Yu Ting Jisas i Promisim Man Nogut Olsem Em Bai Kisim Laip Long Heven?

Dispela askim i kamap bikos Jisas i promisim man nogut i hangamap klostu long em olsem em bai kisim laip long Paradais. Jisas i tok: “Mi tok tru long yu tude, Yu bai stap wantaim mi long Paradais.” (Luk 23:43) Tingim, Jisas i no tok dispela Paradais bai stap we. Olsem na yu ting tok bilong Jisas i makim olsem dispela man nogut bai stap wantaim em long heven?

Pastaim yumi ken skelim sapos dispela man nogut i winim mak bilong kisim laip long heven o nogat. Ol man i wet long kisim laip long heven, ol i kisim baptais long wara na holi spirit, olsem na ol i kamap disaipel bilong Jisas em holi spirit i makim. (Jon 3:3, 5) Narapela samting ol i mas mekim em ol i mas bihainim ol lo bilong God long stretpela pasin na kamapim ol pasin olsem onest pasin, stap gut long narapela, na pilim hevi bilong narapela man. (1 Korin 6:9-11) Na tu, ol i mas stap gut long God na Krais i go inap long ol i dai. (Luk 22:28-30; 2 Timoti 2:12) Taim ol i mekim ol dispela samting, orait God bai kirapim ol bek na ol inap mekim bikpela wok long heven, olsem wok pris na wok king wantaim Krais na bosim ol manmeri inap 1,000 yia.—Revelesen 20:6.

Tasol man nogut i hangamap klostu long Jisas, em i raskolman taim em i bin stap laip na taim em i dai. (Luk 23:32, 39-41) Tru, em i soim pasin rispek taim em i tokim Jisas: “Tingim mi taim yu kamap King.” (Luk 23:42) Tasol em i no bin kisim baptais na em i no bin kisim holi spirit na kamap disaipel bilong Jisas, na tu, em i no bin kamapim klia olsem em i mekim stretpela pasin na stap gut long God. Yu ting i stret long Jisas i promisim dispela man long em i ken mekim wok king wantaim ol gutpela disaipel husat i soim pinis olsem ol i stap gut long God?—Rom 2:6, 7.

Yumi ken tok piksa olsem: Sapos wanpela man i askim yu long fogivim em long em i bin stilim mani bilong yu, ating bai yu no kotim em long polis. Tasol yu ting bai yu trastim em long lukautim bisnis bilong yu o famili bilong yu? Nogat, a? Bai yu givim kain bikpela wok olsem long man em yu bilip tru long em. Na olsem tasol, ol lain husat bai kisim laip long heven, ol i mas kamapim klia olsem ol bai bihainim tru ol stretpela lo bilong God taim ol i bosim ol manmeri. (Revelesen 2:10) Dispela man nogut i no kamapim klia dispela samting, maski i luk olsem em i gat gutpela bel taim em i askim Jisas long tingim em.

Tasol yu ting Jisas i bin tokim man nogut olsem em bai stap wantaim em long heven long dispela seim de? Nogat, long wanem, Jisas yet i no bin go long heven long dispela de stret. Em i bin stap “insait tru long graun” olsem long matmat inap 3-pela de. (Matyu 12:40; Mak 10:34) Bihain long em i kirap bek, em i stap long graun inap 40 de paslain long em i go long heven. (Aposel 1:3, 9) Olsem na man nogut i no inap stap long heven wantaim Jisas long dispela de.

Orait, dispela man nogut i go long wanem Paradais? Taim em i kirap bek, em bai stap long Paradais long graun, em Jisas bai bosim. (Aposel 24:15; Revelesen 21:3, 4) Bilong kisim sampela save moa long dispela Paradais na ol samting God i laik bai yumi mas mekim, toktok wantaim wanpela Witnes Bilong Jehova.