Sapta 10
Kingdom Bilong God i Kamap Pinis!
1, 2. Ol gavman bilong graun i pundaun long mekim wanem ol wok?
ATING wanpela taim yu bin baim wanpela masin na i no wok. Orait, yu singautim wanpela man i kam stretim. Em i tok em i “stretim pinis,” tasol bihain liklik masin i bagarap gen. Em nau, yu bel hevi tru!
2 Na i wankain tu long ol gavman bilong graun. Ol man i laik tru bai i gat wanpela gavman em inap kamapim tru gutaim na amamas. Ol gavman i bin wok strong tru long stretim ol hevi, tasol wok bilong ol i pundaun. Planti taim ol gavman i bin bung na pasim tok long sindaun gut wantaim na ol i no ken pait, tasol bihain gen ol i brukim tok bilong ol. Na i no gat wanpela gavman i bin pinisim pasin bilong i stap rabis, na pasin birua, na pasin raskol, na sik, na pasin bilong bagarapim graun na win na wara. Wok gavman bilong ol man i bagarap na yumi no inap stretim. Na saveman King Solomon bilong Israel em tu i bin askim olsem: “Olsem wanem man bilong graun inap save long rot em i mas wokabaut long en?”—Sindaun 20:24, NW.
3. (a) Wanem as tok bilong ol tok Jisas i autim? (b) Sampela man i tok wanem long Kingdom bilong God?
3 Bel bilong yu i no ken bagarap! Gutpela gavman bilong bosim olgeta hap bilong graun em inap kamap tru. Tok bilong dispela gavman em i as tok Jisas i autim. Em i kolim dispela gavman olsem “kingdom bilong God,” na em i lainim ol disaipel long beten askim God long en. (Luk 11:2; 21:31) Tru, sampela taim ol lain bilong lotu i save stori long Kingdom bilong God. Na planti milion manmeri i save beten long Kingdom i mas kam taim ol i kolim Beten Bilong Bikpela long olgeta de. Tasol sapos yu askim ol, “Kingdom bilong God em i wanem samting?” bai ol i bekim kain kain tok. Sampela i tok, “Em i stap long bel bilong yu.” Sampela i tok em heven tasol. Baibel i tokaut klia long dispela samting, na nau bai yumi stori long en.
KINGDOM I GAT WOK BILONG EN
4, 5. Bilong wanem Jehova i laik kamapim nupela gavman olsem rot bilong mekim wok king bilong em? Dispela gavman bai mekim wanem gutpela wok?
4 Oltaim oltaim God Jehova i stap Nambawan King bilong heven na graun. Em i wokim olgeta samting, olsem na em i holim dispela bikpela namba. (1 Stori 29:11; Song 103:19; Aposel 4:24) Tasol Kingdom em Jisas i autim tok bilong en em i stap aninit long wok bilong God long bosim olgeta samting. Dispela Kingdom Krais bai bosim i gat wok bilong en. Em wanem wok?
5 Olsem Sapta 6 i stori pinis, namba wan man na meri i bikhet long wok king bilong God. Ol bikpela tok bilong stretim i kamap na God i laik putim nupela gavman olsem rot bilong mekim wok king bilong em. Em i tokaut olsem em i laik kamapim wanpela ‘pikinini’ bilong bagarapim Snek, em Satan, na pinisim olgeta samting nogut sin i kamapim. Krais Jisas em i namba wan ‘pikinini,’ na long rot bilong “kingdom bilong God” em bai daunim Satan olgeta. Long rot bilong dispela Kingdom, Krais Jisas bai kamapim bek wok bilong bosim graun long nem bilong Jehova, na em bai kamapim klia inap long olgeta taim bihain olsem i stret Jehova i stap Nambawan Bikpela King.—Stat 3:15; Song 2:2-9.
6, 7. (a) Kingdom i stap we? Husat i King bilong en? Husat ol i mekim wok king wantaim em? (b) Husat ol i stap aninit long Kingdom?
6 Sampela man i tanim tok Jisas i bin givim long ol Farisi nogut, olsem: “Kingdom bilong God em i stap insait long yupela.” (Lukim sta daunbilo bilong Luk 17:21.) Orait, yu ting Jisas i laik tok Kingdom bilong God i stap insait long bel bilong ol dispela man nogut bilong giaman? Nogat tru. Bilong tanim stret dispela tok olsem i stap long tok Grik long pastaim, yumi mas raitim olsem: “Kingdom bilong God em i stap pinis namel long yupela.” Jisas i stap namel long ol na em i toktok long em yet bai kamap King. Kingdom bilong God i no samting i stap long bel bilong man. Nogat. Em wanpela gavman i stap tru na i mekim wok; i gat king bilong en, na ol man i stap aninit long en. Dispela gavman i stap long heven, olsem na Baibel i kolim olsem “kingdom bilong heven” na “kingdom bilong God.” (Matyu 13:11; Luk 8:10) Long driman Daniel i lukim King bilong en i kain olsem ‘pikinini bilong man’ na ol i kisim em i kam long God i Gat Olgeta Strong na God i “mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:13, 14, lukim tu sta daunbilo.) Dispela King em husat? Yumi save, Baibel i kolim Krais Jisas olsem “Pikinini Bilong Man.” (Matyu 12:40; Luk 17:26) Yes, God Jehova i makim Pikinini bilong em, Krais Jisas, bilong kamap King.
