Ol Man i Stap Olsem Lait—Bilong Mekim Wanem Wok?
“Mi mekim yu i kamap olsem lait bilong olgeta kantri.”—APOSEL 13:47.
“BIKPELA i tokim mipela olsem, ‘Mi mekim yu i kamap olsem lait bilong olgeta kantri, na bai yu helpim ol manmeri long olgeta hap bilong graun, na bai mi kisim bek ol.’ ” Aposel Pol i bin tok olsem. (Aposel 13:47) Em i pilim dispela wok em i bikpela samting. Taim em i kamap Kristen, em i givim bel long mekim dispela wok. (Aposel 26:14-20) Olsem wanem? Yumi tu i gat dispela wok? Sapos olsem, bilong wanem em i bikpela samting nau long taim bilong yumi?
Taim Lait i Dai na Ol i Stap Tudak
2 Ol man bilong nau, taim planti bilong ol i no kamap yet, taim bilong las de i kirap, na sampela bikpela samting i wok long kamap. Satan i raus long heven na i kam daun long hap bilong graun. Em i as bilong ol pasin nogut, na em i paulim ol man na tingting bilong ol i stap olsem long tudak. (Efesus 6:12; KTH 12:7-12) Namba Wan Pait i kamap na planti lain i insait long en. Long Ogas 1914 wanpela bikman bilong gavman long Inglan, em Edwat Grei (Edward Grey), em i sanap klostu long windo bilong ofis bilong em na em i tok: “Ol lait i dai long Yurop; yumi ol man bilong nau i no inap lukim ol i lait gen.”
3 Long 1920 ol i kamapim Lig ov Nesen bilong stretim ol hevi, olsem kirapim gen lait, tasol nogat. Na taim Namba 2 Pait i pinis, ol i kamapim Yunaitet Nesen, tasol lait bilong en i liklik tru—ol i no bin stretim ol hevi. Na nau ol bikman bilong graun i toktok long kamapim “nupela taim.” Tasol ol dispela kain “nupela taim” bilong ol i no kamapim bel isi na gutpela sindaun tru long ol man. Planti pait i stap, na ol lain i no stap wanbel, na i gat planti pasin nogut i stap, na ol man i no gat wok na ol i stap nating, na planti ol i stap rabis, na ol man i bagarapim graun, na i gat planti sik; ol dispela samting i mekim na ol man i no inap i stap amamas.
4 Tasol i no long 1914 na lait i dai long namba wan taim na tudak i bin kamap, nogat. Tudak i bin kamap 6,000 yia bipo long Iden, taim tupela tumbuna bilong yumi i bin sakim tok bilong God na ol i bihainim tingting bilong ol yet. Kirap long dispela taim na i kam inap nau planti hevi i bin painim ol man, long wanem, ol i stap aninit long dispela samting em Baibel i kolim olsem “strong bilong tudak.” (Kolosi 1:13) Satan i bin kirapim namba wan man long mekim sin, na long dispela rot sin i kamap long graun, na sin i bringim dai i kam; long rot bilong Adam, dai i kisim olgeta man. (Stat 3:1-6; Rom 5:12) Olsem na ol man i no gutpela moa long ai bilong God, em As bilong lait na bilong laip.—Song 36:9.
5 I gat wanpela rot tasol na bai lait i ken kamap gen long ol man. Ol i mas kamap gutpela gen long ai bilong God Jehova. Olsem bai dispela bikpela hevi i stap long “olgeta lain manmeri,” em sin yet i bin kamapim, i ken tekewe long ol. Dispela samting inap kamap olsem wanem?—Aisaia 25:7.
