Ol Taim na Ol De i Stap Long Han Bilong Jehova
“Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.”—APOSEL 1:7.
1. Taim ol aposel i askim Jisas long wanem taim ol samting bai kamap, em i bekim wanem tok long ol?
OL MANMERI i “bel nogut na i wari long olgeta dispela pasin nogut” ol lain i holim nating nem Kristen na ol narapela lain i wok long mekim, ol i save tingting, wanem taim dispela pasin nogut bilong graun bai pinis na God bai kamapim nupela taim long graun na stretpela pasin tasol bai stap long en? (Esekiel 9:4; 2 Pita 3:13) Klostu long taim Jisas i dai, na taim em i kirap bek pinis, ol aposel i bin givim sampela askim long em long ol taim na de bilong ol samting bai kamap. (Matyu 24:3; Aposel 1:6) Tasol taim Jisas i bekim ol dispela askim, em i no kolim sampela tok na bai ol i ken skelim de na yia ol samting bai kamap. Bilong bekim wanpela askim bilong ol, em i kolim sampela bikpela mak bai kamap, na bilong bekim narapela askim, em i tok, “i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.”—Aposel 1:7.
2 Jisas em i dispela wanpela Pikinini tasol bilong Jehova, tasol bipo em yet i no save long ol taim na de Papa bilong em i makim bilong ol samting bai kamap. Taim Jisas i mekim tok profet long taim bilong las de, long pasin daun em i tokaut olsem: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Matyu 24:36) Jisas i amamas long wet tasol long Papa bilong em i tokaut long em long taim stret Em bai kirap na pinisim ol pasin nogut bilong dispela graun.a
3. Ol tok Jisas i mekim bilong bekim ol askim long ol samting bilong laik bilong God, dispela i skulim yumi long wanem samting?
3 Pasin bilong Jisas long bekim ol askim bilong ol aposel long wanem taim ol samting bai kamap bilong kamapim laik bilong God, dispela inap givim tingting long yumi long tupela samting. Namba wan i olsem, Jehova i save makim taim bilong mekim ol samting; na namba tu i olsem, em wanpela tasol i save makim dispela taim, na ol wokboi bilong em i no ken ting, taim em i no kamapim yet ol dispela samting, em bai toksave long ol long taim o de stret ol i mas kamap.
Ol Taim na Ol De Jehova i Makim
4. Wanem insait bilong ol tok Grik ol i tanim olsem “ol taim” na “ol de” long Aposel 1:7?
4 Wanem insait bilong dispela tok “ol taim” na “ol de”? Tok bilong Jisas i stap long Aposel 1:7 i kolim tupela kain taim. Tok Grik ol i tanim olsem “ol taim,” em i olsem “wanpela hap taim,” olsem longpela taim o sotpela taim. Na dispela tok “ol de,” ol i kisim long wanpela tok Grik i makim wanpela taim stret, olsem wanpela taim ol i makim pinis na i gat sampela samting i mas kamap olsem mak bilong dispela taim. Wanpela man, em W. E. Vine, em i stori long dispela tupela tok Grik na em i tok: ‘Long Aposel 1:7, Papa i mekim wok long bikpela namba bilong em na i makim ol taim (chronos), olsem longpela taim o sotpela taim, na ol de (kairos), olsem wanpela taim stret i gat sampela bikpela samting i mas kamap long dispela taim.’
5 Taim Bikpela Tait i no kamap yet, God i bin makim taim stret, olsem 120 yia, bilong larim pasin nogut i stap long graun, em ol man wantaim ol bikhetlain ensel i bin tanim i kamap man ol i bin mekim. (Stat 6:1-3) Noa, em man bilong God, em i gat 480 krismas long dispela taim. (Stat 7:6) Noa i no gat pikinini, na em i stap olsem inap 20 krismas moa. (Stat 5:32) Bihain bihain, taim ol pikinini man bilong Noa i bikpela pinis na ol i marit, God i toksave long Noa olsem Em i laik pinisim ol pasin nogut i stap long graun. (Stat 6:9-13, 18) Tasol maski Jehova i givim tupela wok long Noa, olsem wokim bot na autim tok long ol man, Jehova i no tokaut long Noa long taim stret em bai kamapim dispela bagarap.—Stat 6:14; 2 Pita 2:5.
