I Stap na Wok Bilong Jisas

Em i Sori Long Ol Man i Gat Hevi

JISAS i krosim ol Farisi long wanem ol i sakim tok bilong God na bihainim lo bilong ol tumbuna, na nau em wantaim ol disaipel bilong em i go long hap bilong Tair na Saidon, longwe long hap bilong not, na bai ol i ken malolo liklik. Tupela ples hia i no stap long hap bilong Israel, na ating long dispela wanpela taim tasol Jisas na ol disaipel i bin lusim hap bilong Israel.

Ol i painim pinis wanpela haus bilong i stap long en, na em i no laik bai wanpela man i save olsem em i stap long dispela hap. Tasol maski em i stap longwe long graun bilong Israel, ol manmeri i save long em. Wanpela meri bilong lain Grik em i kam painim Jisas na askim em: “Bikpela, yu Pikinini Bilong Devit, yu mas sori long mi. Spirit nogut i bagarapim tru pikinini meri bilong mi.” Tasol Jisas i no bekim wanpela tok long em.

Bihain ol disaipel i kam tokim Jisas: “Dispela meri em i singaut singaut na i bihainim yumi i kam. Yu salim em i go.” Tasol Jisas i no mekim wanpela samting. Em i tokim ol long as bilong dispela, em i tok, “God i bin salim mi i kam long ol lain bilong Israel tasol, bilong helpim ol dispela sipsip i lus.”

Tasol dispela meri i no les​—⁠em i singaut yet long Jisas i mas helpim em. Em i kam klostu long Jisas na i brukim skru na putim pes i go daun long graun, na i tok: “Bikpela, yu mas helpim mi.”

Jisas i pilim tru tok bilong dispela meri. Tasol em i stori gen long namba wan wok bilong em long helpim lain bilong God, em ol Israel. Tasol em i laik traim bilip bilong dispela meri, olsem na em i kamapim tingting bilong ol Juda, em ol i no save laikim ol manmeri bilong narapela lain, na em i tok: “Nogut yumi kisim kaikai bilong ol pikinini na tromoi i go long ol [liklik] dok.”

Ol Juda i ting ol narapela lain ol i olsem dok, tasol Jisas i mekim dispela tok long gutpela pasin isi, na pes bilong em tu i makim olsem em i sori long ol manmeri i no bilong lain Juda. Olsem na dispela meri i no kros long tok bilong Jisas. Long pasin daun em i tok: “Bikpela, yu tok tru. Tasol ol dok i save kisim ol hap kaikai i pundaun aninit long tebol bilong ol papa bilong ol.”

Jisas i tokim em: “Meri, bilip bilong yu em i bikpela tru. Samting yu laik i mas kamap long yu, em i ken kamap.” Olsem na taim meri i go bek long haus, em i lukim pikinini i sindaun long bet, na ol spirit nogut i lusim em pinis na em i orait gen.

Jisas na ol disaipel i lusim hap bilong Saidon na ol i brukim wara Jordan na ol i go long hap bilong Dekapolis long hap bilong is bilong raunwara Galili. Ol i go antap long wanpela maunten, na ol manmeri i kam painim ol long dispela hap, na ol i wok long bringim ol lek nogut na ol bun krungut na ol aipas na ol mauspas na planti narapela sikman tu na ol i putim ol klostu long lek bilong Jisas, na em i oraitim sik bilong ol. Taim ol i lukim ol mauspas i toktok, na ol lek nogut i wokabaut, na ol aipas i lukluk, ol i kirap nogut; na ol i litimapim nem bilong God bilong Israel.

Jisas i pilim tru hevi bilong wanpela yaupas i no inap toktok gut. Dispela man i sem, olsem na Jisas i sori long em na kisim em i go longwe liklik na tupela tasol i stap. Nau Jisas i putim pinga bilong em long tupela yau bilong dispela man, na bihain em i spet long pinga bilong em yet na putim pinga long tang bilong dispela man. Na em i lukluk i go long heven, na em i tok: “Yu op.” Wantu yau bilong dispela man i op na em inap toktok gut.

Jisas i oraitim sik bilong planti manmeri, na ol i pilim tru dispela samting. Ol i tok: “Olgeta samting em i mekim, em i mekim gutpela tasol. Em i mekim ol yaupas i harim tok, na ol mauspas i toktok.” Matyu 15⁠:​21-31; Mak 7⁠:​24-37.

◻ Bilong wanem Jisas i no kirap kwik na oraitim pikinini meri bilong wanpela meri Grik?

◻ Bihain Jisas i kisim ol disaipel bilong em i go we?

◻ Jisas i mekim wanem gutpela pasin sori taim em i laik oraitim wanpela yaupas em i no inap toktok gut?