LESEN 03
Yu Inap Trastim Ol Tok Bilong Baibel?
Baibel i mekim planti tok promis na givim planti edvais. Ating yu laik save long ol tok em Baibel i skulim ol man long en, tasol ating yu laik save tu yu inap trastim tok bilong en o nogat. Bai yu trastim ol tok promis na edvais bilong wanpela olpela buk? Yu inap bilip long tok Baibel i mekim long yumi inap stap amamas long nau na long bihain? Planti milion manmeri i mekim olsem. Yu tu i ken mekim olsem.
1. Yu ting Baibel em buk i gat ol stori tru o ol stori nating?
Baibel i tokaut olsem ol tok bilong en, ol i ‘raitim stret na ol i tok i tru.’ (Eklisiastis 12:10) Em i stori long ol samting em ol man i bin stap tru i mekim. (Ritim Luk 1:3; 3:1, 2.) Planti man bilong raitim histori na ol akioloji i tok ol bikpela det, ol man, ol ples, na ol bikpela bung em Baibel i stori long en i stret.
2. Maski Baibel em olpela buk tru, wai na yumi inap trastim ol tok bilong en?
Planti taim Baibel i stori long ol samting paslain long ol i kamap. Olsem, em i stori long sampela samting bilong saiens. Planti man i no bilip long ol stori Baibel i mekim long ol dispela topik. Tasol wok painimaut bilong saiens long nau i kamapim olsem ol tok Baibel i mekim i stret. Yumi “inap trastim ol tok bilong em, nau na i go inap oltaim bihain.”—Buk Song 111:8.
3. Wai na yumi ken trastim tok Baibel i mekim long ol samting bai kamap bihain?
Baibel i gat ol tok profeta we i tokaut “long ol samting i no kamap yet.” (Aisaia 46:10) Em i tok profet na kolim stret planti samting i bin kamap bipo paslain tru long ol i bin kamap. Na tu, em i stori long planti samting bai kamap long nau. Long dispela lesen, bai yumi skelim sampela tok profet bilong Baibel. Ol dispela samting i kamap stret olsem Baibel i kolim.
KISIM SAMPELA SAVE MOA
Skelim hau wok painimaut bilong saiens long nau i wanbel wantaim Baibel, na skelim sampela tok profet bilong Baibel em yumi kirap nogut long en.
4. Tok bilong saiens i wanbel wantaim tok bilong Baibel
Long bipo, planti man i bilip olsem graun i sindaun antap long wanpela samting. Pilaim VIDIO.
Lukim tok ol i raitim long Buk Jop inap olsem 3,500 yia i go pinis. Ritim Jop 26:7, na stori long dispela askim:
Yu gat wanem tingting long tok Baibel i mekim long graun i “hangamap nating”?
Long yia 1800 samting, ol man i luksave long raun bilong wara. Tasol lukim tok Baibel i mekim inap planti tausen yia i go pinis. Ritim Jop 36:27, 28, na stori long ol dispela askim:
Wanem tingting bilong yu long stori Baibel i mekim long raun bilong wara?
Olsem wanem? Ol dispela skripsa nau yu ritim i strongim yu long trastim ol tok bilong Baibel?
5. Baibel i tok profet long ol bikpela samting
Ritim Aisaia 44:27–45:2, na stori long dispela askim:
Inap 200 yia paslain long Babilon i bagarap, Baibel i bin tok profet long wanem samting bai painim em?
Histori i soim olsem King Sairus bilong Persia, na ami bilong em i pait na kisim taun Babilon long yia 539 B.C.E.b Ol i senisim ron bilong wara i banisim taun. Ol i no bin pait bilong kisim taun, nogat, ol i go insait long ol geit i op i stap na kisim taun. Long nau, winim 2,500 yia bihain, ol pipia tasol bilong taun Babilon i stap. Tingim tok profet Baibel i bin mekim.
Ritim Aisaia 13:19, 20, na stori long dispela askim:
Olsem wanem ol samting i painim Babilon i kamapim klia truim bilong dispela tok profet?
Ol pipia tasol bilong taun Babilon long Irak long nau
6. Baibel i tok profet long ol samting yumi lukim long nau
Baibel i stori long taim bilong yumi olsem “taim bilong las de.” (2 Timoti 3:1) Skelim tok profet Baibel i mekim long dispela taim bilong las de.
Ritim Matyu 24:6, 7, na stori long dispela askim:
Wanem sampela samting em Baibel i tok bai kamap long taim bilong las de?
Ritim 2 Timoti 3:1-5, na stori long ol dispela askim:
Baibel i tok planti man bai bihainim wanem kain pasin long taim bilong las de?
Wanem sampela bilong ol dispela pasin em yu lukim?
SAMPELA MAN I TOK: “Baibel em buk i gat ol tumbuna stori.”
Long tingting bilong yu, wanem nambawan evidens i kamapim klia olsem yumi inap trastim ol tok bilong Baibel?
OL BIKPELA POIN
Histori, tok bilong saiens, na ol tok profet, olgeta i kamapim klia olsem yu inap trastim tok bilong Baibel.
Riviu
Yu ting Baibel em buk i gat ol stori tru o ol stori nating?
Wanem sampela topik em tok bilong saiens i wanbel wantaim tok bilong Baibel?
Yu ting Baibel i tok profet long ol samting bai kamap bihain? Wai na yu ting olsem? O wai na yu ting nogat?
MEKIM WOK PAINIMAUT
Yu ting Baibel i gat sampela popaia?
“Yu Ting Tok Bilong Saiens i Wanbel Wantaim Baibel?” (Atikol long websait)
Wanem sampela samting i kamap tru “long taim bilong las de”?
“6 Tok Profet Bilong Baibel Yu Lukim Truim Bilong En” (Wastaua, Me 1, 2011)
Kisim save long olsem wanem ol tok profet bilong Baibel long Gavman Grik i kamap tru.
Painimaut hau ol tok profet bilong Baibel i senisim tingting bilong wanpela man long ol tok bilong Baibel.
a Ol tok profet em ol tok i kam long God i stori long ol bikpela samting bai kamap bihain.
b B.C.E. i makim “Paslain Long Taim Bilong Krais,” na C.E. i makim “Long Taim Bilong Krais.”