Ol Kristen i No Save Insait Long Pait
“Man i kilim dai arapela man em yet i mas dai long han bilong ol man, long wanem mi God mi wokim man olsem piksa bilong mi yet.”−JENESIS 9:6.
1. Wanem ol samting i kamap bihain long yia 1914 na ol man i tingting planti?
KIRAP long yia 1914 na i kam inap long nau winim wan handet milion manmeri i bin i dai long ol pait. Ol man i bin kapsaitim blut bilong planti planti man. Na olsem wanem long bihain? Long yia 1945 ol i tromoi bom nuklia na bagarapim tupela biktaun long Japan na kilim i dai 200,000 manmeri. Nau ol bikpela gavman i save, narapela lain inap bagarapim narapela lain. Ol i resis long hipim planti bom nogut bilong nuklia bilong mekim pretim ol narapela lain bambai ol i no ken kirapim pait long ol. Ol dispela bom inap bagarapim dispela graun olgeta planti taim. Na ol i putim ol dispela bom nogut long ol sabmarin tu, em wanpela kain sip i raun insait long solwara. Nau ol i tok long mekim pait long ples antap. Ol i mekim pasin longlong na bikpela bagarap tru inap kamap. Olsem wanem? I gat rot bilong abrusim?
2 I gat rot. Tasol i no rot ol lain man i tingim. Nogat. Jisas i mekim tok profet na em i tok bai ol man i longlong nabaut na tingting planti olsem nau ol i mekim. Em i tok: “Bambai kain kain mak i kamap long san na mun na sta. Na long graun bel bilong olgeta lain man bai i bagarap tru na ol i pret long pairap bilong bikpela si em i bruk bruk long solwara. Planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun. Long wanem ol sta samting long skai bai i guria.” Na bihain Jisas i mekim gutpela tok promis long ol Kristen i “was i stap.” Em i tok, “bai yupela i abrusim olgeta dispela samting i laik kamap.”−Luk 21:25, 26, 36.
Wok long i Stap Wanbel Wantaim God
3 Ol lain man, na ol lain i gat ol bom nuklia, ol i stap birua birua na ol i resis long bosim graun. Dispela samting inap mekim na bai dispela graun na olgeta manmeri i stap long en i bagarap. “God giaman bilong dispela graun” i laik bai kain samting olsem i kamap. Ol lain man “i bung na tok nogut long God na long dispela man em i makim pinis,” em Krais Jisas, nau em i stap king long heven. Taim Jehova i tok, orait bai Krais i bagarapim ol dispela lain long strongpela han bilong em olsem man i brukim wanpela sospen graun. Na bai ol samting i kamap olsem God i tok promis pinis, em i tok: “God, em i as bilong bel isi, liklik taim bai em i krungutim Seten i go aninit long lek bilong yupela.”−2 Korin 4:4; Sam 2:2, 6-9; Rom 16:20.
4 Tasol yumi, yumi laik wok long i stap wanbel wantaim God. Olsem wanem yumi ken mekim? Wanpela samting yumi mas mekim, em olsem: Yumi mas kisim tingting wankain olsem bilong God long laip na long blut.
5 Jehova em i Man bilong wokim yumi. Em i wokim skin bilong yumi na em i wokim blut na ol rop bilong blut bambai blut i ken karim kaikai i go long olgeta hap bilong skin na yumi ken i stap laip. I no laik bilong God na ol man i kapsaitim nating blut bilong ol man. Ken em i namba wan man bilong kilim i dai narapela man. Em i kilim i dai Ebel na bihain Jehova i tok, blut bilong Ebel i kapsait long graun na i olsem nek bilong wanpela man i singaut long em bilong bekim dispela blut. Wanpela tumbuna pikinini bilong Ken, em Lamek, em i kamap kilman, na em i tok, sapos wanpela man i kilim em i dai, bai dispela man i kisim bikpela hevi moa moa yet. Bihain pasin bilong ol man i go nogut tru na pasin pait i pulap long graun. Jehova i salim tait wara na bagarapim ol dispela manmeri bilong bipo. Lain bilong Noa tasol i abrusim bagarap. Noa em i man bilong bel isi; insait bilong nem bilong em i olsem “Malolo.”−Jenesis 4:8-12, 23, 24; 6:13; 7:1.
