Taim Kros i Kamap Namel Long Tupela Marit

SAPOS man na meri marit i gat stretpela tingting, ol i no amamas taim kros i stap long marit bilong ol, tasol em wanpela hevi i painim planti marit. Wanpela marit i mekim sampela tok i skrapim bel bilong poroman. Ol i tok strong, belhat i kamap, dispela i kirapim tok pait na narapela i tromoi hatpela tok long narapela. Bihain ol i pasim maus i stap, tupela wantaim i no laik toktok wantaim. Orait, isi isi belhat i go daun na tupela i tok sori. Bel isi i stap gen​—⁠i go inap long taim kros i kamap gen.

I gat planti tok pilai na piksa long TV i stori long kros namel long tupela marit, tasol dispela hevi i no bilong mekim man i lap. Tru tumas, wanpela savetok bilong Baibel i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.” (Sindaun 12:18) Yes, hatpela tok inap bagarapim bel bilong narapela inap longpela taim bihain long kros i pinis. Na tu, pasin bilong tok pait inap kirapim pait tru tru.​—⁠Kisim Bek 21:⁠18.

Yumi ol sinman, olsem na sampela taim marit bai i gat hevi. (Stat 3:16; 1 Korin 7:28) Tasol sapos tupela marit i tok pait planti taim na kros bikpela, ol i no ken ting dispela i olsem hevi tasol bilong marit. Ol saveman i kisim save olsem sapos pasin bilong tok pait i stap insait long marit, em isi moa long dispela kain marit i bruk long bihain. Olsem na yu na poroman bilong yu i mas lain long stretim ol hevi bilong yutupela long gutpela pasin.

Skelim As na Kros i Kamap

Sapos pasin bilong tok pait i stap long marit bilong yu, orait skelim olsem wanem kros bilong yupela i save kamap. Olsem: Wanem samting i kamap taim yu na poroman bilong yu i no wanbel long wanpela samting? Wantu pasin bilong sutim tok na bagarapim bel bilong poroman i kamap namel long yutupela? Sapos olsem, orait yupela i ken mekim wanem?

Pastaim, skelim gut wanem samting yu yet i mekim na hevi i kamap. Yu save belhat kwik? Yu gat pasin bilong tok pait? Poroman bilong yu bai tok yu gat dispela kain pasin o nogat? Dispela laspela askim em i bikpela samting long tingim, long wanem, ating yu na poroman bilong yu i no gat wankain tingting long wanem samting i makim olsem man o meri i gat pasin bilong tok pait.

Olsem: Ating poroman bilong yu i no man o meri bilong toktok, tasol yu gat pasin bilong tokaut long olgeta samting bilong yu na yu mekim toktok olsem bel bilong yu i skrap tru long mekim. Ating yu bai tok: “Taim mi go bikpela, mipela olgeta long famili i toktok wantaim olsem. Em i no pasin bilong tok pait!” Ating yu yet i no ting olsem. Long tingting bilong yu i olsem yu gat pasin bilong tokaut stret long ol samting, tasol long tingting bilong poroman bilong yu i olsem yu mekim tok i bagarapim bel na kirapim kros. Taim yu na poroman bilong yu i luksave olsem pasin bilong yupela long toktok wantaim i narapela narapela, dispela i ken daunim hevi.

Na tu, i gutpela long save olsem tok pait i no makim tasol pasin bilong bikmaus. Pol i tokim ol Kristen: “Yupela i mas rausim olgeta pasin bilong . . . bikmaus na tok bilas.” (Efesus 4:31) “Bikmaus” i makim pasin bilong apim nek, tasol “tok bilas” i makim tok yu mekim. So maski yu no apim nek, tok bilong yu inap kirapim kros sapos em i skrapim bel bilong poroman o daunim em.

Orait, nau tingim ol samting yu save mekim taim yu na poroman bilong yu i no wanbel. Yu gat pasin bilong tok pait? Olsem yumi skelim pinis, tingting bilong poroman bilong yu i olsem bekim tru bilong dispela askim. No ken hariap na ting poroman bilong yu i gat pasin bilong bel hevi kwik; traim long lukim klia pasin bilong yu olsem em i save lukim, na stretim ol pasin i kranki. Pol i tok: “Yumi no ken ting long helpim yumi yet. Nogat. Yumi mas ting long helpim ol arapela.”​—⁠1 Korin 10:⁠24.

