Harim Tok Bilong Jehova

1-2. (a) Olsem wanem Jehova i bin toktok wantaim ol manmeri? (b) Long dispela stadi, yumi bai stori long wanem samting?

JEHOVA i save amamas tru long toktok wantaim yumi. Long bipo, em i yusim ol profet, ol ensel, na Krais Jisas long autim ol tingting bilong em. (Amo. 3:7; Gal. 3:19; Rev. 1:1) Long nau, God i toktok wantaim yumi long rot bilong Baibel. Taim yumi ritim Baibel, yumi inap kisim save long ol tingting na pasin bilong em.

² Taim Jisas i stap long graun, 3-pela taim Jehova i toktok wantaim em. Yumi bai stori long ol tok Jehova i mekim. Yumi bai stori tu long skul yumi inap kisim long ol dispela tok, na olsem wanem dispela inap helpim yumi.

 3. (a) Long Mak 1:9-11, Jehova i tok wanem taim Jisas i kisim baptais? (b) Ol tok bilong God i kamapim klia wanem 3-pela samting?

³ Mak 1:9-11 i stori long namba 1 taim Jehova i toktok wantaim Jisas taim em i stap long graun. (Ritim.) God i tok: “Yu Pikinini bilong mi, mi laikim yu tumas, mi amamas long yu.” Ating Jisas i amamas tru long harim olsem Papa i laikim em na dispela i strongim tru Jisas! Ol tok bilong Jehova i kamapim klia 3-pela samting ol man i mas save long en long Jisas. Namba 1: Jisas em Pikinini bilong God. Namba 2: Jehova i laikim Pikinini bilong em. Namba 3: Jehova i amamas long Pikinini bilong em. Yumi bai skelim dispela 3-pela samting.

 4. Jisas em i pikinini spirit bilong God, tasol taim em i kisim baptais, em i kamap Pikinini bilong God long wanem narapela rot?

⁴ “Yu Pikinini bilong mi.” Taim Jehova i mekim dispela tok, em i soim klia olsem Jisas i kisim wanpela bikpela wok. Taim Jisas i stap long heven, em i pikinini spirit bilong God. Tasol taim Jisas i kisim baptais, God i makim em long holi spirit. Long dispela taim, Jisas i kamap Pikinini bilong God long sait bilong bilip. God i makim em long kamap King na Hetpris taim em i go bek long heven. (Luk 1:31-33; Hib. 1:8, 9; 2:17) Olsem na taim Jisas i kisim baptais, i stret Papa i tok: “Yu Pikinini bilong mi.”—Luk 3:22.

 5. Olsem wanem yumi inap bihainim eksampel bilong Jehova long soim pasin laikim na tok amamas long ol narapela?

⁵ “Mi laikim yu tumas.” Jehova i stap nambawan gutpela eksampel long soim pasin laikim na tok amamas long ol narapela, olsem na yumi inap bihainim pasin bilong em. (Jon 5:20) Yumi save kisim nupela strong taim wanpela yumi laikim tumas i soim pasin laikim na tok amamas long gutpela wok yumi mekim. Olsem tasol, ol bratasista long kongrigesen na ol wanfamili bai kisim nupela strong taim yumi soim pasin laikim na strongim ol. Taim yumi tok amamas long ol narapela, yumi strongim bilip bilong ol na ol bai tingting strong long stap gut long Jehova na mekim wok bilong em. Papamama i mas strongim pikinini. Taim papamama i tok amamas long pikinini na laikim em, ol i helpim pikinini long kamap strong long bilip na mekim planti gutpela wok.

 6. Bilong wanem yumi inap bilip long Jisas Krais?

⁶ “Mi amamas long yu.” Jehova i bilip olsem Jisas bai stap gut long em na mekim laik bilong Papa. Jehova i bilip long Pikinini bilong em, olsem na yumi tu i ken bilip tru olsem Jisas bai truim olgeta tok promis bilong Jehova. (2 Kor. 1:20) Taim yumi skelim eksampel bilong Jisas, yumi bai tingting strong moa long kisim save long ol pasin bilong em na bihainim eksampel bilong em. Jehova i bilip tru olsem ol manmeri bilong em bai wok yet long kisim save na bihainim lek mak bilong Pikinini bilong em.—1 Pita 2:21.

 7. (a) Olsem Matyu 17:1-5 i kamapim, Jisas na ol aposel i stap we taim Jehova i toktok? (b) God i tok wanem?