6 Nau Jehova i tokim Noa long laik bilong em long blut na em i tok: “Man i kilim dai arapela man em yet i mas dai long han bilong ol man, long wanem mi God mi wokim man olsem piksa bilong mi yet.” (Jenesis 9:3-6) Olgeta manmeri i stap long graun long nau ol i bin kamap long lain bilong Noa; olsem na dispela lo bilong God em bilong olgeta man i mas bihainim sapos ol i laik bai God i orait long ol. Namba 6 lo bilong ol Tenpela Lo i tok: “Yupela no ken kilim manmeri i dai.” Man i gat asua long blut em i mas kot na kisim pe i stret long pasin em i bin mekim.−Eksodas 20:13; 21:12; Diuteronomi 21:1-9; Hibru 10:30.
7 Jehova i tambuim ol man long kilim man i dai. Orait, bilong wanem em i larim ol Isrel i mekim pait, na em i tokim ol long mekim? Dispela pait em pait holi; em pait bilong God, em Jas bilong olgeta graun. Em rot bilong Jehova bilong pinisim ol lain i save lotuim ol spirit nogut. Ol Kenan i go sindaun nating long Graun Bilong Promis, i no ples bilong ol, na ol i save bihainim pasin nogut tru; ol i save mekim pasin pamuk na kain kain pasin i gat sem na ol i lotuim ol spirit nogut. Pasin bilong ol inap bagarapim gutpela pasin bilong lain holi bilong God. Jehova i mekim na dispela graun i “trautim” ol dispela man i no gat sem moa. Jehova i mekim olsem long rot bilong pait. Em i tokim ol Isrel long mekim pait na long dispela rot ol i pinisim ol dispela man i bihainim pasin nogut tru. (Levitikas 18:1-30, NW; Diuteronomi 7:1-6, 24) Olsem na i stret ol Kristen i mekim pait bilong spirit long nau.−2 Korin 10:3-5; Efesas 6:11-18.
8 Tasol Jehova i no orait long ol man i kilim i dai nating narapela man. Baibel i stori long wanpela king bilong Juda na i tok: “Manasa i kilim i dai planti man i no gat asua na blut bilong ol i pulap long Jerusalem.” Bihain Manasa i tanim bel na daunim em yet long ai bilong Jehova, tasol dispela asua bilong blut i stap long em na long ol lain tumbuna bilong em. Wanpela tumbuna pikinini bilong Manasa em i bilip tru long God, em King Josaia. Em i mekim planti wok bilong rausim ol god giaman long dispela ples na kirapim bek lotu i tru. Tasol em i no inap pinisim dispela asua bilong blut. Taim pikinini man bilong Josaia, em Jehoiakim, em i stap king, Jehova i kirapim Nebukatnesa long i go pait long lain Juda na givim strafe long ol. “Jehova yet i tok na dispela samting i kamap long Juda bilong pinisim long ai bilong em ol rong bilong Manasa, bilong bekim olgeta pasin nogut em i bin mekim; long wanem em i bin kilim i dai planti man i no gat asua na blut bilong ol i pulap long Jerusalem, na Jehova i no inap lusim tingting long dispela.”−2 King 21:16, NW; 24:1-4, NW; 2 Kronikel 33:10-13.
Lo Bilong Ol Kristen
9 Jisas em i Man bilong kirapim lotu Kristen na em i mas kolim lo bilong ol Kristen long kapsaitim blut bilong man o kilim man i dai, a? Olsem wanem? Em i bin mekim olsem? Em i kirapim bung bilong tingim i dai bilong em na bihain liklik em i tokim ol disaipel long redim sampela bainat. Ol disaipel i tok, “Bikpela, yu lukim. Mipela i gat tupela bainat hia.” Na em i tokim ol, “Em inap.” Bilong wanem em i tok olsem? Long wanem em i laik kamapim long ples klia wanpela bikpela tok i mas stiaim tingting bilong olgeta Kristen. Taim ol soldia i kam bilong holim Jisas long Getsemani, Pita i kirap pulim bainat na katim tru yau bilong Malkas, em wanpela wokboi bilong hetpris. Olsem wanem? Ating Pita i mekim gutpela pasin, long wanem em i laik mekim pait bilong helpim Pikinini Bilong God? Jisas i no orait long dispela pasin Pita i mekim. Em i tok, “Lusim dispela pasin nau,” na em i putim han long yau bilong dispela man na yau i kamap gutpela gen. Na em i tokim Pita, Papa bilong em inap salim planti ensel moa, winim 12-pela lain ami, bilong helpim em. Long dispela taim Jisas i kolim wanpela bikpela tok o lo i mas bosim tingting bilong olgeta Kristen, em i tok: “Olgeta man i pait long bainat, bai i lus long bainat.”−Matyu 26:51-53; Luk 22:36, 38, 49-51; Jon 18:10, 11.
