I Stap na Wok Bilong Jisas

Long Ples Bilong Em, Kapaneam

STORI bilong ol wok Jisas i mekim i go kamap long planti hap, na planti man i go painim em long ol hap em i stap long en, em ol hap i no gat man. Tasol sampela de i go pinis, na em i go long Kapaneam gen, klostu long Raunwara Galili. Kwiktaim ol manmeri i harim tok long em i stap long haus na ol i kam bung, na haus i pulap pinis. Sampela Farisi na tisa bilong lo tu i kam. Sampela ol i kam longwe. Ol i lusim Jerusalem na ol i kam.

Ol manmeri i pulap long haus na ples i pas na i no gat rot bilong go insait. Nau wanpela bikpela samting tru i kamap. Em i bikpela samting, long wanem em i helpim yumi long save Jisas i gat strong bilong tekewe as bilong sik na pen na oraitim bek skin bilong olgeta man em i laik helpim ol.

Jisas i wok long autim tok long ol man na nau 4-pela man i karim wanpela sikman i kam. Bun bilong dispela man i dai olgeta. Ol i laik bai Jisas i oraitim bek skin bilong poroman bilong ol, tasol ples i pas na ol i no inap bringim em i go klostu long Jisas. Sori tru! Tasol ol i laik tru long bringim em i go klostu long Jisas; olsem na ol i tekewe hap rup bilong dispela haus Jisas i stap long en, na ol i kisim bet i gat sikman i slip long en na lusim i go daun.

Olsem wanem? Jisas i kros? Nogat tru! Em i lukim bilip bilong ol na em i tokim dispela sikman, “Mi tekewe pinis sin bilong yu.” Tasol yu ting Jisas inap tekewe sin? Ol saveman bilong lo na ol Farisi i ting em i no inap mekim. Long bel bilong ol ol i tingting olsem: “I no gat wanpela man em inap long tekewe sin. Em wok bilong God wanpela tasol.”

Jisas i save long tingting bilong ol, na em i tokim ol: “Wanem tok i moa isi? Sapos mi tok, ‘Mi tekewe sin bilong yu,’ o sapos mi tok, ‘Yu kirap na kisim bet bilong yu na wokabaut’?” Jisas i no wetim ol i bekim tok, em i tanim na tokim dispela sikman: “Yu sanap na kisim bet bilong yu, na yu go long haus bilong yu.” Olsem na em i kirap na long ai bilong olgeta manmeri em i kisim bet bilong em kwiktaim na i wokabaut i go. Olgeta man i kirap nogut tru na ol i tok: “Bipo mipela i no lukim kain samting olsem”!

Taim Jisas i tok long oraitim sik, em i tok long tekewe sin. Olsem na yumi save, sin i mas tekewe bambai skin bilong man i ken orait bek. Baibel i stori olsem: Namba wan tumbuna papa bilong yumi, Adam, em i bin mekim sin na long dispela rot olgeta samting nogut sin i kamapim, olsem sik na i dai, dispela i kisim yumi. Tasol taim Kingdom bilong God i bosim graun, bai Jisas i tekewe sin bilong olgeta manmeri i givim bel long God na mekim wok bilong Em, na bai olgeta sik i pinis. Em gutpela tru, a? Mak 2:1-12; Luk 5:17-26; Matyu 9:1-8; Rom 5:12, 17-19.

◆ Wanem samting i kamap na bihain wanpela bikpela samting tru i kamap?

◆ Dispela sikman, bun bilong em i dai olgeta, olsem wanem em i kamap long Jisas?

◆ Olsem wanem na yumi olgeta i gat sin? Tasol Jisas i mekim wanem na yumi ken bilip olsem, sin bilong yumi inap tekewe na bai skin bilong yumi i kamap gutpela olgeta?