Asumsio−God i As Bilong Dispela Bilip?

DISPELA bilip i olsem: Maria, em mama bilong Jisas, em i go long heven wantaim bodi bilong em. Planti milion Katolik i bilip olsem. Saveman George William Douglas i tok: “Ol i ting God i kisim Virgo Maria i go long heven, na long olgeta yia ol i wokim bikpela de bilong lotu ol i kolim pestode, o pesto, bilong litimapim dispela bilip em i namba wan bikpela samting bilong lotu Katolik.”

Tasol ol tisa bilong lotu Katolik i tokaut olsem Baibel i no tok God i bin kisim Maria i go antap long heven wantaim bodi bilong em. Inap planti handet yia ol i bin tok pait long dispela bilip, em i tru o nogat, na planti Katolik i no save long dispela samting. Olsem wanem na Misin Katolik i bin kirap na kisim dispela bilip?a I gat as na yumi ken ting God yet i bin tokim ol? Bekim bilong ol dispela askim i no stap hait, nogat. Sapos yumi laik bihainim tok i tru yumi mas save long dispela samting, nogut yumi bihainim bilip giaman.

As Bilong Bilip

Sampela handet yia bihain long dai bilong Jisas ol Kristen i no ting God i bin kisim Maria i go antap long heven olsem. Jean Galot em i wanpela tisa bilong lotu Katolik, na em i tok long wanpela nius (L’Osservatore Romano) olsem: “Lain Kristen bilong bipo i no bin tingim dai bilong Maria.”

Bihain, taim misin i kisim bilip bilong God Triwan, nau ol i kirap long litimapim nem bilong Maria. Ol i tok, Maria i olsem “Mama Bilong God,” na “em i no gat sin,” na em i “Helpim bilong ol man,” na em i “Kwin Bilong Heven.” Galot i tok, “ol i no amamas long ting Maria i dai pinis; ol i ting em i gutpela tru na em i no gat sin; olsem na ol i kirap long givim biknem long em na long ting em i stap long heven; olsem na as bilong dispela bilip em i kirap long tingting bilong ol man tasol.”

Sampela handet yia bihain long taim bilong Krais ol i kirap long raitim ol stori nating na ol i tok ol i ting God i bin kisim Maria i go long heven. Nem bilong wanpela stori i olsem: “Mama Holi Bilong God Em i Bin Slip.” Ol i tok, aposel Jon i bin raitim. Tasol ol i bin raitim 400 yia bihain long taim Jon i dai pinis. Na stori i tok, ol aposel bilong Krais i bin bung long Maria na ol i lukim em i mekim orait ol aipas na yaupas na lek nogut, na nau ol i harim Bikpela i tokim Maria, ‘Nau yu wantaim gutpela skin bilong yu bai go long paradais, na tewel holi bilong yu bai stap long gutpela ples bilong Papa, na dispela tewel bai lait moa, na i stap bel isi wantaim ol ensel holi, na em bai stap olsem tasol.’

Tasol sampela bilong misin i ting olsem wanem long dispela stori? Wanpela saveman bilong dispela samting, em René Laurentin, em i tok: “Sampela man i no gat tingting ol i bilip, long wanem, ol i amamas nating long gutpela stori tasol. Tasol ol narapela i sakim, long wanem, ol tok bilong dispela stori i no wankain na i pait wantaim, na i no gat as bilong en.” Olsem na taim ol i kirapim dispela bilip, pastaim ol man i no bilip tumas long en. Na ol i tok ol i bin painim sampela bun bilong Maria na ol i lotu long en, tasol ol man i laik save, sapos Maria i bin go long heven wantaim bodi bilong em, olsem wanem ol inap painim bun bilong em long graun?

Bihain long yia 1200 Tomas Akwainas, em wanpela tisa bilong misin, em i tok, i no inap yumi ken bilip long Asumsio, olsem Maria i bin go long heven wantaim bodi bilong em, long wanem, “dispela tok i no stap long Baibel.” Planti bikman moa bilong Misin Katolik i bin ting olsem tu long dispela taim. Tasol sampela man i bilip yet long en, na ol i wokim ol piksa bilong Maria i go long heven, em ol man olsem Rafeil, na Koregio, na Tisan, na Karasi, na Rubens.

