Maria (Mama Bilong Jisas)

Stori: Em meri God i makim na orait long em na em i bin karim Jisas. I gat 5-pela narapela Maria long Baibel. Dispela Maria em i lain bilong King Devit, bilong lain Juda, na em i pikinini meri bilong Heli. Namba wan taim Baibel i stori long em, ol i bin makim em bilong maritim Josep, em tu i bilong lain Juda na lain bilong Devit.

Stori bilong Maria long Baibel i lainim yumi long wanem samting?

(1) Dispela stori i lainim yumi long pasin bilong harim gut tok God i givim long yumi long rot bilong sampela man, maski pastaim yumi kirap nogut long en na ting i no inap kamap.​—⁠Lu 1:​26-37.

(2) Na i lainim yumi long strongim bel na bihainim laik bilong God taim yumi kisim save long en, na bilip tru long God bai helpim yumi. (Lukim Luk 1:38. Olsem Lo 22:​23, 24 i tok, sapos meri Juda i no marit na em i gat bel, bikpela strafe inap painim em.)

(3) Na i lainim yumi olsem God i orait long givim wok long man o meri, maski em i gat nem o nogat.​—⁠Skelim Luk 2:​22-24 wantaim Wok Pris 12:​1-8.

(4) Na i lainim yumi long tingim samting bilong God pastaim. (Lukim Luk 2:41; Aposel 1:14. I no gat lo i tok ol meri Juda i mas wokabaut wantaim man bilong ol long longwe rot i go long Jerusalem bilong mekim Pasova long olgeta yia, tasol Maria i save mekim.)

(5) Na i lainim yumi long pilim tru olsem pasin bilong i stap stret em i bikpela samting.​—⁠Lu 1:⁠34.

(6) Na i lainim yumi long skulim gut ol pikinini long tok bilong Baibel. (Dispela i kamap klia long samting Jisas i mekim taim em i gat 12-pela krismas. Lukim Luk 2:​42, 46-49.)

Tru Maria i nupela meri yet na em i karim Jisas?

Luk 1:​26-31 i tok, ensel Gebriel i go long wanpela “yangpela meri” nem bilong em Maria na em i tok: “Yu bai kisim bel na karim wanpela pikinini man.” Maria i harim dispela tok na “Maria i askim ensel olsem, ‘Dispela samting bai i kamap olsem wanem? Mi no marit yet long [“slip yet wantaim,” NW] wanpela man.’ ” (Lu 1 Ves 34) Matyu 1:​22-25 i tok moa olsem: “Dispela olgeta samting i kamap bilong inapim wanpela tok Bikpela i bin mekim long maus bilong profet. Profet i bin tok olsem, ‘Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.’ As bilong dispela nem i olsem, God i stap wantaim yumi. Taim Josep i kirap long slip, orait em i mekim olsem ensel bilong Bikpela i bin tokim em. Em i kisim meri bilong en. Tasol em i no slip wantaim em, i go inap long taim Maria i karim pikinini man. Na em i kolim nem bilong en Jisas.”

Yu ting samting inap kamap olsem? God inap mekim i kamap long strong bilong em, long wanem, em yet i bin wokim rot bilong pikinini i kamap insait long bel bilong meri. Em i wokim olsem mirakel​—⁠em i kisim strong bilong laip bilong namba wan Pikinini bilong em long heven na putim long bel bilong Maria. Strong bilong God yet, em spirit holi, i lukautim dispela pikinini taim em i wok long kamap insait long bel bilong Maria, olsem na dispela pikinini i kamap wanpela man i gutpela olgeta.​—⁠Lu 1:35; Jo 17:⁠5.

Maria i stap nupela meri oltaim o nogat?

Mt 13:​53-56: “[Jisas] i go long haus lotu bilong ol na i givim tok bilong God long ol manmeri. Ol i harim tok bilong en na ol i kirap nogut na i tok, ‘Dispela man em i kisim dispela save we? Na olsem wanem em inap wokim ol mirakel? Yumi save, dispela man em i pikinini bilong wanpela kamda, na Maria em i mama bilong en. Na Jems na Josep na Saimon na Judas, ol i brata bilong en [tok Grik, a·del·phoiʹ]. Na olgeta susa bilong en [tok Grik, a·del·phaiʹ], ol i stap wantaim yumi.’ ” (Taim yu skelim dispela tok bilong Baibel, yu ting Maria i gat wanpela pikinini tasol, em Jisas, o em i gat ol narapela pikinini man na meri?)

