“Bikpela, Yu Skulim Mipela Long Mekim Prea”
“Wanpela disaipel i tokim em olsem, ‘Bikpela, yu skulim mipela long mekim prea.’ ”—LUK 11:1.
1. Bilong wanem wanpela disaipel bilong Jisas i askim Jisas long skulim ol long prea?
LONG wanpela taim long 32 C.E., wanpela disaipel bilong Jisas i lukim Em i beten. Em i no inap harim ol tok Jisas i mekim long Papa bilong em, long wanem, ating Jisas i no kolim long maus. Tasol taim Jisas i beten pinis, dispela disaipel i tokim em: “Bikpela, yu skulim mipela long mekim prea.” (Luk 11:1) Wanem samting i kirapim em long askim olsem? Beten em samting ol Juda i save mekim long olgeta de na i hap lotu bilong ol. Ol Skripsa Hibru i kamapim planti beten long Buk Song na ol narapela hap. Olsem na disaipel hia i no askim Jisas long skulim em long samting em i no gat save long en o samting em i no bin mekim bipo. Em i save long ol beten bilong ol bikman bilong lotu Juda, em ol i save kolim nating long maus. Tasol nau em i bin lukim Jisas i mekim prea, na ating em i pilim olsem pasin bilong ol tisa bilong lotu long beten, em ol i mekim olsem ol i holi tru, em i narapela kain tru long pasin bilong Jisas long prea.—Matyu 6:5-8.
2. (a) Wanem samting i makim olsem Jisas i no laik bai yumi kolim olgeta wan wan tok bilong dispela beten em i lainim ol man long en? (b) Bilong wanem yumi laik save long pasin bilong prea?
2 Inap olsem 18 mun paslain long dispela, taim Jisas i mekim tok antap long maunten, em i bin kamapim wanpela beten na bai ol disaipel i ken bihainim ol bikpela samting bilong en long taim ol i beten. (Matyu 6:9-13) Ating dispela disaipel i no bin i stap long dispela taim, olsem na Jisas i tingim em na i kamapim gen ol bikpela samting bilong dispela beten. Yumi lukim olsem Jisas i no kolim gen olgeta wan wan tok bilong beten, na dispela i makim olsem em i no kamapim wanpela beten ol i mas tingim olgeta wan wan tok bilong en na kolim kolim nating long maus. (Luk 11:1-4) Olsem dispela disaipel, yumi tu i laik lain long pasin bilong prea na bai yumi ken i go klostu moa long Jehova. Olsem na nau yumi ken skelim dispela beten olgeta, olsem aposel Matyu i bin raitim. I gat 7-pela samting long dispela beten em yumi ken askim God long en—3-pela em bilong ol samting God i tingting pinis long mekim, na 4-pela em bilong ol samting bilong skin na spirit yumi mas kisim. Long dispela stadi, bai yumi skelim 3-pela samting dispela beten i kolim pastaim.
Wanpela Papa i Gat Pasin Laikim
3, 4. Taim yumi beten na kolim Jehova olsem “Papa bilong mipela,” dispela i makim wanem samting?
3 Long kirap bilong dispela beten, Jisas i soim olsem ol beten bilong yumi i mas kamapim olsem yumi pas gut wantaim Jehova na rispektim em. Jisas i tingting pastaim long helpim ol disaipel i bin kam bung klostu long em long dispela maunten, olsem na em i tokim ol long kolim Jehova olsem “Papa bilong mipela, yu stap long heven.” (Matyu 6:9) Wanpela saveman i tok, maski Jisas i bin mekim tok Hibru ol man i save mekim o tok Aram, tok em i kolim bilong makim “Papa,” em i wankain olsem tok em pikinini i save mekim long papa, olsem ‘wanpela tok bilong ol pikinini.’ Taim yumi kolim Jehova olsem “Papa bilong mipela,” dispela i makim olsem yumi pas gut wantaim em na yumi bilip tru long em.