10 Bihain ol Kristen bilong pastaim i tingim beten Jisas i bin mekim long Jehova, em i beten strong na em i tok, ol disaipel bilong em “ol i no bilong dispela graun” olsem em i no bilong dispela graun. Na ol i tingim tu tok em i bekim long Pailat, em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait bai ol wokman bilong mi ol i pait, na i no gat wanpela man inap putim mi long han bilong ol Juda. Tasol nau kingdom bilong mi em i no bilong dispela graun.” (Jon 17:14, 16; 18:36) Long dispela taim bipo ol narapela narapela lain insait long lain Juda ol i pait−ol i pait long maus o ol i pait tru na kapsaitim blut bilong ol wantok. Tasol ol disaipel bilong Jisas i no save insait long ol dispela kros na pait. Inap 30 samting yia ol i wet long Jerusalem na taim ol i lukim mak Jisas i bin kolim, ol i bihainim tok bilong em na ol i “ranawe i go long maunten.” Ol i no insait long pait na ol i ranawe na dispela samting i lukautim ol na ol i no bagarap.−Matyu 24:15, 16.
11 Tasol ating sampela i tingim Konilias, em i kepten bilong 100 soldia, na Sesias Polas, em i namba wan gavman long Saipras na ami i sambai long em. Dispela tupela man i wok wantaim ami, a? Tru, taim ol i harim tok bilong Krais long pastaim ol i wok wantaim ami. Baibel i no stori long ol samting Konilias na ol narapela i mekim taim ol i kamap Kristen. Tasol Sesias Polas em i gat gutpela tingting na “tingting bilong em i kirap tru long tok bilong Bikpela.” Olsem na yumi save kwiktaim em i mas kirap skelim ol wok bilong skin em i mekim wantaim bilip Kristen bilong em na bihainim rot i stret. Na Konilias tu i mas mekim olsem. (Aposel 10:1, 2, 44-48; 13:7, 12) Baibel i no tok ol disaipel i tokim ol long ol samting ol i mas mekim. Nogat. Ol yet inap tingim wanem samting ol i mas mekim, long wanem ol i stadi na kisim save long tok bilong God, em Baibel.−Aisaia 2:2-4; Maika 4:3.
12 Olsem tasol long nau. Ol Kristen i no save insait long pait, tasol ol i no ken tokim ol narapela man long ol samting ol i mas mekim long dispela. Olgeta wan wan yet i mas bihainim maus bilong bel bilong em yet na bihainim save em i kisim long ol lo bilong Baibel na tingim wanem samting em bai mekim.−Galesia 6:4, 5.
Long Taim Bilong Yumi
13 Long yia 1914, long namba wan taim, pait bilong olgeta hap i kamap long graun. Ol lain man i givim olgeta samting bilong ol, ol manmeri tu, bilong helpim dispela pait. Planti Witnes Bilong Jehova (ol i kolim Ol Sumatin Bilong Baibel long dispela taim) ol i wok strong bambai ol i no gat asua long blut. Ol man i mekim nogut tru long ol, olsem Jisas i tok ol bai mekim.−Jon 15:17-20.
14 Taim Namba Tu Pait Bilong Olgeta Hap i kirap long yia 1939, Jehova i stiaim tingting bilong ol wokboi bilong em na soim gut rot long ol. Ol lain man i kirap pinis long pait na tupela mun bihain, lain bilong Jehova i kisim dispela samting bilong soim rot long ol, em ol tok bilong Baibel bilong stadi long en long Wastaua (tok Inglis) bilong Novemba 1, 1939, nem bilong en: “No Insait long Pait.” Laspela tok bilong en i olsem: “Olgeta manmeri i stap long lain bilong Bikpela bai ol i no insait long pait; bai ol i givim bel olgeta long GOD tasol na long dispela King em i bin makim.”
