Kaikai Wantaim Wanpela Farisi

Jisas i stap yet long Judia na wanpela Farisi i singautim em long i go kaikai wantaim em. I luk olsem dispela kaikai i kamap long belo samting, na i no long apinun. (Luk 11:37, 38; skelim Luk 14:12.) Paslain long kaikai, ol Farisi i save bihainim kastam bilong ol long wasim han i go inap long skru bilong han. Tasol Jisas i no mekim olsem. (Matyu 15:1, 2) Dispela pasin bilong wasim han i no brukim Lo Bilong God na em i no samting God i tokim ol long mekim.

Dispela Farisi i kirap nogut olsem Jisas i no bihainim dispela pasin bilong wasim han. Jisas i luksave long dispela na em i tok: “Yupela ol Farisi, yupela i save klinim ausait bilong kap na dis, tasol bel bilong yupela i pulap long pasin gridi na pasin nogut. Yupela ol krankiman! Man i wokim ausait bilong ol samting, em i wokim tu insait bilong ol samting, a?”—Luk 11:39, 40.

Pasin bilong wasim han paslain long kaikai i no as na Jisas i mekim dispela tok, nogat. Em i toktok long pasin bilong lotu long tupela maus. Ol Farisi na ol narapela i bihainim dispela kastam bilong wasim han, ol i no rausim pasin nogut long bel bilong ol na bai ol i kamap klin. Olsem na Jisas i stretim ol, em i tok: “Ol samting i stap insait, yupela i mas givim bilong helpim ol rabisman. Na harim! Yupela bai stap klin long olgeta arapela samting.” (Luk 11:41) Tok bilong Jisas i stret tru! Bel i mas kirapim man long givim samting long ol narapela, na em i no giaman long mekim stretpela pasin bilong amamasim ol man.

Ol dispela man i gat pasin bilong givim ol samting. Tasol Jisas i tok: “Yupela i save givim namba 10 hap bilong mint, na ru, na ol arapela kaikai bilong gaden. Tasol yupela i givim baksait long stretpela pasin na pasin laikim bilong God. Yupela i gat wok long givim namba 10 hap, tasol yupela i mas mekim tu ol dispela arapela samting.” (Luk 11:42) Lo Bilong God i tok ol i mas tilim ol kaikai bilong gaden long 10-pela hap na givim wanpela hap long God. (Lo 14:22) Ol kaikai bilong gaden i makim tu ol kumu sayor bilong mekim kaikai i swit. Ol Farisi i strong long bihainim dispela lo long givim ol namba 10 hap bilong mint, ru, na ol kumu sayor, tasol olsem wanem long ol bikpela tok bilong Lo, olsem bihainim stretpela pasin na mekim pasin daun long ai bilong God?—Maika 6:8.

Jisas i tok moa: “Yupela ol Farisi, yupela lukaut! Long wanem, insait long ol sinagog yupela i laikim ol sia i stap long fran na yupela i laik bai ol man i tok gude long yupela long ol ples bung long maket. Yupela lukaut! Long wanem, yupela i olsem ol matmat i no stap ples klia na ol man i wokabaut antap long ol na ol i no save.” (Luk 11:43, 44) Yes, ol man inap pundaun antap long ol dispela matmat na nau ol i no stap klin long ol samting bilong lotu. Jisas i mekim dispela tok bilong kamapim long ples klia olsem ol Farisi i no bihainim ol stretpela pasin bilong lo, tasol ol manmeri i no luksave long dispela samting.—Matyu 23:27

Wanpela man i save gut long Lo Bilong God i komplein na i tok: “Tisa, ol dispela tok yu mekim i bagarapim bel bilong mipela tu.” Jisas i mekim kain tok na bai ol i luksave olsem ol i no helpim ol manmeri. Em i tok: “Yupela ol man husat i save gut long Lo, yupela lukaut! Long wanem, yupela i putim ol hevipela samting antap long ol man na ol i hatwok long karim, tasol yupela yet i no save tatsim ol dispela hevipela samting long wanpela pinga bilong yupela. Yupela lukaut! Long wanem, yupela i wokim ol matmat bilong ol profet, tasol ol tumbuna bilong yupela i bin kilim ol i dai.”—Luk 11:45-47.

Ol hevipela samting Jisas i toktok long en i makim ol kastam ol Farisi i harim long maus bilong ol tumbuna, na tingting bilong ol long Lo Bilong God. Ol dispela man i strong long olgeta man i mas bihainim ol dispela lo, na i olsem ol i putim hevi long ol. Ol tumbuna bilong ol i bin kilim i dai ol profet bilong God, kirap long Abel na i kam. Ol Farisi i mekim olsem ol i onarim ol profet taim ol i wokim ol matmat bilong ol, tasol tru tru ol i bihainim tingting na pasin bilong ol tumbuna bilong ol. Na tu, ol i wok long painim rot long kilim nambawan Profet bilong God. Jisas i tok, God bai bekim rong bilong ol dispela lain pipol. Na long 70 C.E dispela samting i bin kamap tru, em 38 yia bihain.

Jisas i tok moa: “Yupela ol man husat i save gut long Lo, yupela lukaut! Long wanem, yupela i tekewe ki bilong kisim save. Yupela yet i no go insait na ol man i laik i go insait, yupela i traim long stopim ol.” (Luk 11:52) Ol dispela man i gat wok long kamapim klia mining bilong Tok Bilong God, tasol ol i no mekim olsem. Ol i pasim rot bilong ol man long kisim save na kliagut long Tok Bilong God.

Ol Farisi na ol saveman bilong lo i mekim wanem taim ol i harim dispela tok? Taim Jisas i laik lusim ol, ol i kros na sutim planti askim long em. I no olsem ol i laik kisim save na ol i askim, nogat. Ol i laik trikim Jisas na bai em i mekim wanpela tok na ol i ken arestim em.