I Stap na Wok Bilong Jisas

Truim Tok Profet Bilong Aisaia

JISAS i kisim save pinis olsem ol Farisi na ol man bilong Herot i pasim tok long kilim em i dai, olsem na em wantaim ol disaipel bilong em i lusim dispela ples na ol i go long hap bilong Raunwara Galili. Bikpela lain manmeri bilong olgeta hap bilong Palestain ol i bihainim em, na ol man bilong ol narapela hap tu. Jisas i oraitim sik bilong planti man, olsem na ol man i gat sik ol i pas strong long em. Ol i laik putim han long em.

Bikpela lain manmeri moa i stap, olsem na Jisas i tokim ol disaipel long putim wanpela bot i sambai na em i ken kalap long en. Taim em i kalap long bot na ol i pul i go liklik, em inap lainim yet ol man i bung i stap long nambis na ol i no pas tumas long em, o em inap i go long narapela hap bilong raunwara na helpim ol man bilong dispela hap.

Disaipel Matyu i stori long ol wok Jisas i mekim na em i tok, dispela i truim “wanpela tok God i bin mekim long maus bilong profet Aisaia.” Bihain em i kolim dispela tok Profet, em olsem:

“Dispela em, i wokman bilong mi, mi makim em pinis. Mi laikim em tumas, na bel bilong mi em i gutpela long em. Bai mi putim Spirit bilong mi long em, na bai em i autim tok bilong stretpela pasin long ol man bilong ol arapela lain. Em bai i no mekim tok kros na i no bikmaus. Bai ol i no harim maus bilong em i singaut long ol bikrot. Wanpela pitpit i bruk liklik, dispela bai em i no brukim olgeta. Na wanpela wik i paia liklik yet, bai em i no mekim i dai olgeta. Em bai i wok i stap,_-inap em i mekim stretpela pasin i win tru. Na ol man bilong ol arapela lain bai ol i bilip long em na wetim em.”

Jisas em i dispela wokman God i laikim em tumas. Na Jisas i kamapim long ples klia stretpela pasin, em ol bilip bilong lotu giaman i bin karamapim. Ol Farisi i gat tingting kranki long lo bilong God, olsem na long de Sabat ol i no save helpim man i gat sik! Bilong kamapim klia stretpela pasin bilong God, Jisas i helpim ol man long lusim ol dispela pasin bilong lotu i no stret, olsem na ol hetman bilong lotu i laik kilim em i dai.

Wanem insait bilong dispela tok olsem em i no ken ‘mekim tok kros o bikmaus, na ol man i no ken harim em i singaut long ol bikrot’? Taim Jisas i oraitim sik bilong ol man em i save “tambuim ol long telimautim nem bilong em long ol arapela man” Em i no laik bai ol i singaut long ol bikrot na tokim ol narapela man long em, o narapela i stori stori long narapela long ol wok em i mekim, nogut stori i paul.

Na Jisas i save go givim gutpela tok long ol man i olsem pitpit i bruk liklik o ol i olsem wik bilong lam em klostu i laik i dai. Em i mekim gut long ol; em i no brukim olgeta o mekim i dai olgeta. Long gutpela pasin sori, em i strongim ol dispela man i gat pasin daun. Tru tumas, olgeta lain man i ken bilip long em na wetim em! Matyu 12:​15-21; Mak 3:​7-12; Aisaia 42:​1-4.

◆ Olsem wanem Jisas i kamapim stretpela pasin long ples klia na em i no mekim tok kros o singaut long ol bikrot?

◆ Husat ol i olsem pitpit i bruk liklik na wik i paia liklik yet? Jisas i mekim wanem kain pasin long ol?