Sapotim Kongrigesen Bilong Yu

Long olgeta hap bilong graun, planti milion manmeri i amamas long lotuim Jehova insait long planti tausen kongrigesen. Ol i tenkyu long ol tok bilong stiaim ol em ol i kisim, na ol i amamas long sapotim kongrigesen long kain kain rot. Yu pilim olsem long kongrigesen bilong yu?

1. Wanem sampela rot em yu ken yusim taim na strong bilong yu long sapotim kongrigesen?

Yumi olgeta inap helpim kongrigesen. Olsem, sampela long kongrigesen bilong yu em ol i lapun o sik? Yu inap helpim ol na kisim ol i go long ol miting? O yu inap helpim ol long ol narapela samting, olsem go baim kaikai o ol narapela samting ol i nidim long stua, o klinim haus bilong ol? (Ritim Jems 1:27.) Yumi ken amamas long helpim tu wok bilong klinim na lukautim Haus Kingdom bilong yumi. I no gat man i fosim yumi long mekim ol dispela samting. Yumi laikim Jehova na ol brata, olsem na “[yumi] bai amamas long go” helpim wok.​—Buk Song 110:3.

Ol baptais Witnes inap sapotim kongrigesen long planti narapela rot. Ol brata i winim ol mak Baibel i kolim ol inap mekim wok kongrigesen sevan, na bihain kamap elda. Ol brata na sista wantaim inap sapotim wok autim tok long rot bilong mekim wok painia. Sampela Witnes i ken helpim wok bilong sanapim ol ples lotu o muv i go long ol narapela hap we kongrigesen i nidim helpim long ol narapela wok.

2. Hau bai yumi ken yusim mani na ol samting bilong yumi long sapotim kongrigesen?

Yumi inap “onarim Jehova na givim em ol gutpela samting tru bilong [yumi].” (Provep 3:9) Yumi amamas long givim mani na ol narapela samting bilong sapotim kongrigesen na wok bilong autim tok long olgeta hap. (Ritim 2 Korin 9:7.) Kontribiusen yumi givim i sapotim tu ol disasta rilif wok. Planti i mekim disisen olsem long olgeta taim ol bai “putim sampela mani i stap” bilong givim olsem kontribiusen. (Ritim 1 Korin 16:2.) Yumi ken putim kontribiusen long ol bokis kontribiusen long ol ples lotu o givim long rot bilong Intenet long hap donate.jw.org. Jehova i givim rot bilong yumi ken soim olsem yumi laikim em taim yumi mekim disisen long hau yumi yusim mani na ol samting bilong yumi.

KISIM SAMPELA SAVE MOA

3. Yumi ken yusim mani na ol samting bilong yumi

Jehova i laikim man i amamas long givim samting, na Jisas tu i pilim wankain. Olsem, Jisas i tingim pasin bilong wanpela wido meri, maski em i sot long ol samting em i putim kontribiusen. Ritim Luk 21:1-4, na stori long ol dispela askim:

• Yu ting yu mas givim bikpela kontribusen bilong amamasim Jehova?

• Jehova na Jisas i pilim olsem wanem taim yumi amamas long givim kontribiusen?

Bilong save long hau ol i yusim kontribiusen bilong yumi, pilaim VIDIO. Na stori long dispela askim.

VIDIO: ‘Givim Presen Long Jehova’ (4:47)

• Hau ol i yusim ol kontribiusen long helpim ol kongrigesen long olgeta hap bilong graun?

4. Yumi ken amamas long givim helpim

Long taim bilong ol man i bin raitim Baibel, ol manmeri i lotuim Jehova i givim bel tru long lukautim ol ples bilong lotu. Tasol dispela i no makim tasol wok bilong givim mani olsem kontribiusen, nogat. Ritim 2 Stori 34:9-11, na stori long dispela askim:

• Olsem wanem olgeta Israel i helpim wok bilong lukautim haus bilong Jehova, o ples bilong lotu?

Bilong lukim hau ol Witnes Bilong Jehova i bihainim eksampel bilong ol Israel bilong bipo, pilaim VIDIO. Na stori long ol dispela askim.

VIDIO: Lukautim Ol Ples Bilong Mekim Lotu (3:31)

• Wai na em i bikpela samting long oltaim klinim na stretim gut ol samting bilong Haus Kingdom i bagarap?

• Wanem sampela rot em yu ken helpim?

5. Ol brata inap winim ol mak bilong kisim sampela wok moa

Baibel i kirapim ol Kristen man long mekim olgeta samting ol inap mekim bilong sapotim kongrigesen. Bilong lukim wanpela eksampel, pilaim VIDIO. Na stori long dispela askim.

VIDIO: Ol Brata​—Wok Strong Long Kisim Wanpela Gutpela Wok (5:19)

• Long vidio, Ryan i mekim wanem bilong sapotim gut moa kongrigesen?

Baibel i kolim ol mak em ol brata i mas winim bilong mekim wok kongrigesen sevan na elda. Ritim 1 Timoti 3:1-13, na stori long ol dispela askim:

• Ol brata i laik kamap kongrigesen sevan na elda ol i mas stap olsem wanem?

• Famili bilong ol i mas bihainim wanem kain pasin?​—Lukim ves 4 na 11.

• Taim ol brata i wok strong long winim ol dispela mak, olsem wanem dispela i helpim olgeta long kongrigesen?

OL BIKPELA POIN

Jehova i amamas tru long hatwok yumi mekim long givim taim, strong, na mani samting bilong sapotim kongrigesen.

Riviu

• Hau yumi inap yusim taim na strong bilong yumi long sapotim kongrigesen?

• Hau yumi inap yusim mani na ol samting bilong yumi long sapotim kongrigesen?

• Long wanem ol rot yu laik sapotim kongrigesen?

MEKIM WOK PAINIMAUT

Skelim wai na God i no tok long ol manmeri i lotuim em long nau i mas givim namba 10 hap.

“Baibel i Tok Wanem Long Pasin Bilong Givim Namba Ten Hap?” (Atikol long websait)

Baibel i makim sampela wok em ol man i baptais pinis i ken mekim. Tasol olsem wanem sapos wanpela meri i baptais pinis i mas mekim ol dispela wok?

“Kliagut Long Wok Bilong Ol Elda Olsem Het Insait Long Kongrigesen” (Wastaua, Februari 2021)

Lukim sampela Witnes i gat strongpela bel i daunim laik bilong ol yet bambai ol i trenspotim ol litresa i go long ol wanbilip bilong ol.

Tilim Ol Litresa Bilong Baibel Long Kongo (4:25)

Kisim save long rot em mipela i save kisim mani bilong helpim wok bilong mipela, dispela i narakain long ol narapela lotu.

“Ol Witnes Bilong Jehova i Kisim Mani We Bilong Mekim Wok?” (Atikol long websait)