Yu Ran Strong Long Resis Bilong Kisim Laip?
“Ol man i ran long resis, olgeta i save ran, na wanpela tasol i save kisim prais. Ating yupela i no save long dispela? Orait yupela tu i mas ran strong bilong kisim prais.”—1 KORIN 9:24.
1. Baibel i tok, i stap bilong yumi ol Kristen i olsem wanem samting?
BAIBEL i tok piksa long yumi ran long resis bilong kisim laip. Aposel Pol i stori long em yet na i tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God.” Na em i tokim ol wanwok Kristen long mekim olsem, na em i tok: “Yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en.”—2 Timoti 4:7; Hibru 12:1.
2. Yumi amamas long wanem gutpela samting bilong dispela resis bilong kisim laip?
2 Dispela tok piksa i stret, long wanem, sapos ol i laik ran long resis, pastaim ol i mas kirap long ran, na ol i mas bihainim rot, na i gat mak ol i mas winim. Na i olsem tasol long i stap bilong yumi long ol samting bilong spirit. Long olgeta yia planti tausen nupela man i kirap long mekim ol samting bilong kisim laip, olsem ran long dispela resis. Long 5-pela yia i go pinis 1,336,429 nupela man i dediket na kisim baptais. Em gutpela, tasol nogut bihain ol i les; ol i mas i stap long dispela resis inap long ol i winim mak. Orait, olsem wanem long yu?
Ran Long Resis Bilong Kisim Laip
3, 4. (a) Pol i tok wanem long yumi mas ran strong long dispela resis? (b) Sampela man i no bihainim tok bilong Pol na ol i mekim wanem?
3 Em i bikpela samting long yumi mas ran yet long dispela resis, olsem na Pol i tok: “Ol man i ran long resis, olgeta i save ran, na wanpela tasol i save kisim prais. Ating yupela i no save long dispela? Orait yupela tu i mas ran strong bilong kisim prais.”—1 Korin 9:24.
4 Taim ol i bin resis long bipo, wanpela man tasol i bin win, tasol long resis bilong kisim laip, olgeta man inap win, na bilong mekim olsem, ol i no ken lusim rot inap long ol i kamap long mak! Planti ol i bin mekim olsem i go inap long ol i dai, olsem Pol i bin mekim. Na planti milion moa ol i ran yet. Tasol sampela i no bin givim bel long resis i go inap long kisim mak. Ol i larim sampela samting i pulim ol, na ol i pundaun, o ol i bin brukim lo bilong resis na ol i raus na ol i no stap moa long en. (Galesia 5:7) Yumi mas tingim dispela samting na bai yumi ken skelim ran bilong yumi yet, yumi stap gut long resis o nogat.
5. Pol i tok, dispela resis bilong kisim laip em i wankain stret olsem taim ol man i pilai na resis, o olsem wanem?
5 Tasol yumi laik save, Pol i bin tingim wanem samting taim em i tok, “wanpela tasol i save kisim prais”? Em i no tok, wanpela tasol insait long resis bilong kisim laip bai win na olgeta narapela bai lus. Em i no tok, wanpela tasol bai kisim laip oltaim. Long wanem, planti taim em i bin tok, God i laik bai olgeta man i ken tanim bel na bai em i ken kisim bek ol na ol i no ken lus. (Rom 5:18; 1 Timoti 2:3, 4; 4:10; Taitus 2:11) Pol i no tok, narapela i laik winim narapela long dispela resis long kisim laip, olsem ol i save mekim long taim ol i pilai na i ran long resis. Ol Korin i save long tingting bilong ol man i insait long resis bilong bipo kain olsem Olimpik-Gems na narapela i laik winim narapela. Orait, wanem insait bilong dispela tok bilong Pol?