Dispela Man Bilong “i Stap Olsem Lait Bilong Ol”
6 Taim Jehova i no rausim yet Adam tupela Iv long Paradais, em i tokaut long wanpela ‘pikinini’ bai kamap bilong kisim bek ol manmeri i laikim tru stretpela pasin. (Stat 3:15) Bihain dispela ‘Pikinini’ i kamap, na Jehova i kirapim lapun Simeon long haus lotu long Jerusalem long mekim wanpela tok long dispela Pikinini na bai yumi ken luksave long em, em i olsem “wanpela lait, na em bai i givim lait long ol man bilong ol arapela lain.” (Luk 2:29-32) Dispela man, em Krais Jisas, em i bin givim laip bilong em olsem ofa, na sapos ol man i bilip long dispela ofa, dispela inap karamapim sin bilong ol. (Jon 3:36) Nau ol i ken tingting long i stap laip oltaim long Kingdom long heven o i stap long paradais long graun aninit long Kingdom. Em gutpela samting tru yumi ken wetim i kamap!
7 Ol samting Krais Jisas i bin mekim, dispela i as na yumi ken bilip olsem yumi inap kisim tru ol dispela gutpela samting. Em i bin oraitim sik bilong ol man, na aposel Matyu i kolim tok bilong Aisaia 42:1-4 bilong makim Krais Jisas. Dispela tok i olsem: “Dispela em i wokman bilong mi. Oltaim mi save strongim em. Mi yet mi bin makim em, na oltaim mi amamas moa yet long em. Mi putim pinis spirit bilong mi long em, na em bai i bringim stretpela pasin tasol long olgeta lain manmeri bilong graun. Em bai i no singaut bikmaus long taim em i toktok. . . . Na em bai i no mekim i dai lam i no lait gut.” Jisas i no bin mekim hatpela pasin long ol man i gat hevi. Em i bin sori long ol, na em i skulim ol long ol laik bilong God, na em i oraitim sik bilong ol.—Matyu 12:15-21.
8 Man bilong mekim dispela tok profet em i givim sampela tok long Wokman bilong em, em Jisas, na i tok: “Mi [Jehova] yet, mi bin singautim yu long soim stretpela pasin bilong mi. Bai mi sambai long yu na was gut tru long yu. Long yu tasol, bai mi mekim kontrak wantaim olgeta manmeri bilong graun. Na bai mi mekim yu i stap olsem lait bilong ol. Bai yu mekim ol aipas i lukluk gen. Na bai yu helpim ol man i stap long kalabus na long ples tudak, na mekim ol i kamap fri.” (Aisaia 42:6, 7) Jisas em i olsem wanpela “kontrak” Jehova i bin mekim wantaim ol man; long Jisas tasol bai God i truim olgeta tok promis bilong em. Jisas i gat bikpela tingting na sori long ol man; em i bin givim laip bilong em bilong helpim ol. Jehova i bin makim em bilong bosim olgeta man bilong graun, na Jehova i tok, Jisas i olsem lait bilong ol. Na Jisas yet i tok: “Mi yet mi lait bilong graun.”—Jon 8:12.
9 Jisas i stap “lait bilong graun” bilong mekim wanem wok? I no olsem em i laik insait long ol wok bilong graun o long kisim planti samting bilong skin, nogat. Em i no laik stretim o helpim ol wok politik bilong graun o kisim wok king em Satan o ol man i laik givim long em, nogat. (Luk 4:5-8; Jon 6:15; 14:30) Jisas i gat bikpela sori long ol manmeri i gat hevi na ol i stap tarangu, na em i bin helpim ol long pasin ol narapela man i no inap mekim. Na em i save, i no inap em i helpim ol tru long dispela taim, long wanem, Satan na ol spirit nogut i bosim graun. Olsem na Jisas i bin givim bel long bihainim laik bilong God tasol.—Hibru 10:7.
