Askim

◼ Olsem wanem long tok bilong Jisas long Matyu 11:24? Em i tok ol man bilong Sodom na Gomora em Jehova i bin kukim ol long paia na ol i dai pinis, ol bai kirap bek o nogat?

Wan wan taim insait long ol yia i go pinis mipela i bin stori long ol tok bilong Jisas long Matyu 10:​14, 15 na 11:​20-24 na Luk 10:​13-15. Nau mipela skelim moa ol dispela tok, na nau mipela i save, em i no toktok tru long ol samting bai painim ol Sodom na Gomora long bihain. Yumi ken lukim sampela tok moa long Baibel, tasol pastaim yumi ken skelim gut dispela tok bilong Jisas.

Jisas i bin stap long Galili na “long sampela taun Jisas i wokim planti mirakel tumas, tasol ol i no tanim bel. Olsem na long dispela taim Jisas i wok long krosim ol.” Jisas i kolim nem bilong 3-pela taun olsem, em i tok: “Sori tumas, yupela ol Korasin! Sori tumas, yupela ol Betsaida! Sapos wanpela man i bin wokim ol mirakel long Taia na Saidon olsem mi bin wokim long ples bilong yupela, orait longtaim bipo ol Taia na Saidon ol i pasim pinis hap bek olsem laplap na ol i sindaun long sit bilong paia, na ol i tanim bel pinis. Tasol mi tokim yupela, long de bilong kotim ol manmeri, bai hevi bilong Taia na Saidon em i no bikpela olsem hevi bai i painim yupela. Na yupela ol Kapaneam, bai ol i litimapim yupela i go long heven, a? Nogat. Bai yupela i go daun long [matmat, Hades]. Sapos wanpela man i bin wokim mirakel long Sodom olsem mi bin wokim long ples bilong yupela, orait nau tude bai Sodom i stap yet. Tasol mi tokim yupela, long de bilong kotim ol manmeri bai hevi bilong Sodom i no bikpela olsem hevi bai i painim yupela.” (Matyu 11:​20-24) Jisas i mekim wankain tok taim em i salim 12-pela disaipel i go autim tok, na em i mekim gen taim em i salim 70 i go autim tok.−Matyu 10:​14, 15; Luk10:​13-15.

Paslain long yia 1964 yumi bin ting, ol man bilong Korasin na Betsaida na Kapaneam i mas bagarap, tasol sampela Wastaua (tok Inglis) bilong 1964 na 1965 i tok klia olsem ol man i stap long matmat (Hades o Sheol) ol bai kirap bek na Jas bai “skelim olgeta man wan wan” inap long ol pasin ol i mekim.−Revelesen 20:⁠13.

Na ol dispela Wastaua i bin stori olsem: Matyu 11:23 na Luk 10:15 i tok, ol i no ken litimapim Kapaneam i go antap long heven, tasol ol bai daunim em i go daun long matmat, na dispela i makim olsem ol bai daunim ol man bilong Kapaneam. Na long dispela hap bilong Baibel Jisas i kolim Taia na Saidon. Esikiel 32:​21, 30 i tok, ol man bilong Saidon, em God i bin makim ol bilong dai, ol i go long matmat (Sheol). (Aisaia 23:​1-9, 14-18; Esikiel 27:​2-8) Jisas i skelim Taia na Saidon wantaim Sodom, na dispela i makim olsem ol man bilong Sodom tu i stap long matmat (Sheol). Em, ol dispela Wastaua i bin stori olsem.

Tasol mipela skelim gen dispela tok long Matyu 11:​20-24. Jisas i toktok long wanem samting? Em i toktok long ol man i dai na i pinis olgeta na em i toktok long ol man bai kirap bek o olsem wanem? Em i laik tok olsem ol Korasin na Betsaida na Kapaneam i no givim bel long harim tok bilong em, na maski ol i stap long kot ol i no inap tanim bel. Taim Jisas i tok, “long de bilong kotim ol manmeri,” “hevi” bilong Taia na Saidon na bilong Sodom na Gomora “em i no bikpela olsem hevi bai i painim yupela,” ating i no olsem em i tok, ol Taia na Saidon na ol Sodom na Gomora bai kirap bek; nogat. Taim Jisas i tok olsem em i mekim olsem hap tok piksa na bai ol man i kirap nogut long en na ol i ken pilim. Jisas i save mekim dispela kain tok bilong strongim tok bilong em. Sampela wankain tok em olsem:

