Banis Ston I Tokaut Stret Long Tok Profet

Banis Ston Bilong Taitus i kamapim tupela bikpela samting i bin kamap long bipo. Planti man i no luksave olsem em i stori long ol samting i kamap bipo na stori bilong Baibel—Banis Ston Bilong Taitus i tokaut stret long ol narakain tok profet bilong Baibel.

Kirap long taim bilong ol aposel, Gavman Rom i bosim Briten na Gaul (nau Frans) i go inap long Isip, na ol manmeri bilong dispela kantri i stap gut na bungim planti mani kago. Tasol wanpela ples i stap longwe em i save givim planti hevi long Rom, em provins bilong Judia.

Buk Encyclopedia of Ancient Rome i tok: “Sampela ples Rom i bosim i stap olsem ples ol i no laikim tru, long tupela sait wantaim, olsem Judia. Lain Juda i no laikim ol bikman bilong ol narapela ples husat i no tingim kastam bilong ol, na lain Rom i tingim lain Juda olsem ol man i gat strongpela het na dispela i kamapim bikpela hevi.” Planti Juda i bilip olsem wanpela lida bai helpim ol long rausim lain Rom, em ol lain ol i heitim na kamapim gen gutpela sindaun long Israel. Tasol long 33 C.E., Jisas Krais i tokaut olsem bikpela bagarap bai painim Jerusalem.

Jisas i tok: “Taim bai kamap na ol birua bilong yu bai banisim yu long wanpela strongpela banis i gat ol pos i sap na ol bai banisim yu na givim hevi long yu long olgeta sait. Na ol bai tromoi yu na ol pikinini i stap insait long yu i go daun long graun, na ol bai i no larim wanpela ston bilong yu i stap antap long narapela ston.”—Luk 19:43, 44.

Ol disaipel i tingting planti long tok Jisas i mekim. Tupela de bihain, ol disaipel i lukim tempel long Jerusalem na wanpela i tok: “Tisa, lukim ol dispela ston na ol dispela haus!” Sampela ston bilong tempel i longpela winim 11 mita, braitpela bilong ol inap 5 mita, na ol i go antap inap 3 mita! Tasol Jisas i tok: “Ol dispela samting yupela i lukim, taim bai kamap na bai i no gat wanpela ston i stap antap long narapela ston, nogat tru, bai ol i tromoi olgeta i kam daun.”—Mak 13:1; Luk 21:6.

Jisas i tok moa olsem: “Taim yupela i lukim ol ami i kam banisim Jerusalem, orait yupela i ken save olsem taim bilong em long bagarap i kam klostu. Long dispela taim ol manmeri long Judia i mas ranawe i go long ol maunten, na ol manmeri i stap long Jerusalem i mas lusim dispela hap. Na ol man i stap ausait long dispela taun ol i no ken i go insait long en.” (Luk 21:20, 21) Olsem wanem? Tok bilong Jisas i kamap tru?

Inap 33 yia bihain, na lain Juda i no amamas long daun long Rom. Tasol long 66 C.E. taim gavana bilong Rom long Judia, Gesius Florus, i kisim mani long bokis mani bilong tempel holi, lain Juda i belhat nogut tru. Bihain ol paitman bilong Juda i go long Jerusalem na ol i kilim i dai ol soldia bilong Rom, na ol i tokaut olsem ol i kisim indipendens long Rom.

Klostu 3-pela mun bihain, winim 30,000 soldia bilong Rom, em Sestius Galus i bosim, ol i go long Jerusalem bilong bagarapim ol bikhetman. Kwiktaim ol Rom i go insait long taun na brukim namba 1 banis i raunim tempel. Bihain, i no gat risen na ol i lusim na i go bek. Ol bikhetman bilong Juda i amamas na kwiktaim ol i ronim ol. Taim ol soldia bilong Rom na ol bikhetman bilong Juda i lusim taun na i go, ol Kristen i bihainim tok lukaut bilong Jisas, ol i ranawe lusim Jerusalem na i go long ol ples maunten long hapsait bilong Wara Jordan.—Matyu 24:15, 16.

Long 67 C.E., ol Rom i kirapim pait gen wantaim ol Judia, na Jeneral Vespesian na pikinini man bilong em Taitus i bosim ol. Tasol bihain long Empera Niro i dai long yia 68 C.E., Vespesian i go bek long Rom long kamap empera, na em i larim pikinini bilong em Taitus wantaim 60,000 lain ami long pait long ol Judia.

Long Jun 70 C.E., Taitus i tokim ol soldia bilong em long katim ol diwai i gro ausait long taun bilong ol Judia, na ol i yusim long wokim wanpela longpela banis inap 7 kilomita raunim Jerusalem. Long Septemba, ol Rom i bagarapim na kukim taun na tempel, na rausim olgeta wan wan ston olsem Jisas i bin tok profet long en. (Luk 19:43, 44) Wanpela wok painimaut i tok olsem, “klostu 250,000 i go 500,000 manmeri i bagarap long Jerusalem na ol narapela hap bilong kantri.”

Long 71 C.E., Taitus i go bek long Itali na ol sitisen bilong Rom i welkamim em. Olgeta manmeri long taun i selebretim wanpela bikpela mats bilong makim nupela empera bilong biktaun.

Bikpela lain manmeri i amamas taim ol i mats namel long ol strit bilong Rom. Ol i amamas long lukim ol sip ol i kisim long pait, ol samting ol i wokim olsem piksa bilong woa, na ol samting ol i kisim long tempel bilong Jerusalem.

Taitus i kisim ples bilong papa bilong em Vespesian na kamap empera long 79 C.E. Tasol tupela yia bihain, Taitus i dai. Brata bilong em Domisian i kisim ples bilong em, na kwiktaim em i wokim wanpela banis ston bilong givim ona long Taitus.

Long nau, long olgeta wan wan yia planti handret tausen manmeri i save visitim Ples Maket Bilong Rom na ol i amamas tru long lukim Banis Ston Bilong Taitus. Sampela i tingim dispela banis ston olsem namba 1 gutpela wok bilong ol saveman, na sampela i tingim olsem samting ol i wokim bilong makim strong bilong empera bilong Rom, na ol narapela i tingim olsem samting bilong makim taim Jerusalem na tempel i bagarap.

Ol man bilong ritim na skelim tok bilong Baibel i tingim Banis Ston Bilong Taitus olsem em i stori long ol bikpela samting. Banis ston i tokaut stret long ol samting Baibel i tok profet long en na dispela i soim olsem God i as bilong ol tok bilong en.—2 Pita 1:19-21.