15 Wanem samting i kamap? Lain Witnes Bilong Jehova ol i stap olsem wanpela bikpela lain brata long olgeta hap bilong graun na ol i no insait long pait. Ol i no kapsaitim blut bilong ol man i no gat asua; ol i no kapsaitim blut bilong ol brata bilong ol i stap long ol narapela kantri. Ol Katolik na ol Talatala na ol man bilong lotu Buda na ol narapela tu ol i insait long pait na narapela i kilim i dai narapela. Tasol ol disaipel tru bilong Jisas i bihainim nupela lo em i givim long ol, em i tok: “Mi bin laikim yupela tru. Olsem tasol yupela i mas laikim tru ol brata.”−Jon 13:34.
16 Ol dispela Kristen i givim samting bilong Sisa long Sisa. Ol i no bikhet long gavman. Ol i wokabaut stret na bihainim ol lo bilong gavman. (Matyu 22:17-21; Rom 13:1-7) Tasol bikpela samting em olsem: Ol i givim samting bilong God long God−ol i givim laip bilong ol, em ol i bin dediketim long God, na lotu bilong ol long God. Olsem na taim Sisa i singaut long ol i mas givim samting bilong God long Sisa, ol i bihainim tok bilong Aposel 4:19 na 5:29. Ol Kristen i no save insait long pait na kapsaitim blut bilong man, o mekim narapela wok bilong ami, o mekim wanpela wok em gavman i laik givim long ol olsem senis bilong ol dispela wok, o lotuim wanpela piksa, olsem salut long plak bilong kantri samting. Ol Kristen i stap gut long God ol i no save helpim pait liklik, na long dispela as ol man i kilim sampela i dai.−Matyu 24:9; Revelesen 2:10.
Ol i No Lusim Lo Bilong God Liklik
17 Wanpela buk bilong nau (Of Gods and Men) i stori long ol Witnes Bilong Jehova long Jemani taim Hitler i stap bos. Dispela buk i tok, ol man i “mekim nogut tru” long ol Witnes, winim olgeta narapela lotu. Tasol ol Witnes i no lusim lo bilong God liklik. Ol manmeri bilong ol narapela lotu ol i bihainim ol pasto bilong ol bilong ami na ol i lotu long gavman bilong Jemani. Ol i kisim “mak” bilong wel abus politik “long han sut na long pes” bilong ol. (Revelesen 13:16) Ol i helpim wok bilong gavman bilong Jemani, na ol i kamapim dispela samting long ples klia, long wanem ol i save salut long Hitler na long plak bilong gavman bilong em.
18 Ol Kristen tru long Jemani ol i bin mekim wanem? Olsem dispela buk i tok: “Ol Witnes Bilong Jehova tasol i sanap strong na sakim dispela gavman. Ol i wok strong long mekim, olsem na gavman i kalabusim planti tru (inap 50 pesen) na kilim i dai planti (inap 25 pesen). . . . Ol i narapela kain [long ol narapela lotu], long wanem ol i no bihainim pasin bilong dispela graun−ol i no wok long kisim bikpela nem long dispela graun o bikpela mani kago samting. Ol i save tingim ol yet ol i no bilong dispela graun. Ol i no save insait long wanpela lain politik, long wanem ol i bilong narapela lain−em lain bilong God. . . . Ol i no surik liklik. . . . Ol i pilim olsem sapos ol i insait long ami o ol i vot o ol i salut long Hitler bai ol i givim samting bilong God long dispela graun.” Insait long ol kalabus nogut bilong Hitler tu ol man i lukim ol Witnes i wok long i stap wanbel wantaim ol man na ol i no save pait. Ol man i lukim dispela pasin bilong ol Witnes, olsem na ol wasman bilong ol dispela haus kalabus nogut (em ol S.S.) ol i larim ol Witnes tasol i sevim ol. Dispela buk i tok: “Ol i save ol Witnes i no ken kilim ol i dai.”