6. (a) Olsem wanem Noa i kamapim klia olsem em i putim taim na de bilong ol samting long han bilong Jehova? (b) Olsem wanem yumi inap bihainim pasin bilong Noa?
6 Inap planti yia—ating 50 yia samting—“Noa i mekim olgeta samting olsem God i tokim em.” Noa i “bilip long God” na em i mekim olsem, na em i no save long de stret dispela samting bai kamap. (Stat 6:22; Hibru 11:7) Jehova i larim em i stap olsem na i no tokim em long de stret em bai kirap mekim ol samting. Orait wanpela wik paslain long taim bikpela ren i kirap, Jehova i toksave long em. (Stat 7:1-5) Noa i bilip tru long Jehova na dispela i helpim em long putim taim na de bilong ol samting long han bilong God. Na yumi ken save, Noa i tenkyu tru long Jehova i bin lukautim em long taim bilong Bikpela Tait, na bihain em i lusim bot na i kam ausait long gutpela klinpela graun! Yumi tu i wet long Jehova i kisim bek yumi, olsem na yumi mas i gat wankain strongpela bilip long God olsem Noa, a?
7, 8. (a) Ol bikpela lain na ol strongpela gavman bilong bosim graun ol i bin kamap olsem wanem? (b) Olsem wanem Jehova i bin ‘makim taim bilong ol lain man i ken i stap, na em i bin putim mak bilong graun bilong ol’?
7 Bihain long Tait, ol manmeri i kamap long lain bilong Noa, klostu olgeta i lusim lotu tru long Jehova. Ol i laik bung na sindaun long wanpela hap tasol, olsem na ol i kirap wokim wanpela bikpela taun na wanpela taua bilong lotu long ol god giaman. Orait Jehova i pasim tok pinis long bel olsem em i mas bagarapim dispela wok bilong ol. Em i paulim tok ples bilong ol na “ol i go i stap nabaut long olgeta hap bilong graun.” (Stat 11:4, 8, 9) Bihain, ol dispela liklik lain em ol i gat ol narapela narapela tok ples bilong ol yet ol i kamap olsem ol bikpela lain, na sampela ol i kamap strong na kisim ol narapela kantri na ol i bosim ol bikpela hap, na sampela i kamap strongpela gavman bilong bosim olgeta hap bilong graun.—Stat 10:32.
8 Bilong kamapim laik bilong em, sampela taim God i bin putim mak bilong graun bilong ol kantri, na wanem taim wanpela lain bai kamap strong na bosim ol kantri i stap klostu, o kamap strongpela gavman bilong bosim graun. (Stat 15:13, 14, 18-21; Kisim Bek 23:31; Lo 2:17-22; Daniel 8:5-7, 20, 21) Aposel Pol i tingim dispela samting bilong ol taim na de bilong Jehova taim em i tokim ol saveman Grik long Atens: “God i bin wokim graun wantaim olgeta samting i stap long graun, . . . [na] long wanpela tumbuna tasol em i bin mekim olgeta lain manmeri i kamap. Na em i putim ol i stap long olgeta hap bilong graun. Em yet i bin makim taim bilong ol i ken i stap, na em i bin putim mak bilong graun bilong ol.”—Aposel 17:24, 26.
9. Olsem wanem Jehova i bin senisim ol taim na ol de bilong ol king?
9 Tasol dispela i no makim olsem Jehova yet i as na sampela lain politik i daunim na kisim ol narapela kantri na i gat ol senis i kamap long ol gavman politik long ol kantri. Tasol sapos em i laik, em inap pasim o daunim wok bilong ol bambai em i ken kamapim ol laik bilong em. Olsem na Daniel, em dispela profet bai lukim bikpela gavman Babilon i pundaun na gavman bilong Midia na Persia i senisim, em i tok long Jehova olsem: “Yu save bosim taim bilong san na ren [olsem senisim ol taim na ol de], na yu yet yu save mekim ol man i kamap king na yu save rausim ol king long wok bilong ol. Na yu givim gutpela tingting na save long ol man.”—Daniel 2:21; Aisaia 44:24–45:7.
