Beten Bilong Bikpela—Mining Bilong En Long Yu
BETEN Bilong Bikpela, em Jisas Krais i kamapim taim em i mekim Bikpela Tok Long Maunten, em i stap long Baibel long Matyu sapta 6, ves 9 i go 13. Paslain long Jisas i kolim dispela beten, em i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”—Matyu 6:7.
Olsem na i klia tru olsem Jisas i no laik bai yumi kolim olgeta wan wan tok bilong dispela beten. Tru, bihain em i kolim gen dispela beten bilong sampela narapela i ken harim. (Luk 11:2-4) Tasol ol tok bilong dispela beten long Gutnius bilong Matyu na Luk i no wankain olgeta. Na tu, ol beten Jisas na ol disaipel i mekim bihain, ol i no bihainim stret ol wan wan tok bilong dispela beten Jisas i bin skulim ol disaipel long en.
I gat wanem as na Beten Bilong Bikpela i stap long Baibel? Long rot bilong dispela beten, Jisas i skulim yumi long wanem kain beten God i orait long en. Na long dispela beten, yumi kisim bekim bilong sampela bikpela askim. Orait nau yumi ken skelim olgeta wan wan hap bilong dispela beten.
Wanem Nem Bilong God?
“Papa bilong mipela, yu stap long heven, nem bilong yu i mas i stap holi.” (Matyu 6:9) Dispela tok long kirap bilong beten i helpim yumi long go klostu long God long taim yumi kolim em “papa bilong mipela.” Olsem pikinini i save go long gutpela papa i pilim tru ol tingting na hevi bilong em, yumi ken go long Papa bilong yumi long heven na bilip tru olsem em i gat laik long harim beten bilong yumi. King Devit i tok: “Yu save harim beten bilong mipela. Olsem na mipela olgeta manmeri i mas i go long yu.”—Song 65:2.
Jisas i tokim yumi long beten long nem bilong God i mas i stap holi. Tasol wanem nem bilong God? Baibel i bekim dispela askim olsem: “Yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (Song 83:18, NW ) Olsem wanem? Yu bin lukim dispela nem Jehova?
Nem bilong God, Jehova, i stap klostu 7,000 taim long ol olpela manuskrip bilong Baibel. Tasol sampela man bilong tanim tok i bin rausim dispela nem long Baibel bilong ol. Olsem na i stret yumi beten askim Man Bilong Wokim yumi long mekim holi nem bilong em. (Esekiel 36:23) Wanpela rot bilong mekim samting i stret wantaim dispela beten, em yumi ken kolim nem bilong Jehova taim yumi beten long God.
Wanpela meri, nem bilong em Patricia, i bin go bikpela insait long lotu Katolik na em i save gut long Beten Bilong Bikpela. Em i mekim wanem taim wanpela Witnes Bilong Jehova i soim em nem bilong God long Baibel? Em i tok: “Man! Mi kirap nogut. Olsem na mi kisim Baibel bilong mi yet, na nem i stap long dispela Baibel tu. Orait nau Witnes i soim mi Matyu 6:9, 10 na em i tok nem bilong God i stap insait long Beten Bilong Bikpela. Mi amamas nogut tru na mi askim em long stadi wantaim mi long Baibel.”
Laik Bilong God i Mas Kamap Long Graun
“Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Olsem wanem truim bilong dispela hap bilong beten bilong Jisas bai kamap? Planti manmeri i ting olsem heven em ples bilong bel isi. Baibel i tok heven em ples bilong Jehova we “bikpela lait na strong bilong [em] i pulap long en.” (Aisaia 63:15) Em nau, long dispela as yumi beten askim God long kamapim laik bilong em long graun olsem ol i save “bihainim long heven”! Tasol tru dispela samting bai kamap?
Profet bilong Jehova, Daniel, i tok profet: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king [bilong graun] na kingdom bilong en bai i stap oltaim.” (Daniel 2:44) Klostu nau dispela Kingdom, o gavman, long heven bai kirap mekim wok bilong kamapim bel isi long olgeta hap bilong graun na bosim ol man long stretpela pasin.—2 Pita 3:13.
Taim yumi beten long Kingdom Bilong God i mas i kam na laik bilong em i mas kamap long graun, dispela i kamapim olsem yumi bilip na dispela bilip i no ken lus nating. Kristen aposel Jon i raitim tok olsem: “Long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ” Na Jon i raitim moa: “Na dispela Man i sindaun long sia king, em i tok . . . ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ”—KTH 21:3-5.
Ol Samting Bilong Skin Yumi Mas i Gat
Long dispela beten, Jisas i soim olsem namba wan samting yumi mas tingim taim yumi beten em ol samting bilong nem bilong God na laik bilong em. Tasol dispela beten i soim olsem yumi ken askim Jehova long ol samting bilong yumi yet.
Namba wan samting i olsem: “Nau yu ken givim mipela kaikai inap long dispela de.” (Matyu 6:11) Yumi no askim God long mani kago. Jisas i tok yumi mas beten askim God olsem “olgeta de yu ken givim mipela kaikai inap bilong dispela de.” (Luk 11:3) Olsem na yumi ken bilip tru na beten olsem God bai givim yumi ol samting yumi mas i gat long olgeta wan wan de sapos yumi laikim em na bihainim ol tok bilong em.
