Ol Bikpela Sik—Em Mak Bilong Pinis i Laik Kamap?

OLSEM WANEM? Ol bikpela sik i wok long kamap long nau i makim pinis bilong graun i klostu? Paslain long mipela i stori long dispela askim, yumi ken tingim insait bilong dispela tok “pinis bilong dispela graun.”

Planti man i ting pinis bilong graun em olsem: God bai bagarapim graun yet na olgeta samting long en. Tasol Baibel i tok, em “i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) God i gat laik long ol man i ken pulap long graun, na ol i no gat sik, na ol i amamas, na ol i gat bikpela laik long bihainim ol stretpela lo bilong em. Olsem na pinis bilong graun i no makim pinis bilong graun yet na ol man i stap long en. Nogat. Dispela tok i makim pinis bilong pasin bilong dispela graun na bilong ol man i no laik bihainim laik bilong God.

Aposel Pita i kamapim klia dispela samting, olsem: “Bikpela tait [long taim bilong Noa] i karamapim dispela graun, na graun i bagarap olgeta.” God i bagarapim ol man nogut, tasol graun yet na stretpela man Noa wantaim famili bilong em ol i no bagarap. Bihain Pita i tok, God bai mekim gen sampela samting na “ol man i bin givim baksait long God, ol bai i bagarap olgeta.”​—⁠2 Pita 3:​6, 7.

Na sampela ves moa long Baibel i stret wantaim dispela tingting. Olsem: Sindaun 2:​21, 22 i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”​—⁠Lukim tu Song 37:​9-11.

Ol Bikpela Sik na Pinis Bilong Graun

Tasol dispela samting bai kamap long wanem taim? Fopela disaipel bilong Jisas i bin askim em olsem. Ol i tok: “Wanem mak bai i kamap na mipela i ken save, yu kam i stap na pasin bilong dispela graun i laik pinis [o sampela Baibel i tok, “dispela graun i laik pinis”]?” (NW) Jisas i tok: “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king. Long sampela hap ol bai i gat taim bilong bikpela hangre, na graun bai i guria.” (Matyu 24:​3, 7) Long stori bilong dispela samting long Luk 21:​10, 11, Jisas i tok moa: “Na long sampela hap ol bai i gat taim bilong . . . bikpela sik. Na long skai yupela bai i lukim ol bikpela bikpela mak na ol kain kain samting bilong mekim yupela i pret nogut tru.”

Jisas i no tokaut olsem ol bikpela sik tasol bai kamap bilong makim pinis i klostu, nogat. Em i kolim ol narapela samting tu olsem ol bikpela pait, guria, na hangre. Long tok profet bilong em long Matyu 24 na 25, Mak 13, na Luk 21, Jisas i tok profet long planti samting moa bai kamap. Olgeta dispela samting i mas kamap long wankain taim paslain long God i kirap na pinisim ol pasin nogut long graun. Ol samting i kamapim klia olsem yumi stap nau long dispela taim.

Paradais Bai Kamap Bihain

Bihain ol manmeri i no ken bagarap olgeta long bikpela sik o long han bilong God, nogat. God Jehova i tok promis long mekim dispela graun i kamap wanpela paradais. (Luk 23:​43, NW) Em bai pinisim ol bikpela sik wantaim ol narapela samting i save bagarapim ol man.

Yumi save long dispela samting taim yumi tingim wok bilong Krais Jisas, em man i bihainim stret ol gutpela pasin bilong Papa bilong em. Papa bilong em long heven i givim strong long Jisas bilong oraitim sik bilong ol lek nogut, ol bun krungut, ol aipas, na ol mauspas. (Matyu 15:​30, 31) Na tu, em i oraitim sik bilong ol man i gat sik lepra. (Luk 17:​12-14) Em i oraitim sik bilong wanpela meri em i karim blut oltaim, na wanpela man i gat han nogut, na wanpela man skin bilong em i solap nogut. (Mak 3:​3-5; 5:​25-29; Luk 14:​2-4) Em i mekim skin i kamap gutpela gen bilong ol man i gat “sik i save mekim ol i pundaun na guria nogut, na ol man bun bilong ol i dai olgeta.” (Matyu 4:24) Tripela taim em i kirapim bek ol man i dai pinis!​—⁠Luk 7:​11-15; 8:​49-56; Jon 11:​38-44.

Ol dispela mirakel bilong oraitim ol sik i strongim tok promis bilong God olsem, bihain em bai kamapim wanpela taim ‘i no gat man i tok olsem, “Mi gat sik.” ’ (Aisaia 33:24) Inap long olgeta taim bihain ol bikpela sik i no ken bagarapim moa skin na laip bilong ol man. Yumi ken amamas tru olsem gutpela Man bilong wokim yumi em i gat strong na laik long pinisim olkain sik inap oltaim!​—⁠KTH 21:​3, 4.

[Ol Piksa long pes 9]

God i givim strong long Jisas bilong oraitim ol sikman

[Piksa long pes 10]

Long Paradais bai kamap bihain long graun, Jehova bai pinisim olkain sik