10 Orait, olsem wanem Jisas i stap olsem lait bilong graun? Na em i stap olsem lait bilong mekim wanem wok? Em i givim bel long autim gutpela tok bilong Kingdom bilong God. (Luk 4:43; Jon 18:37) Na em i autim tok i tru long ol samting Jehova bai mekim, na long dispela rot em i litimapim nem bilong Papa bilong em i stap long heven. (Jon 17:4, 6) Na em i olsem lait bilong graun, olsem na em i wok tu long kamapim long ples klia ol bilip kranki bilong ol lotu giaman. Long dispela rot em i helpim ol man long lusim kalabus bilong lotu giaman na kamap fri. Jisas i kamapim klia Satan, em i man bilong stiaim ol man em ol i larim em i bosim ol; na Jisas i kamapim long ples klia ol pasin bilong tudak. (Matyu 15:3-9; Jon 3:19-21; 8:44) Na bikpela wok tru em i bin mekim olsem lait bilong graun, em olsem: Em i dai na givim laip bilong em olsem pe bilong baim bek ol man. Olsem na ol man i bilip long ofa bilong em, Jehova bai lusim rong bilong ol na ol inap kamap gutpela long ai bilong Jehova, na nau ol i ken tingting long kisim laip i stap oltaim insait long bikpela famili bilong Jehova. (Matyu 20:28; Jon 3:16) Na narapela samting Jisas i mekim, em i givim bel long God i go inap long em i dai, na long dispela rot em i stap gut long wok king bilong God Jehova na kamapim klia olsem Satan em i man bilong giaman. Dispela i helpim ol man i laikim tru stretpela pasin na ol inap kisim ol gutpela samting bilong oltaim oltaim. Tasol olsem wanem? Jisas wanpela tasol i mas i stap olsem lait?
“Yupela i Olsem Lait Bilong Graun”
11 Long Matyu 5:14, Jisas i tokim ol disaipel: “Yupela i olsem lait bilong graun.” Ol i mas bihainim lek bilong em. Long pasin na wok bilong ol long autim tok, ol i mas soim rot long ol narapela na bai ol i ken i kam long Jehova, em i As bilong lait tru. Ol i mas bihainim pasin bilong Jisas na autim nem bilong Jehova, na stap gut long wok king bilong Jehova. Na ol i mas autim tok bilong Kingdom bilong God na tokim ol man, dispela Kingdom tasol inap helpim ol. Na ol i mas kamapim long ples klia ol bilip kranki bilong ol lotu giaman na ol pasin na wok bilong tudak, na dispela man nogut em i as bilong ol dispela pasin. Na tu, ol i mas tokim ol man bilong olgeta hap long gutpela pasin sori Jehova i bin mekim—em i kisim bek yumi long rot bilong Krais Jisas. Ol Kristen bilong pastaim i bin givim bel tru long mekim dispela wok. Ol i kirap mekim long Jerusalem na Judia, na bihain long Samaria, olsem Jisas i bin tokim ol long mekim!—Aposel 1:8.
12 Tasol wok bilong autim tok bilong Kingdom i no bilong kamap long ol dispela hap tasol, nogat. Jisas i tokim ol disaipel, ol i mas “mekim olgeta lain manmeri i kamap disaipel bilong” em. (Matyu 28:19) Taim Sol bilong Tarsus i tanim bel na kamap Kristen, Jisas i tokim Sol (em bihain Sol i kamap aposel Pol) em i no ken autim tok long ol Juda tasol; em i mas i go long ol man bilong ol narapela lain tu. (Aposel 9:15) Spirit holi i helpim Pol na em i pilim tru dispela bikpela wok em i mas mekim. Em i kisim save olsem tok profet bilong Aisaia 42:6 i makim stret Krais Jisas, tasol i olsem Jehova i givim dispela wok tu long olgeta man i bilip long Krais. Olsem na long Aposel 13:47, taim Pol i kolim tok bilong Aisaia, Pol i tok: “Bikpela i tokim mipela olsem, ‘Mi mekim yu i kamap olsem lait bilong olgeta kantri, na bai yu helpim ol manmeri long olgeta hap bilong graun, na bai mi kisim bek ol.’ ” Orait, olsem wanem long yu? Yu tingim gut dispela wok bilong yu long i stap olsem lait? Yu bihainim pasin bilong Jisas na Pol na yu givim bel olgeta long bihainim laik bilong God?