Sapos yumi tingting planti long ol hevi bilong mani samting, dispela inap mekim na yumi lusim pasin bilong tingim ol samting bilong spirit na yumi no mekim ol samting God i laik yumi mas mekim. Tasol sapos yumi putim lotu bilong God i go pas long ol narapela samting long i stap bilong yumi, orait yumi ken bilip olsem taim yumi beten askim God long ol samting bilong skin, olsem kaikai na laplap samting, em bai harim beten bilong yumi. Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:26-33, Nupela Testamen na Ol Sam) I hatwok long painim stretpela pasin bilong God, long wanem, yumi olgeta i gat sin na yumi laik bai God i ken lusim. (Rom 5:12) Beten Bilong Bikpela i kolim dispela samting tu.
Lusim Ol Rong
“Lusim ol rong bilong mipela, olsem mipela i save lusim ol rong ol arapela i mekim long mipela.” (Matyu 6:12; Luk 11:4) Olsem wanem? Tru tru God Jehova bai lusim ol rong bilong yumi?
Tru, King Devit bilong Israel bipo i bin mekim sampela bikpela rong, tasol em i tanim bel na beten olsem: “Bikpela, yu gutpela tru na yu save rausim sin bilong mipela. Yu save laikim tumas olgeta manmeri i save beten long yu.” (Song 86:5) Dispela i save mekim gut bel bilong yumi, a? Papa bilong yumi long heven i redi long “rausim” sin bilong ol man i tanim bel na beten long em. God Jehova inap rausim ol sin bilong yumi na pinisim olgeta.
Tasol Jisas i kolim wanpela samting yumi yet i mas mekim: Bilong God i ken lusim rong bilong yumi, yumi mas lusim rong bilong ol arapela. (Matyu 6:14, 15) Maski 3-pela pren i mekim nogut long stretpela man Jop, em i lusim rong bilong ol, na em i beten bilong God i ken helpim ol tu. (Jop 42:10) Sapos yumi lusim rong ol arapela i mekim long yumi, God bai amamas long dispela na marimari long yumi.
God i redi long harim ol beten bilong yumi na dispela i mas kirapim yumi long mekim ol samting em i laikim. Yumi inap mekim olsem, maski yumi sinman. (Matyu 26:41) Long dispela samting tu Jehova inap helpim yumi, olsem Jisas i kamapim klia long laspela hap bilong dispela beten.
Kisim Helpim Long Bihainim Stretpela Rot
“Yu no ken larim ol traim i kamap long mipela, tasol yu ken kisim bek mipela long ol samting nogut.” (Matyu 6:13) Jehova i no larim ol traim i kamap long yumi na yumi no gat strong long sakim, nogat; na tu, em i no pulim yumi long mekim sin. Baibel i tok: “Sin i no inap pulim God, na God i no save pulim man long mekim sin.” (Jems 1:13) God i larim ol traim i kamap long yumi, tasol em inap kisim bek yumi long “samting nogut”—em Satan, Nambawan Man Bilong Traim yumi.
Aposel Pita i tokim ol brata Kristen: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Satan i bin traim tu gutpela man Jisas Krais! Satan i laik mekim wanem? Em i laik pulim Jisas na bai em i lusim pasin bilong lotu tru long God Jehova. (Matyu 4:1-11) Sapos yu gat laik long mekim wok bilong God, orait Satan i gat laik long bagarapim yu tu!
Long rot bilong ol man bilong dispela graun Satan i bosim, ating em inap pulim yumi long bihainim ol pasin God i no laikim. (1 Jon 5:19) Olsem na oltaim yumi mas beten askim God long helpim yumi, na moa yet taim wanpela samting i wok strong long pulim yumi. Na sapos yumi lotuim Jehova olsem tok bilong em long Baibel i makim, em bai lukautim yumi na helpim yumi long sakim Satan. Baibel i tok, “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat.”—1 Korin 10:13.
Bilip Long God i Bikpela Samting
Em i gutpela samting tru long save olsem Papa bilong yumi long heven i tingim yumi olgeta wan wan! Em i mekim na Pikinini bilong em, Jisas Krais, i skulim yumi long pasin bilong beten. Dispela samting i mas kirapim yumi long mekim pasin em God Jehova i laikim. Olsem wanem yumi ken mekim olsem?
Baibel i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Olsem wanem yumi inap kisim dispela kain bilip? Baibel i tok: “Yumi harim tok bilong God na dispela i kirapim bilip.” (Rom 10:17) Ol Witnes Bilong Jehova i save amamas long stori long ol tok bilong Baibel wantaim olgeta man i gat laik tru long bilip long God na mekim wok bilong em.
Mipela laik bai dispela stori bilong Beten Bilong Bikpela i helpim yu long kliagut moa long mining bilong en. Sapos yu wok long kisim sampela save moa long Jehova na long ol gutpela samting em bai mekim long “ol man i wok long painim em,” yu inap strongim bilip bilong yu long God. I gutpela sapos yu kisim sampela save moa long em na long ol samting em i tingting pinis long mekim na bai yu ken pas gut wantaim Papa bilong yu long heven i go inap oltaim oltaim.—Jon 17:3.
[Rait long pes 5]
“Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven. Nau yu ken givim mipela kaikai inap long dispela de. Na yu ken lusim ol rong bilong mipela, olsem mipela i save lusim ol rong ol arapela i mekim long mipela. Na yu no ken larim ol traim i kamap long mipela, tasol yu ken kisim bek mipela long ol samting nogut.”—Matyu 6:9-13
[Piksa long pes 7]
Jehova i save lukautim ol man i laikim em long ol samting ol i mas i gat
[Piksa long pes 7]
Na tu, God i save helpim yumi long sakim Satan
[Piksa long pes 7]
Olsem Jop, sapos yumi lusim rong ol arapela i mekim long yumi, God bai marimari long yumi