Yu Save Long Dispela?
Bilong wanem sanda Maria i yusim i gat bikpela pe tru bilong en?
Sampela de paslain long Jisas i dai, Maria em susa bilong Lasarus, em i “karim wanpela naispela botol ston i gat nambawan sanda [“em gutpela nad,” NW ], em i dia tumas” na em i kapsaitim sanda long het bilong Jisas. (Mak 14:3-5; Matyu 26:6, 7; Jon 12:3-5) Stori bilong Mak na Jon i tok pe bilong dispela sanda em inap olsem 300 denarii—em pe wanpela wokman inap kisim insait long wanpela yia.
Ol i kisim we dispela sanda i dia tumas? Dispela nad olsem nambawan sanda i dia tumas em Baibel i toktok long en, i kam long wanpela liklik plaua diwai i gat gutpela smel bilong en (Nardostachys jatamansi) i save stap long ol maunten Himaleya. Planti taim ol i save kisim dispela kain nad i gat bikpela pe na miksim wantaim ol arapela sanda samting i no gat bikpela pe. Tasol Mak na Jon wantaim i mekim dispela tok “nambawan sanda.” Dispela tok sanda i dia tumas i makim olsem ating dispela sanda i mas kam long India.
Bilong wanem stori bilong Mak i tok Maria i “brukim dispela botol”? Ol i save stailim kain botol sanda na wokim nek bilong en i liklik bilong pasim ai bilong dispela botol na bai gutpela smel bilong sanda i no ken lus nating. Long buk Discoveries From the Time of Jesus, Alan Millard i tok: “Em i isi long luksave olsem amamas bilong dispela meri i mekim na em i no opim ai bilong dispela botol, em i brukim [nek bilong botol] na kapsaitim sanda olgeta.” Ating dispela em i as na “gutpela smel bilong dispela sanda i karamapim haus olgeta.” (Jon 12:3) Em wanpela presen i gat bikpela pe tru bilong en, na em i stret tru. Bilong wanem i olsem? Long wanem, long dispela pasin meri i kamapim klia olsem em i tenkyu long Jisas i kirapim bek brata bilong em Lasarus.—Jon 11:32-45.
I gat wanpela o tupela taun Jeriko?
Matyu, Mak, na Luk, ol i raitim tok long wanpela mirakel bilong oraitim man i bin kamap klostu long Jeriko. (Matyu 20:29-34; Mak 10:46-52; Luk 18:35-43) Matyu na Mak wantaim i tok, Jisas i mekim dispela mirakel taim em i “lusim Jeriko na i go.” Tasol Luk i tok dispela samting i kamap taim Jisas i “kamap klostu” long taun Jeriko.
I gat wanpela o tupela taun Jeriko long taim bilong Jisas? Buk Bible Then & Now i tok: “Long taim Jisas i stap long graun, ol i bin wokim gen taun Jeriko olsem 1.6 kilomita longwe long hap saut bilong olpela taun Jeriko. King Herot i wokim wanpela haus bilong em long dispela hap na em i save stap long en long taim bilong kol.” Buk Archaeology and Bible History, i soim klia dispela samting, em i tok: “Long taim bilong Jisas i gat tupela taun Jeriko. . . . olpela taun (Jeriko) bilong ol Juda i stap 1.6 kilomita longwe long taun (Jeriko) bilong ol Rom.”
Olsem na ating Jisas i wokim dispela mirakel taim em i lusim taun bilong Juda na i kamap klostu long taun bilong ol Rom o ating em i lusim taun bilong Rom na i kamap klostu long taun bilong ol Juda. Em nau, yumi save long ol samting i bin stap na i kamap long dispela taim bipo, dispela i kamapim olsem ol tok bilong Baibel i no pait wantaim.
[Piksa long pes 31]
Botol sanda
[Kredit Lain]
© Réunion des Musées Nationaux/Art Resource, NY