Jisas i Kamapim Klia Stretpela Pasin Bilong God

“God i givim Krais olsem ofa na bai ol manmeri i ken kamap wanbel wantaim God long rot bilong bilip bilong ol long blut bilong Krais. God i mekim olsem bilong kamapim klia em i bihainim stretpela pasin.”​—RO. 3:​25, NW.

1, 2. (a) Baibel i tok wanem long i stap bilong ol man? (b) Bai yumi skelim wanem ol askim long dispela stadi?

PLANTI man i save long stori bilong Baibel long pasin bikhet i bin kamap long gaden Iden. Yumi olgeta i pilim tru hevi bilong sin bilong Adam, olsem dispela tok i kamapim: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Ro. 5:12) Maski yumi wok strong long mekim pasin i stret, yumi save mekim pasin i no stret, olsem na i gat wok long God i mas fogivim yumi. Aposel Pol tu i bin pilim olsem: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim. O sori, dispela hevi i bagarapim tru tingting bilong mi!”​—Ro. 7:​19, 24.

² Yumi olgeta i gat sin, olsem na taim Jisas bilong Nasaret i bon, olsem wanem na em i no gat sin, na bilong wanem em i kisim baptais? Olsem wanem laip bilong Jisas i kamapim klia stretpela pasin bilong Jehova? Na bikpela samting moa yet, indai bilong Krais i inapim wanem samting?

Satan i Sutim Tok Long Stretpela Pasin Bilong God

 3. Satan i giamanim Iv olsem wanem?

³ Tupela tumbuna bilong yumi, Adam na Iv, i bin mekim longlong pasin taim ol i sakim wok bos bilong God na larim “dispela snek bilong bipo yet, . . . em Satan,” i bosim ol. (KTH 12:9) Tingim olsem wanem dispela i bin kamap. Satan i sutim tok long stretpela pasin bilong Jehova long mekim wok bos. Em i mekim olsem taim em i askim Iv: “Ating God i tambuim yutupela long kaikai pikinini bilong olgeta diwai bilong gaden, a?” Iv i kolim dispela lo God i bin givim long ol, olsem i gat wanpela diwai ol i no ken holim, sapos ol i holim ol bai dai. Orait nau Satan i tok, God i giaman. Satan i tokim Iv: “Yutupela i no inap i dai.” Satan i giamanim Iv long bilip olsem God i pasim em long kisim gutpela samting na sapos em i kaikai dispela prut tambu, em bai kamap olsem God na em yet inap makim wanem samting i gutpela na wanem samting i nogut.​—Stt. 3:​1-5.

 4. Ol manmeri i kam aninit long wok bos bilong Satan olsem wanem?

⁴ I olsem Satan i tok ol manmeri bai amamas moa sapos ol i bosim wokabaut bilong ol yet na sakim wok bos bilong God. Adam i no sambai long stretpela pasin bilong God long mekim wok bos. Em i harim tok bilong meri bilong em na em tu i kaikai dispela prut tambu. Dispela i mekim na Adam i lusim pasin bilong em long stap gut long Jehova na em i bringim yumi i kam aninit long wok bos bilong sin na dai. Na tu, ol manmeri i kam aninit long wok bos bilong Satan, em “giaman god bilong dispela graun.”​—2 Ko. 4:4; Ro. 7:14.

 5. (a) Wanem samting i bin kamap tru olsem Jehova i tok pinis? (b) God i tokaut long wanem gutpela samting ol tumbuna pikinini bilong Adam na Iv inap wetim i kamap?

⁵ Adam na Iv i mas i dai, olsem Jehova i tok pinis. (Stt. 3:​16-19) Tasol dispela i no makim olsem laik bilong Jehova i no inap kamap, nogat. Taim Jehova i kolim strafe bilong Adam tupela Iv, em i tokaut long wanpela gutpela samting ol tumbuna pikinini bilong tupela inap wetim i kamap. Em i tokaut olsem em bai kamapim wanpela “pikinini” em Satan bai kaikaim lek bilong em. Tasol dispela Pikinini bilong promis bai orait bek na em bai “krungutim het bilong [Satan.]” (Stt. 3:​15, NW) Baibel i stori moa long dispela samting Jisas Krais bai mekim, olsem: “Pikinini Bilong God i bin kamap ples klia bilong bagarapim na rausim wok bilong Satan.” (1 Jo. 3:8) Tasol olsem wanem pasin na dai bilong Jisas i bin kamapim klia stretpela pasin bilong God?