7 I no Jisas wanpela tasol bai stap King. I gat 144,000 em God i ‘baim bek ol long graun’ bilong mekim wok king na wok pris wantaim Jisas. (KTH 5:9, 10; 14:1, 3; Luk 22:28-30) Ol manmeri i stap aninit long Kingdom bai i stap olsem wanpela famili long olgeta hap bilong graun, na ol bai daun long Krais. (Song 72:7, 8) Tasol olsem wanem yumi inap save, Kingdom bai mekim tru wok bilong kamapim klia olsem Jehova em i Nambawan King, na Kingdom bai kamapim bek Paradais long graun?
KINGDOM BILONG GOD EM I STAP TRU
8, 9. (a) Wanem tok piksa inap makim olsem ol tok promis bilong God long Kingdom ol bai kamap tru? (b) Olsem wanem yumi inap save Kingdom em i stap tru?
8 Tingim tok piksa olsem: Haus bilong yu i paia na bagarap olgeta. Wanpela pren em inap helpim yu na em i tok promis long wokim gen haus na givim kaikai samting long famili bilong yu. Sapos dispela pren i save mekim tok tru oltaim long yu, bai yu bilipim tok promis bilong em, a? Na sapos long de bihain, yu pinis wok na kam bek long haus na yu lukim ol wokman i kirap pinis long rausim ol pipia bilong haus, na ol i kisim kaikai i kam givim long famili, orait nau bai yu bilip tru olsem bihain bai haus i sanap gen na ol samting bai kamap gutpela tru winim bilong bipo.
9 Long kain rot olsem, Jehova i helpim yumi long save Kingdom em i stap tru. Olsem Buk Hibru long Baibel i tok, planti samting long Lo Bilong Moses i olsem piksa na i makim samting bilong Kingdom. (Hibru 10:1) Kingdom bilong Israel long graun em tu i olsem piksa bilong Kingdom bilong God. Dispela Kingdom bilong Israel i no wanpela gavman nating bilong graun, long wanem, ol king bilong Israel ol i mekim wok king long nem bilong God. (1 Stori 29:23) Na Baibel i tok profet pinis olsem: “[Juda] i holim dispela stik i makim strong bilong king, na em bai i stap king oltaim. Em bai i holim dispela namba inap [Silo] i kamap . . . na em bai i bosim olgeta lain manmeri.” (Stat 49:10)a Em nau, Jisas i mas kamap long lain king bilong famili bilong Juda, na em bai i stap King bilong gavman bilong God oltaim oltaim.—Luk 1:32, 33.
10. (a) Wanem taim God i putim ol as ston bilong Kingdom bilong em, em Krais bai bosim? (b) Ol manmeri ol bai mekim wok king wantaim Jisas ol i mas go pas long mekim wanem wok long graun?
10 Taim Jisas i makim ol aposel, ol i kamap olsem ol as ston bilong dispela Kingdom bilong God em Krais bai bosim. (Efesus 2:19, 20; KTH 21:14) Ol i namba wan hap bilong lain 144,000 ol bai mekim wok king wantaim Krais Jisas long heven. Ol dispela manmeri bilong mekim wok king, taim ol i stap yet long graun ol i mas i go pas long wok bilong autim tok, olsem Jisas i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.”—Matyu 28:19.
11. Husat ol i mekim wok bilong autim tok bilong Kingdom long nau? Dispela wok i kamapim wanem gutpela samting?
11 Long nau planti man moa yet i bihainim tok bilong Jisas na i go kamapim ol disaipel. Ol Witnes Bilong Jehova i autim gutpela tok bilong Kingdom long olgeta hap bilong graun. Dispela i truim tok profet bilong Jisas olsem: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Hap wok bilong autim tok bilong Kingdom em bikpela wok bilong skulim ol man. Ol man i daun long ol lo na ol stiatok bilong Kingdom bilong God ol i stap bel isi na wanbel wantaim; ol gavman bilong graun i no inap helpim ol man long i stap gutpela olsem. Dispela olgeta samting i kamapim klia olsem Kingdom bilong God em i stap tru!