⁷ Ritim Matyu 17:1-5. Namba 2 taim Jehova i toktok wantaim Jisas em long taim Jisas i “senis na kamap narakain.” Jisas i kisim Pita, Jems, na Jon na em i bringim ol i go long wanpela maunten i antap moa. Taim ol i stap antap long maunten, ol i lukim narakain visen. Pes bilong Jisas i lait olsem san na klos bilong em i kamap waitpela olsem lait. Tupela man i luk olsem Moses na Elaija i kamap long ai bilong ol na toktok wantaim Jisas long dai na kirap bek bilong em. Maski “ai bilong [3-pela aposel] i hevi tru na ol i slip,” ol i no aislip moa taim ol i lukim dispela narakain visen. (Luk 9:29-32) Bihain, wanpela klaut i karamapim ol na klaut i lait, na wanpela nek i kamap long klaut na i toktok—ol i harim nek bilong God! Jehova i tokaut klia olsem em i amamas na laikim tru Pikinini bilong em, wankain olsem em i mekim long taim Jisas i kisim baptais. Em i tok: “Dispela em i Pikinini bilong mi, mi laikim em tumas na bel bilong mi i amamas long em.” Jehova i tok moa olsem: “Harim tok bilong em.”

 8. Taim Jisas na ol aposel i lukim visen, dispela i mekim wanem long ol?

⁸ Dispela visen i soim klia olsem Jisas bai kisim glori na bikpela strong taim em i kamap King long Kingdom Bilong God. Dispela i strongim bel bilong Jisas long sanap strong na karim bikpela pen na hevi paslain long em i dai. Na tu, dispela visen i strongim bilip bilong ol disaipel na redim ol long sanap strong na winim ol traim na givim bel tru long mekim bikpela wok em Jisas i tokim ol long mekim. Inap 30 yia bihain, aposel Pita i stori gen long dispela visen, na dispela i soim olsem em i tingim yet dispela samting.—2 Pita 1:16-18.

 9. Jisas i givim wanem skultok long ol disaipel?

⁹ “Harim tok bilong em.” Jehova i kamapim klia olsem em i laik bai yumi harim tok bilong Jisas na bihainim. Jisas i tok wanem taim em i stap long graun? Em i stori long planti samting we inap helpim yumi long nau! Em i skulim ol disaipel long olsem wanem ol inap autim gutnius, na inap planti taim em i tokim ol long was i stap. (Mat. 24:42; 28:19, 20) Em i tok ol i mas taitim bun tru na ol i no ken givap. (Luk 13:24) Jisas i strongim tok olsem ol disaipel i mas laikim narapela narapela, stap wanbel, na bihainim ol tok bilong em. (Jon 15:10, 12, 13) Ol dispela skultok i bin helpim tru ol disaipel! Wankain skultok inap helpim yumi tu long nau.

10-11. Olsem wanem yumi inap soim olsem yumi harim tok bilong Jisas?

¹⁰ Jisas i tok: “Olgeta man i stap long sait bilong tok i tru, ol i save harim maus bilong mi.” (Jon 18:37) Yumi soim olsem yumi harim tok bilong em taim yumi “wok yet long karim hevi narapela i putim long [yumi] na amamas long fogivim narapela.” (Kol. 3:13; Luk 17:3, 4) Na tu, yumi soim olsem yumi harim tok bilong em taim yumi givim bel tru long autim gutnius long “gutpela taim na long taim nogut.”—2 Tim. 4:2.

¹¹ Jisas i tok: “Ol sipsip bilong mi i save putim yau long nek bilong mi.” (Jon 10:27) Ol disaipel bilong Krais i harim tok bilong em na ol i bihainim. Ol i no larim “ol wari bilong laip” i pulim nabaut tingting bilong ol. (Luk 21:34) Ol i holim tingting olsem em i bikpela samting tru long bihainim tok bilong Jisas maski bikpela hevi i painim ol. Planti bratasista i stap rabis, disasta i kamap long ol, na ol i kisim hevi long han bilong ol birua. Maski ol dispela bikpela hevi i kamap long ol, ol i sanap strong na stap gut yet long Jehova. Ol i tingim tok bilong Jisas olsem: “Man i kisim ol lo bilong mi na i bihainim, dispela man i laikim mi tru. Na man i laikim mi, Papa bilong mi bai laikim em.”—Jon 14:21.

12. Wanem narapela rot bilong soim olsem yumi harim tok bilong Jisas?

¹² Narapela rot yumi soim olsem yumi harim tok bilong Jisas em olsem: Yumi wok gut wantaim ol lain em God i makim bilong i go pas long yumi. (Hib. 13:7, 17) Insait long ol yia i go pinis, oganaisesen bilong God i kamapim planti senis. Yumi gat ol nupela pablikesen na vidio bilong yusim long wok autim tok, na yumi bihainim nupela pasin bilong mekim miting namel long wik, na nupela wei bilong bildim, stretim, na lukautim Haus Kingdom. Yumi amamas long ol dispela senis! Yumi ken bilip tru olsem Jehova bai blesim hatwok bilong yumi long bihainim daireksen i kam long oganaisesen.