19 Long taim bilong Namba Tu Pait Bilong Olgeta Hap ol Witnes Bilong Jehova i sanap strong tru na ol i no insait liklik long pait. Ol i no pret. Long olgeta hap bilong graun ol i bihainim pasin bilong Jisas na kamapim long ples klia olsem “ol i no bilong dispela graun.” Ol manmeri bilong dispela graun i gat bikpela asua long blut, tasol ol dispela Kristen i winim pinis pasin bilong dispela graun olsem Krais i bin mekim.−Jon 17:16; 16:33; 1 Jon 5:4.
Ranawe long Asua Bilong Blut
20 Ol misin bilong dispela graun i bin mekim planti pait bilong subim ol man long bihainim lotu bilong ol, na ol i bin mekim ol pait “holi,” na ol i bin kilim i dai planti man taim ol i wok long painimaut ol man i lusim bilip bilong misin. Ol i bin kapsaitim blut bilong ol dispela man i no gat asua. Ol i bin wokim kontrak wantaim ol hatpela bos bilong dispela graun, em ol i save kapsaitim blut bilong planti man. Ol i orait long ol dispela hatpela bos i tromoi ol Witnes Bilong Jehova long ol kalabus nogut na planti ol i dai pinis. Ol i helpim ol hetman i bin tokim ol man long sutim ol Witnes long gan na kilim ol i dai o katim nek bilong ol na kilim ol i dai. Ol dispela misin i no inap abrusim stretpela kot bilong Jehova. Strafe bilong Jehova bai painim ol na i no ken lusim taim. Na olgeta manmeri i laikim tumas stretpela pasin ol i no ken lusim taim−kwiktaim ol i mas ranawe lusim olgeta lotu giaman, em “bikpela taun Babilon” i gat asua long blut. Ol i mas ranawe i go long oganaisesen bilong God bambai ol i no ken bagarap.−Revelesen 18:2, 4, 21, 24.
21 Planti bilong yumi, taim ol i no kisim save yet long ol lo bilong God long Baibel, ating ol i bin kapsaitim blut bilong man o ol i bin insait long wanpela misin o wanpela lain politik i gat asua long blut. Ol dispela manmeri i olsem man bilong Isrel long bipo em i kilim i dai man, tasol em i no tingting long kilim em i dai. Dispela man inap ranawe i go long wanpela bilong ol 6-pela taun bilong hait bambai em i no ken bagarap, na bihain, taim hetpris bilong Isrel i dai, dispela man i ken lusim dispela taun. Dispela i makim olsem long nau yumi mas bilip long Krais Jisas na larim ol wok bilong dispela Hetpris bilong God i helpim yumi. Sapos yumi stap aninit long Hetpris Krais Jisas na wok wantaim ol manmeri bilong God, em spirit holi i bin makim ol, orait taim “man bilong bekim blut” long nau, em Krais Jisas, i kam bilong givim strafe long ol man i gat asua long blut, orait bai yumi abrusim bagarap. ‘Bikpela lain’ nau ol i ranawe i go long oganaisesen bilong God, ol i mas i stap long dispela ples hait i go inap long taim wok pris bilong Krais bilong baim bek ol man em i pinis na i olsem em i ‘dai.’−Nambas 35:6-8, 15, 22-25, NW; 1 Korin 15:22-26; Revelesen 7:9, 14.
22 Long banis bilong Yunaitet Nesen long Nu Yok, long Amerika, ol i raitim tok bilong Aisaia 2:4 (NW ) olsem: “Ol i mas wokim ol bainat bilong ol i kamap samting bilong wokim gaden, na ol i mas wokim ol spia bilong ol i kamap sisis bilong katim han bilong diwai. Narapela lain i no ken holim bainat bilong pait long narapela lain, na ol i no ken lain moa long pait.” Tasol husat i save bihainim dispela tok long nau? No gat wanpela lain insait long Yunaitet Nesen i mekim. Tasol dispela “lain” ol i wok long bihainim pasin wanbel, em ol 3 milion samting Witnes Bilong Jehova i stap long olgeta hap bilong graun, ol i bihainim dispela tok. Ol i kamapim long ples klia olsem ol Kristen i no save insait long pait.
Sampela Askim Bilong Kamapim Gen Ol Bikpela Tok
◻ Olsem wanem yumi ken kamap wanbel wantaim God?