Samting Baptais Bilong Jisas i Makim

 6. Olsem wanem yumi save Jisas i no kisim sin long Adam?

⁶ Taim Jisas i bikpela pinis, em i mas wankain stret olsem Adam em long pastaim em i bin stap gutpela olgeta. (Ro. 5:14; 1 Ko. 15:45) Olsem na Jisas i mas gutpela olgeta taim em i bon. Olsem wanem dispela inap kamap? Ensel Gebriel i tokim mama bilong Jisas, Maria, olsem: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.” (Lu. 1:35) Yumi ken ting olsem, taim Jisas i liklik yet, Maria i bin tokim em long dispela samting. Olsem na taim Maria na waspapa bilong Jisas, em Josep, i painim yangpela Jisas long tempel bilong God, Jisas tok: “Ating yutupela i no save, mi mas i stap long haus bilong Papa bilong mi?” (Lu. 2:49) Kirap long taim Jisas i liklik yet, em i save olsem em i Pikinini Bilong God. Olsem na wok bilong kamapim klia stretpela pasin bilong God i stap bikpela samting tru long em.

 7. Jisas i holim wanem ol samting i dia tumas?

⁷ Long pasin bilong go oltaim long ol miting bilong lotu, Jisas i soim olsem em i laikim tru ol tok bilong God. Tingting bilong em i gutpela olgeta, olsem na em inap lain na kliagut long olgeta samting em i harim na ritim long Ol Skripsa Hibru. (Lu. 4:​16) Narapela samting em i holim i dia tumas, em wanpela bodi i gutpela olgeta em inap givim olsem ofa bilong baim bek ol man. Taim Jisas i baptais, em i beten i stap na ating em i tingim tok profet bilong Song 40:​6-8.​—Lu. 3:​21; ritim Hibru 10:​5-​10.a

 8. Bilong wanem Jon Bilong Baptais i laik pasim Jisas long kisim baptais?

⁸ Pastaim Jon Bilong Baptais i laik pasim Jisas long kisim baptais. Bilong wanem? Long wanem, Jon i wok long baptaisim ol Juda em ol i hevi long rong ol i bin mekim long Lo na ol i tanim bel pinis. Jon i wanblut bilong Jisas na em i save olsem Jisas i no gat sin, olsem na i no gat wok long Jisas i tanim bel. Tasol Jisas i tokim Jon olsem i stret long Em i mas kisim baptais. Em i tok, “long dispela pasin bai yumi inapim olgeta samting God i laik bai yumi mas mekim.”​—Mt. 3:15.

 9. Baptais bilong Jisas i makim wanem samting?

⁹ Jisas em man i gutpela olgeta, na em i inap ting olsem, wankain olsem Adam, em inap kamapim wanpela lain pikinini i no gat sin. Tasol Jisas i no gat dispela laik, long wanem, dispela em i no laik bilong Jehova. God i bin salim Jisas i kam long graun bilong inapim wok em Pikinini bilong promis, o Mesaia, i mas mekim. Insait long wok Mesaia i mas mekim, Jisas i mas givim gutpela laip bilong em olsem ofa. (Ritim Aisaia 53:​5, 6, 12.) Baptais bilong Jisas i no makim wankain samting olsem baptais bilong yumi. Em i no makim olsem em i dediket long Jehova, long wanem, Jisas i bin kamap insait long lain Israel em lain i dediket pinis long God. Tasol baptais bilong Jisas i makim olsem em i givim em yet bilong mekim laik bilong God olsem Baibel i tok long Mesaia bai mekim.

10. Bilong mekim laik bilong God, Mesaia i mas mekim wanem ol wok? Jisas i ting olsem wanem long dispela?

¹⁰ Laik bilong Jehova long Jisas em long autim gutnius long Kingdom Bilong God, kamapim ol disaipel, na redim ol long mekim wok bilong kamapim ol nupela disaipel. Na tu, pasin bilong Jisas long givim em yet i makim olsem em i redi long karim hevi bilong pasin birua na dai bilong sapotim stretpela wok bos bilong God Jehova. Jisas i laikim tru Papa bilong em long heven, olsem na em i amamas long mekim laik bilong God na em i amamas tru long givim bodi bilong em olsem ofa. (Jo. 14:31) Na tu, em i amamas long save olsem em inap givim pe bilong gutpela laip bilong em long God bilong baim bek yumi long sin na dai. Olsem wanem? God i orait long Jisas i givim em yet bilong mekim ol dispela bikpela wok? Yes, em i orait long dispela!