Lait na Tok i Tru Bilong God i Soim Rot Long Yumi
13 Sapos long tingting bilong yumi yet yumi tingim rot bilong ‘kirapim gen ol lait,’ olsem bilong kamapim gutaim, yumi mekim pasin kranki na i olsem yumi givim baksait long rot Baibel i makim. Maski ol man bilong graun i mekim wanem, ol Kristen tru i save bilip long Jehova, olsem em i As bilong lait na em inap givim dispela lait long yumi. Yumi mekim beten i wankain olsem i stap long Song 43:3, i tok: “Yu mas salim tok tru na lait bilong yu i kam na soim rot long mi, bai mi go stret long Saion, em maunten bilong yu yet, na bai mi go long dispela haus yu save stap long en.”
14 Jehova i harim yet dispela beten bilong ol gutpela wokman bilong em. Em i salim lait i go—em i tokaut long laik bilong em na helpim ol wokman bilong em long save long laik bilong em, na em i truim tok bilong em na mekim ol samting olsem em i bin tok em i laik mekim. Taim yumi beten, yumi no mekim bambai ol man i ting yumi holi, nogat. Yumi laik tru bai lait i kam long Jehova i ken soim rot long yumi, olsem man bilong raitim Song 43:3 i tok. Taim yumi kisim dispela lait i kam long Jehova, yumi save yumi gat wanpela wok yumi mas mekim. Yumi olsem aposel Pol na yumi pilim tru olsem yumi gat dinau long ol man na yumi mas bekim dispela dinau—olsem yumi mas givim tok bilong Kingdom long ol. Jehova i bin givim dispela tok long yumi bilong autim long ol man.—Rom 1:14, 15.
15 Lait na tok i tru Jehova i salim i kam long taim bilong yumi i makim klia olsem Krais i kirap pinis long mekim wok king long heven. (Song 2:6-8; KTH 11:15) Jisas i tok profet olsem taim em i stap King, bai ol i autim dispela gutpela tok bilong Kingdom long olgeta hap bilong graun. (Matyu 24:3, 14) Ol i mekim dispela wok long nau, na dispela wok i kamap strong long olgeta hap. Sapos yumi putim dispela wok i stap nambawan bikpela wok bilong yumi, orait, lait na tok i tru bilong God i soim rot long yumi.
Lait Bilong Jehova i Lait i Go
16 Baibel i stori gut long rot bilong dispela lait bilong God i go kamap long ol man bilong olgeta hap. Long Aisaia 60:1-3, Jehova i mekim sampela tok long “meri” bilong em, olsem oganaisesen bilong em long heven, na em i tok: “Jerusalem, yu kirap na lait olsem san, long wanem, nau bikpela lait na strong bilong mi, Bikpela, i lait antap long yu. Lukim. Ol blakpela klaut na bikpela tudak i karamapim olgeta arapela lain manmeri bilong graun. Tasol mi Bikpela, mi kam long yu, na bikpela lait bilong mi i lait strong antap long yu. Ol arapela lain manmeri bai i lukim dispela lait bilong yu na ol bai i kam long yu. Na ol king tu bai i lukim dispela strongpela lait bilong yu, na ol bai i kirap i kam.”
17 Jehova i givim lait bilong em long oganaisesen bilong em long yia 1914. Dispela oganaisesen, olsem “meri” bilong em, i bin wet longtaim, na long 1914 em i kamapim Kingdom na Krais i kamap King bilong en. (KTH 12:1-5) Lait bilong Jehova i lait long dispela gavman tasol—Jehova i orait long dispela gavman tasol i mas bosim graun.
