Winim Ol Mak Bilong Kisim Baptais Kristen

“Ating wanpela samting i pasim rot na mi no inap kisim baptais?”​—⁠APOSEL 8:⁠36.

1, 2. Olsem wanem Filip i kirap toktok wantaim wanpela bikman bilong Itiopia? Wanem samting i soim olsem dispela man i save tingim ol samting bilong spirit?

WANPELA o tupela yia bihain long dai bilong Jisas, wanpela bikman bilong gavman i raun long rot i lusim Jerusalem na i go long hap saut long Gasa. Em i mas raun long longpela rot long karis, ating inap olsem 1,500 kilomita. Dispela man bilong givim bel bilong em long God, em i bin lusim Itiopia na i go long Jerusalem bilong lotuim Jehova. Long longpela rot bilong go bek long ples, em i mekim gutpela wok long taim bilong em na em i ritim Tok Bilong God​—⁠dispela i kamapim klia bilip bilong em. Jehova i tingim dispela man i gat gutpela bel, na long rot bilong ensel, Em i stiaim disaipel Filip i go autim tok long em.​—⁠Aposel 8:​26-28.

² I no hatwok long Filip i kirap toktok wantaim dispela bikman bilong Itiopia, long wanem, em i ritim strong wanpela buk olsem ol man long dispela taim bipo ol i save mekim. Olsem na Filip inap harim tok em i wok long ritim long Buk Aisaia. Wanpela liklik askim bilong Filip i kirapim tingting bilong dispela man, olsem: “Yu save long as bilong dispela tok yu ritim, o nogat?” Dispela i kirapim tupela long toktok long Aisaia 53:​7, 8. Bihain long dispela, Filip i “autim ol arapela tok bilong gutnius bilong Jisas” long dispela man.​—⁠Aposel 8:​29-35.

3, 4. (a) Bilong wanem Filip i baptaisim man Itiopia wantu tasol? (b) Nau bai yumi skelim wanem ol askim?

³ Insait long sotpela taim, man Itiopia i kliagut long wok bilong Jisas long ol samting God i tingting pinis long mekim, na tu, em i luksave olsem em i mas kisim baptais na kamap disaipel bilong Krais. Taim ol i kamap long wanpela wara, em i askim Filip: “Ating wanpela samting i pasim rot na mi no inap kisim baptais?” Tru, samting i kamap long dispela man Itiopia i narapela kain long nau. Dispela man bilong bilip i lotuim God pinis na i bihainim lotu Juda. Ating sapos em i no kisim baptais nau, em i mas wet inap longpela taim bambai rot i op long em i ken kisim baptais. Na bikpela samting moa, dispela man i kliagut long ol samting God i laik bai em i mas mekim, na em i laik givim bel bilong em olgeta long God. Filip i amamas long baptaisim man Itiopia, na taim em i baptais pinis, em i “amamas na i bihainim rot bilong en na i go.” Yumi ken ting em i kamap man bilong givim bel long autim gutnius long ples bilong em.​—⁠Aposel 8:​36-39.

⁴ Tru, yumi mas tingting gut na no ken hariap tumas long dediket na baptais, tasol stori bilong bikman bilong Itiopia i soim olsem sampela taim ol man i bin kisim baptais bihain liklik long ol i harim tok i tru bilong Baibel.a Olsem na i stret long skelim ol dispela askim: Man i mas mekim wanem bilong redi long kisim baptais? Krismas bilong man i laik kisim baptais i bikpela samting o nogat? Paslain long man i kisim baptais, em i mas kamap strong long ol samting bilong spirit inap long wanem mak? Na bikpela samting moa, bilong wanem Jehova i laik bai ol wokman bilong em i mas kisim baptais?

Wanpela Bikpela Kontrak

5, 6. (a) Lain bilong God long bipo i bin mekim wanem bilong soim olsem ol i pilim pasin laikim bilong Jehova? (b) Taim yumi baptais pinis yumi ken pas gut wantaim Jehova olsem wanem?

⁵ Jehova i helpim lain Israel long lusim Isip na bihain em i orait long kisim ol olsem “lain manmeri” bilong em na bai em i ken laikim na lukautim ol na ol i kamap olsem wanpela lain holi. Tasol bilong kisim ol kain blesing olsem, ol i mas mekim sampela samting bilong soim olsem ol i pilim pasin laikim bilong God. Bilong soim dispela, ol i wanbel long “mekim olgeta samting olsem Bikpela i bin tok” na ol i wokim kontrak wantaim em. (Kisim Bek 19:​4-9) Taim Jisas i stap long graun, em i tokim lain bilong em long mekim ol man bilong olgeta lain i kamap disaipel, na ol dispela man husat i bihainim tok bilong em ol i kisim baptais. Bilong ol i ken pas gut wantaim God ol i mas bilip long Jisas Krais na kisim baptais.​—⁠Matyu 28:​19, 20; Aposel 2:​38, 41.