6. Pol i tingim wanem samting taim em i toktok long man bilong ran long resis?
6 Taim Pol i tok piksa long man i insait long wanpela resis, em i toktok long em yet em i laik i stap strong i go inap long em i kisim laip oltaim. Paslain long taim em i bin toktok long resis em i bin stori long em i wok strong na givim bel long mekim wok bilong God. (1 Korin 9:19-22) Na long 1Korin 9 ves 23 em i tok: “Mi save mekim dispela olgeta wok bilong mekim gutnius bilong Jisas i kamap strong, bai mi tu mi ken kisim ol gutpela samting Bikpela i redim pinis bilong givim long ol man i bilip long gutnius.” Pol i save, maski em i wanpela aposel, na maski em i bin mekim bikpela wok long autim gutpela tok long ol narapela man, dispela tasol i no inap long em i kisim prais. Em i mas wok yet long givim bel long dispela wok. Em i mas mekim olsem man i stap long resis na i tingting strong long win na em i taitim bun, olsem ol man i mekim taim “wanpela tasol i save kisim prais.”—1 Korin 9:24a.
7. Yumi mas mekim wanem bilong winim dispela resis na kisim laip?
7 Yumi ken kisim save na tingting long dispela tok piksa bilong Pol long resis. Olgeta man insait long resis ol i laik win, tasol sapos ol i no givim bel long win, ol i no inap win. Olsem na yumi no ken ting sapos yumi insait tasol long dispela resis, em inap long helpim yumi long win. Dispela tasol i no inap. Yumi no ken ting, sapos yumi insait long tok i tru, dispela samting tasol inap helpim yumi long winim dispela resis bilong kisim laip. Nogat. Ating yumi tok yumi Kristen, tasol olsem wanem? Yumi gat strong bilong Kristen inap long mekim wok bilong Kristen tru? Yumi save mekim ol wok bilong Kristen, olsem go long ol miting bilong ol, na raun autim tok wantaim ol, na ol narapela wok olsem? Sapos yumi mekim olsem, em gutpela, na yumi ken i stap strong long bihainim yet dispela gutpela pasin. Tasol olsem wanem? Yumi inap mekim sampela samting moa? Yumi save redim gut ol samting bilong miting na bai yumi ken bekim tok na helpim miting? Yumi save bihainim ol tok yumi lain pinis long en? Yumi save mekim gutpela wok moa long pasin bilong autim tok, maski ol man i givim hevi long yumi? Yumi strong long i go bek lukim gen ol man i bin harim tok, na traim kirapim Baibel-stadi wantaim ol? Pol i tok, yumi “mas ran strong bilong kisim prais.”—1 Korin 9:24b.
Bosim Gut Laik Bilong Yumi Long Olgeta Samting
8. Ating Pol i bin lukim wanem samting na em i toktok long “daunim olgeta laik bilong bodi, na wok strong bilong kisim laip”?
8 Pol i bin lukim planti ol i no givim bel moa long resis olsem ol i bin mekim long pastaim, na ol i no ran strong moa, na sampela i lusim na i no insait moa long dispela resis. (1 Timoti 1:19, 20; Hibru 2:1) Olsem na planti taim em i tokim ol narapela Kristen long wok strong long i stap gut long dispela resis. (Efesus 6:12; 1 Timoti 6:12) Em i stori moa long pasin bilong man insait long resis na i tok: “Olgeta man i laik win long resis, ol i save daunim olgeta laik bilong bodi, na wok strong bilong kisim prais.” (1 Korin 9:25a) Taim Pol i tok olsem, em i save ol Kristen long Korin i save gut long pasin bilong ol man insait long pilai resis, ol i mas lainim gut skin bilong ol na bai ol i ken win.
9, 10. (a) Wanpela stori i tok wanem long man insait long resis? (b) Wanem samting bilong dispela stori em yumi mas tingim?
9 Wanpela stori i toktok long man i insait long resis ol i bin wokim long bipo, na i tok:
‘Dispela man i stap bel isi na em i no toktok; em i bihainim tasol ol lo na tambu bilong man i laik lain long i go insait long resis, na em i mekim olsem inap 10-pela mun, em lo bilong ol man i laik ran long dispela resis. Skin bilong em i save les, na em i mas karim sampela hevi samting, tasol em i amamas long mekim olsem, long wanem, em i ting sapos em i abrusim olgeta samting inap mekim na bai em i lus long winim resis, dispela bai givim biknem long em. Em i lukim sampela ol i no tambuim skin bilong ol na ol i kaikai planti tumas, na taim ol i sotwin long taitim bun long eksasais ol i save malolo, na ol i save mekim nabaut long painim amamas bilong skin; tasol em yet i no tingim ol dispela samting, long wanem, bel bilong em i tingting tasol long winim prais, na em i save em i mas hatwok pastaim na bai em inap kisim dispela samting, na em i no inap les o malolo liklik.’—Buk The Expositor’s Bible, Volyum 5, pes 674.
