik pikinini, bihain liklik mangi, na yangpela man. Em i no gat sin. Tasol taim em i yangpela, oltaim em i save bihainim tok bilong papamama bilong em ol i gat sin. (Lu. 2:​51, 52) Pasin daun bilong em i narapela kain tru, laka?

11. Wanem sampela rot we yumi inap bihainim pasin daun bilong Jisas?

¹¹ Yumi bihainim pasin daun bilong Jisas taim yumi amamas long mekim ol wok i no gat nem. Tingim wok bilong autim gutnius. Dispela wok inap luk olsem wanpela wok i no gat nem, na moa yet taim ol man i les long harim tok, o ol i tok bilas, o birua long yumi. Tasol taim yumi strong yet long autim tok, yumi save helpim ol man long bihainim singaut bilong Jisas long bihainim em. Long dispela rot yumi helpim ol man long abrusim bagarap. (Ritim 2 Timoti 4:​1-5.) Narapela wok em wok bilong lukautim Haus Kingdom bilong yumi, olsem rausim pipia, mopim plua, na klinim toilet​​—em ol wok i no gat nem liklik! Tasol yumi save olsem wok bilong lukautim Haus Kingdom​​—em ples bilong mekim lotu i tru​​—em wanpela hap wok lotu bilong yumi. Taim yumi amamas long mekim ol wok i olsem wok i no gat nem, yumi kamapim olsem yumi gat pasin daun, na long dispela rot yumi bihainim lek mak bilong Krais.

Olsem Jisas, Givim Bel Long Mekim Wok

12, 13. (a) Jisas i bin givim bel long mekim wanem wok? Wanem samting i bin kirapim em? (b) Wanem samting bai kirapim yumi long givim bel long wok bilong autim tok?

¹² Tingim pasin bilong Jisas long givim bel long mekim wok bilong God. Jisas i mekim kain kain wok taim em i stap long graun. Taim em i yangpela yet, ating em i wok wantaim waspapa bilong em, Josep, long mekim wok kamda. Long wok bilong God em i mekim, em i wokim ol mirakel, olsem oraitim ol sikman na kirapim bek ol man i dai pinis. Tasol nambawan bikpela wok bilong em, em wok bilong autim gutnius na skulim ol man i gat laik long harim tok. (Mt. 4:​23) Yumi save bihainim em, olsem na yumi gat wankain wok bilong mekim. Orait, olsem wanem yumi inap bihainim pasin bilong em? Wanpela samting, em yumi mas kisim wankain tingting i bin kirapim Jisas long mekim dispela wok.

¹³ Nambawan samting i kirapim Jisas long autim tok na skulim ol man, em pasin bilong laikim tru God. Na tu, em i laikim tru ol dispela tok i tru em i autim. Ol dispela tok i gutpela samting tru long em, na em i gat bikpela laik long helpim ol narapela long save long ol dispela tok i tru. Yumi mekim wok tisa, olsem na yumi tu i pilim olsem. Tingim sampela gutpela tok i tru bilong Baibel yumi bin kisim save long en! Yumi save long dispela bikpela tok i bin kamap long husat i gat rait long stap nambawan bos, na rot bilong stretim dispela tok. Yumi kliagut long tok Baibel i mekim long man i dai pinis i stap olsem wanem, na ol blesing ol man bai kisim long nupela taim God bai kamapim. Ol dispela tok i tru i gutpela samting tru, maski nau tasol yumi bin kisim save long en o long bipo yet. (Ritim Matyu 13:52.) Taim yumi autim tok na amamas long mekim, yumi kamapim long ol narapela olsem yumi laikim tru ol dispela tok Jehova i bin skulim yumi long en.

14. Olsem wanem yumi inap bihainim pasin bilong Jisas long skulim ol man?

¹⁴ Tingim tu pasin bilong Jisas long skulim ol man. Oltaim em i save stiaim tingting bilong ol man i go long Baibel. Planti taim em i tok: “Buk bilong God i gat tok olsem.” (Mt. 4:4; 21:13) Long ol tok bilong em i stap long Baibel, em i kamapim tok bilong planti buk bilong Ol Skripsa Hibru, winim 50 pesen. Olsem Jisas i bin mekim, yumi save mekim bikpela wok long Baibel taim yumi autim tok na yumi wok long opim Baibel na kamapim sampela tok bilong en. Long dispela rot, yumi helpim ol man i gat gutpela bel long save olsem yumi skulim ol long tingting bilong God na i no bilong yumi yet. Yumi amamas tru taim wanpela i orait long ritim wanpela hap long Baibel na toktok wantaim yumi long mining bilong en. Na taim ol i bihainim singaut bilong Jisas na bihainim em, amamas bilong yumi i bikpela tru.

Bihainim Jisas Long Laikim Ol Arapela

15. Wanem wanpela gutpela pasin tru bilong Jisas? Taim yumi tingim dispela pasin, dispela inap mekim wanem long yumi?

¹⁵ Narapela pasin bilong Jisas yumi bai stori long en, em i gutpela samting tru​​—em pasin bilong em long laikim ol manmeri. Aposel Pol i tok: “Krais i bin givim bel bilong en long mipela, na dispela i save kirapim mipela long wok.” (2 Ko. 5:​14) Taim yumi tingim pasin bilong Jisas long laikim olgeta lain manmeri, na yumi wan wan, yumi pilim tru dispela long bel, na dispela i kirapim yumi long bihainim pasin bilong em.

