Jisas i Bekim Tok Long Yangpela Maniman i Gat Namba

Jisas i wokabaut long hap bilong Perea bilong i go long Jerusalem, na wanpela yangpela maniman i ran i kam na nildaun klostu long lek bilong em. Dispela man em “wanpela hetman,” ating em i wanpela ofisa i holim bikpela namba long sinagog o em i wanpela memba bilong Sanhedrin. Em i tok: “Gutpela Tisa, mi mas mekim wanem bilong kisim laip oltaim?”—Luk 8:41; 18:18; 24:20.

Jisas i tokim em: “Bilong wanem yu kolim mi gutpela? I no gat wanpela man i gutpela, God wanpela tasol i gutpela.” (Luk 18:19) Taim yangpela man i kolim em “gutpela” ating em i laik givim biknem long Jisas, olsem ol rabai i save mekim. Jisas i gutpela tisa, tasol em i laik bai dispela man i save olsem dispela biknem “Gutpela” i makim God tasol.

Jisas i tokim em. “Tasol sapos yu laik kisim laip, orait oltaim yu mas bihainim ol lo.” Na yangpela man i askim em: “Wanem ol lo?” Orait Jisas i kolim 5-pela bilong Tenpela Lo olsem, yu no ken kilim man i dai, no ken mekim pasin pamuk, no ken stil, no ken tok giaman long kot, na yu mas onarim papamama bilong yu. Jisas i kolim tu nambawan bikpela lo, olsem: “Yu mas laikim ol arapela man olsem yu laikim yu yet.”—Matyu 19:17-19.

Na dispela man i bekim tok olsem. “Mi bin bihainim olgeta dispela lo. Mi sot yet long wanem samting?” (Matyu 19:20) Ating em i pilim olsem em i sot long sampela gutpela pasin, em samting em i mas i gat bilong kisim laip oltaim. Dispela man i laik save long dispela samting, olsem na Jisas i “laikim em.” (Mak 10:21) Tasol i gat wanpela samting i pasim em long bihainim Jisas.

Dispela man i laikim tumas mani kago, olsem na Jisas i tok: “I gat wanpela samting moa yu mas mekim: Go na salim ol samting bilong yu na givim dispela mani long ol rabisman na bai yu gat ol samting i dia tumas long heven. Na kam bihainim mi.” Yes, em i ken givim mani bilong em long helpim ol rabisman, em ol i no inap bekim ol samting em i givim, na em bai kamap disaipel bilong Jisas. Yangpela man i harim dispela tok na em i bel hevi na em i go. Em i “gat planti samting tru,” na ol dispela samting i pasim ai bilong em na em i no lukim ol samting i dia tumas long heven. (Mak 10:21, 22) Jisas i tok: “I hatwok tru long ol man i gat mani long i go insait long Kingdom bilong God!”—Luk 18:24.

Ol disaipel i kirap nogut long tok bilong Jisas na long tok nau em i mekim olsem: “Kamel i laik go insait long ai bilong nidol bilong samap, em i no gat hatwok olsem maniman i laik go insait long Kingdom bilong God.” Olsem na ol disaipel i tok: “Husat tru inap kisim laip?” Olsem wanem? I hatwok long man i kisim laip? Jisas i lukluk long ol na i tok: “Ol samting ol man i no inap mekim, God inap mekim.”—Luk 18:25-27.

Pita i tok samting ol i mekim i narapela long samting dispela maniman i mekim, em i tok: “Harim! Mipela i lusim pinis olgeta samting na bihainim yu. Bai mipela i kisim wanem samting?” Ol i bin mekim gutpela disisen, olsem na Jisas i kolim blesing ol bai kisim, em i tok: “Long taim bilong wokim ol samting i kamap nupela, taim Pikinini bilong man i sindaun long sia king bilong en, yupela ol man i bin bihainim mi, yupela tu bai sindaun long 12-pela sia king, na stap olsem jas na skelim 12-pela lain bilong Israel.”—Matyu 19:27, 28.

Dispela tok bilong Jisas i makim olsem bihain nupela taim bai kamap long graun na olgeta samting bai kamap nupela gen olsem gaden Iden long bipo. Pita wantaim ol narapela disaipel bai kisim gutpela prais bilong mekim wok king wantaim Jisas na bosim dispela Paradais long graun. Em gutpela prais tru inap long ol i lusim olgeta samting bilong ol long kisim!

Tasol nau tu ol inap kisim ol gutpela samting. Ol disaipel i kisim ol blesing tu long dispela taim. Olsem na Jisas i tok: “Olgeta man husat i tingim Kingdom bilong God na i lusim haus, meri bilong ol, brata, papamama, o pikinini, ol bai kisim planti moa long dispela taim, na ol bai kisim laip oltaim long taim i kamap bihain.”—Luk 18:29, 30.

Maski ol disaipel bilong em i go long wanem wanem hap, ol i insait yet long wanpela bikpela lain brata i stap wanbel tru, winim ol wanblut bilong ol. Tasol ating dispela yangpela maniman i lus long kisim dispela gutpela prais, na em i lus tu long kisim laip i stap oltaim long Kingdom Bilong God long heven.

Jisas i tok moa: “Tasol planti man i stap fes ol bai stap las, na ol man i stap las ol bai stap fes.” (Matyu 19:30) Wanem insait bilong dispela tok bilong Jisas?

Em i makim olsem, dispela yangpela maniman i stap “fes” wantaim ol hetman bilong Juda. Em i save long ol lo bilong God, na em i save long ol tok promis, na em inap mekim ol narapela gutpela wok. Tasol em i putim mani kago i stap namba 1 samting long laip bilong em, winim ol narapela samting. Tasol ol man nating bilong dispela hap i save olsem Jisas i skulim ol long tok i tru na rot bilong kisim laip. Pastaim ol i stap “las,” tasol nau ol i stap “fes.” Bihain ol bai sindaun long ol sia king long heven wantaim Jisas na bosim Paradais long graun.