“Dispela Taim Klostu i Laik Kamap”
10, 11. (a) Jehova i laik kisim bek ol lain tumbuna pikinini bilong Abraham long wok kalabus bilong ol, na em i makim taim bilong en inap hamas yia paslain long dispela taim? (b) Wanem samting i makim olsem ol Israel i no save wanem taim stret Jehova bai kisim bek ol?
10 Inap 400 yia samting paslain, Jehova i makim yia stret em bai daunim king bilong Isip, em bikpela gavman bilong bosim graun, na Jehova bai helpim lain tumbuna pikinini bilong Abraham long lusim wok kalabus bilong ol. God i kamapim laik bilong em long Abraham na em i tok promis olsem: “Bai ol lain tumbuna pikinini bilong yu i go i stap long kantri bilong ol arapela lain. Na bai ol i kamap wokboi nating, na ol arapela lain bai i mekim nogut long ol inap 400 yia. Tasol bai mi givim hevi long ol dispela lain i mekim dispela pasin long ol. Na ol lain tumbuna pikinini bilong yu bai ol i kisim planti samting tru na bai ol i lusim dispela kantri.” (Stat 15:13, 14) Taim Stiven i sanap long ai bilong kaunsil na em i stori long ol samting i bin painim lain Israel long bipo, em i tingim dispela 400 yia ol i bin stap long Isip na em i tok: “Taim God i makim bilong inapim dispela promis bipo em i bin mekim long Abraham, dispela taim klostu i laik kamap. Na ol lain Israel i stap long Isip, na ol i kamap bikpela lain tru. Na bihain wanpela man i kamap king bilong Isip, na em i no save long Josep.”—Aposel 7:6, 17, 18.
11 Dispela nupela king i mekim nogut long ol Israel na ol i mas mekim wok olsem lain kalabus. Long dispela taim Moses i no bin raitim yet ol stori bilong Buk Stat, tasol ol tok promis Jehova i bin mekim long Abraham, ating Abraham i givim long pikinini na tumbuna pikinini bilong em, na ol tu i givim dispela tok long ol pikinini bilong ol, i go i go olsem, o ol i bin raitim ol dispela tok promis. Tasol maski ol Israel i bin kisim ol dispela tok, i olsem ol i no gat rot long skelim de stret Jehova bai kisim bek ol long wok kalabus bilong ol. God i save pinis wanem taim em bai kisim bek ol, tasol ating em i no bin toksave long ol Israel, em ol i karim pen na hevi long wok kalabus bilong ol. Baibel i tok: “Sampela yia i go pinis na bihain king bilong Isip i dai. Na ol Isip i mekim ol Israel i wok hat nogut tru. Na ol Israel i wok yet long krai nogut na singaut long God long helpim ol. Na God i harim krai bilong ol na God i tingim dispela kontrak em i bin mekim wantaim Abraham na Aisak na Jekop bilong helpim ol tumbuna pikinini bilong ol. Em i lukim ol Israel i sindaun nogut tru. Na em i sori long ol na em i ting long helpim ol.”—Kisim Bek 2:23-25.
12. Olsem wanem Stiven i soim yumi olsem Moses i kirap mekim ol samting paslain long taim Jehova i bin makim bilong mekim dispela wok?
12 Na ol tok Stiven i mekim inap givim tingting long yumi olsem ol Israel i no bin save long taim stret God bai kisim bek ol. Stiven i stori long Moses na em i tok: “Taim Moses i gat 40 krismas pinis . . . em i tingting long i go lukim ol brata bilong em, ol Israel. Na em i lukim wanpela Isip i wok long mekim nogut long wanpela Israel. Orait em i helpim dispela Israel na i bekim rong dispela Isip i bin mekim long em. Em i paitim dispela Isip na kilim em i dai. Moses i ting ol brata bilong en bai i save olsem, God i laik helpim ol long han bilong en. Tasol ol i no save.” (Aposel 7:23-25) Em nau, Moses i laik kisim bek ol Israel 40 yia paslain long taim God i bin makim. Stiven i tokaut olsem Moses i mas wet inap 40 yia moa na long rot bilong em bai God i ‘kisim bek ol Israel long han bilong ol Isip.’—Aposel 7:30-36.