10 Yu tingim hap tok bilong dispela stori, em i tok, man i lain long ran long resis em i ting sapos em i mas hatwok na i stap tambu long planti samting, dispela i gutpela samting bilong givim gutnem long em, olsem na em i no mangal liklik long ol gutpela samting bilong skin ol narapela man i kisim na em nogat. Olsem wanem? Dispela samting i ken givim sampela tingting long yumi? Tru tumas em i ken mekim olsem!
11. Yumi ol manmeri i ran long resis bilong kisim laip, yumi no ken mangalim o laikim wanem ol samting?
11 Tingim tok bilong Jisas em i tok, “dua i go long ples bilong lus, em i bikpela, na rot i go long dispela ples em i op tumas na [i no hatwok] long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i [hatwok] tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:13, 14) Taim yu bihainim dispela rot i gat hatwok, yu save mangal long ol gutpela samting bilong skin ol man long bikpela rot i kisim, tasol yu yet i no gat? Yu pilim olsem yu sot long ol amamas bilong ol narapela man na ol dispela amamas i no nogut tumas? Sapos olsem, orait, yu mas tingim tok bilong Pol em i tok: “Ol dispela prais ol i kisim, bihain bai ol i bagarap. Tasol prais yumi ting long kisim, em i no save bagarap.”—1 Korin 9:25b.
12. Biknem ol man i kisim long dispela graun, olsem wanem dispela i olsem lip bilas ol man bilong bipo i bin kisim long taim ol i winim resis?
12 Man i bin winim dispela resis long bipo, ol i givim sampela lip bilong diwai long em ol i bin ropim wantaim olsem bilas, tasol dispela samting i save drai insait long sampela de o wik. Tasol em i no bin tingim tumas dispela ol lip taim em i laik win—em i tingim biknem em bai kisim. Ol i tok, taim man i winim resis long bipo na em i go bek long ples, ol wanples i litimapim nem bilong em na i tok, ‘Ure, Ure,’ long em. Sampela taim ol i brukim banis bilong taun na bai em i gat rot bilong i go insait, na ol i sanapim piksa bilong em na bai ol man i ken tingim em. Tasol maski ol i bin mekim ol dispela samting, biknem bilong em i no stap longpela taim; bihain liklik ol man i lusim tingting long em, na long nau ol i no save tumas long ol dispela man bilong bipo ol i bin winim ol resis, na ating ol i no tingim ol. Sapos man i givim bikpela taim na strong na givim bel long painim biknem o mani kago bilong dispela graun, tasol em i no gat nem long ai bilong God, em bai lus wantaim ol dispela samting em i bin givim bel long kisim, na i olsem dispela ol lip olsem bilas ol i bin givim long man i bin winim resis.—Matyu 16:19, 20; Luk 12:16-21.
13. Resis bilong pilai, na resis bilong kisim laip, olsem wanem tupela i narapela narapela kain?
13 Ol man insait long pilai resis ol i mas eksasais strong na lainim skin bilong ol long ran long resis, tasol taim resis i pinis ol i no mekim moa; ol i lusim na ol i kirap mekim ol narapela wok bilong ol; na sapos bihain i gat resis i kamap gen, ol i kirap gen long eksasais na lainim gen skin bilong ol long mekim dispela resis. Tasol ol man insait long resis bilong kisim laip ol i no ken mekim olsem. Ol i no ken malolo long lain. Long olgeta taim ol samting ol i mekim i bilong helpim na strongim ol long i stap gut long dispela resis na bai ol i ken win na kisim prais.—1 Timoti 6:6-8.