4 Na taim yumi tok “Papa bilong mipela,” yumi tokaut olsem yumi insait long wanpela bikpela famili em ol i lukluk i go long Jehova olsem Man Bilong Givim Laip long ol. (Aisaia 64:8; Aposel 17:24, 28) Ol Kristen God i makim long holi spirit, ol i kamap “pikinini bilong God,” na ol inap singaut long em olsem “Aba, Papa.” (Rom 8:14, 15) Planti milion manmeri ol i kamap poroman tru tru bilong ol. Ol i bin dediketim laip bilong ol long Jehova na kisim baptais long wara bilong makim olsem ol i dediket pinis. Dispela “ol arapela sipsip” ol tu inap beten long Jehova long nem bilong Jisas na kolim Em olsem “Papa bilong mipela.” (Jon 10:16; 14:6) Long olgeta taim yumi inap beten long Papa bilong yumi long heven bilong litimapim nem bilong em, tok tenkyu long em long ol gutpela samting em i bin mekim long yumi, na kamapim ol hevi bilong yumi long em, long wanem, yumi bilip tru olsem em i save tingim yumi.— Filipai 4:6, 7; 1 Pita 5:6, 7.
Laikim Tru Nem Bilong Jehova
5. Wanem namba wan tok long dispela beten bilong Jisas? Bilong wanem dispela i stret?
5 Namba wan tok bilong beten i kamapim klia samting i nambawan bikpela samting. Em i tok: “Nem bilong yu i mas i stap holi.” (Matyu 6:9) Tru tumas, wok bilong mekim nem bilong Jehova i stap holi, em i mas i stap olsem nambawan bikpela samting long yumi, long wanem, yumi laikim em tumas na yumi nolaik tru long lukim kain kain samting ol man i bin mekim long bagarapim nem bilong em. Taim Satan i bikhet na i kirapim namba wan man na meri long sakim tok bilong God Jehova, dispela i krungutim gutnem bilong Jehova, long wanem, em i mekim olsem God i no mekim stret wok bilong Em olsem nambawan bos bilong heven na graun. (Stat 3:1-6) Na tu, i kam inap nau, ol man em ol i tok ol i stap olsem mausman bilong God ol i bin bagarapim nem bilong Jehova long ol pasin nogut bilong ol na ol bilip giaman ol i skulim ol man long en.
6. Sapos yumi prea long nem bilong Jehova i mas i stap holi, bai yumi no ken mekim wanem?
6 Taim yumi prea long nem bilong Jehova i mas i stap holi, dispela i kamapim tingting bilong yumi long husat i mas i stap nambawan bos bilong heven na graun—Jehova yet i mas bosim heven na graun. Jehova i laik bai ol lain husat i amamas long i stap aninit long stretpela wok king bilong em i ken pulap long heven na graun. Na ol i laik stap olsem, long wanem, ol i laikim em tru na ol i laikim tumas ol samting nem bilong em i makim. (1 Stori 29:10-13; Song 8:1; 148:13) Pasin bilong yumi long laikim tumas nem bilong Jehova, dispela bai helpim yumi na yumi no mekim wanpela samting inap bagarapim dispela nem holi. (Esekiel 36:20, 21; Rom 2:21-24) Bilong bel isi i ken i stap long heven na graun, nem bilong Jehova i mas i stap holi, na olgeta i daun long wok king bilong em, long wanem, ol i laikim em tru; olsem na taim yumi beten olsem “nem bilong yu i mas i stap holi,” dispela i soim olsem yumi bilip tru olsem olgeta samting Jehova i tingting pinis long mekim bai kamap tru na dispela bai litimapim nem bilong em.—Esekiel 38:23.
Dispela Kingdom Yumi Prea Long En
7, 8. (a) Wanem dispela Kingdom Jisas i skulim yumi long prea long en? (b) Long Buk Daniel na Kamapim Tok Hait yumi kisim wanem save long dispela Kingdom?
7 Namba tu samting long dispela beten i olsem: “Kingdom bilong yu i mas i kam.” (Matyu 6:10) Dispela samting yumi prea long en i poroman wantaim namba wan samting long dispela beten. Rot bilong Jehova long mekim nem bilong em i stap holi, em Kingdom bilong em long han bilong Mesaia, olsem gavman bilong em long heven, na em i makim Pikinini bilong em, Jisas Krais, i stap King bilong en. (Song 2:1-9) Tok profet bilong Daniel i tok piksa long Kingdom Bilong Mesaia i olsem “wanpela ston” em yet i bruk long wanpela “maunten.” (Daniel 2:34, 35, 44, 45) Maunten i makim namba bilong Jehova olsem nambawan bos bilong heven na graun. Olsem na dispela Kingdom em ston i makim em i nupela rot bilong Jehova long mekim wok king na bosim heven na graun. Na long dispela tok profet, ston “i kamap bikpela maunten na i karamapim olgeta hap bilong graun,” na dispela i makim olsem Kingdom Bilong Mesaia bai makim wok king bilong Jehova long bosim graun.