13. Olsem wanem yumi stap wankain olsem ol Israel paslain long taim God i bin kisim bek ol long Isip?
13 Tru, “taim God i makim bilong inapim dispela promis bipo em i bin mekim long Abraham, dispela taim klostu i laik kamap,” na God i makim pinis yia stret bilong en, tasol Moses wantaim olgeta manmeri bilong Israel ol i mas bilip. Ol i mas wetim dispela taim Jehova i bin makim, na ating ol yet i no inap skelim na kisim save long taim stret dispela samting bai kamap. Yumi tu i bilip strong olsem taim bilong God long kisim bek yumi long dispela pasin nogut bilong graun, em i klostu pinis. Yumi save yumi stap long taim bilong “las de.” (2 Timoti 3:1-5) Olsem na yumi mas amamas long kamapim bilip bilong yumi na wetim taim bilong Jehova long kamapim bikpela de bilong em, a? (2 Pita 3:11-13) Orait, long dispela taim bai yumi inap mekim pasin olsem Moses na ol Israel i bin mekim—ating bai yumi mekim wanpela gutpela singsing tru bilong litimapim nem bilong Jehova, em i bin kisim bek yumi.—Kisim Bek 15:1-19.
“Long Taim Stret God i Bin Makim”
14, 15. Olsem wanem yumi save, God i bin makim taim stret bilong salim Pikinini bilong em i kam long graun? Ol profet na ol ensel tu i bin was i stap na wetim wanem samting?
14 Jehova i bin makim taim stret bilong salim Pikinini bilong em i kam long graun na kamap Mesaia. Pol i tok: “Long taim stret God i bin makim, em i salim Pikinini bilong en i kam. Meri i karim em, na em i kamap man i stap aninit long lo.” (Galesia 4:4) Dispela i truim tok promis bilong God long salim wanpela Pikinini i kam—em ‘Silo, na em bai i bosim olgeta lain manmeri.’—Stat 3:15; 49:10.
15 Ol profet bilong God—na ol ensel tu—ol i was i stap na wetim “de” Mesaia bai kamap long graun na rot bai i op bilong kisim bek ol manmeri bilong graun ol i gat sin. Pita i tok: “Ol profet i bin autim tok long dispela gutpela samting nau God i mekim long yupela. Ol i bin wok strong long painim as bilong dispela tok bilong God i kisim bek yumi. Spirit bilong Krais i bin i stap insait long ol profet, na Spirit i bin tokaut long maus bilong ol long ol kain kain pen Krais bai i karim na long bihain em bai i kisim biknem. . . . Ol ensel tu i laikim tumas long kisim save long ol dispela gutpela samting.”—1 Pita 1:1-5, 10-12.
16 Long rot bilong profet bilong em, Daniel—em wanpela man i gat strongpela bilip—Jehova i bin mekim tok profet long wanpela hap taim olsem “70 taims 7-pela yia,” olsem “70 wik” (lukim sta daunbilo, bilong ves 24). Dispela tok profet bai helpim ol Juda i stap long taim bilong Jisas long save olsem taim bilong Mesaia i mas kamap em i klostu pinis. Hap tok bilong dispela tok profet i tok: “Stat long taim dispela tok i kamap bilong wokim gen Jerusalem, 7 taims 7-pela yia [olsem 70 wik] i mas pinis pastaim . . . na . . . 62 taims 7-pela yia [olsem 69 wik].” (Daniel 9:24, 25) Ol saveman bilong lotu Juda, na Katolik, na Talatala ol i wanbel long tok olsem ol dispela wik i makim ol yia. Dispela 69 wik (483 yia) bilong Daniel 9:25 i bin kirap long yia 455 B.C.E., taim King Artaserksis i tokim Nehemia long “wokim gen Jerusalem.” (Nehemia 2:1-8) Dispela taim i pinis 483 yia bihain—long yia 29 C.E., taim Jisas i kisim baptais na God i kapsaitim spirit holi long em na em i kamap Mesaia, o Krais.—Matyu 3:13-17.