⁶ Ol dispela stori bilong Baibel i soim olsem Jehova i mekim gut long ol man i save tok promis long mekim wok bilong em na ol inapim dispela tok promis. Ol Kristen i mas dediket na baptais na bai Jehova inap blesim ol. Yumi strong long bihainim ol lo bilong em na yumi askim em long soim rot long yumi. (Song 48:14) Taim yumi mekim olsem, i olsem Jehova i holim han bilong yumi na i soim rot yumi mas wokabaut long en.​—⁠Song 73:23; Aisaia 30:21; 41:​10, 13.

 7. Bilong wanem yumi yet i mas wokim disisen bilong dediket na baptais?

⁷ Pasin bilong laikim tru Jehova na laik bilong yumi long mekim wok bilong em i mas kirapim yumi long dediket na baptais. I no stret long wanpela i kisim baptais long wanem narapela i tokim em olsem em i bin stadi inap longpela taim pinis, o long wanem ol pren bilong em i kisim baptais. Nogat. Ol papamama na ol strongpela Kristen inap strongim wanpela long tingting long dediket na baptais. Aposel Pita i tokim ol man i harim tok bilong em long Pentikos long “kisim baptais.” (Aposel 2:38) Tasol dediket em samting yumi yet i mas mekim, narapela man i no inap mekim dediket bilong yumi. Yumi yet i mas wokim disisen bilong mekim laik bilong God.​—⁠Song 40:⁠8.

Redi Gut Long Kisim Baptais

8, 9. (a) Bilong wanem pasin bilong baptaisim ol liklik pikinini i no stret wantaim tok bilong Baibel? (b) Paslain long ol yangpela i kisim baptais, ol i mas winim wanem ol mak?

⁸ Olsem wanem? Ol pikinini inap wokim gut tingting bilong ol yet na dediket? Baibel i no tok man i mas i gat hamas krismas na em i ken kisim baptais. Tasol ol liklik pikinini i no inap kamap bilipman, wokim ol disisen em bilip i as bilong en, o dediket long God. (Aposel 8:12) Saveman Augustus Neander i raitim wanpela buk (General History of the Christian Religion and Church), na long dispela buk em i stori long ol Kristen bilong bipo olsem: “Pastaim ol i baptaisim tasol ol man i bikpela pinis, long wanem, long dispela taim ol man i ting baptais na bilip i poroman wantaim.”

⁹ Sampela yangpela inap kliagut long ol bikpela tok bilong God taim ol i yangpela yet, na sampela i kliagut long ol dispela tok taim ol i bikpela liklik. Tasol paslain long wanpela yangpela i kisim baptais em i mas pas gut wantaim Jehova, save gut long ol bikpela tok bilong Baibel, na kliagut long mining bilong dediket, olsem ol man i bikpela pinis tu i mas winim ol dispela mak.

10. Man i mas mekim wanem ol samting paslain long em i dediket na baptais?

¹⁰ Jisas i tokim ol disaipel long lainim ol nupela man long ol tok em i bin givim long ol. (Matyu 28:20) Olsem na pastaim ol nupela man i mas kisim stretpela save long tok i tru, na dispela samting bai helpim ol long kisim pasin bilong bilip long Jehova na Tok bilong em. (Rom 10:17; 1 Timoti 2:4; Hibru 11:⁠6) Orait, taim man i bilip long tok i tru bilong Baibel long bel bilong em, dispela i kirapim em long tanim bel na givim baksait long ol pasin bipo em i bin mekim. (Aposel 3:19) Na bihain man i kisim laik long dediketim em yet long Jehova na kisim baptais, olsem Jisas i bin tok ol man i mas mekim.

11. Bilong wanem em i bikpela samting long yumi insait long wok autim tok long olgeta mun paslain long yumi kisim baptais?

¹¹ Narapela bikpela samting bilong inapim mak bilong baptais, em man i mas insait long wok bilong autim gutnius bilong Kingdom. Dispela em i nambawan bikpela wok Jehova i bin tokim lain bilong em long mekim long dispela taim bilong las de. (Matyu 24:14) Olsem na ol pablisa i no baptais, ol i ken insait long gutpela wok bilong tokim ol narapela man long bilip bilong ol. Taim ol i insait long dispela wok, dispela i redim ol long givim bel oltaim long wok autim tok taim ol i baptais pinis.​—⁠Rom 10:​9, 10, 14, 15.

