Skul Yumi Kisim Long Pasin Daun

Bihain long bodi bilong Jisas i kamap narakain, na em i oraitim wanpela boi i gat spirit nogut, em i lusim Sisaria Filipai na em i go long Kaperneam. Em wantaim ol disaipel bilong em tasol i go, long wanem, em i no laik bai ol manmeri i “save long dispela samting.” (Mak 9:30) Dispela i opim rot long Jisas long redim ol disaipel bilong em long dai bilong em, na long wok ol i mas mekim bihain long em i dai. Em i tok: “Wanpela birua bai putim Pikinini bilong man long han bilong ol man, na ol bai kilim em i dai, na long namba 3 de bai em i kirap bek.”—Matyu 17:22, 23.

Planti taim Jisas i save mekim dispela tok long ol disaipel bilong em. Bipo Jisas i bin tokim ol disaipel olsem ol man bai kilim em i dai, tasol Pita i no laik bai dispela samting i kamap long Jisas. (Matyu 16:21, 22) Na tripela aposel i bin lukim Jisas i kamap narakain, na ol i harim stori long Jisas bai “go.” (Luk 9:31) Nau ol disaipel bilong Jisas i “bel hevi tru” long tok em i mekim. (Matyu 17:23) Maski ol i no kliagut long tok bilong em, ol i surik long askim em.

Bihain ol i kam long Kaperneam, em ples Jisas i mekim planti wok bilong em, na em asples bilong sampela aposel bilong em. Sampela man bilong kisim takis bilong tempel i kam long Pita na ol i givim askim long em. Ating ol i laik sutim tok long Jisas olsem em i no save baim takis, olsem na ol i askim: “Tisa bilong yupela i save baim takis bilong 2 drakma koin o nogat?”—Matyu 17:24.

Pita i tok, “Yes.” Taim Pita i go kamap long haus, Jisas i save pinis long askim ol i givim long Pita, olsem na em i tok: “Saimon, yu ting wanem? Ol king bilong graun i save kisim kain kain takis long husat? Ol i kisim long ol pikinini man bilong ol yet o long ol arapela man?” Pita i tok: “Long ol arapela man.” Jisas i tokim em: “Olsem na ol pikinini i no gat wok long baim takis.”—Matyu 17:25, 26.

Papa bilong Jisas em King bilong heven na graun na ol i save lotuim Em long tempel. Olsem na i no gat lo i tok Pikinini Bilong God i mas baim takis bilong tempel. Jisas i tok: “Tasol yumi no laik bai ol i gat tingting nogut long yumi, olsem na yu go long raunwara na tromoi huk. Na kisim namba 1 pis yu pulim, na taim yu opim maus bilong en bai yu lukim wanpela silva koin [steita koin, o tetradrakma]. Kisim dispela koin na givim long ol, na em i bilong yu na mi wantaim.”—Matyu 17:27.

Nau ol disaipel i kam bung na ol i laik askim Jisas long husat i stap nambawan winim ol arapela long Kingdom. Pastaim ol i bin surik long askim Jisas long dai bilong em, tasol nau ol i no pret long askim em long samting bai kamap bihain. Jisas i save long askim bilong ol, long wanem, ol i bin tok pait long dispela taim ol i wokabaut i kam bek long Kaperneam. Olsem na em i askim ol: “Long rot yupela i kros long wanem samting?” (Mak 9:33) Ol disaipel i sem na ol i no bekim tok, long wanem, ol i bin tok pait long husat bai stap nambawan. Orait nau ol i givim askim long Jisas olsem: “Husat tru i stap nambawan winim ol arapela long Kingdom bilong heven?”—Matyu 18:1.

Klostu 3-pela yia olgeta, Jisas i stap wantaim ol na ol i harim na lukim ol wok em i mekim, olsem na yumi kirap nogut long ol i tok pait long dispela samting. Tasol ol i no gutpela olgeta. Na ol i bin go bikpela insait long lotu Juda, dispela lotu i save skulim lain bilong en long tingim namba na biknem man i gat. Na tu, ating Pita i pilim olsem em i nambawan, long wanem, pastaim em i bin harim Jisas i tok long givim “ol ki” bilong Kingdom long em. Na ating Jems na Jon tu i gat wankain tingting, long wanem, ol i bin lukim bodi bilong Jisas i kamap narakain.

Yumi no save long risen na ol disaipel i kisim dispela kain tingting, tasol Jisas i helpim ol long kisim stretpela tingting. Em i kisim wanpela liklik pikinini na i sanapim em namel long ol, na em i tokim ol disaipel: “Sapos yupela i no senisim pasin bilong yupela na kamap olsem ol liklik pikinini, orait bai yupela i no inap tru long go insait long Kingdom bilong heven. Man i daunim em yet olsem dispela liklik pikinini, dispela man em i nambawan winim ol arapela long Kingdom bilong heven. Na man i tingim nem bilong mi na mekim gut long wanpela liklik pikinini olsem, em i mekim gut long mi tu.”—Matyu 18:3-5.

Em gutpela rot bilong skulim ol disaipel bilong em! Jisas i no krosim ol na tok ol i gat gridi pasin, o ol i laik kisim biknem na namba, nogat. Em i mekim wanpela tok piksa. Ol liklik pikinini i no gat namba o biknem. Ating Jisas i laik kamapim klia long ol disaipel bilong em olsem ol i mas i gat dispela kain pasin. Orait nau Jisas i helpim ol disaipel long luksave long skul ol i kisim, na em i tok: “Man i save daunim em yet namel long yupela, dispela man em i nambawan.”—Luk 9:48.