11. Jehova i mekim wanem bilong soim olsem em i orait long Jisas i stap olsem Mesaia, o Krais?

¹¹ Ol fopela man bilong raitim ol Gutnius i kamapim klia olsem taim Jisas i kam antap long wara Jordan, God Jehova i tokaut olsem em i amamas long Jisas. Jon Bilong Baptais i tok: “Mi lukim pinis Holi Spirit i lusim heven na i kam daun olsem wanpela bilong ol dispela pisin ol i kolim balus, na em i go i stap antap long [Jisas]. . . . Na mi yet mi lukim na mi autim tok pinis olsem, dispela em i Pikinini Bilong God.” (Jo. 1:​32-34) Long dispela taim tu, Jehova i tokaut: “Dispela em i Pikinini bilong mi. Mi laikim em tumas. Bel bilong mi em i amamas long em.”​—Mt. 3:17; Mk. 1:11; Lu. 3:22.

Stap Gut Long God Inap Long Em i Dai

12. Jisas i mekim wanem insait long tri na hap yia bihain long em i kisim baptais?

¹² Insait long tri na hap yia, Jisas i insait tru long wok bilong skulim ol man long Papa bilong em na long stretpela wok bos bilong God. Em i wokabaut i go long olgeta hap long Graun Bilong Promis na em i taiet, tasol i no gat wanpela samting inap pasim em long autim gut tok i tru. (Jo. 4:​6, 34; 18:37) Jisas i skulim ol manmeri long Kingdom Bilong God. Long rot bilong mirakel em i oraitim ol sikman, givim kaikai long bikpela lain i stap hangre, na kirapim bek ol man i dai pinis, na long dispela rot em i kamapim klia ol samting Kingdom bai mekim bilong helpim ol man.​—Mt. 11:​4, 5.

13. Jisas i skulim yumi long beten long wanem ol samting?

¹³ Jisas i no laik kisim biknem long wok bilong em long skulim ol man na wokim mirakel, nogat. Em i stap gutpela piksa long daunim em yet na givim biknem long Jehova. (Jo. 5:19; 11:​41-44) Na tu, Jisas i kamapim ol bikpela samting yumi mas beten long en. Long beten bilong yumi, yumi mas askim God long mekim nem bilong em Jehova “i stap holi,” na wok bos bilong God i mas senisim wok bos nogut bilong Satan na bai ol i ken bihainim “laik bilong [God] long graun olsem ol i save bihainim long heven.” (Mt. 6:​9, 10) Na tu, Jisas i tokim yumi long mekim ol samting i stret wantaim ol dispela beten long rot bilong “wok pastaim long painim kingdom bilong God wantaim stretpela pasin bilong em.”​—Mt. 6:​33, Nupela Testamen na Ol Sam.

14. Jisas i gutpela olgeta, olsem na bilong wanem em mas wok strong tru bambai em i mas inapim wok bilong em insait long laik bilong God?

¹⁴ Klostu long taim Jisas i laik i dai, em i luksave moa yet long bikpela wok em i gat. Bilong laik bilong Papa bilong em i ken kamap, Jisas i mas sanap strong na karim hevi bilong kot giaman ol i mekim long em na kisim bikpela pen na dai. Faivpela de paslain long em i dai, Jisas i beten olsem: “Nau bel bilong mi i hevi na mi tingting planti. Na bai mi tok wanem? Ating bai mi tok, ‘Papa, yu no ken larim dispela taim nogut i kamap long mi’? Nogat. Mi no ken tok olsem. Dispela taim bilong hevi i mas kamap long mi. Long dispela as tasol na mi kam.” Taim Jisas i kamapim pinis dispela tingting bilong em, em i kirap putim tingting bilong em i go long samting i bikpela moa na em i beten: “Papa, yu ken mekim nem bilong yu i kamap bikpela.” Wantu Jehova i bekim tok: “Mi mekim nem bilong mi i kamap bikpela pinis, na bai mi mekim olsem gen.” (Jo. 12:​27, 28) Yes, Jisas i redi long winim ol bikpela hevi i traim pasin bilong em long stap gut long God​—i no gat wanpela man bipo i bin bungim kain bikpela traim olsem. Na taim Jisas i harim dispela tok bilong Papa bilong em long heven, dispela i givim strong long em olsem em bai inapim wok bilong em long kamapim klia olsem Jehova em i nambawan bos. Na tru tumas, em inapim dispela wok!