13. Taim yumi bihainim tok bilong Jisas, hau bai dispela i helpim yumi?

¹³ Taim yumi bihainim olgeta tok bilong Jisas, dispela bai helpim tru yumi. Jisas i tokim ol disaipel olsem ol skultok bilong em bai givim nupela strong long ol. Em i tok: “Yupela bai kisim nupela strong. Hap plang bilong mi i gutpela na samting mi askim yupela long karim i no hevi.” (Mat. 11:28-30) Ol 4-pela pas bilong Ol Gutnius i stori long laip na wok autim tok bilong Jisas, na dispela bai givim yumi nupela strong long sait bilong bilip na helpim yumi long kisim savetingting. (Sng. 19:7; 23:3) Jisas i tok: “Ol man i harim tok bilong God na bihainim, ol i ken amamas!”—Luk 11:28.

14-15. (a) Olsem Jon 12:27, 28 i kamapim, wanem namba 3 taim Jehova i stap long heven na toktok? (b) Wai na yumi inap ting olsem tok bilong Jehova i bin mekim gut bel bilong Jisas na strongim em?

¹⁴ Ritim Jon 12:27, 28. Gutnius Bilong Jon i stori long namba 3 taim Jehova i stap long heven na toktok. Sampela de paslain long Jisas i dai, em i stap long Jerusalem long selebretim laspela Pasova bilong em. Em i tok: “Bel bilong mi i hevi na mi tingting planti.” Em i beten na tok: “Papa, litimapim nem bilong yu.” Papa i stap long heven na em i tok: “Mi litimapim pinis nem bilong mi na bai mi litimapim gen.”

¹⁵ Jisas i tingting planti bikos em i gat bikpela wok long stap gut long Jehova. Jisas i save olsem em bai karim bikpela pen na hevi na ol birua bai mekim hatpela pasin tru long em na kilim em i dai. (Mat. 26:38) Tasol nambawan bikpela laik bilong Jisas em long litimapim nem bilong Papa. Ol birua i sutim tok olsem Jisas i tok bilas long God, olsem na Jisas i tingting planti olsem dai bilong em bai bagarapim gutnem bilong God. Tok bilong Jehova i bin strongim tru Jisas! Olsem na em inap bilip tru olsem bikpela glori moa bai go long nem bilong Jehova. Tok bilong Papa i mekim gut bel bilong em na strongim em long karim hevi bai kamap. Ating Jisas tasol i save long mining bilong tok em Jehova i mekim. Maski i olsem, Jehova i kirapim ol aposel long raitim ol dispela tok bambai yumi inap save long en.—Jon 12:29, 30.

16. Wanem samting i mekim na yumi inap tingting planti long gutnem bilong God?

¹⁶ Olsem Jisas, yumi no laik mekim wanpela samting we inap bagarapim gutnem bilong Jehova. Ating ol man i no mekim fea pasin long yumi. O yumi tingting planti bikos ol birua i kamapim ol giaman stori long yumi. Ating yumi tingting planti olsem ol dispela stori bai bagarapim gutnem bilong Jehova na oganaisesen bilong em. Long kain taim olsem, tok bilong Jehova long Jon 12:27, 28 inap mekim gut bel bilong yumi. I no gat wok long yumi tingting planti. Yumi ken bilip tru olsem “bel isi bilong God i winim tru tingting bilong man, em bai lukautim bel bilong [yumi] na tingting bilong [yumi] long rot bilong Krais Jisas.” (Fili. 4:6, 7) Oltaim Jehova bai litimapim nem bilong em. Kingdom bilong em bai pinisim olgeta pen na hevi em Satan i kamapim long ol wokman bilong em.—Sng. 94:22, 23; Ais. 65:17.

17. Olsem Aisaia 30:21 i tok, olsem wanem Jehova i toktok long yumi long nau?

¹⁷ Long nau tu, Jehova i save toktok long yumi. (Ritim Aisaia 30:21.) Yumi no inap harim nek bilong God i kam long heven. Tasol long rot bilong Baibel, em i givim ol tok bilong skulim yumi. Na tu, holi spirit bilong Jehova i kirapim “gutpela bosboi” long givim kaikai bilong strongim bilip bilong ol wokman bilong em. (Luk 12:42) Yumi gat planti pablikesen, vidio, na odio rekoding!

18. Olsem wanem ol tok Jehova i mekim i strongim bilip bilong yu na helpim yu long sanap strong?

¹⁸ Yumi mas tingim ol tok Jehova i mekim taim Jisas i stap long graun! Tok bilong God long Baibel i ken strongim yumi olsem Jehova i kontrolim olgeta samting, na em bai pinisim olgeta pen na hevi em Satan na lain bilong em i kamapim. Yumi mas tingting strong long harim gut tok bilong Jehova. Sapos yumi mekim olsem, yumi bai winim olgeta kain hevi i painim yumi long nau na ol hevi bai kamap bihain. Baibel i tok: “Yupela i mas i gat pasin bilong sanap strong bai yupela i ken kisim ol samting God i promis long en. Tasol pastaim yupela i mas mekim laik bilong God.”​—Hib. 10:36.