Jisas i Oraitim Tupela Aipas Man na Helpim Sakius

Jisas na ol lain i wokabaut wantaim em ol i kamap long Jeriko, em i stap longwe liklik long Jerusalem. I gat 2-pela hap bilong taun Jeriko, wanpela em olpela taun bilong ol Juda, na narapela em nupela taun bilong ol Rom i stap klostu liklik olsem 1.6 kilomita samting. Orait Jisas wantaim dispela bikpela lain i lusim olpela taun na ol i kam klostu long nupela taun, na tupela aipas man i save singaut long mani ol i harim toktok bilong ol dispela lain. Nem bilong wanpela aipas man em Bartimeus.

Tupela i harim Jisas i wokabaut i kam, na tupela i singaut olsem: “Bikpela, Pikinini bilong Devit, marimari long mitupela!” (Matyu 20:30) Na sampela namel long dispela bikpela lain i krosim tupela na tokim ol long pasim maus, tasol tupela i singaut strong moa yet. Jisas i harim singaut bilong tupela na em i stop. Na em i tokim ol man long singautim tupela aipas i kam. Orait ol i go long tupela na tokim wanpela: “Strongim bel! Kirap, em i singautim yu.” (Mak 10:49) Orait dispela aipas man i amamas tru, em i tromoi saket bilong em na sanap kwik na i go long Jisas.

Jisas i askim tupela: “Yutupela i laik bai mi mekim wanem bilong helpim yutupela?” Na tupela aipas man i tok: “Bikpela, opim ai bilong mitupela.” (Matyu 20:32, 33) Jisas i sori tru, na em i putim han long ai bilong tupela, na em i tokim wanpela aipas olsem: “Yu ken i go. Bilip bilong yu i mekim na yu kamap orait.” (Mak 10:52) Tupela aipas i lukluk, na tupela wantaim i kirap na litimapim nem bilong God. Olgeta manmeri i lukim dispela na ol tu i litimapim nem bilong God. Kwiktaim Bartimeus wantaim poroman bilong em i bihainim Jisas.

Orait Jisas i lusim Jeriko na i wokabaut i go na bikpela lain manmeri moa i kam bungim em. Ol i laik lukim dispela man husat i bin oraitim ai bilong tupela aipas. Ol manmeri i pas pas klostu long Jisas, olsem na sampela i no inap lukim em. Wanpela bilong ol em Sakius. Em i bosim wok bilong kisim takis long hap bilong Jeriko. Em i sotpela man na em i no inap lukim Jisas. Olsem na Sakius i ran i go pas na em i go antap long wanpela diwai fik na bai em i ken lukim Jisas. Em i save Jisas bai wokabaut i kam long dispela rot. Sakius i stap antap long diwai na em inap lukim gut olgeta samting i kamap. Orait Jisas i kamap long dispela hap na em i lukluk i go antap long diwai, na em i tokim Sakius: “Sakius, kam daun hariap, tude mi mas stap long haus bilong yu.” (Luk 19:5) Orait Sakius i kam daun hariap na em i go pas long haus bilong redim ol samting.

Taim ol manmeri i lukim dispela samting ol i kros. Ol i ting i no stret long Jisas i go long haus bilong man em ol i tingim olsem sinman. Sakius i bin giaman na pulim nating takis long ol man na em i kamap maniman.

Taim Jisas i go insait long haus bilong Sakius, ol manmeri i komplein na tok: “Em i go stap long haus bilong wanpela man bilong mekim sin.” Tasol Jisas i save, Sakius inap tanim bel. Olsem na Jisas i no bel hevi. Nau Sakius i kirap na i tok: “Bikpela, harim! Mi bai skelim ol samting bilong mi long tupela hap na givim wanpela hap long ol rabisman. Na ol samting mi bin giaman na pulim long ol man, mi bai bekim ol dispela samting 4-pela taim.”—Luk 19:7, 8.

Sakius i kamapim long ples klia olsem em i tanim bel tru! Ating em i lukim ol pepa bilong takis em i holim na em i ken save hamas mani em i mas bekim long ol. Olsem na em i tok promis long bekim ol samting 4-pela taim. Dispela i winim mak bilong ol samting em i ken givim olsem Lo Bilong God i tok. (Kisim Bek 22:1; Wok Pris 6:2-5) Na tu, Sakius i tok promis long em bai tilim ol samting bilong em na givim long ol rabisman.

Jisas i amamas long Sakius i tanim bel, olsem na em i tok: “Nau long dispela de, God i kisim bek dispela man na famili bilong en, long wanem, dispela man tu i pikinini bilong Abraham. Pikinini bilong man i kam bilong painim na kisim bek ol man i lus.”—Luk 19:9, 10.

Paslain liklik, Jisas i tok piksa long wanpela yangpela man ‘i bin lusim’ papa. (Luk 15:11-24) Orait nau long rot bilong Sakius, em i kamapim klia long ol man olsem wanem wanpela man inap kam bek long God. Ol hetman bilong lotu na lain bilong ol i kros long pasin bilong Jisas long helpim ol kain man olsem Sakius. Tasol Jisas i wok yet long painim na kisim bek ol pikinini bilong Abraham husat i lus.