Samting Dai Bilong Jisas i Mekim

15. Paslain long Jisas i dai, bilong wanem em i tok: “Em i pinis nau”?

¹⁵ Taim Jisas i hangamap long diwai pos na win bilong em i laik pinis, em i singaut: “Em i pinis nau.” (Jo. 19:30) God i bin helpim Jisas na em i bin mekim planti bikpela samting insait long tri na hap yia bihain long em i baptais i go inap long em i dai. Taim Jisas i dai, wanpela bikpela guria i kamap. Kepten bilong ol soldia bilong Rom husat i go pas long kilim Jisas i dai, i tokaut olsem: “Tru tumas, dispela man em i Pikinini Bilong God.” (Mt. 27:54) Ating dispela kepten i bin i stap taim ol man i tok bilas long Jisas long em i tok em i Pikinini Bilong God. Maski planti hevi tru i bin painim Jisas, em i holimpas pasin bilong em long stap gut long God na kamapim klia olsem Satan em man bilong giaman. Satan i bin sutim tok long olgeta man husat i sapotim wok bos bilong God, olsem: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Jisas i bin stap gut long God na dispela i soim olsem Adam tupela Iv inap i stap gut long God na winim dispela traim bilong ol em i no bikpela olsem traim bilong Jisas. Na bikpela samting moa, i stap bilong Jisas na dai bilong em i kamapim klia olsem pasin bilong Jehova long mekim wok bos em i stret olgeta. (Ritim Sindaun 27:11) Olsem wanem? I gat sampela samting moa em dai bilong Jisas i bin inapim? Yes, i gat!

16, 17. (a) Olsem wanem ol witnes bilong Jehova i stap paslain long taim bilong ol Kristen inap stap olsem stretpela man long ai bilong em? (b) Jehova i givim wanem gutpela pe long Pikinini bilong em? Bikpela Jisas Krais i wok yet long mekim wanem?

¹⁶ Planti wokman bilong Jehova i bin stap paslain long taim Jisas i kam long graun. Ol i stap olsem stretpela man long ai bilong God na God i tok promis long ol olsem taim ol i dai, bihain ol bai kirap bek. (Ais. 25:8; Dan. 12:13) Tasol i gat wanem as na God Jehova inap blesim ol sinman long kain gutpela rot olsem? Baibel i tok: “God i bin makim Jisas [Krais] long em bai i dai na blut bilong en bai i kapsait bilong rausim sin bilong olgeta manmeri i bilip long em. Long dispela pasin God i soim yumi pasin em i mekim bilong kolim yumi stretpela manmeri [“kamapim klia em i bihainim stretpela pasin,” NW]. Bipo God i save isi long ol manmeri na em i no bekim kwik pe nogut bilong sin ol i mekim. Tasol nau long dispela taim God i soim yumi olsem em yet i stretpela olgeta. Na olgeta manmeri i bilip long Jisas, God i save kolim ol stretpela manmeri.”​—Ro. 3:​25, 26.b

¹⁷ Jehova i givim gutpela pe long Jisas, em i kirapim bek em na givim bikpela namba tru long em, winim namba em i bin gat paslain long em i kam long graun. Jisas em i wanpela spirit i gat bikpela namba na i no inap dai moa. (Hi. 1:3) Olsem Hetpris na King, Bikpela Jisas Krais i wok yet long helpim ol disaipel bilong em long litimapim stretpela pasin bilong God. Yumi amamas tru olsem Papa bilong yumi long heven, Jehova, em Man bilong mekim gut long ol man i mekim olsem na i bihainim pasin bilong Pikinini bilong em long stap gut long em!​—Ritim Song 34:3; Hibru 11:6.

18. Stadi i kamap bihain bai i stori long wanem samting?

¹⁸ Olgeta bilipman kirap long taim bilong Abel na i kam, ol i bin pas gut wantaim Jehova, long wanem, ol i kamapim bilip bilong ol na ol i bilip tru long Pikinini bilong promis bai kam. Jehova i bin save Pikinini bilong em bai stap gut long em, na dai bilong em bai karamapim “sin bilong olgeta manmeri bilong graun.” (Jo. 1:29) Dai bilong Jisas i helpim tu ol man i stap laip long nau. (Ro. 3:26) Orait, pe bilong baim bek man em Krais i givim, em bai bringim wanem ol blesing long yu? Long stadi i kamap bihain bai yumi stori long dispela.

[Ol Futnot]

Bai Yu Bekim Olsem Wanem?

• Olsem wanem Satan i sutim tok long stretpela pasin bilong God?

• Baptais bilong Jisas i makim wanem samting?

• Indai bilong Krais i inapim wanem samting?

[Piksa long pes 9]

Yu save baptais bilong Jisas i makim wanem samting?