Askim

◼ Krai 4:10 i stori long ol mama i bin kaikai pikinini bilong ol yet, orait bilong wanem dispela ves i tok ol dispela mama “i bin sori tru long ol pikinini bilong ol”?

Jeremaia i stori long bikpela hevi tru i bin painim ol Juda taim ol Babilon i banisim Jerusalem long yia 607 paslain long Krais, na em i tok: “Ol mama i bin sori tru long ol pikinini bilong ol, tasol taim ol pikinini i dai ol i kisim bodi bilong ol na kukim na kaikai. Dispela kain pasin i kamap long taim ol birua i kam pait long ol tarangu manmeri bilong mi.”—Krai 4:10.

Planti handet yia paslain long dispela taim, Moses i bin toksave long ol Israel olsem sapos ol i bihainim ol lo bilong God bai ol i kisim blesing, tasol sapos ol i sakim ol stretpela pasin bilong God, bai ol samting nogut i painim ol. Wanpela samting nogut tru inap painim ol, em olsem: Long taim bilong bikpela hevi tru bai ol i kirap na kaikai pikinini bilong ol yet. (Lo 28:1, 11-15, 54, 55; 30:1; Wok Pris 26:3-5, 29) Dispela kain pasin i bin kamap tru taim ol Israel i lusim Jehova na bikhet long em na Jehova i larim ol Babilon i daunim ol.

Long Krai 4:10 profet Jeremaia i stori long pasin bilong ol mama, em ol i save sori tru long ol pikinini bilong ol na lukautim ol gut bambai samting nogut i no ken bagarapim ol. (1 King 3:26, 27; 1 Tesalonaika 2:7) Tasol taim ol Babilon i kam pait long Jerusalem na ol i banisim taun, bikpela hangre tru i kamap na dispela i subim ol mama long sakim dispela pasin sori bilong ol mama na ol i kukim na kaikai pikinini bilong ol yet.—Lukim Krai 2:20.

Kain pasin nogut tru i bin kamap tu long taim ol Juda i sakim Mesaia o Krais, em i bin toksave long ol olsem bai ol birua i kam pait long Jerusalem na banisim taun. (Matyu 23:37, 38; 24:15-19; Luk 21:20-24) Man bilong raitim stori bilong bipo, em Josifas, em i stori long wanpela samting nogut tru i bin kamap long dispela taim long yia 70 bihain long Krais, em i tok: “Maria, em pikinini meri bilong Eliesa, . . . em i kilim i dai pikinini man bilong em na em i kisim bodi bilong em na kukim long paia na em i kaikai hap, na narapela hap em i haitim bambai em i ken kaikai long bihain.”—Buk The Jewish War, em G. A. Williamson i tanim tok bilong en, sapta 20, pes 319.

Tru tumas, ol manmeri i lusim ol lo bilong God na stretpela pasin bilong Em, ol i no bihainim gutpela tingting.