18 Tasol bikpela tudak i karamapim ol lain bilong dispela graun. I gat wanem as na ol i stap long tudak? Ol i sakim gavman bilong Pikinini bilong God na ol i laik bai ol man i bosim ol. Ol i ting, sapos ol i senisim senisim ol gavman, bai ol i painim rot bilong stretim ol hevi. Tasol nogat. Ol lain i stap birua birua na ol i pait, na ol bikpela man bilong bisnis i laik kisim bikpela mani moa, na dispela i pasim rot bilong ol man. Ol i no save long dispela spirit nogut em i bosim ol samting ol lain bilong graun i mekim. (2 Korin 4:4) Ol i sakim As bilong lait tru, olsem na ol i stap tudak. (Efesus 6:12) Tasol maski ol lain bilong dispela graun i mekim wanem, ol wan wan man long lain bilong ol inap lusim dispela tudak. Ol i mas mekim wanem bilong lusim? Ol i mas bilip tru long Kingdom bilong God na daun long en.
19 Ol misin i holim nating nem Kristen ol i no bilip long Kingdom bilong God na ol i no daun long en. Tasol lain bilong Krais em God i bin makim ol, ol i bin mekim. Olsem na God i orait long dispela lain long graun ol i olsem maus bilong oganaisesen bilong em long heven, olsem “meri” bilong em, na em i givim lait bilong em long ol. (Aisaia 60:19-21) Olsem na maski wanem senis i kamap long wok politik o wok bisnis, dispela i no inap tekewe dispela lait bilong spirit i stap long ol. Jehova i bin helpim ol na ol i lusim kalabus bilong Bikpela Babilon. (KTH 18:4) Em i amamas long ol, long wanem, ol i kisim gut ol tok em i bin givim long ol bilong skulim na stretim ol, na ol i daun long wok king bilong em. Ol gutpela samting i wetim ol long bihain, olsem God i tok promis long en.
20 Bilong wanem Jehova i bin mekim gut long lain bilong em olsem? Long Aisaia 60:21 em yet i tok, em bilong “givim biknem” long em. Em i laik bai ol i litimapim nem bilong em na dispela bai pulim ol narapela i kam long em, em wanpela tasol i God tru, na dispela bai helpim ol inap oltaim oltaim. Olsem na long yia 1931 dispela lain i lotu long God tru ol i kisim nem olsem ol Witnes Bilong Jehova. Orait, taim ol i autim tok bilong Kingdom, olsem givim lait long ol man, sampela “ol king” i bin lukim dispela lait na ol i kam, olsem Aisaia i bin tok? Ol i kam! Tasol ol dispela “king” i no ol bikman politik bilong graun, nogat. Ol i laspela hap bilong dispela lain God i bin singautim ol bilong mekim wok king wantaim Krais long Kingdom. (KTH 1:5, 6; 21:24) Na olsem wanem long “ol arapela lain manmeri”? Dispela lait i bin pulim ol tu na ol i kam? Tru tumas, ol i kam! Dispela lait i no pulim lain bilong wanpela kantri olgeta i kam. Em i pulim bikpela lain manmeri bilong olgeta kantri i kam, na ol i daun long Kingdom, na ol i wetim God i kisim bek ol na ol inap i stap long nupela taim God bai kamapim long graun; em i nupela taim tru, i gat stretpela pasin tasol i stap long en.—2 Pita 3:13; KTH 7:9, 10.
21 Olsem wanem long yu? Yu insait long dispela lain ol i stap olsem lait na ol i wok long kamap planti tru? Jehova i helpim yumi long kisim save long laik bilong em bambai yumi ken i stap olsem lait, olsem Jisas i bin mekim. Sapos yumi givim bel tru long mekim wok Jehova i givim long ol wokman bilong em long nau, dispela bai kamapim klia olsem yumi no sakim gutpela pasin sori em i bin mekim long yumi. (2 Korin 6:1, 2) Long nau dispela wok em i nambawan bikpela wok, winim ol narapela wok. Na em i gutpela samting tru long yumi ken givim dispela gutpela lait bilong God long ol narapela man, na long dispela rot yumi givim biknem long Jehova.