Wanpela bikpela buk Katolik i stori long dispela tupela tok Grik (a·del·phoiʹ na a·del·phaiʹ) long Matyu 13:​55, 56 na i tok, dispela tupela tok “i makim ol brata susa tru . . . Long yia 380 samting Helvidius i raitim buk nau i lus pinis na em i tokaut strong olsem Maria i gat ol narapela pikinini, i no Jisas tasol, na bai Maria i ken i stap olsem gutpela piksa bilong ol mama i gat planti pikinini. Tasol Santu Jerom i bihainim olpela bilip bilong Misin olsem Maria i stap nupela meri oltaim, na em i raitim wanpela nius bilong sakim tok bilong Helvidius (yia A.D. 383) na em i kamapim stori . . . em planti tisa Katolik i bihainim yet.”​—⁠New Catholic Encyclopedia, 1967, Vol. 9, p. 337.

Mk 3:​31-35: “Long dispela taim mama wantaim ol brata bilong Jisas ol i kamap. . . . Bikpela lain manmeri i sindaun raunim em, na ol i tokim em olsem, ‘Harim. Mama bilong yu wantaim ol brata na susa bilong yu ol i stap ausait na i singaut long yu.’ Na em i bekim tok bilong ol olsem, ‘Husat em i mama na brata bilong mi?’ Em i lukluk raun long ol manmeri i sindaun raun long em, na em i tok, ‘Lukim mama bilong mi wantaim ol brata bilong mi. Man o meri i save bihainim laik bilong God, em i brata na susa na mama bilong mi.’ ” (Dispela i makim olsem ol brata tru bilong Jisas, na ol brata bilong em long spirit, em ol disaipel, i narapela narapela. No gat wanpela man i gat tok long dispela tok “mama bilong em,” olsem na i gat wanem as na ol i tok dispela tok “brata” i makim ol kasen brata bilong em na i no makim ol brata tru bilong em? I gat narapela tok Grik (syg·genonʹ) i makim ol wanblut i no brata tru, olsem long Luk 21:16.)

Maria em Mama bilong God o nogat?

Taim ensel i tokim em, em bai karim pikinini, ensel i no tok, dispela pikinini em i God. Ensel i tok: “Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. . . . Em bai i stap gutpela na stretpela man bilong God, na ol bai i kolim em Pikinini Bilong God.”​—⁠Lu 1:​31-35.

Hi 2:​14, 17: “Ol dispela pikinini Jisas i tok long en, em ol manmeri tasol. Olsem na Jisas tu i kamap man wankain olsem ol . . . Long olgeta samting em i mas kamap wankain tru olsem ol brata bilong en.” (Tasol sapos em i hap God na hap man, bai em i no “wankain tru olsem ol brata bilong en,” a?)

Bikpela buk Katolik i tok: ‘Sapos tru Maria i mama bilong Jisas na tru Jisas em i God, orait, tru Maria em i mama bilong God.’ (New Catholic Encyclopedia, 1967, Vol. 10, p. 21) Baibel i tok, Maria em i mama bilong Jisas, tasol Jisas em i God o nogat? Bihain long yia 300 samting, longtaim bihain long taim ol man i raitim pinis Baibel, Misin i kamapim bilip bilong ol long God Triwan. (New Catholic Encyclopedia, 1967, Vol. 14, p. 295; lukim het-tok “God Triwan,” pes 126, 127.) Long dispela taim, long tok bilong kamapim bilip ol i kolim Tokaut Bilong Naisia, Misin i tok, Krais Jisas em i “God tru.” Bihain, olsem long Bung Bilong Efesus long yia 431, Misin i tok Maria em i The·o·toʹkos. Insait bilong dispela tok i olsem: “Em i karim God” o em i “Mama bilong God.” Tasol dispela tok na tingting i no i stap long wanpela Baibel. (Lukim “Krais Jisas,” pes 212-216.)

Yu ting Maria i no gat sin, kirap long taim em i stap blut yet long bel bilong mama?