8 I gat ol narapela tu, inap 144,000, ol i wok wantaim Krais long dispela Kingdom, o gavman, em God i bin “baim bek ol” namel long “olgeta lain man” bilong mekim wok olsem king na pris wantaim Krais. (KTH 5:9, 10; 14:1-4; 20:6) Daniel i kolim dispela lain olsem “ol manmeri bilong God Antap Tru,” na ol wantaim Krais, em Hetman bilong ol, ol i kisim Kingdom na “biknem na strong bilong olgeta king bilong graun . . . na ol bai i stap king oltaim oltaim. Na olgeta kantri bai i stap aninit long ol manmeri bilong God na bihainim tok bilong ol.” (Daniel 7:13, 14, 18, 27) Em dispela gavman bilong heven Jisas i bin skulim ol disaipel long prea long en.
Bilong Wanem Yumi Prea Yet Long Kingdom i Mas i Kam?
9. Bilong wanem i stret yumi prea long Kingdom Bilong God i mas i kam?
9 Long dispela beten bilong em, Krais i skulim yumi long prea long Kingdom Bilong God i mas i kam. Truim bilong ol tok profet bilong Baibel i makim olsem Kingdom long han bilong Mesaia i kamap pinis long heven long 1914.a Olsem na yumi laik save, i stret yumi prea yet long Kingdom i mas “kam”? Em i stret. Long wanem, long tok profet bilong Daniel, Kingdom Bilong Mesaia, em ston i makim, em bai kam bagarapim ol gavman politik bilong ol man, em wanpela traipela imis i makim. Bihain dispela ston bai kam paitim dispela imis na bagarapim olgeta na i kamap olsem pipia tasol. Tok profet bilong Daniel i tok: “Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.
10. Bilong wanem yumi laik tru long Kingdom Bilong God i mas i kam?
10 Yumi laik tru long lukim Kingdom Bilong God i kam na mekim save long pasin nogut bilong dispela graun em Satan i bosim, long wanem, dispela bai mekim nem bilong Jehova i stap holi na olgeta lain i birua long wok king bilong God ol bai bagarap. Yumi prea strong olsem: “Kingdom bilong yu i mas i kam,” na yumi bungim nek wantaim aposel Jon na tok: “I tru. Bikpela Jisas, yu kam.” (KTH 22:20) Tru tumas, yumi laik bai Jisas i kam bilong mekim nem bilong Jehova i stap holi na kamapim klia olsem i stret Jehova i stap King, na bai tok bilong man bilong raitim song i kamap tru, em i tok: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.”—Song 83:18, NW.
“Mipela i Mas Bihainim Laik Bilong Yu”
11, 12. (a) Taim yumi prea long laik bilong God i mas kamap “long graun olsem ol i save bihainim long heven,” yumi beten long wanem samting? (b) Na taim yumi prea long laik bilong Jehova i mas kamap, dispela i makim wanem samting moa?
11 Orait nau Jisas i skulim ol disaipel long prea olsem: “Mipela i mas bihainim laik bilong yu long graun olsem ol i save bihainim long heven.” (Matyu 6:10) Ples antap na graun i bin kamap long laik bilong Jehova yet. Ol strongpela lain long heven i singaut olsem: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (KTH 4:11) Jehova i gat wanpela laik long “ol samting bilong heven na bilong graun.” (Efesus 1:8-10) Orait taim yumi prea long laik bilong God i mas kamap, i olsem yumi askim Jehova long kamapim dispela samting em i tingting pinis long mekim. Na tu, yumi soim olsem yumi gat laik tru long lukim laik bilong God i kamap long heven na graun olgeta.