Ol i tok pait long Asumsio inap planti yia, na bihain long yia 1900 Giuseppe Filograssi, em wanpela kain pris bilong Misin Katolik, em i tok, ol saveman Katolik i raitim ol kain tok i no orait long dispela bilip long Asumsio. Na sampela pop tu, olsem Leo Namba 13, na Pius Namba 10, na Benedict Namba 15, “ol i no laik toktok long dispela bilip.” Tasol long Novemba 1, 1950, Pop Pius Namba 12 i tok: “God i bin tokim mipela, em i kisim mama bilong em, em Virgo Maria, i go long heven long taim em i pinis long graun, na em i go wantaim skin na tewel bilong em.”​—⁠Munificentissimus Deus.

Dispela tok bilong pop i strongim dispela bilip long Asumsio, na nau i kamap olsem wanpela bilip tru ol Katolik i mas bilip long en, maski ol i laik o nogat. Na Pop Pius Namba 12 i tok, ‘sapos sampela man i no laik bilip long dispela Asumsio olsem mipela i bin makim, ol i no bihainim tru bilip bilong lotu Katolik i kam long God.’

Baibel i Tok Wanem?

Wanem as na Misin Katolik i tok, dispela bilip i samting tru? Pop Pius Namba 12 i tok, Baibel i as bilong en. Ol i kolim tok bilong Luk 1:​28, 42, em i tok olsem long Maria: “Gebriel i go long [Maria] na i tok olsem, ‘Gude, meri. Bikpela i stap wantaim yu, na em i bin blesim yu na mekim gut long yu. . . . Na dispela pikinini i stap long bel bilong yu, em tu i kisim blesing bilong God.’ ” Ol i tok, sapos God i bin blesim Maria na mekim gut long em, em i no inap i dai, na sapos God i bin blesim pikinini Jisas long bel bilong em, em i mas kisim ol gutpela samting olsem Jisas i kisim, na go long heven olsem Jisas i bin mekim. Yu ting dispela tok bilong Misin Katolik i stret?

Ol man i save gut long ol tok ples ol i tok, dispela tok bilong Luk hia ol i tanim olsem “blesim,” em i no stret tumas. Ol i mas kolim olsem “God i orait” long em. Tasol maski God i bin orait long Maria, dispela i no as na yumi ken ting em i bin i go wantaim bodi bilong em long heven. God i bin “helpim tru Stiven” tu “na i givim strong long em,” tasol Baibel i no tok, Stiven i bin go long heven wantaim skin bilong em, nogat.​—⁠Aposel 6:⁠8.

Tru, ‘Bikpela i bin stap wantaim Maria na blesim em na mekim gut long em’ olsem ensel Gebriel i bin tok, tasol Bikpela i bin mekim olsem long sampela ol narapela meri tu, na em i no bin kisim ol i go long heven. Baibel i tok, God i bin “mekim gut long Sara,” olsem blesim em, tasol God i no bin kisim Sara i go long heven, nogat. (Stat 17:16) Na ol i tok, taim Jisas i bin go long heven em i go wantaim skin em i stap long en taim em i stap man long graun. Tasol Baibel i tok: “Long graun em i stap man, na ol i kilim em i dai, tasol em i kirap bek na em i stap spirit long heven.” (1 Pita 3:18; lukim tu 1 Korin 15:45.) Na aposel Pol i tok: “Man bilong dispela graun em i no inap i go insait long kingdom bilong God . . . Bai yumi olgeta i senis na i kamap narakain.”​—⁠1 Korin 15:​42-52.

Baibel i tok, ol Kristen em God i bin makim ol long spirit holi ol bai kirap bek long i dai na ol bai go long heven. Tasol 1 Tesalonaika 4:​13-17 i tok, dispela samting bai kamap long taim bilong las de, long “taim Bikpela i kam bek.” Olsem na Maria i mas i dai na slip long matmat inap long dispela taim, olsem planti tausen gutpela Kristen moa i mas mekim.​—⁠1 Korin 15:​51, 52.