“Heven wantaim graun bambai i lus. Tasol wanpela liklik hap bilong lo bai em i no inap lus.” “Skai wantaim graun bambai i go pinis, tasol tok bilong mi em bai i no lus.” (Luk 16:17; 21:33; Matyu 5:18; lukim tu Hibru 1:​10-12.) Yumi save graun tru na ples antap, olsem skai, i no inap pinis. (Sam 78:69; 104:5; Eklisiastis 1:⁠4) Na narapela tok Jisas i mekim na i wankain tu, em i tok: “Kamel i laik i go insait long hul bilong nil bilong samap, em i no gat hatwok olsem maniman i laik i go insait long kingdom bilong God.” (Mak 10:25) Tasol Jisas i no tok maniman i no inap kamap disaipel; nogat; sampela i bin kamap disaipel. (1 Timoti 6:​17-19) Tasol Jisas i save mekim dispela kain tok na bai yumi ken save, maniman bai hatwok long givim baksait long ol gutpela samting bilong skin na givim bel long ol wok bilong God.−Luk 12:​15-21.

Olsem na taim Jisas i tok, ‘long de bilong kotim ol manmeri bai hevi bilong Taia o Sodom i no bikpela olsem hevi bai painim yupela,’ em i no tok, ol man bilong Taia na Sodom bai stap long De Bilong Kot. Tasol em i laik tok strong long ol man bilong Korasin na Betsaida na Kapaneam, long wanem, planti ol i no laik harim tok, na ol i gat asua, na Jisas i laik bai ol i pilim dispela samting. Tru, sampela bilong Kapaneam i harim na ol i kamap Kristen, tasol ol narapela nogat. (Mak 1:​29-31; Luk 4:​38, 39) Ating sampela bilong ol dispela ples, na ol saveman bilong lo na ol Farisi tu, ol i mekim sin long spirit holi, na i no inap God i ken lusim tingting long dispela kain sin, na bihain tu nogat. O1 bai go long Gehena; ol bai bagarap na pinis olgeta.−Matyu 12:​31, 32; 23:⁠33.

Na Esikiel 32:​21, 30 i tok ol haiden bilong Taia na Saidon ol i stap long matmat (Sheol), olsem na ol inap kirap bek. Orait, olsem wanem long ol man bilong Sodom long De Bilong Kot? Tru, Jisas i skelim Saidon wantaim Sodom, tasol dispela i no makim olsem ol Sodom bai kirap bek. God i bin kukim long paia na salfa ol man nogut bilong Sodom. Tasol yumi ken stori moa long Baibel i tok wanem long ol dispela samting.

Jut i tok klia. Pastaim Jut i toktok long (1) ol Isrel i kisim bagarap long wanem ol i no bilip, na (2) ol ensel i bin mekim rong na “ol i wetim bikpela De bilong God, na bai ol i kamap long kot.” Em i tok pinis olsem, na nau em i tok, i olsem tasol long ol man bilong Sodom na Gomora; em i tok: “Bipo ol man bilong Sodom wantaim Gomora . . . ol i bin mekim pasin wankain . . . Olsem na God i bekim pe nogut long ol long paia i stap oltaim.” Bipo yumi bin ting, dispela i toktok long ol taun tasol bai bagarap na pinis olgeta na ol man bilong en nogat. Tasol sapos yumi lukim Jut 5 na 6 bai yumi save, ves 7 i toktok long ol man. (I olsem tu long Matyu 11:​20-24, em i toktok long ol man; em i no toktok long ol ston o haus.) Olsem na ves 7 i tok olsem: God i skelim pinis long kot ol man nogut bilong Sodom na Gomora na em i bagarapim na pinisim ol na ol i lus olgeta na i no inap kirap bek.a

Na sampela taim, taim Baibel i stori long Tait Wara long taim bilong Noa, Baibel i kolim Sodom na Gomora tu.