I Gat Wanpela Samting i Pasim Yu Long Kisim Baptais?

12. Wanem samting inap mekim na sampela i surik long kisim baptais?

¹² Sampela inap surik long kisim baptais, long wanem, ol i no laik mekim ol samting i stret wantaim baptais. Ol i luksave olsem bilong bihainim ol lo bilong Jehova, ol i mas mekim sampela bikpela senis long sindaun bilong ol. O ating ol i pret long ol bai hatwok long bihainim ol lo bilong God bihain long taim ol i baptais. Na sampela inap ting, “Nogut bihain mi mekim rong na ol bai rausim mi long kongrigesen.”

13. Long taim bilong Jisas, wanem samting i mekim na sampela i surik long bihainim Jisas?

¹³ Taim Jisas i stap long graun, sampela i larim ol samting bilong ol yet o famili i pasim ol long kamap disaipel bilong em. Wanpela saveman bilong lo i tok em bai bihainim Jisas long wanem wanem hap Jisas bai go long en. Tasol Jisas i tokim em olsem planti taim em i no gat ples bilong slip. Taim Jisas i singautim wanpela narapela man long bihainim em, dispela man i tok em i mas “planim” papa bilong em pastaim. Ating em i no laik bihainim Jisas, em i laik stap pastaim wantaim famili na wet i go inap long taim papa bilong em i dai, na nau em i ken planim papa. Namba tri man i tok paslain long em i kirap bihainim Jisas, em i mas “tok gutbai” long famili bilong em. Jisas i tok kain pasin olsem bilong surikim taim bilong mekim samting i olsem ‘man i lukluk i go long baksait.’ So i luk olsem ol man husat i laik mekim olsem, oltaim ol bai painim eskius bilong surik long mekim samting ol Kristen i mas mekim.​—⁠Luk 9:​57-62.

14. (a) Pita, Andru, Jems, na Jon i mekim wanem taim Jisas i singautim ol long mekim wok bilong kisim ol man? (b) Bilong wanem yumi no ken surik long kisim plang bilong Jisas?

¹⁴ Pasin bilong Pita, Andru, Jems, na Jon i narapela kain. Taim Jisas i singautim ol long bihainim em na mekim wok bilong kisim ol man, Baibel i tok: ‘Kwiktaim ol i lusim umben na i go bihainim em.’ (Matyu 4:​19-22) Taim ol i wokim hariap disisen long bihainim Jisas, ol samting Jisas i tok long en i painim ol: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:​29, 30) Tru, baptais i mekim na yumi mas karim plang, olsem mekim sampela wok, tasol Jisas i tok dispela plang i isi long karim na i givim malolo long yumi.

15. Olsem wanem stori bilong Moses na Jeremaia i soim olsem yumi ken bilip long God bai helpim yumi?

¹⁵ Tru, yumi inap pilim olsem yumi no inap mekim ol samting yumi mas mekim. Pastaim Moses na Jeremaia i ting ol i no inap mekim wok Jehova i bin tokim ol long mekim. (Kisim Bek 3:11; Jeremaia 1:⁠6) God i tok wanem bilong strongim bel bilong ol? Em i tokim Moses olsem: “Bai mi stap wantaim yu.” Na long Jeremaia em i tok: “Mi stap wantaim yu na bai mi lukautim yu.” (Kisim Bek 3:12; Jeremaia 1:⁠8) Yumi tu inap bilip olsem God bai helpim yumi. Pasin bilong laikim tru God na bilip long em inap helpim yumi long save tru olsem yumi inap truim dediket bilong yumi. Aposel Jon i tok: “Man i save laikim ol arapela, em i no save pret. Sapos pasin bilong laikim ol arapela i kamap strong pinis insait long laip bilong wanpela man, orait dispela i save rausim pasin bilong pret.” (1 Jon 4:18) Ating liklik mangi i pret taim em wanpela i wokabaut i go, tasol em i no pret taim em i holim han bilong papa bilong em na i wokabaut. Na olsem tasol, sapos yumi bilip long Jehova long bel olgeta, em i tok promis long ‘soim yumi stretpela rot long bihainim’ taim yumi wokabaut wantaim em.​—⁠Sindaun 3:​5, 6.