16, 17. (a) Long rot bilong wanem tok profet Jehova i bin helpim ol Juda long taim bilong Jisas long wetim Mesaia? (b) Tok profet bilong Daniel i mekim wanem long ol Juda i wetim Mesaia?
17 Yumi no save, ol Juda i bin stap long taim Mesaia i mas kamap ol i save long taim stret dispela 483 yia i bin kirap o nogat. Tasol taim Jon Bilong Baptais i kirap long mekim wok bilong em long autim tok, “ol manmeri i lukim ol dispela samting na bel bilong ol i kirap na ol i tingting planti olsem, ‘Ating Jon em i dispela man God i makim bilong kisim bek ol manmeri bilong en?’ ” (Luk 3:15) Sampela saveman bilong Baibel i ting ol dispela manmeri i tingim tok profet bilong Daniel na ol i wetim Mesaia i kamap. Matthew Henry i mekim sampela tok long dispela ves na em i tok: ‘Dispela ves i tokim yumi olsem ol manmeri i lukim wok bilong Jon long autim tok na givim baptais long ol man na dispela i kirapim ol long tingting long Mesaia, na long ting olsem klostu nau bai em i kamap. Dispela 70 wik bilong Daniel i laik pinis.’ Wanpela buk long tok ples Frans (Manuel Biblique, bilong Vigouroux, Bacuez, na Brassac) i tok: “Ol man i save, dispela 70 wik em Daniel i kolim, klostu i laik pinis; ol man i no kirap nogut taim ol i harim Jon Bilong Baptais i tokaut olsem kingdom bilong God i kam klostu pinis.” Wanpela saveman Juda, em Abba Hillel Silver, em i tok, ‘pasin bilong ol man long dispela taim bipo long kaunim ol yia samting, dispela i mekim na ol i ting Mesaia bai kamap long taim namel long yia 25 na 50 C.E.’
Ol i Tingim Ol Samting i Kamap—Ol i No Skelim Ol Yia
18. Tok profet bilong Daniel i helpim ol Juda long save long taim Mesaia bai kamap, tasol wanem samting i makim moa yet olsem Jisas em i Mesaia?
18 Ol Juda bilong bipo i gat sampela save long yia bilong ol samting i mas kamap, na i olsem dispela i bin helpim ol long save liklik long taim Mesaia bai kamap. Tasol ol samting i kamap bihain i soim yumi olsem dispela hap save bilong ol long ol yia samting i no bin helpim planti bilong ol long bilip olsem Jisas em i Mesaia, nogat. Klostu wanpela yia paslain long taim em i dai, Jisas i askim ol disaipel: “Ol manmeri i save tok, mi husat tru?” Ol i bekim tok olsem: “Sampela i save tok olsem, yu Jon Bilong Baptais. Na sampela i save tok, yu Elaija. Na sampela i tok, ‘Wanpela bilong ol profet bilong bipo em i kirap bek.’ ” (Luk 9:18, 19) Baibel i no tok olsem Jisas i bin kolim dispela tok profet bilong Daniel long ol wik bilong helpim em long kamapim klia olsem em i Mesaia, nogat. Tasol wanpela taim em i tok: “Samting i winim Jon, em i tokaut long mi nau. Em dispela olgeta wok Papa i bin givim long mi bilong mekim na pinisim. Ol dispela wok mi save mekim i tokaut gut long ol manmeri olsem, Papa i bin salim mi na mi kam.” (Jon 5:36) Ol samting olsem wok bilong Jisas long autim tok, ol mirakel em i bin wokim, ol samting olsem mirakel i kamap long taim em i dai (olsem tudak, na bikpela laplap i hangamap insait long haus lotu i bruk olgeta, na bikpela guria), ol dispela samting i kamapim klia olsem em i dispela Mesaia God i bin salim i kam—tasol pasin bilong makim ol yia samting, nogat.—Matyu 27:45, 51, 54; Jon 7:31; Aposel 2:22.
