Sindaun Bilong Ol Kristen Bilong Pastaim
Ol Lain Bilong “Lukautim Gut Haus”
“Jisas wantaim ol disaipel i wokabaut i go, na Jisas i go insait long wanpela ples. Wanpela meri bilong dispela ples, nem bilong en Marta, em i kisim Jisas i go long haus bilong en. Marta i gat wanpela susa, nem bilong en Maria. Maria em i kam sindaun klostu long lek bilong Bikpela, na i harim toktok bilong em. Tasol Marta em i tingting planti long bikpela wok em i mekim bilong redim kaikai samting. Olsem na em i go long Jisas na i tok, ‘Bikpela, susa bilong mi em i lusim mi na mi wanpela tasol mi wok long redim kaikai. Ating yu no tingting long dispela? Yu tokim em long kam helpim mi.’ Tasol Bikpela i bekim tok bilong em olsem, ‘Marta, Marta, yu wok long tingting planti na yu wari long planti samting. Yu mas tingting long wanpela samting tasol. Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting.’ ”—LUK 10:38-42.
MARTA em meri bilong wok hat. Ating ol narapela i save apim nem bilong em. Long taim bilong ol aposel, ol Juda i save skelim pasin bilong meri long ol wok em i mekim bilong lukautim haus na famili, na dispela i soim olsem em i meri tru o nogat.
Ol meri Kristen long taim bilong ol aposel, ol i gat wok long “lukautim gut haus bilong ol.” (Taitus 2:5) Na ol i gat wok tu long skulim ol narapela long bilip Kristen. (Matyu 28:19, 20; Aposel 2:18) Long dispela taim bipo, wanem ol wok i insait long ol “bikpela wok” em meri Juda i mas mekim? Na yumi inap kisim wanem skul long ol tok em Jisas i bin mekim long Maria?
“Bikpela Wok” Long lain Juda, maritmeri i save kirap long mekim wok taim tulait i no bruk yet. (Sindaun 31:15) Taim em i redim pinis liklik kaikai bilong famili, olsem poris, em i save kisim ol pikinini man bilong em i go long skul long haus lotu. Ol pikinini meri bilong em bai stap long haus na em bai skulim ol long sampela kain wok we bai helpim ol taim ol i marit.
Taim mama na ol pikinini meri i kirap mekim ol wok bilong haus, pastaim ol bai pulimapim oil i go insait long ol lam (1), brumim haus (2), na kisim susu long meme bilong ol (3). Bihain long dispela, ol bai wokim bret bilong kaikai long dispela de. Pastaim ol pikinini meri bai seksekim plaua bilong rausim ol pipia (4), na bihain ol bai yusim ston long wilwilim wit bilong wokim plaua (5). Mama bai kisim plaua na kapsaitim wara na yis, na em bai miksim na bengim bengim (6) na larim i stap long solap, na em bai i go mekim ol narapela wok. Ol pikinini meri bai tantanim susu em ol i bin kisim long meme na wokim i kamap sis (7).
Taim san i kam antap liklik, mama na ol pikinini meri bai go long maket. Taim ol i kamap long maket, mama inap smelim kain kain spais, na harim singaut bilong ol animal, na ol manmeri i tok pait long prais bilong ol samting, na em bai baim ol samting ol i nidim bilong dispela de (8). Ating em bai baim tu sampela kaikai bilong gaden na pis em ol i bin draim. Sapos em i wanpela Kristen, ating em bai autim bilip bilong em long ol arapela manmeri i stap long maket.—Aposel 17:17.
Taim ol i wokabaut i go long maket na wokabaut i kam bek long haus, gutpela mama bai yusim dispela haptaim long skulim ol pikinini meri na helpim ol long pilim tru ol stiatok i stap long Tok Bilong God. (Lo 6:6, 7) Ating em bai skulim ol tu long pasin bilong skelim gut na baim ol samting long maket.—Sindaun 31:14, 18.
Narapela wok bilong ol meri em long i go long hulwara (9). Ol bai kisim wara bilong famili long yusim, na ating ol bai toktok wantaim ol arapela meri em ol tu i go bilong pulimapim wara. Taim ol i kam bek long haus, mama na ol pikinini meri bai stat long kukim bret. Pastaim, ol bai fletim bret na wokim i kamap raunpela, na putim insait long aven (10) em ol i hatim pinis we i save stap ausait long haus. Mama na ol pikinini meri bai amamas long naispela smel bilong bret na ol bai stori na lukluk i stap taim bret i wok long kuk.
Bihain, ol bai go long wara long wasim ol klos (11). Pastaim ol bai yusim wanpela kain sop bilong klinim gut ol klos—em sop ol i wokim long sit bilong paia i kam long sampela kain diwai. Taim ol i rinsim ol klos na skwisim na rausim pinis wara long en, ol bai draim ol klos antap long gras na ol ston.
Taim ol i go bek long haus, ating mama na ol pikinini meri bai i go antap long rup bilong haus na samapim (12) ol klos i gat sampela hap bilong en i bruk, na putim i go bek long kabot. Bihain, mama bai skulim ol pikinini meri long pasin bilong yusim tret long samap na wokim ol kain kain bilas (13). I no longtaim na ol i mas kukim kaikai bilong apinun (14). Ol Juda i gat pasin bilong mekim gut long ol visita i kam long haus, olsem na famili bai redi long serim liklik kaikai bilong ol—bret, gaden kaikai, sis, pis ol i draim pinis, na kolwara.
Long nait, taim ol pikinini i redi long i go slip na sapos ol i gat sua long skru bilong lek, orait mama i save rapim oil long skru bilong ol. Ol i save yusim lait bilong lam long ritim wanpela stori i kam long Tok Bilong God na beten wantaim ol pikinini. Taim olgeta pikinini i slip na i no gat nois moa long haus, man bai tokim meri bilong em olsem: “Ating man i laik maritim meri i gat gutpela pasin tru, a? Orait bai em i hatwok tru long painim. Kain meri olsem i winim olkain ston i dia tumas.”—Sindaun 31:10.
Makim “Gutpela Samting Tru” Yumi save tru olsem long taim bilong ol aposel, ol meri bilong wok hat ol i bin i gat planti “wok” bilong mekim. (Luk 10:40) Olsem tasol, ol meri long nau tu, na moa yet em ol mama, ol i gat planti wok tru long mekim. Ol nupela masin samting i helpim ol long mekim sampela wok bilong haus. Tasol sindaun bilong famili i mekim na sampela mama i mas lusim haus na i go mekim sampela narapela wok.
Maski sindaun bilong ol i olsem, planti meri Kristen long nau ol i bihainim pasin bilong Maria, em yumi stori pinis long em long kirap bilong dispela stori. Ol i tingim tru pasin bilong ol long pas gut wantaim God. (Matyu 5:3) Ol i lukautim gut famili bilong ol, olsem Baibel i kirapim ol long mekim. (Sindaun 31:11-31) Na tu, ol i bihainim stiatok em Jisas i bin tokim Marta long en. Marta i save tingim gut pasin bilong pas gut wantaim God, olsem na em i kisim gut tok bilong Jisas. Ol meri Kristen i no save larim ol wok bilong haus i pasim ol long kisim save long God (15) o toktok wantaim ol arapela long bilip bilong ol. (Matyu 24:14; Hibru 10:24, 25) Taim ol i mekim olsem, ol i makim “gutpela samting tru.” (Luk 10:42) Olsem na ol i olsem ol samting i dia tumas long ai bilong God, na long ai bilong Krais, na long ai bilong wanfamili bilong ol.—Sindaun 18:22.