◻ Jehova i ting olsem wanem long pasin bilong kilim i dai nating ol man?
◻ Ol Kristen i no save insait liklik long wanem samting?
◻ Husat ol i bin sanap strong na i stap gut long God?
◻ Yumi mas ranawe i go we bambai yumi no ken bagarap?
2. Jisas i tok profet olsem wanem long dispela taim nau? Tasol em i mekim wanem tok promis long ol Kristen?
3. (a) Olsem wanem ol lain man i bihainim laik bilong ‘god bilong dispela, graun’? (b) Jehova bai stretim dispela samting olsem wanem?
4. Yumi mas mekim wanem na bai yumi inap i stap wanbel wantaim God? (1 Pita 3:11)
5. I gat wanem ol stori long Baibel long man i kilim i dai man na yumi save, Jehova i save bekim pe nogut long ol man i kilim i dai nating narapela man?
6. Wanem lo bilong God long blut? Husat i mas bihainim dispela lo?
7. (a) Bilong wanem i stret Jehova i tokim ol Isrel long mekim pait? (b) Ol Kristen i gat wanem kain pait long nau?
8. Wanem samting i bin kamap long bipo na yumi save, Jehova i no orait long pasin bilong kilim i dai man i no gat asua?
9. Jisas i givim wanem lo long ol Kristen long kapsaitim blut bilong man?
10. (a) Wanem bikpela tok o lo bilong stiaim tingting bilong yumi i stap long Jon 17:14, 16 na Jon 18:36? (b) Ol Kristen bilong pastaim i mekim wanem na ol i no bagarap?
11, 12. (a) Taim Konilias na Sesias Polas i kamap Kristen, tupela i mas tingim gut wanem samting? (b) Wanem samting i helpim ol long tingim gut dispela samting na bihainim rot i stret? (c) Orait, olsem wanem long yumi long nau?
13 Long taim bilong Namba Wan Pait Bilong Olgeta Hap, Ol Sumatin Bilong Baibel i gat asua long blut o olsem wanem?
14, 15. (a) Long taim bilong Namba Tu Pait, olsem wanem Jehova i soim rot long lain bilong em? (b) Olsem na ol Witnes Bilong Jehova i mekim wanem? (c) Tasol ol manmeri bilong ol lotu bilong dispela graun ol i mekim wanem?
16. (a) Ol Witnes Bilong Jehova i mekim wanem na ol i kamapim long ples klia olsem ol i no bikhet long gavman? (b) Ol Witnes i mekim wanem na ol i strong long givim samting bilong God long God? Na sampela taim wanem samting i kamap?
17. (a) Lain bilong Hitler ol i mekim wanem long ol Witnes Bilong Jehova, olsem wanpela buk i tok? (b) Ol Witnes i mekim wanem na i narapela kain tru long pasin ol manmeri bilong ol narapela lotu i mekim?
18. (a) I gat wanem stori i kamapim long ples klia olsem ol Witnes i no save insait long wok politik? (b) Dispela stori long samting i bin kamap long bipo em i mas mekim wanem long yumi long nau?
19. Olsem wanem ol Witnes Bilong Jehova i bin bihainim pasin bilong Jisas? Na wanem samting i bin kamap?
20. (a) Bilong wanem ol man i mas lusim kwik ol lotu giaman? (b) Ol i mas ranawe i go we bambai ol i no ken bagarap?
21. Bipo God i putim sampela taun bilong hait na dispela wok em i mekim i makim wanem samting long nau?
22. Long tok bilong Aisaia 2:4 olsem wanem ol lain bilong Yunaitet Nesen i narapela kain long lain holi bilong God?
[Blok long pes 21]
Ol i Sanap Strong na Stap Gut long Bilip
Wanpela buk (New Religious Movements: A Perspective for Understanding Society) i stori moa long pasin bilong ol Witnes Bilong Jehova long sanap strong taim lain bilong Hitler mekim nogut long ol. Dispela buk i tok:
‘Ol Witnes Bilong Jehova i no bihainim dispela gavman na gavman i no inap daunim ol, na dispela tupela samting i mekim ol man i bin kamapim dispela nupela gavman ol i tingting planti. Ol i laik bai olgeta man long Jemani i mas daun long ol. Ol i mekim nogut tru long ol Witnes, tasol ol Witnes i no surik liklik. Ol i givim pen long ol Witnes, na kalabusim ol, na tok bilas long ol, tasol i no gat wanpela Witnes i lusim bilip na kamap wanpela Natsi. Ol Natsi i ting ol inap mekim pretim ol Witnes na bai ol i lusim bilip. Tasol nogat. Olsem na ol Natsi i tingting planti na ol i no save wanem samting ol i mas mekim.’