14, 15. Ol man i ran long resis bilong kisim laip, bilong wanem ol i mas was gut na bosim strong tingting na pasin bilong ol?
14 Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” (Mak 8:34) Sapos yumi kirap long bihainim Jisas, yumi mas bihainim em long olgeta taim, na i no gat malolo long mekim olsem, nogat. Na yumi no ken mekim nating o mekim bilong kisim biknem samting, nogat. Yumi mas oltaim bihainim tok bilong Jisas, long wanem, sapos yumi no was gut na bosim tingting na pasin bilong yumi long olgeta taim, nogut wanpela taim yumi no tingting gut na yumi mekim rong na dispela i bagarapim gutnem bilong yumi long ai bilong God, na ating bai yumi lus long winim resis na kisim prais olsem laip oltaim. Yumi no save kamap strong wantu long ol samting bilong spirit, tasol wantu yumi inap pundaun sapos yumi no was gut.
15 Na Pol i tok: “Olgeta man i laik winim resis, ol i save daunim olgeta laik bilong bodi, na wok strong long kisim prais.” Yumi mas mekim dispela samting long olgeta taim, long wanem, nogut yumi bosim skin long sampela taim tasol na sampela taim yumi mekim nabaut na bagarapim ol gutpela pasin na wok yumi mekim pinis. Man i lain long ran long resis, nogut em i eksasais na stap tambu long kaikai long sampela taim tasol na long ol narapela taim em i dring na kaikai tumas. Sapos yumi bosim skin na yumi no dring longlong o mekim pasin pamuk, tasol yumi gat pasin antap na yumi man bilong tok pait, i no gutpela, a? O sapos yumi no save les kwik long ol man na yumi mekim pasin sori long ol, tasol yumi gat wanpela rong yumi haitim i stap, dispela tu i no stret, a? Olsem na yumi mas bosim gut olgeta pasin bilong yumi.—Lukim Jems 2:10, 11.
Long Resis Bilong Kisim Laip, No Ken “Lukluk Nabaut”
16. Wanem insait bilong dispela tok, “lukluk nabaut”?
16 Pol i save ol man i laik winim resis ol i mas taitim bun tru, olsem na Pol i tok: “Mi mekim olsem man i ran strong, na i no save lukluk nabaut. Na mi mekim olsem man i boksen gut, na i no tromoi han nabaut na paitim win nating.” (1 Korin 9:26) Insait bilong dispela tok olsem man i no ken “lukluk nabaut,” i olsem man i ran stret na putim ai long mak em i laik kisim na em i no lusim rot. Sapos yu lukim mak bilong lek bilong man long graun, na mak i go nabaut long han kais na long han sut, na sampela taim em i baut i go bek tu, bai yu ting dispela man i no ran tru, na em i no save em i laik go we. Tasol sapos yu lukim mak bilong lek i go stret tasol, bai yu save dispela man em i putim ai bilong em i go long mak em i laik kisim na em i no longlong long ol samting em i mas mekim bilong winim resis na kisim prais.
17. (a) Olsem wanem yumi save Pol i no bin “lukluk nabaut”? (b) Olsem wanem yumi ken bihainim pasin bilong Pol?
17 Pol yet i no olsem “lukluk nabaut” taim em i mekim ol wok bilong em. Em i mekim ol samting na bai ol man i save em i wokman Kristen tru na aposel tru. Em i tingim wanpela samting tasol, na em i givim bel long kisim dispela samting. Em i no larim wanpela samting i pulim em, olsem biknem, o mani kago, o gutpela sindaun, maski em inap kisim ol dispela samting sapos em i laik. (Aposel 20:24; 1 Korin 9:2; 2 Korin 3:2, 3; Filipai 3:8, 13, 14) Taim yu tingim ol samting yu bin mekim inap nau, yu bin mekim ol samting i stret o nogat? Yu bin bihainim stretpela rot, o yu bin kranki nabaut olsem man i lusim rot? Yu bin mekim ol samting olsem man i laik winim resis? Yumi mas save, yumi stap long wanpela wok i olsem resis tru, na yumi mas givim bel long en inap long yumi winim.