Bikpela buk Katolik (New Catholic Encyclopedia, 1967, Vol. 7, p. 378-381) i stori long as bilong dispela bilip olsem: “Baibel i no tok klia olsem Maria i no gat sin, kirap long taim em i stap blut yet long bel bilong mama. . . . Ol tisa bilong Misin long pastaim tru i ting Maria em i holi, tasol ol i no ting em i no gat sin. . . . Yumi no inap save wanem taim stret dispela bilip i bin kamap. . . . [Long 1854 Pop Pius Namba 9 i stori long dispela bilip] ‘olsem Virgo Maria i Gat Blesing Bilong God, na em i no gat sin kirap long taim em i stap blut yet long bel bilong mama.’ ” Na namba 2 kibung bilong Misin Katolik (1962-1965) i tok orait long dispela bilip.​—⁠Buk The Documents of Vatican II, p. 88.

Baibel yet i tok: “Wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Ro 5:12) Olsem na Maria tu i gat sin, a? Baibel i tok, 40 de bihain long taim Maria i karim Jisas, em i bihainim Lo Bilong Moses na em i go long haus lotu long Jerusalem na mekim ofa bilong tekewe sin bambai em i ken kamap klin gen long ai bilong God. Maria tu i bin kisim sin long Adam.​—⁠Lu 2:​22-24; Wkp 12:​1-8.

Maria i go antap long heven wantaim skin bilong graun, o olsem wanem?

Bikpela buk Katolik i stori long tokaut em Pop Pius Namba 12 i mekim long 1950 bilong makim dispela bilip i kamap wanpela bilip tru bilong Misin Katolik, na buk i tok: “Baibel i no tok klia olsem Maria i bin go antap long heven wantaim skin bilong graun, tasol Pop i strong long tok, Baibel i as bilong dispela bilip.”​—⁠New Catholic Encyclopedia, 1967, Vol. 1, p. 972.

Baibel yet i tok: “Man bilong dispela graun [em i gat skin bilong graun] em i no inap i go insait long kingdom bilong God.” (1 Ko 15:50) Jisas i tok, “God em i Spirit.” Taim Jisas i kirap bek, em i kamap spirit gen, olsem “spirit bilong givim laip long man.” Ol ensel ol i spirit. (Jo 4:24; 1 Ko 15:45; Hi 1:​13, 14) Olsem na i gat wanem tok long Baibel i makim olsem man o meri bilong dispela graun em inap go long heven wantaim skin bilong em i gat mit na blut? Man o meri i gat dispela kain skin em i mas i stap long graun bambai em inap i stap laip, a? (Lukim “Kirap Bek,” pes 196-198.)

Yu ting i stret yumi beten long Maria na bai em i askim God long helpim yumi?

Krais Jisas i tok: “Yupela i mas mekim kain prea olsem, ‘Papa bilong mipela, yu stap long heven . . . ’ ” Na em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. . . . Olgeta samting yupela i askim long nem bilong mi, em bai mi mekim.”​—⁠Mt 6:9; Jo 14:​6, 14.

Sapos yumi beten long Papa long rot bilong Krais Jisas, yu ting Papa inap sori long yumi wankain olsem sapos yumi beten long em long rot bilong wanpela meri i pilim pinis hevi bilong ol meri? Baibel i tok: “Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save . . . yumi i olsem das tasol.” Em i “as bilong marimari na sori,” na em i “no save belhat kwik.” (Sng 103:​13, 14; Kis 34:⁠6) Na Baibel i stori long Krais olsem: “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. . . . Bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.”​—⁠Hi 4:​15, 16.

Pasin bilong adorim piksa bilong Maria, i stret wantaim Baibel o nogat?

Namba 2 kibung bilong Misin Katolik (1962-1965) i strongim ol Katolik long bihainim dispela pasin. “Dispela Bung holi . . . i tok strong long lain bilong Misin olsem: Ol i mas givim bel long adorim [Maria], na ol i mas mekim moa yet long taim bilong lotu. Dispela Bung i strongim ol long tingim gut ol pasin na wok bilong adorim [Maria], em ol tisa bilong Misin i bin tokaut long en inap planti handet yia bipo, na ol i mas bihainim gut ol dispela lo bilong bipo long adorim ol piksa bilong Krais, na [Maria], na ol santu.”​—⁠Buk The Documents of Vatican II, p. 94, 95.

Bilong save Baibel i tok wanem long dispela samting, lukim “Piksa Bilong Lotu Long En,” pes 370-375.

Yu ting ol Kristen bilong pastaim i bin givim biknem long Maria?

Aposel Pita i no stori liklik long Maria long ol rait bilong em long Baibel. Aposel Pol i kolim Maria olsem “meri” tasol; em i no kolim nem bilong em.​—⁠Ga 4:⁠4.