Ol disaipel i askim Jisas long taim bilong pinis, na em i tok. “Long dispela taim bai i gat bikpela hevi tru. Long taim graun i nupela yet inap nau, kain hevi olsem i no bin kamap bipo. Na bihain tu bai i no gat hevi olsem.” (Matyu 24:​3, 14, 21) Na nau Jisas i toktok “long taim bilong Noa” na “long taim bilong Lot,” em ol man bilong dispela taim ol no laik harim tok long wanpela bagarap i laik kamap. Na nau Jisas i tok: “Bai i olsem tasol long de Pikinini Bilong Man i kamap ples klia.” (Luk 17:​26-30; lukim tu Matyu 24:​36-39.) Olsem wanem? Jisas i stori hia long pasin o tingting bilong ol man? o em i toktok long taim bilong kot na taim bilong givim strafe long ol man nogut na bagarapim na pinisim ol?

Bihain Pita i stori long taim God i mekim kot long ol man na givim strafe long ol man nogut. Na nau Pita i stori long 3-pela samting: Ol ensel i bin mekim rong, na taim bilong Noa, na ol man bilong Sodom na Gomora i kisim bagarap. Na Pita i tok: “Bihain, ol man i givim baksait long God, ol i ken tingim dispela kot bilong bipo. Em i piksa bilong kot i mas kamap long ol.” (2 Pita 2:​4-9) Ol man nogut i kisim bagarap long Tait Wara, em Pita i skelim dispela wantaim “de bilong kot i kamap long ol man i givim baksait long God, na bai ol i lus.” Dispela bai kamap paslain long taim bilong nupela heven na nupela graun God i tok promis long kamapim.−2 Pita 3:​5-13.

Orait, taim dispela pasin nogut bilong nau em i pinis na God i kilim i dai ol man nogut, ol dispela man i pinis olgeta, o olsem wanem? Baibel i tok ol i pinis olgeta. Long 2 Tesalonaika 1:​6-9 Baibel i tok: “God bai i mekim stretpela pasin olsem: Bai em i bekim hevi long ol man i save givim hevi long yupela. Na em i laik tekewe dispela hevi nau yupela i karim, na givim malolo long yupela wantaim mipela. Bai em i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia wantaim bikpela paia. Long dispela taim bai em i bekim pe nogut long ol man i no save long God na i no bihainim gutnius bilong Bikpela bilong yumi Jisas. Ol dispela man bai ol i kisim pe nogut olsem: Bai ol i stap longwe long pes bilong Bikpela, na long lait bilong bikpela strong bilong em, na bai ol i lus olgeta.”

Dispela tok i wankain long tok bilong Jut taim em i stori long ol samting i bin painim Sodom. Na Matyu 25:​31-46 na Revelesen 19:​11-21 i tok, ol “meme” bai kisim pe nogut long pait bilong God liklik taim bai kamap na ol bai “go daun long bikpela hul i gat hatpela paia,” em i makim olsem man i bagarap na pinis olgeta.b−Revelesen 20:​10, 14.

Baibel i kolim Sodom wantaim Gomora, na Tait Wara tu, i olsem samting bilong makim taim bilong God i bagarapim dispela pasin nogut nau i stap long graun. Sodom na Gomora wantaim Tait Wara i olsem piksa bilong makim dispela bagarap liklik taim bai kamap. Olsem na nau yumi save, ol dispela man bipo God i bagarapim, ol i pinis olgeta na i no ken kirap bek. Na sapos long nau yumi stap gut long Jehova na yumi stap olsem inap long nupela taim i kamap na i stap, bai yumi ken lukim husat i kirap bek long matmat na bai yumi save tu husat i no kirap bek. Yumi save, ol kot bilong Jehova i stret. Ilaihu i laik strongim bel bilong yumi na em i tok: “Tru tumas, God i no save mekim pasin nogut, na God I Gat Olgeta Strong em i no save paulim kot.”−Jop 34:​10, 12, NW.

[Ol Futnot]