18. (a) Wanem samting i olsem “tromoi han nabaut na paitim win nating”? (b) Bilong wanem dispela samting i nogut tru?
18 Pol i mekim narapela tok piksa na em i tok: “Mi mekim olsem man i boksen gut, na i no tromoi han nabaut na paitim win nating.” (1 Korin 9:26b) I gat planti birua i laik paulim yumi na bai yumi lus long dispela resis yumi ran long en—em Satan, na pasin bilong ol man bilong graun, na laik nogut bilong skin bilong yumi. Taim man i boksen em i save tromoi stret han na bai em i ken sakim birua bilong em, na yumi mas mekim olsem long sakim ol dispela samting i laik pundaunim yumi olsem birua. Tasol gutpela tru, God Jehova i lainim yumi long mekim dispela samting. Rot bilong em long mekim olsem, em Baibel, na ol buk bilong Baibel, na ol miting Kristen. Tasol sapos yumi kaunim Baibel na ol buk na go long ol miting, na yumi no bihainim ol samting yumi lainim, i olsem yumi “tromoi han nabaut na paitim win nating.” Dispela samting i nogut tru na inap yumi ken lus. I olsem yumi ting yumi wok strong na yumi stap orait, tasol dispela i no inap sakim ol dispela samting i laik pundaunim yumi. Olsem na disaipel Jems i tok: “Dispela tok yupela i kisim, em yupela i mas bihainim. Yupela i no ken harim nating tasol. Nogat. Sapos yupela i harim nating, orait yupela i giamanim yupela yet.” Sapos yumi “tromoi han nabaut na paitim win nating,” o “yumi harim nating tasol,” dispela i no inap helpim yumi long winim ol birua o bihainim laik bilong God.—Jems 1:22; 1 Samuel 15:22; Matyu 7:24, 25.
19. Yumi mas mekim wanem na bai yumi no ken lus?
19 Na Pol i kolim samting i helpim em long i stap gut, em i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long ol arapela man na bihain mi yet mi no kisim prais.” (1 Korin 9:27) Olsem Pol i bin mekim, yumi tu i mas daunim laik bilong skin, nogut dispela samting i bosim yumi na pulim yumi nabaut na yumi mekim pasin nogut. Yumi mas rausim ol tingting na pasin na laik nogut bilong skin. (Rom 8:5-8; Jems 1:14, 15) Ating em bai hatwok long mekim olsem, tasol Pol i tok, em i bin “paitim tru bodi bilong” em na bai em inap mekim, na yumi tu i mas mekim olsem, maski i hatwok, long wanem, nogut yumi bihainim laik bilong skin na bihain yumi dai.—Lukim Matyu 5:28, 29; 18:9; 1 Jon 2:15-17.
20. Bilong wanem nau yumi mas skelim gut pasin bilong yumi long ran long resis bilong kisim laip?
20 Long nau yumi stap klostu long pinis bilong resis. Liklik taim bai yumi kisim prais. Pol i kolim prais em wantaim ol Kristen bilong go long heven bai ol i kisim, na Pol i tok: “Dispela prais em i olsem: Long wok bilong Krais Jisas, God i singautim mi bilong i go antap na i stap gut tru wantaim em.” (Filipai 3:14) Na prais bilong bikpela lain bilong i stap long graun em i olsem: ol bai stap laip oltaim long paradais. Olsem na yumi mas ran strong olsem Pol na bai yumi no lus long “kisim prais.” Yumi “mas ran strong bilong kisim.”—1 Korin 9:24, 27.
Yu Tingim Yet?
◻ Olsem wanem i stret yumi skelim pasin bilong Kristen wantaim wanpela resis?
◻ Olsem wanem resis bilong kisim laip i no wankain olsem pilai resis?
◻ Bilong wanem yumi mas “daunim olgeta laik bilong bodi”?
◻ Olsem wanem yumi ken ran na yumi no “lukluk nabaut”?
◻ Bilong wanem i nogut sapos yumi “tromoi han nabaut na paitim win nating”?
[Piksa long pes 16]
Lip bilas, wantaim biknem bilong dispela graun, em bai bagarap