12. (a) Olsem wanem na i stret ol man bilong autim tok bilong Kingdom i kisim nem olsem ol Witnes Bilong Jehova? (b) Olsem wanem Kingdom bilong God i narapela kain long ol gavman bilong graun?
12 Jehova i tokim ol Israel: “Yupela i witnes bilong mi. Mi bin makim yupela bilong i stap wokman bilong mi.” (Aisaia 43:10-12) Jisas em i “man bilong autim stret olgeta tok bilong God” na em i wok strong long autim gutnius bilong Kingdom. (KTH 1:5; Matyu 4:17) Olsem na ol man i autim tok bilong Kingdom long nau, i stret ol i holim dispela nem God i makim, em ol Witnes Bilong Jehova. Tasol bilong wanem ol Witnes i lusim bikpela hap taim na strong long tokim ol man long Kingdom bilong God? Long wanem, Kingdom tasol inap helpim ol man. Ol gavman bilong graun i save bagarap, tasol Kingdom bilong God i no ken bagarap. Aisaia 9:6, 7 i kolim King bilong en, em Jisas, olsem “King bilong kamapim gutpela sindaun na bel isi,” na i tok moa: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” Kingdom bilong God i no olsem ol gavman bilong graun, nau ol i kamap na tumora ol i go pinis. Daniel 2:44 i tok: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God . . . kingdom bilong en bai i stap oltaim.”
13. (a) Wanem sampela wok Kingdom bilong God bai mekim tru? (b) Olsem wanem yumi inap save tru God bai truim ol tok promis bilong em?
13 Wanem king bilong dispela graun inap mekim i dai ol pait, na pinisim pasin raskol, na sik, na hangre, na givim haus long olgeta man? Na wanem king inap kirapim bek ol man i dai pinis? I no gat wanpela, a? Tasol Kingdom bilong God wantaim King bilong en bai mekim ol dispela wok. Kingdom i no ken pundaun long wok bilong en olsem wanpela masin i no wok gut na oltaim yumi mas stretim. Ol wok bilong Kingdom bai kamap gutpela, long wanem, Jehova i tok promis olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11) God i no ken popaia long kamapim laik bilong em, tasol em i makim wanem taim bilong Kingdom i mas kamap?
KINGDOM I KAMAP LONG WANEM TAIM?
14. Ol disaipel bilong Jisas i gat wanem tingting kranki long Kingdom? Tasol Jisas i gat wanem save long wok king bilong em?
14 Ol disaipel i askim Jisas: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” Dispela i makim olsem long dispela taim ol disaipel i no save yet long wok bilong Kingdom na long taim God i makim bilong Kingdom i mas kamap. Tasol Jisas i tok ol i no ken askim nabaut long dispela. Em i toksave long ol olsem: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.” Jisas i save, wok bilong em bilong bosim graun i bilong bihain; em i mas kamap King bihain tru long taim em i kirap bek na go antap long heven. (Aposel 1:6-11; Luk 19:11, 12, 15) Baibel i tok profet olsem. Orait Baibel i tok wanem?
15. Olsem wanem Song 110:1 i helpim yumi long save long taim Jisas i kamap King?
15 King Devit i kolim Jisas olsem “Bikpela” na em i mekim tok profet olsem: “[Jehova] i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ ” (Song 110:1; skelim wantaim Aposel 2:34-36.) Dispela tok profet i makim olsem taim Jisas i go bek long heven em i no ken kirap kwik long mekim wok king. Em i mas sindaun long han sut bilong God na wet pastaim. (Hibru 10:12, 13) Em i mas wet inap long wanem taim? Wanem taim em i kamap King? Baibel i helpim yumi long save long dispela.
16. Wanem samting i bin kamap long yia 607 paslain long Krais? Olsem wanem dispela i samting bilong Kingdom bilong God?
16 Jehova i putim nem bilong em long wanpela taun tasol long graun, em Jerusalem. (1 King 11:36) Em nambawan biktaun bilong wanpela kingdom long graun em God i bin orait long en na i makim Kingdom tru bilong God long heven. Olsem na taim ol Babilon i bagarapim Jerusalem long yia 607 paslain long Krais, dispela i makim wanpela bikpela samting. Em kirap bilong wanpela bikpela hap taim i no gat wanpela king long graun em God i makim bilong bosim lain bilong em. Inap 600 yia bihain, dispela bikpela hap taim i stap yet, long wanem, Jisas i tok: “Lek bilong ol man bilong ol arapela lain bai i krungutim Jerusalem, inap long taim God i bin makim bilong ol arapela lain man i bosim Jerusalem, em i pinis.”—Luk 21:24.
17. (a) Wanem dispela “taim God i bin makim bilong ol arapela lain”? Dispela hap taim em inap hamas yia tru? (b) Hap taim “bilong ol arapela lain” i kirap long wanem taim na i pinis long wanem taim?