12 Na taim yumi beten olsem, yumi kamapim olsem yumi laik stretim wokabaut bilong yumi na bai em i stret wantaim laik bilong Jehova. Jisas i tok: “Kaikai bilong mi, em long bihainim laik bilong [God] na long pinisim wok em i bin givim mi.” (Jon 4:34) Olsem Jisas, yumi ol Kristen i dediket pinis, yumi amamas long mekim laik bilong God. Yumi laikim tumas Jehova na Pikinini bilong em na dispela i kirapim yumi na yumi ‘no bihainim moa ol laik bilong olpela bel. Nogat. Yumi bihainim laik bilong God.’ (1 Pita 4:1, 2; 2 Korin 5:14, 15) Yumi wok strong na bai yumi no mekim ol samting yumi save i no stret wantaim laik bilong Jehova. (1 Tesalonaika 4:3-5) Yumi lusim sampela samting na bai yumi gat taim bilong ritim Baibel na stadi, na long dispela rot yumi “save gut long laik bilong Bikpela,” na wanpela laik bilong em, em yumi autim “dispela gutnius bilong kingdom.”—Efesus 5:15-17; Matyu 24:14.
Laik Bilong Jehova Long Heven
13. Olsem wanem laik bilong God i bin wok long kamap paslain tru long taim Satan i bikhet?
13 Ol i bin mekim laik bilong Jehova long heven paslain tru long taim wanpela pikinini spirit bilong em i bikhet na kamap Satan. Buk Sindaun i tok piksa long namba wan Pikinini bilong God na i kolim em olsem gutpela tingting na save. Em i soim olsem inap planti yia tru, em yumi no inap kaunim ol yia bilong en, Pikinini bilong God i “bin amamas i stap oltaim long ai bilong Bikpela,” na em i amamas long mekim laik bilong Papa bilong em. Bihain em i kamap “saveman i bosim wok” bilong Jehova long wokim olgeta samting “long heven na long graun . . . em olgeta samting yumi save lukim na samting yumi no inap lukim.” (Sindaun 8:22-31; Kolosi 1:15-17) Jisas i stap olsem Tok, o Mausman, bilong Jehova.—Jon 1:1-3.
14. Yumi ken kisim wanem save long Song 103 long olsem wanem ol ensel i save mekim laik bilong Jehova long heven?
14 Man bilong raitim song i soim yumi olsem wok king bilong Jehova i antap long olgeta samting, na ol bikpela lain ensel ol i save harim ol tok bilong em bilong skulim ol na tok em i givim long ol bilong bihainim. Em i tok: “Bikpela i stap king long heven, na em i bos bilong olgeta samting. Yupela olgeta ensel bilong Bikpela, yupela i gat bikpela strong. Yupela i save bihainim tok bilong en, yupela i save putim yau gut long tok bilong en. Orait yupela i mas litimapim nem bilong Bikpela. Yupela ol wokman bilong Bikpela, yupela i stap long heven na i save bihainim laik bilong em, yupela litimapim nem bilong em. Yupela olgeta samting Bikpela i bin wokim na i stap long olgeta hap, na em yet i stap king bilong yupela, litimapim nem bilong Bikpela.”—Song 103:19-22.
15. Taim Jisas i kisim namba bilong bosim Kingdom, olsem wanem long laik bilong God long heven?
15 Taim Satan i bikhet pinis, em i gat rot yet long raun long heven, olsem Buk Jop i tok. (Jop 1:6-12; 2:1-7) Tasol Buk Kamapim Tok Hait i tok profet long wanpela taim bai kamap na ol bai rausim Satan wantaim ol spirit nogut bilong em long heven. Yumi ken ting dispela taim i bin kamap bihain liklik long Jisas Krais i kisim namba bilong bosim Kingdom long 1914. Kirap long dispela taim, i no gat ples moa bilong ol dispela bikhetlain long heven. Long nau ol i stap hia long graun. (KTH 12:7-12) Long nau i no gat wanpela long heven i sutim tok long wok king bilong Jehova—olgeta long heven i bungim nek wantaim bilong tok amamas long “Pikinini Sipsip,” Krais Jisas, na litimapim nem bilong Jehova, em ol i daun long em. (KTH 4:9-11) Tru tumas, long heven ol i wok long mekim laik bilong Jehova.