Bai Yu Bekim Olsem Wanem?
◻ Wanem as bilong ol bikpela hevi i painim ol man?
◻ Olsem wanem Jisas na lain bilong em tu ol i stap olsem “lait bilong graun”?
◻ Olsem wanem lait na tok i tru bilong Jehova i soim rot long yumi?
◻ Jehova i mekim wanem na em i givim lait bilong em long oganaisesen bilong em?
◻ Jehova i makim lain bilong em i stap olsem lait bilong mekim wanem wok?
[Askim Bilong Stadi]
1. Taim aposel Pol i harim dispela tok olsem i stap long Aposel 13:47, em i mekim wanem?
2. (a) Long kirap bilong taim bilong las de, wanem samting i kamap na dispela i mekim na pasin nogut i go bikpela? (b) Wanpela bikman bilong gavman i tok wanem long samting i bin kamap long mun Ogas bilong yia 1914?
3. Ol bikman bilong graun i bin stretim ol hevi, o olsem wanem?
4, 5. (a) Wanem taim tudak i bin kamap na i karamapim ol man? Em i bin kamap olsem wanem? (b) Olsem wanem hevi inap pinis long ol man?
6. Long rot bilong Jisas, Jehova i opim rot na bai yumi ken tingting long kisim wanem gutpela samting?
7. Olsem wanem yumi ken amamas long tok promis bilong Aisaia 42:1-4 na samting i bin kamap bihain long en bilong truim dispela tok?
8. Olsem wanem Jehova i bin givim Jisas long ol man olsem wanpela “kontrak” na “lait bilong ol” man?
9. Bilong wanem Jisas i no laik stretim pasin bilong dispela graun o mekim i kamap gutpela?
10. Olsem wanem Jisas i stap olsem lait bilong graun? Em i stap olsem lait bilong mekim wanem?
11. Bilong i stap olsem lait, ol disaipel bilong Jisas i mas mekim wanem wok?
12. (a) Dispela lait i mas i go inap long wanem mak? (b) Spirit bilong Jehova i bin helpim Pol long kisim wanem save long tok bilong Aisaia 42:6? Dispela tok profet i mas kirapim yumi long mekim wanem?
13. Yumi mekim wanem beten i stret wantaim tok bilong Song 43:3? Dispela i helpim yumi long abrusim wanem pasin kranki?
14, 15. (a) Long nau Jehova i salim lait na tok i tru bilong em i go long ol man long wanem rot? (b) Olsem wanem yumi ken kamapim klia olsem lait na tok i tru bilong God i soim rot long yumi?
16, 17. Olsem wanem Jehova i givim lait bilong em long oganaisesen, olsem “meri” bilong em long 1914? Jehova i givim wanem tok long dispela “meri”?
18. (a) Wanem samting i mekim na tudak i karamapim graun, olsem Aisaia 60:2 i tok? (b) Olsem wanem ol wan wan man inap lusim dispela tudak?
19, 20. (a) Bilong wanem Jehova i givim lait bilong em long lain bilong Jisas em Jehova i bin makim ol long spirit holi? Jehova i mekim olsem wanem? (b) Bilong wanem Jehova i givim wok long dispela lain em i bin makim ol na ol i mas i stap olsem lait? (c) Olsem wanem “ol king” na “ol arapela lain” ol i kam long dispela lait bilong God?
21. Olsem wanem yumi ken kamapim klia olsem yumi pilim tru pasin sori bilong God, em i larim yumi i kisim save long ol samting em i laik mekim?
[Ol Piksa long pes 9]
Samting i bin kamap long Iden i helpim yumi long save long
as bilong ol bikpela hevi i painim ol man long nau
[Ol Kredit Lain]
Tom Haley/Sipa
Paringaux/Sipa