Askim
Taim Jisas i tokim lain bilong em, “yupela i mas givim dinau long ol man, yupela i no ting ol bai inap bekim dinau gen long yupela,” em i laik tok ol i no ken tokim man long bekim dispela dinau, o olsem wanem?
Bilong kliagut long dispela tok bilong Jisas long Luk 6:35, yumi mas skelim Lo Bilong Moses. Long dispela Lo God i tokim ol Israel, taim ol i givim dinau long wanpela Israel i bin kamap rabis na em i mas kisim sampela helpim, ol i no ken singaut long winmani taim em i bekim dinau. (Kisim Bek 22:25; Wok Pris 25:35-37; Matyu 5:42) Ol dispela kain dinau i no bilong wokim bisnis long en. Em i bilong helpim ol man i stap rabis o sampela hevi i kamap na ol i sot. Em i no gutpela pasin long kisim winmani taim wantok i gat hevi bilong mani. Tasol man i givim dinau, i stret em i ken kisim bek mani stret em i bin givim olsem dinau, sampela taim man i givim dinau i singaut long wanpela samting (olsem promis o mak bilong bekim dinau).—Lo 24:17.
Jisas i wanbel long tok bilong Lo, tasol em i kamapim sampela samting moa dispela tok i makim, em i tok man i givim dinau em i no ken ting long ol i mas “bekim dinau gen.” Olsem ol Israel, sampela taim ol hevi bilong mani i painim ol Kristen, o narapela samting i mekim na ol i kamap rabis, o sindaun i bagarap olgeta. Sapos kain samting olsem i painim wanpela brata Kristen na em i laik bai wanpela i helpim em long mani, em i gutpela pasin long yumi helpim em. Tru tumas, pasin laikim bai kirapim Kristen long helpim brata i sot tru long mani na i no asua bilong em yet na em i kamap rabis. (Sindaun 3:27) Ating yumi inap givim mani olsem presen long wanpela brata i sot tru, maski dispela mani i aninit long mani yumi bai givim olsem dinau.—Song 37:21.
Long taim bilong ol aposel, aposel Pol na Barnabas i kisim wok bilong kisim mani ol Kristen long Esia Maina i bin givim na karim i go long ol brata long Judia, em bikpela hangre i painim ol. (Aposel 11:28-30) Long nau tu, taim wanpela bikpela bagarap i kamap, planti taim ol Kristen i save salim kaikai na mani samting olsem presen long ol brata i sot. Taim ol i mekim olsem, dispela i olsem wanpela rot bilong autim tok long ol man. (Matyu 5:16) Tru, yumi mas skelim tingting na sindaun bilong dispela man i laik kisim helpim. I gat wanem as na em i sot long mani samting? Yumi ken tingim tok bilong Pol: “Sapos man i no laik mekim wok, orait em i no ken kisim kaikai.”—2 Tesalonaika 3:10.
Sapos brata i singaut long dinau em i no rabis tru—em i laik kisim liklik helpim na bai em i ken stretim hevi bilong mani i bin painim em—ating yumi laik givim dinau long em na yumi no kisim winmani long en. Long kain taim olsem, sapos Kristen i givim dinau na em i laik bai brata i bekim dispela dinau olgeta, dispela i no pait wantaim tok bilong Jisas long Luk 6:35. Ol tok tupela i pasim wantaim, ol i mas raitim long pepa, na man i bin kisim dinau em i mas wok strong long bekim, olsem tok tupela i bin pasim pinis. Pasin laikim bilong Kristen i mas kirapim brata i bin kisim dinau long wok strong long bekim, wankain olsem dispela pasin i bin kirapim Kristen long givim dinau.
Man i tingting long givim dinau (o givim mani olsem presen) em i mas skelim i stap bilong famili bilong em yet. Olsem: Nogut dispela i mekim na em i no inap lukautim famili, em Baibel i tok em i nambawan wok em i mas mekim. (2 Korin 8:12; 1 Timoti 5:8) Tasol ol Kristen i save painim rot bilong kamapim pasin laikim long narapela narapela, na ol i kamapim dispela pasin laikim long ol rot i stret wantaim ol stiatok bilong Baibel.—Jems 1:27; 1 Jon 3:18; 4:7-11.