Laik Bilong Jehova Long Graun
16. Olsem wanem dispela beten Jisas i skulim yumi long en i kamapim klia olsem tok bilong Kristendom long ol man bai kisim laip we, dispela tok i no stret?
16 Ol lotu bilong Kristendom i ting i no gat sampela samting God i tingting pinis long mekim long graun, long wanem, ol i tok olgeta gutpela man i save go long heven. Tasol Jisas i skulim yumi long prea olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Tasol yu ting long nau ol man i mekim laik bilong Jehova long dispela graun em pait na ol pasin i no stret na sik na dai i pulap tru long en? Nogat tru! Olsem na yumi mas prea strong long laik bilong Jehova i mas kamap long graun, wankain olsem dispela promis aposel Pita i bin raitim: “God i promis pinis long em bai i wokim nupela skai [em Kingdom, o gavman, bilong Krais] na nupela graun [em stretpela lain man long graun], na stretpela pasin tasol bai i stap long en. Yumi wet long dispela samting tasol i mas kamap.”—2 Pita 3:13.
17. Jehova i tingting pinis long mekim wanem long dispela graun?
17 Jehova i gat wanpela laik na em i wokim graun. Em i kirapim profet Aisaia long raitim tok olsem: “Bikpela tasol em i God. Em i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en. Em i save tok olsem, ‘Mi wanpela tasol mi Bikpela, na i no gat narapela god moa i stap.’ ” (Aisaia 45:18) God i bin putim namba wan man na meri long wanpela gaden olsem paradais na em i tokim tupela: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:27, 28; 2:15) Em nau, i klia tru olsem God i tingting pinis olsem ol stretpela man em skin bilong ol i gutpela olgeta ol bai stap long graun na ol i amamas long i stap aninit long wok king bilong Jehova na i stap oltaim oltaim long Paradais em Krais i bin promis long en.—Song 37:11, 29; Luk 23:43, NW.
18, 19. (a) Wanem samting i mas kamap pastaim na bai laik bilong God i ken kamap tru long graun? (b) Long stori i kamap bihain long dispela, bai yumi skelim wanem ol narapela samting long dispela beten bilong Jisas?
18 Laik bilong Jehova long dispela graun i no inap kamap tru olgeta long dispela taim i gat ol man na meri long en i save sakim wok king bilong em. God bai mekim wok long ol strongpela ensel em Krais bai bosim, na Em bai “bagarapim ol man i bin bagarapim graun.” Olgeta samting bilong dispela graun em Satan i bosim, wantaim ol lotu giaman, na ol wok politik i save paulim ol samting, na ol bikpela kampani i mangal long mani na i mekim pasin giaman, na ol wok ami samting i save bagarapim ol samting na ol man, ol dispela samting bai pinis olgeta. (KTH 11:18; 18:21; 19:1, 2, 11-18) Jehova bai kamapim long ples klia tru olsem i stret em i stap nambawan bos, na dispela bai mekim nem bilong em i stap holi. Yumi prea long olgeta dispela samting i mas kamap taim yumi tok: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
19 Tasol long beten Jisas i skulim yumi long en, em i soim olsem yumi ken prea long ol samting bilong yumi tu. Long stori i kamap bihain long dispela, bai yumi skelim ol samting olsem em i bin kolim taim em i skulim yumi long beten.
[Futnot]
a Lukim sapta 6 bilong buk Putim Yau Long Tok Profet Bilong Daniel!, ol Witnes Bilong Jehova i wokim.
Sampela Askim
• Bilong wanem i stret yumi kolim Jehova olsem “Papa bilong mipela”?
• Bilong wanem em i bikpela samting tru long yumi mas prea long nem bilong Jehova i mas i stap holi?
• Bilong wanem yumi save prea long Kingdom Bilong God i mas i kam?
• Taim yumi prea long laik bilong God i mas kamap long graun olsem i stap long heven, dispela i makim wanem samting?
[Piksa long pes 9]
Ol beten bilong Jisas i narapela kain tru long beten bilong ol Farisi em ol i mekim olsem ol i holi tru
[Piksa long pes 10]
Ol Kristen i save prea long Kingdom Bilong God i mas i kam, na nem bilong em i mas i stap holi, na laik bilong em i mas kamap