“Lukaut Gut Bai Yupela i Harim Gut Tok”

Narapela samting bilong helpim tupela marit taim ol i no wanbel i stap long tok Jisas i mekim: “Lukaut gut bai yupela i harim gut tok.” (Luk 8:18) Tru Jisas i no toktok long pasin bilong toktok gut wantaim poroman marit. Tasol stiatok hia i stret long ol marit. Olsem wanem long pasin bilong yu long putim gut yau taim poroman bilong yu i toktok? Nogut yu no save putim yau liklik long em. O wantu yu save katim tok bilong em na kamapim nating rot bilong stretim hevi taim yu yet i no kliagut long olgeta samting bilong dispela hevi? Baibel i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.” (Sindaun 18:13) Taim yu na poroman i no wanbel, yutupela i mas toktok gut wantaim na narapela i mas putim yau long narapela.

No ken mekim olsem tingting bilong poroman bilong yu i no bikpela samting, kamapim olsem yu “sori” long poroman. (1 Pita 3:⁠8) Tok Grik ol i tanim olsem sori i makim pasin bilong pilim pen na hevi bilong narapela. Sapos poroman bilong yu i bel hevi long wanpela samting, yu mas pilim bel hevi bilong em. Pilim tru tingting bilong em.

Gutpela man Aisak i bin mekim olsem. Baibel i tok meri bilong em, Rebeka, i wari long pikinini man bilong em, Jekop. Rebeka i tokim Aisak: “Mi les pinis long ol dispela meri bilong lain Hit. Sapos Jekop tu i maritim wanpela meri bilong lain Hit olsem dispela tupela meri i stap hia, orait mobeta mi dai.”​—⁠Stat 27:⁠46.

Pasin bilong tingting planti i kirapim Rebeka long mekim sampela tok i no makim tingting tru bilong em. Yu ting tru tru em i les long laip bilong em? Bai em i amamas long dai sapos pikinini man i maritim wanpela meri bilong lain Hit? Ating nogat. Tasol Aisak i no mekim olsem tingting bilong Rebeka em i samting nating. Nogat. Aisak i luksave olsem i stret Rebeka i tingting planti, na em i stretim ol samting. (Stat 28:⁠1) Mekim wankain samting taim poroman bilong yu i tingting planti long wanpela samting. No ken mekim olsem wari bilong em i samting nating, putim gut yau long poroman bilong yu, pilim tru tingting bilong em, na mekim pasin i soim olsem yu sori long em.

Putim Yau na Bihainim Gutpela Tingting

Wanpela savetok bilong Baibel i tok: “Man i gat gutpela tingting, em i no inap kros kwik.” (Sindaun 19:11) Taim kros i kamap pinis, em isi tru long bekim bek olgeta hatpela tok poroman bilong yu i mekim. Tasol planti taim dispela i save mekim kros i go bikpela moa. Olsem na taim yu putim yau long ol tok poroman i mekim, no ken tingting tasol long tok em i kamapim, wok strong long kliagut long tingting i stap long bel bilong em. Gutpela tingting olsem bai helpim yu long sakim ol samting inap skrapim bel bilong yu na bai yu tingting tasol long as tru bilong hevi.

Olsem: Sapos meri bilong yu i tok: “Yu no save lusim haptaim bilong stap wantaim mi!” Ating yu kros liklik na tok i no olsem, na yu tokaut long samting tru i bin kamap. Ating yu tok: “Mi bin stap wantaim yu inap wanpela de olgeta long mun i go pinis.” Tasol sapos yu putim gut yau, bai yu luksave olsem tru tru meri i no askim yu long stap wantaim em inap sampela aua o minit moa. Em i askim yu long strongim bel bilong em, em i pilim olsem yu no tingim em na yu no laikim em tru.

Sapos yu wanpela meri marit na man bilong yu i tingting planti long yu bin baim wanpela samting. Em i kirap nogut na tok: “Olsem wanem yu inap tromoi bikpela mani olsem?” Ating wantu yu tingting long kamapim hamas mani famili i gat o long skelim samting yu baim wantaim samting em yet i bin baim. Tasol gutpela tingting bai helpim yu long luksave olsem tru tru man bilong yu i no wari long mani yu lusim. Nogat. Ating em i bel hevi, long wanem, em i no insait long disisen bilong baim bikpela samting olsem.

Tru, ol marit i no wankain long hamas taim ol i makim bilong poroman wantaim o olsem wanem ol i makim ol samting ol bai baim. Bikpela poin i olsem: Taim yu na poroman bilong yu i no wanbel, gutpela tingting bai daunim belhat na helpim yu long save long wanem samting tru i mekim na yupela i no wanbel. No ken kirap kwik long mekim samting, bihainim tok bilong man bilong raitim Baibel, em Jems, na “putim yau kwik long harim tok, tasol yupela i no ken hariap long mekim toktok, na yupela i no ken kros kwik.”​—⁠Jems 1:⁠19.