19 Na i olsem tu bihain long taim Jisas i dai—God i no givim sampela rot long ol Kristen bilong pastaim long skelim wanem yia ol pasin na lo bilong lain Juda bai i pinis. Tru, tok profet bilong Daniel long ol wik i tok olsem God bai pinisim ol pasin na lo bilong lain Juda. (Daniel 9:26b, 27b) Tasol dispela samting bai kamap long pinis bilong dispela “70 taims 7-pela yia,” olsem 70 wik (yia 455 B.C.E. i go inap long yia 36 C.E.). I olsem: Bihain long taim ol namba wan manmeri bilong ol narapela lain i kamap disaipel bilong Jisas long yia 36 C.E., i no gat sampela bikpela yia moa bilong Daniel sapta 9 ol Kristen i ken tingim. Ol i no ken tingim ol yia—ol i mas tingim ol samting i kamap bilong makim olsem ol pasin na lo bilong lain Juda i laik pinis. Ol dispela samting Jisas i bin tok profet long en, ol bikpela samting bilong en i kirap long kamap long yia 66 C.E., taim ol ami bilong Rom i kam pait long Jerusalem na bihain ol i lusim na ol i go. Em nau, ol gutpela Kristen long Jerusalem na Judia em ol i was i stap, ol i gat rot long “ranawe i go long ples maunten.” (Luk 21:20-22) Ol dispela Kristen bilong pastaim i no gat sampela yia ol i ken skelim bilong givim save long ol long wanem taim Jerusalem bai bagarap. Ol i mas i gat strongpela bilip tru bambai ol i ken lusim haus bilong ol, na ol gaden, na woksop, na i stap longwe long Jerusalem inap 4-pela yia samting, i go inap long taim ol ami bilong Rom i kam bek long yia 70 C.E. na pinisim tru ol pasin na lo bilong lain Juda!—Luk 19:41-44.
20. (a) Pasin bilong Noa, Moses, na ol Kristen i stap long Judia long taim bilong ol aposel, em inap helpim yumi olsem wanem? (b) Long stori i kamap bihain long dispela, bai yumi toktok long wanem samting?
20 Wankain olsem Noa, Moses, na ol Kristen bilong pastaim long Judia, yumi ol Kristen long nau inap bilip tru na larim ol taim na ol de i stap long han bilong Jehova. Yumi bilip tru olsem yumi stap long taim bilong las de, na taim bilong God i kisim bek yumi i kam klostu pinis. Tasol i no olsem yumi skelim ol yia na yumi bilip olsem, nogat; yumi lukim ol samting tru tru i kamap na i truim ol tok profet bilong Baibel. Na tu, yumi stap long taim Krais i kam i stap pinis, tasol i no olsem yumi no gat wok moa long bilip na was i stap, nogat. Yumi mas wok yet long wetim ol bikpela samting bai kamap olsem Baibel i tok profet long en, na bel bilong yumi i mas kirap tru long wetim ol dispela samting. Bai yumi toktok long dispela samting long stori i kamap bihain long dispela.
[Ol Futnot]
Sampela Askim
◻ Jisas i tok wanem long ol aposel long ol taim na ol de bilong Jehova long mekim ol samting?
◻ Wanem taim Noa i save long taim stret Bikpela Tait i mas kamap?
◻ Wanem samting i makim olsem Moses na ol Israel i no bin save wanem taim stret God bai kisim bek ol long Isip?
◻ Ol stori bilong Baibel long tingting bilong sampela man long ol taim na ol de Jehova i bin makim, dispela inap helpim yumi olsem wanem?
2. I gat wanem as na yumi ken tok, bipo Jisas i no save long de Papa bilong em i bin makim bilong ol samting i mas kamap long taim bilong las de?
5. Wanem taim Jehova i bin tokim Noa long laik bilong Em long bagarapim olgeta man nogut? Noa i mekim wanem tupela wok?
19. (a) Olsem wanem ol Kristen inap save, taim bilong Jerusalem i mas bagarap em i klostu pinis? (b) Ol Kristen i ranawe lusim Jerusalem, bilong wanem ol i mas bilip strong yet?
[Piksa long pes 11]
Bilip i helpim Noa long putim taim bilong ol samting long han bilong Jehova