Jisas yet i mekim wanem kain tok long mama bilong em?

Jo 2:​3, 4: “Taim wain i pinis [long kaikai bilong marit long Kana], na mama bilong Jisas i tokim em olsem, ‘Ol i no gat wain.’ Na Jisas i tokim em olsem, ‘Mama, dispela em i samting bilong yu. Em i no samting bilong mi. Taim bilong mi em i no yet.’ ” (Taim Jisas i stap pikinini yet, em i save daun long mama na waspapa bilong em. Tasol nau em i bikpela pinis na em i tok isi olsem, bambai mama i ken save em i no ken bosim em moa. Maria i mekim pasin daun na em i no kros long dispela tok bilong stretim em.)

Lu 11:​27, 28: “Jisas i autim tok long taim bikpela lain manmeri i stap. Na wanpela meri i stap namel long ol em i singaut olsem, ‘Dispela meri i bin karim yu na i givim susu long yu, em i ken amamas.’ Tasol Jisas i tok, ‘Mobeta yumi tok olsem, ol man i harim tok bilong God na i bihainim, em ol i ken amamas.’ ” (Sapos i stret Jisas i givim biknem long mama, em gutpela taim bilong mekim, a? Tasol em i no mekim.)

Wanem taim dispela pasin bilong adorim Maria i bin kamap?

Andrew Greeley, em pris Katolik, i tok: “Maria em i nambawan strongpela mak bilong lotu long hap bilong Wes, kirap long bipo na i kam inap nau . . . Maria i olsem mak i bungim lotu Kristen wantaim ol lotu bilong bipo i gat ol god mama.”​—⁠Buk The Making of the Popes 1978, p. 227.

Yumi ken tingim tu ples ol i bin kamapim tru dispela bilip olsem Maria em i Mama bilong God. Ol bisop i bung long taun Efesus long yia 431. Dispela taun em i as ples bilong lotuim god meri Artemis, em ol Rom i kolim em Diana. Ol bisop i bung klostu long bikpela haus lotu em ol man i bin lotuim Bikpela Mama long en kirap long yia 330 paslain long Krais, na olsem ol stori bilong bipo i tok, ol bisop i ting inap liklik taim Maria i bin stap long dispela haus lotu. Olsem na wanpela buk i tok, long kain ples olsem, yumi no ken kirap nogut long ol i bin kamapim tok olsem Maria em i Mama bilong God.​—⁠Buk The Cult of the Mother-Goddess, p. 207.

Sapos Man i Tok​—⁠

‘Yu bilip olsem Maria em i nupela meri, o nogat?’

Yu ken tok: ‘Baibel i tok klia olsem mama bilong Krais Jisas em i nupela meri, na mipela i bilipim dispela tok. God em i Papa bilong Jisas, olsem na tru tumas, em i Pikinini bilong God, olsem ensel i bin tokim Maria. (Lu 1:35)’ Na ating yu ken tok moa olsem: ‘Tasol bilong wanem i bikpela samting Jisas i mas kamap long graun long dispela rot? Yu bin tingim dispela samting? . . . Long dispela rot tasol bai i gat pe i stret bilong baim bek yumi long sin na i dai.​—⁠1 Ti 2:​5, 6; na ating yu ken kamapim Jon 3:16 tu.’

O yu ken tok: ‘Mipela i bilipim olgeta tok Baibel i mekim long Maria, na Baibel i tok klia olsem em i stap nupela meri yet na em i karim Jisas. Mi save pilim ol narapela tok tu Baibel i mekim long Maria na ol gutpela pasin bilong em yumi ken bihainim. (Kamapim sampela tok bilong pes 244, 245.)’

‘Yu no bilip olsem Maria em i nupela meri, a?’

Yu ken tok: ‘Mi save, sampela man i no bilip olsem wanpela nupela meri i no bin slip wantaim man em i bin karim Pikinini bilong God. Tasol mipela bilip olsem. (Opim wanpela buk bilong yumi i stori long dispela na soim long man bilong haus.)’ Na ating yu ken tok moa olsem: ‘Tasol yu ting i gat sampela samting moa yumi mas mekim bambai God i ken kisim bek yumi? . . . Lukim dispela tok Jisas i mekim taim em i beten long Papa bilong em. (Jo 17:⁠3)’