Maria i Gat Strongpela Bilip

Tasol i no olsem yumi laik daunim Maria, nogat. Em i gutpela meri tru, na em i gat strongpela bilip, na yumi ken wok long bihainim bilip olsem bilong em. Em i bin orait long kamap mama bilong Jisas na karim ol hevi bilong dispela wok. (Luk 1:38; 2:​34, 35) Em wantaim Josep i bin mekim bikpela long Jisas na lainim em long gutpela tok bilong God. (Luk 2:​51, 52) Em i bin sambai long Jisas long taim em i hangamap long pos na i karim bikpela pen. (Jon 19:​25-27) Em i gutpela disaipel bilong Jisas, na em i bihainim tok na i stap long Jerusalem na kisim spirit bilong God long taim bilong Pentikos.​—⁠Aposel 1:​13, 14; 2:​1-4.

Sapos yumi bihainim bilip giaman long Asumsio, dispela bai mekim nogut long Maria, na God tu. Na dispela bilip i tok tu olsem Maria i save kisim beten bilong yumi i go long God na bai God i ken helpim yumi, tasol Jisas i no bin tok olsem. Em i tok: “Mi yet mi rot . . . I no gat wanpela man inap i kam long Papa long narapela rot. Nogat. Long mi tasol. . . . Olgeta samting yupela i askim long nem bilong mi, em bai mi mekim.” (Jon 14:​6, 14; lukim Aposel 4:12.) Jisas tasol inap askim God long helpim yumi, i no Maria. Jisas wanpela em i rot bilong helpim yumi long “i go klostu long God, na . . . em bai i helpim yumi.”​—⁠Hibru 4:⁠16.

Ating sampela i no amamas long harim dispela trupela tok long Maria. Ating ol i mas lusim sampela bilip kranki ol i bin holim inap longtaim. Tasol Baibel i tok, “tok tru bai i mekim yupela i kamap fri.” (Jon 8:32) Na Jisas i tok, Papa bilong em i laik bai ol man i ken lotu long em long “Holi Spirit na long pasin i tru.” (Jon 4:24) Ol Katolik i gat gutpela bel ol i ken tingim dispela tok bilong Baibel.

[Ol Futnot]

[Blok long pes 27]

MARIA I BIN DAI, O NOGAT?

Yumi laik save, Maria i bin dai pastaim na em i go antap long heven? Ol tisa bilong Misin Katolik i no inap bekim gut dispela askim. Wanpela nius bilong ol (Nuovo dizionario di teologia) i tok, ‘I no stret yumi tok, Maria i no inap i dai, long wanem, Jisas yet i bin dai.’ Na sapos ol i tok, Maria i bin dai, dispela bai pait wantaim narapela bilip bilong ol long Maria i no gat sin. Wanpela tisa bilong misin, em Kari Børresen, em i tok, ‘dai em pe bilong sin, tasol Maria i no gat sin.’ Tasol i gat wanem as na Maria i bin dai? Sin tasol, a? Olsem na Pop Pius Namba 12 i no laik toktok long dispela samting long taim em i kamapim bilip long Asumsio.

Ol tok bilong Baibel i klia, na em i no tok, Maria i no gat sin. Maria i wankain olsem ol narapela manmeri, na i mas gat ofa bilong baim bek em tu na bai em i no ken lus. Olsem na taim em i karim Jisas em i go long haus lotu na mekim ofa long God long sin bilong em. (Wok Pris 12:​1-8; Luk 2:​22-24) Taim em i go lapun em i dai wankain olsem ol narapela sinman i save mekim.​—⁠Rom 3:23; 6:⁠23.

I no hatwok long save long dispela tok tru bilong Baibel, tasol dispela bilip bilong Asumsio long Maria i go long heven wantaim skin bilong em, dispela bilip i no gat as bilong en.

[Piksa long pes 26]

‘Asumsio Bilong Virgo,’ em piksa Tisan i bin wokim (yia 1488-1576 samting)

[Kredit Lain]

Giraudon/Art Resource, N.Y.

[Piksa long pes 28]

Bihain long Maria i karim Jisas em i go long haus lotu bilong givim ofa. Dispela i makim olsem Maria i gat sin na i mas i gat ofa