I Stap na Wok Bilong Jisas

Em i Lainim Ol Long Bihainim Pasin Daun

TAIM Jisas i stap long hap bilong Sisaria Filipai, em i mekim orait wanpela manki i gat spirit nogut long em, na nau Jisas i laik go bek long Kaperneam. Em i laik bai ol disaipel tasol i go wantaim em, long wanem em i laik givim sampela tok moa long ol bambai ol i ken redi long mekim ol wok ol i mas mekim bihain long taim em i dai. Jisas i tokim ol, ‘Ol bai i kilim i dai Pikinini Bilong Man, tasol long de namba 3 bai em i kirap bek.’

Bipo tu Jisas i bin tokim ol long dispela samting, na tripela aposel bilong em i bin lukim em i kamap narapela kain, na ol i harim “Moses na Elaija” i tok long em bai i “lusim dispela graun na i go,” tasol ol i no pilim yet dispela samting. Ol i no tok dispela samting i no ken kamap long Jisas, olsem pastaim Pita i tok, tasol ol i pret long givim sampela askim moa long em long dispela.

Bihain ol i kamap long Kaperneam, em olsem as ples bilong Jisas taim em i stap long graun, na em i as ples tru bilong Pita na sampela aposel moa. Sampela man bilong Kaperneam, em ol man bilong kisim takis bilong tempel, ol i kam long Pita. Ating ol i laik painim wanpela rong long Jisas long lo bilong ol, na ol i askim Pita: “Ating tisa bilong yupela i save givim takis bilong tempel?”

Pita i tok: “Yes.”

Bihain liklik Jisas i kamap long haus na em i save long dispela askim ol i bin givim long Pita. Taim Pita i no tokim Jisas yet long dispela samting, Jisas i askim em: “Saimon, yu ting wanem? Ol king bilong dispela graun i save kisim pe bilong ol kain kain takis long husat? Ol i save kisim long ol lain bilong ol yet, o long ol arapela man?”

Pita i tok: “Long ol arapela man.”

Jisas i tokim em: “Olsem na ol lain bilong ol yet i no [ken] givim takis.” Papa bilong Jisas em King bilong heven na graun na ol i save lotuim em long tempel, olsem na i no gat lo i tok Pikinini Bilong God i mas baim takis bilong tempel. Tasol Jisas i tok: “Nogut . . . ol i kros long yumi. Yu go long raunwara na tromoi huk. Na namba wan pis yu pulim, em yu kisim na opim maus bilong en, na bai yu lukim wanpela mani i stap insait. Yu kisim dispela mani na givim long ol, bilong inapim takis bilong mitupela.”

Taim ol disaipel i kam bek pinis long Kaperneam na ol i bung wantaim, ating long haus bilong Pita, ol i kamapim askim olsem: “Husat bai i gat biknem tru long kingdom bilong heven?” Jisas i save long as bilong dispela askim bilong ol, long wanem em i save long ol tok ol i bin mekim taim ol i lusim Sisaria Filipai na wokabaut i kam. Olsem na em i askim ol: “Long rot yupela i mekim wanem toktok?” Ol disaipel i sem na ol i pasim maus i stap, long wanem ol i bin tok pait long husat bai stap namba wan.

Klostu tripela yia olgeta Jisas i bin wok long lainim ol, olsem na yumi kirap nogut long ol i tok pait long dispela samting, a? Tru, tasol dispela i makim olsem sin na olpela lotu bilong ol i paulim tingting bilong ol. Ol disaipel i go bikpela insait long lotu Juda na dispela lotu i strong long kirapim lain bilong ol long tingim namba o nem bilong man. Ating Pita i pilim olsem em i namba wan, long wanem Jisas i tok long givim “ol ki” bilong Kingdom long em. Na ating Jems na Jon i gat wankain tingting, long wanem ol i bin lukim Jisas i kamap narapela kain.

Maski wanem samting i mekim na ol i kisim dispela kain tingting, tasol Jisas i mekim wanpela samting bilong helpim ol long kisim stretpela tingting. Em i singautim wanpela pikinini i kam na em i sanapim em namel long ol. Na Jisas i holim pikinini, na em i tok: “Sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven. Man i daunim em yet na i kamap olsem dispela liklik pikinini, dispela man bai i gat biknem tru long kingdom bilong heven. Na sapos wanpela man i tingting long mi na i helpim wanpela liklik pikinini olsem dispela pikinini, orait em i helpim mi.”

Em gutpela rot tru bilong stretim ol disaipel bilong em! Jisas i no hatim ol na tok ol i gat pasin antap, o i no stret ol i laik kisim bikpela nem na namba. Nogat. Em i mekim wanpela tok piksa long pasin bilong pikinini, long wanem ol pikinini i gat pasin daun, na ol i no tingting long kisim biknem na winim ol narapela. Long dispela rot, Jisas i lainim ol disaipel long ol dispela gutpela pasin ol i mas wok long kisim. Na Jisas i tok: “Man i no gat nem na i stap liklik tru namel long yupela olgeta, em i stap namba wan.” Matyu 17⁠:​22-27; 18⁠:​1-5; Mak 9⁠:​30-37; Luk 9⁠:​43-48.

◆ Jisas i go bek long Kaperneam, na em i stori gen wantaim ol disaipel long wanem samting? Ol i ting olsem wanem long dispela tok?

◆ Bilong wanem i no gat wok long Jisas i givim takis bilong tempel? Tasol bilong wanem em i givim dispela takis?

◆ Ating wanem samting i mekim na ol disaipel i tok pait? Jisas i mekim wanem bilong stretim ol?