Soim Rispek

16. Bilong wanem man i mas i go insait olgeta long wara taim em i kisim baptais?

¹⁶ Paslain long ol man i kisim baptais i gat wanpela tok bilong Baibel i stori long baptais Kristen i bikpela samting olsem wanem. Long pinis bilong tok, ol man i laik kisim baptais i mas kamapim bilip bilong ol long rot bilong bekim tupela askim bilong baptais. (Rom 10:10; lukim blok long pes 22.) Bihain long dispela, ol man i kisim baptais insait long wara, olsem Jisas yet i bin mekim. Baibel i tok taim Jisas i kisim baptais pinis, em i “lusim wara na i kam antap.” (Matyu 3:16; Mak 1:10) Jon Bilong Baptais i putim Jisas i go insait olgeta long wara.b Taim yumi go insait olgeta long wara, dispela i makim bikpela senis yumi mekim long laip bilong yumi​—⁠i olsem yumi dai long olpela pasin bilong yumi na yumi kisim nupela laip bilong mekim wok bilong God.

17. Ol man i kisim baptais na ol man i lukim baptais inap mekim wanem na bai taim bilong baptais i ken kamap gutpela tru?

¹⁷ Baptais em i taim bilong amamas na taim bilong tingim gut ol samting. Baibel i tok Jisas i beten i stap taim Jon i putim em i go insait long wara Jordan. (Luk 3:​21, 22) Olsem Jisas i bin mekim, ol man i kisim baptais long nau ol i mas bihainim pasin i stret. Baibel i tok yumi mas werim ol klos i stret long olgeta de, olsem na moa yet yumi mas bihainim dispela tok long de yumi kisim baptais! (1 Timoti 2:⁠9) Ol man i lukim baptais inap soim rispek long rot bilong putim gut yau long tok bilong baptais na bihainim gutpela pasin taim ol i lukim ol man i kisim baptais.​—⁠1 Korin 14:⁠40.

Ol Blesing Bilong Ol Disaipel i Baptais Pinis

18, 19. Baptais i opim rot na yumi ken kisim wanem ol blesing?

¹⁸ Taim yumi dediketim yumi yet long God na kisim baptais, yumi insait long wanpela narakain famili. Namba wan samting, Jehova i kamap Papa na Pren bilong yumi. Taim yumi no kisim baptais yet, yumi stap longwe long God, tasol nau yumi wanbel wantaim em. (2 Korin 5:19; Kolosi 1:20) Long rot bilong ofa bilong Krais, yumi go klostu long God na em i kam klostu long yumi. (Jems 4:⁠8) Profet Malakai i tok Jehova i tingim na i putim yau long ol man i holim na mekim wok long nem bilong em, na em i putim nem bilong ol long buk bilong em long tingim ol man. God i tok: “Dispela ol lain bai i stap lain bilong mi tasol. . . . Na bai mi marimari long ol olsem wanpela papa i save marimari long pikinini i mekim wok bilong papa.”​—⁠Malakai 3:​16-18.

¹⁹ Baptais i opim rot long yumi ken insait long wanpela lain brata i stap long olgeta hap. Taim aposel Pita i askim Jisas long wanem ol blesing ol disaipel bilong Krais bai kisim, long wanem, ol i lusim ol samting bilong ol yet, Jisas i tok promis: “Olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim.” (Matyu 19:29) Planti yia bihain, Pita i tok long “ol arapela manmeri bilong God” i bin kamap long graun. Pita yet i bin kisim helpim na ol blesing bilong gutpela lain brata, na yumi tu inap kisim ol dispela samting.​—⁠1 Pita 2:17; 5:⁠9.

20. Man i kisim baptais inap wet long kisim wanem gutpela samting?

²⁰ Na tu, Jisas i tok ol man i bihainim em ol bai “kisim laip i stap gut oltaim oltaim.” Em nau, man i dediket na baptais em inap wet long kisim “dispela laip em i laip tru”​—⁠em laip oltaim long nupela taim God bai kamapim. (1 Timoti 6:19) I no gat narapela samting inap helpim yumi na famili bilong yumi long i stap gut long bihain. Dispela gutpela samting bai mekim na yumi inap ‘bihainim God, Bikpela bilong yumi inap oltaim oltaim.’​—⁠Maika 4:⁠5.

[Ol Futnot]

Yu Inap Stori Long Dispela?

• Yumi mas mekim wanem bilong soim olsem yumi pilim pasin laikim bilong Jehova? Bilong wanem yumi mas mekim olsem?

• Paslain long man i kisim baptais, em i mas kamap strong long ol samting bilong spirit inap long wanem mak?

• Bilong wanem yumi no ken larim pasin bilong tingting planti long wok Kristen yumi mas mekim o pasin bilong pret long yumi bai pundaun i mekim na yumi surik long kisim baptais?

• Ol disaipel bilong Jisas Krais i kisim wanem ol gutpela blesing?

[Piksa long pes 26]

“Ating wanpela samting i pasim rot na mi no inap kisim baptais?”

[Ol Piksa long pes 29]

Baptais em i taim bilong amamas na taim bilong tingim gut ol samting