16, 17. Long wanem ol rot Jisas i soim pasin laikim long ol arapela?

¹⁶ Olsem wanem Jisas i bin soim pasin laikim long ol arapela? Em i amamas long lusim laip bilong em bilong helpim ol manmeri, na dispela em i nambawan bikpela samting i soim pasin laikim bilong em. (Jo. 15:13) Tasol taim Jisas i mekim wok bilong em long graun, em i soim pasin laikim long ol arapela rot tu. Em i save sori long ol man i kisim pen na hevi. Taim em i lukim Maria na sampela arapela i krai long Lasarus i dai pinis, Jisas i pilim tru bel hevi bilong ol. Maski em bai kirapim bek Lasarus, Jisas i bel sori tru na em i “krai.”​​—Jo. 11:​32-35.

¹⁷ Taim Jisas i kirap mekim wok bilong em long graun, wanpela lepraman i kam long em na i tok: “Sapos yu laik, yu inap long mekim mi i kamap klin long ai bilong God.” Jisas i mekim wanem? Baibel i tok: “Jisas i sori tru long em.” Orait nau em i mekim wanpela narakain samting. “[Em] i putim han long em, na i tokim em olsem, ‘Mi laik. Yu kamap klin.’ Orait wantu sik lepra i lusim dispela man, na em i kamap klin.” Aninit long Lo Bilong Moses, ol man i gat sik lepra ol i no klin, na bilong oraitim dispela lepraman, i no olsem Jisas i mas putim han long em, nogat. Tasol taim Jisas i wok long oraitim dispela lepraman, Jisas i larim em i pilim han bilong em. Ating em namba wan taim insait long planti yia em wanpela i bin tatsim em. Em bikpela sori tru Jisas i kamapim, laka?​​—Mk. 1:​40-​42.

18. Olsem wanem yumi ken soim olsem yumi pilim tru hevi bilong narapela?

¹⁸ Yumi save bihainim Krais, olsem na yumi mas soim pasin laikim long rot bilong “sori” na pilim tru hevi bilong narapela. (1 Pi. 3:8) Ating i hatwok long pilim tru tingting bilong wanpela wanbilip husat i gat bikpela sik o sik bilong bel hevi​—na moa yet sapos yumi yet i no bin kisim kain hevi olsem. Tasol Jisas i bin pilim hevi bilong ol man i gat sik, maski em yet i no bin sik wanpela taim. Olsem wanem yumi ken kisim wankain pasin? Yumi ken putim gut yau taim ol man i karim pen ol i kamapim tingting i stap long bel bilong ol. Na yumi ken askim yumi yet: ‘Sapos mi gat wankain hevi olsem ol, mi bai pilim olsem wanem?’ Sapos yumi kisim pasin bilong pilim tru hevi bilong ol narapela, bai yumi inap mekim ol gutpela tok i save “strongim bel bilong ol man” i bel hevi. (1 Te. 5:​14) Long dispela rot bai yumi bihainim Jisas.

19. Pasin bilong Jisas inap mekim wanem long yumi?

¹⁹ Em i gutpela samting tru long stadi long ol tok na pasin bilong Jisas Krais, a? Taim yumi kisim bikpela save moa long em, laik bilong yumi long bihainim pasin bilong em i save go bikpela​​—na laik bilong yumi long helpim ol arapela long mekim olsem, dispela tu i save go bikpela. Olsem na yumi mas amamas long bihainim King Mesaia​​—nau na long olgeta taim bihain!

Yu Inap Stori Long Dispela?

• Olsem wanem yumi ken bihainim savetingting olsem Jisas i bin mekim?

• Long wanem ol rot yumi ken bihainim pasin daun?

• Olsem wanem yumi inap kisim pasin bilong givim bel long wok autim tok?

• Long wanem ol rot yumi ken bihainim Jisas long soim pasin laikim long ol narapela?

[Blok/Piksa long pes 5]

WANPELA BUK I HELPIM YUMI LONG BIHAINIM KRAIS

Long kibung distrik bilong 2007, ol i kamapim wanpela nupela buk long tok Inglis i gat 192-pes long en, nem bilong en “Come Be My Follower.” Wok bilong dispela buk i bilong helpim ol Kristen long putim tingting i go long Jisas, long ol pasin bilong em na ol samting em i mekim. Bihain long sapta 1 na sapta 2, namba wan hap bilong buk i stori long ol nambawan gutpela pasin bilong Jisas​—pasin daun, strongpela bel, savetingting, pasin bilong bihainim tok, na pasin bilong sanap strong na karim hevi.

Bihain, i gat ol hap i stori long ol wok bilong Jisas olsem tisa na man bilong autim gutnius, na long sampela rot we em i kamapim bikpela pasin laikim bilong em. Long olgeta hap bilong buk, i gat ol tok bilong helpim Kristen long bihainim pasin bilong Jisas.

Mipela i bilip olsem dispela buk bai kirapim yumi olgeta long skelim yumi yet na askim olsem: ‘Mi save bihainim tru Jisas? Olsem wanem mi inap bihainim moa yet pasin bilong em?’ Buk bai helpim tu ‘ol manmeri, bel bilong ol i gutpela tru bilong kisim laip oltaim,’ long bihainim Krais.​—Ap. 13:48.

[Piksa long pes 4]

Jisas i orait long kam long graun na kamap wanpela liklik bebi. Bilong mekim olsem, em i mas i gat wanem kain pasin?

[Piksa long pes 6]

Wanem samting bai kirapim yumi long givim bel long wok autim tok?