17 Long “taim God i bin makim bilong ol arapela lain” em i larim ol gavman bilong graun i katim wok king em i bin orait long en. Dispela hap taim “bilong ol arapela lain” i bin kirap long yia 607 paslain long Krais taim ol i bagarapim Jerusalem, na Daniel i makim olsem dispela hap taim bai stap inap “7-pela yia.” (Daniel 4:23-25) Dispela “7-pela yia” i gat hamas yia tru bilong en? Baibel i tok, 3 na hap yia em inap olsem 1,260 de. (KTH 12:6, 14) Olsem na 7-pela yia em inap olsem 2,520 de. Tasol i no gat wanpela bikpela samting i kamap long pinis bilong dispela sotpela hap taim. Orait, sapos yumi makim “wanpela wanpela yia bilong inapim olgeta wan wan de” na yumi skruim 2,520 yia long yia 607 paslain long Krais, yumi kamap long yia 1914.—Namba 14:34; Esekiel 4:6.
18. Jisas i kisim pinis strong bilong bosim Kingdom na kwiktaim em i mekim wanem? Dispela i mekim wanem long graun?
18 Olsem wanem? Jisas i bin kamap King long heven long dispela yia? Sapta 11 bai stori long ol tok bilong Baibel i makim olsem. Tasol taim Jisas i kirap mekim wok king, gutaim i no ken kamap long graun wantu tasol. Kamapim Tok Hait 12:7-12 i tok, taim Jisas i kamap King pinis, kwiktaim em bai rausim Satan na ol ensel nogut long heven. Dispela bai kamapim bikpela hevi long graun, tasol yumi ken strongim bel, long wanem, Baibel i tok Satan i gat “sotpela taim tasol.” Klostu nau bai yumi inap amamas, long wanem, Kingdom bilong God bai bosim graun na em bai mekim gut long graun yet na long ol manmeri i bihainim tok. (Song 72:7, 8) Olsem wanem yumi save, klostu nau dispela samting bai kamap?
[Ol Futnot]
a Insait bilong dispela nem “Silo” i olsem “Man Bilong Kisim Dispela Wok.” Bihain ol i save, dispela “Silo” em Krais Jisas, em i “Laion i bin kamap long lain Juda.” (KTH 5:5) Taim ol Juda i tanim tok bilong sampela hap bilong Ol Skripsa Hibru long tok Aram ol i senisim tok “Silo” na raitim olsem “Mesaia” o “king Mesaia.”
TRAIM SAVE BILONG YU
Kingdom bilong God em wanem samting? Em i stap we?
Husat ol i stap king long Kingdom? Husat ol bai stap aninit long Kingdom?
Olsem wanem Jehova i helpim yumi long save Kingdom i stap tru?
Hap taim “bilong ol arapela lain” i kirap long wanem taim na i pinis long wanem taim?
[Blok long pes 94]
SAMPELA BIKPELA SAMTING BILONG KINGDOM BILONG GOD
• Jehova i tokaut long laik bilong em long kamapim wanpela ‘pikinini’ em bai krungutim het bilong Snek, em Satan.—Stat 3:15.
• Long yia 1943 paslain long Krais, Jehova i makim olsem dispela ‘pikinini’ bai kamap long graun long lain bilong Abraham.—Stat 12:1-3, 7; 22:18.
• Kontrak bilong Lo ol Israel i kisim long yia 1513 paslain long Krais i olsem “piksa o tewel tasol bilong ol gutpela samting i laik kamap bihain.”—Kisim Bek 24:6-8; Hibru 10:1.
• Kingdom bilong Israel long graun i kamap long yia 1117 paslain long Krais na bihain ol king bilong en i bilong lain bilong Devit.—1 Samuel 11:15; 2 Samuel 7:8, 16.
• Jerusalem i bagarap long yia 607 paslain long Krais, na “taim God i bin makim bilong ol arapela lain” i kirap.—2 King 25:8-10, 25, 26; Luk 21:24.
• Long yia 29, God i makim Jisas long spirit holi bilong kamap King bihain, na em i kirap mekim wok bilong em long autim tok long graun.—Matyu 3:16, 17; 4:17; 21:9-11.
• Long yia 33, Jisas i go antap long heven na em i sindaun long han sut bilong God na wetim taim bilong em i kamap King.—Aposel 5:30, 31; Hibru 10:12, 13.
• Jisas i kamap King bilong Kingdom bilong heven long yia 1914 long pinis bilong hap taim “bilong ol arapela lain.”—KTH 11:15.
• Ol i rausim Satan na ol narapela ensel nogut i kam daun long graun na bikpela hevi i kamap long ol man.—KTH 12:9-12.
• Jisas i bosim wok bilong autim gutpela tok bilong Kingdom bilong God long olgeta hap bilong graun.—Matyu 24:14; 28:19, 20.