‘Ol Natsi i laik bai olgeta man i mas bihainim ol, Tasol ol Witnes i strong long bihainim bilip bilong ol yet. Olsem na pait i kamap. Ol Natsi i moa strong long ol samting bilong skin, tasol ol Witnes i moa strong long ol samting bilong spirit. I no gat strongpela as bilong bilip bilong ol Natsi olsem kingdom bilong ol bai stap inap 1,000 yia. Tasol ol Witnes i gat strongpela bilip, kirap long taim bilong namba wan bilipman Ebel. Lain bilong Hitler i hatwok long daunim ol man i no wanbel wantaim ol, na ol i mas wok strong bilong kirapim ol man long bihainim tingting bilong ol. Tasol ol Witnes i save, olgeta manmeri long lain bilong ol bai i stap gut long bilip maski ol i mas i dai tu.’
Bihain taim bai kamap na bai ol Kristen i sanap strong na i stap gut long bilip inap pinis. Yumi wetim dispela taim. (Rom 8:35-39) Long dispela taim Kingdom bilong Krais, em “King Bilong Gutaim,” bai bosim graun na “wok king bilong em bai i go bikpela, na gutaim i no ken pinis.”−Aisaia 9:6, 7, NW.
[Blok long pes 22]
Ol Yangpela i Stap Gut long God
Sampela yia bipo wanpela man i raitim stori long olgeta de bilong ol samting em i lukim long wanpela kantri long Yurop. Ol tok dispela man i raitim i kamapim long ples klia olsem ol yangpela Witnes i bin sanap strong na “ol i no bilong dispela graun.”−Jon 17:14.
‘Yia 1945, Mas 12: Wanpela kot bilong ami i kamap. Tupela yangpela bilong lain bilong Jehova ol i kot. Tupela i kot, long wanem tupela i no laik insait long ami (ol i strong long bihainim lotu bilong ol). Wanpela i no winim yet 20 krismas na kot i tok em i mas kalabus inap 15 yia. Narapela, em krismas bilong em i bikpela liklik, kot i tok em i mas i dai. Wantu ol i kisim em i go long ples bilong em bilong kilim em i dai long ai bilong ol manmeri na mekim pretim ol. Em i namba 14 man ol i bin kilim i dai. Mi pilim tru samting i painim dispela tupela yangpela man. Ol i no ken mekim olsem long ol dispela man bilong Jehova. Ol i kilim i dai dispela yangpela man, tasol dispela samting i no mekim pretim ol man; dispela samting i litimapim gutpela pasin bilong dispela yangpela man−em i stap strong long bilip na em i dai. Em i yangpela man na skin bilong em i strong. Mi sori long em.’
‘Long apinun mipela i harim stori bilong dispela yangpela man ol i kilim em i dai long ai bilong bikpela lain long ples bung. Ol i makim sampela soldia bilong sanap na was i stap, na wanpela i kilim i dai em yet long gan taim ol i no kilim i dai yet dispela yangpela man, long wanem em i sem long wok ol i laik bai em i mekim. Wanpela kepten i laik bai dispela soldia i helpim ol long hangamapim dispela yangpela man na kilim em i dai. Tasol em i no laik mekim. Olsem na em i kilim i dai skin bilong em yet. Dispela yangpela man hia em i no pret. Em i sanap strong i go inap long taim em i dai. Em i no mekim wanpela tok.’
Long taim bilong kirap bek ol dispela yangpela man bai amamas tru, long wanem ol i redi long i dai bambai ol inap holimpas bilip bilong ol, na long dispela rot ol i no lus long kisim laip i stap oltaim long nupela taim Jehova i laik kamapim!−Lukim Hosea 13:14.