Famili Bilong Jisas i Go Long Jerusalem

Nau em mun Mas o Epril, na em i taim bilong Josep na famili bilong em, ol pren, na ol wanblut bilong ol long i go long Jerusalem olsem ol i save mekim long olgeta yia. Ol i go long Jerusalem long mekim bung bilong Pasova olsem Lo i tok long lain Israel i mas mekim. (Lo 16:16) Nasaret i stap longwe long Jerusalem inap olsem 120 kilomita. Olsem na olgeta i amamas na ol i bisi long redim ol samting. Long dispela taim Jisas i gat 12-pela krismas, na em i amamas tru long go long dispela bikpela bung, long wanem, em inap long i go gen long tempel.

Jisas na famili bilong em i tingim Pasova olsem wanpela bikpela bung, na i no olsem bung bilong wanpela de tasol. De bihain long Pasova em kirap bilong 7-pela de bilong mekim Bikpela Bung Bilong Bret i No Gat Yis. (Mak 14:1) Ol i tingim dispela bung olsem bung bilong Pasova. Dispela raun bilong ol i save kisim 2-pela wik samting, kirap long taim ol i lusim Nasaret na i go long Jerusalem, taim ol i stap long Jerusalem, na taim ol i go bek long asples bilong ol. Tasol long dispela yia, raun bilong ol i winim 2-pela wik, long wanem, sampela samting i kamap long Jisas na ol i mas i go bek long Jerusalem bilong painim em.

Taim ol i lusim Jerusalem na i go bek long hap not, Josep na Maria i ting Jisas i wokabaut wantaim ol wanblut na ol pren bilong ol. Tasol taim ol i stop long wanpela ples na ol i laik malolo long nait, ol i no lukim em. Olsem na ol i stat long painim em namel long ol lain ol i go wantaim, tasol ol i luksave olsem em i no stap. Ol i no inap lukim pikinini bilong ol! Olsem na Josep na Maria i go bek long Jerusalem bilong painim em.

Long de olgeta, ol i painim Jisas, tasol ol i no lukim em. Na tu, ol i no painim em long namba 2 de. Long namba 3 de, ol i lukim pikinini bilong ol long tempel, dispela tempel i gat planti ples bung long en. Ol i lukim Jisas i sindaun namel long ol tisa bilong lotu Juda. Em i wok long putim gut yau na givim ol askim long ol, na ol i kirap nogut long savetingting bilong em.

Maria i tok: “Pikinini, bilong wanem yu mekim dispela pasin long mipela? Mitupela papa bilong yu i wari tru na wok long painim yu.”—Luk 2:48.

Jisas i kirap nogut olsem ol i no save long ples em inap stap long en. Em i tok: “Bilong wanem yutupela i wok long painim mi? Ating yutupela i no save olsem mi mas i stap long haus bilong Papa bilong mi?”—Luk 2:49.

Taim ol i painim em pinis, olgeta i go bek long Nasaret, na oltaim Jisas i daun na bihainim tok bilong Josep na Maria. Em i wok long kamap bikpela na savetingting bilong em tu i go bikpela moa. Maski em i yangpela yet, God na ol man i laikim em. Tru tumas, kirap long taim Jisas i liklik yet, em i stap gutpela eksampel long pasin bilong kisim save long God na mekim laik bilong em, na tu, pasin bilong soim rispek long papamama bilong em.