Taim yu mekim sampela tok, no ken lusim tingting olsem pasin bilong yu long toktok wantaim poroman em i bikpela samting. Baibel i tok: “Tok bilong man i gat gutpela tingting i save helpim ol man olsem gutpela marasin.” (Sindaun 12:18) Taim yu na poroman bilong yu i toktok long samting yupela i no wanbel long en, tok bilong yu i bagarapim bel bilong em o mekim em i stap bel isi? Tok yu mekim i pasim rot long stretim hevi, o i opim rot bilong kamap wanbel gen? Olsem yumi skelim pinis, pasin bilong kirap kwik long bekim tok o tok strong i mekim kros i kamap.​—⁠Sindaun 29:⁠22.

Sapos yupela i no wanbel na kirap tok pait i go i kam, orait wok strong long no ken larim toktok i go nabaut nabaut. Putim tingting i go long as bilong kros, i no ken go long daunim poroman. Tingim wanem samting i stret long mekim, no ken strong long tingim husat i stret. Was gut, nogut tok bilong yu i mekim kros i go bikpela moa. Baibel i tok: “Tasol sapos yu rabisim narapela man long tok bilong yu, bai yu mekim em i belhat nogut tru long yu.” (Sindaun 15:⁠1) Tru tumas, tok yu mekim na pasin bilong yu long kamapim, em inap mekim poroman i amamas long helpim yu o mekim em i les na sakim yu.

Strong Long Stretim, i No Long Winim

Taim kros i kamap, bikpela samting em long stretim hevi na i no long winim toktok. Olsem wanem bai yu mekim? Nambawan rot em long kisim save long tok bilong Baibel na bihainim, na ol man marit i mas go pas long mekim olsem. No ken autim kwik tingting bilong yu yet long hevi yupela i laik stretim, pastaim traim tingim dispela hevi olsem Jehova i save tingim. Beten long em, na painim bel isi God i save givim, dispela bai mekim bel na tingting bilong yu i stap gut. (Efesus 6:18; Filipai 4:​6, 7) Wok strong long tingim ol samting bilong helpim poroman, i no long helpim yu tasol.​—⁠Filipai 2:⁠4.

Planti taim hevi i go nogut moa sapos yu larim bel hevi na kain kain filings nabaut i bosim tingting bilong yu na ol samting yu mekim. Gutpela moa long larim tok bilong Baibel i stretim yu, dispela i kamapim bel isi, pasin wanbel, na pasin Jehova i amamas long en. (2 Korin 13:11) Olsem na larim “gutpela tingting na save i kam long God” i stiaim yu, kamapim ol pasin God i laikim, na kisim gutpela helpim olsem man bilong kamapim pasin wanbel.​—⁠Jems 3:​17, 18.

Tru tru olgeta manmeri i mas lain long stretim ol hevi long pasin isi, maski ol i mas lusim sampela laik bilong ol yet bilong mekim olsem. (1 Korin 6:⁠7) Bihainim tok bilong Pol na lusim ‘pasin bilong kros na belhat na bel nogut, na pasin bilong tok nogut long ol arapela na mekim toktok i doti. Rausim olgeta pasin bilong olpela bel, na kamap nupela man.’​—⁠Kolosi 3:​8-10.

Tasol sampela taim bai yu mekim sampela tok na bihain yu bel hevi long en. (Jems 3:⁠8) Taim dispela i kamap, tok sori long poroman bilong yu. Wok strong i go. Isi isi yu na poroman bilong yu bai lukim wok bilong yupela long stretim kros i kamap gutpela moa.

[Blok/Piksa long pes 22]

Tripela Rot Bilong Daunim Kros

• Putim yau long poroman bilong yu.—Sindaun 10:⁠19

• Pilim tru tingting bilong narapela.—Filipai 2:4

• Kamapim ol tok long gutpela pasin.—1 Korin 13:​4-7

[Blok/Piksa long pes 23]

Samting Yu Ken Mekim Long Nau

Givim ol askim hia long poroman bilong yu, na putim yau long bekim bilong em na no ken katim tok. Bihain poroman i ken mekim ol dispela askim long yu tu.

• Mi gat pasin bilong tok pait?

• Mi save putim gut yau taim yu kamapim tingting bilong yu, o mi save kirap kwik na katim tok bilong yu?

• Tok bilong mi i kirapim yu long ting mi no tingim yu o mi kros?

• Yumi ken mekim wanem bilong helpim pasin bilong yumi long toktok wantaim i kamap gutpela moa​—⁠moa yet taim yumi no wanbel long wanpela samting?

[Piksa long pes 21]

Yu save putim gut yau?

[Piksa long pes 22]

“Mi pilim olsem yu no tingim mi na yu no laikim mi”

[Piksa long pes 22]

“Yu no save lusim haptaim bilong stap wantaim mi!”

[Piksa long pes 22]

“Mi bin stap wantaim yu inap wanpela de olgeta long mun i go pinis!”