Yu Wanpela Gutpela Samting Tru Long Ai Bilong God!
“Oltaim mi save laikim yupela tumas na mi save mekim gutpela pasin long yupela, bilong mekim yupela i kam klostu long mi.”—JEREMAIA 31:3.
OL INAP lukim pasin sori bilong em long ai bilong em. Dispela man Jisas em i no olsem ol bikman long lotu bilong ol, nogat; em i save tingim ol. Em i sori long ol dispela manmeri, long wanem, “ol i stap nogut tru, olsem ol sipsip i no gat wasman.” (Matyu 9:36) Ol bikman bilong lotu i gat wok long i stap olsem gutpela wasman i mekim pasin sori na marimari long ol, olsem God bilong ol i save mekim. Tasol ol i lukim ol man nating i olsem ol pipia lain tasol, na ol i ting God i makim pinis ol dispela lain bambai ol i mas bagarap.a (Jon 7:47-49; skelim wantaim Esekiel 34:4.) Dispela tingting bilong ol i kranki tru na i no stret liklik wantaim ol tok bilong Baibel na tingting bilong God long lain bilong em. Em i bin tokim lain bilong em, em ol Israel: “Oltaim mi save laikim yupela tumas na mi save mekim gutpela pasin long yupela, bilong mekim yupela i kam klostu long mi.”—Jeremaia 31:3.
2 Tasol ol Farisi i no namba wan lain i laik givim tingting long ol gutpela sipsip bilong Jehova olsem ol i nogut tasol na ol i no inap mekim wanpela gutpela wok. Yumi ken tingim Jop. Long ai bilong Jehova Jop em i stretpela man na i no gat asua long wanpela samting, tasol tripela pren giaman bilong em i tok olsem Jop i save mekim pasin pamuk na em i man nogut bilong lusim God na lotuim ol god giaman, na em bai dai na i no gat wanpela samting bilong em bai i stap bilong makim olsem em i bin i stap long graun. Ol i tok, God i no ken tingim wanpela stretpela pasin bilong Jop, long wanem, God i no save bilip tu long ol ensel bilong em yet, na heven tu i no klin long ai bilong em!—Jop 1:8; 4:18; 15:15, 16; 18:17-19; 22:3.
3 Long nau tu, Satan i wok yet long mekim dispela “pasin bilong trik na giaman” bilong givim tingting long ol gutpela sipsip bilong Jehova olsem ol i nogut tasol na ol i no inap mekim wanpela gutpela wok. (Efesus 6:11) Tru, planti taim em i save wok long pulim ol man i gat pasin hambak na pasin antap na bai ol i ting ol i samting tru. (2 Korin 11:3) Tasol em i save amamas tru long bagarapim bel bilong man na bai em i ting em i samting nating tasol. Na Satan i mekim moa yet nau long “taim bilong las de” i gat planti hevi long en. Long nau, planti manmeri i go bikpela insait long ol famili i no save mekim pasin sori long pikinini. Na long olgeta de planti ol i mas wok o i stap wantaim ol man bilong kros pait na bikhet. (2 Timoti 3:1-5) Inap planti yia pinis ol man i bin mekim nogut long ol na paitim ol, o ol man i birua long ol, long wanem, ol i bilong narapela lain o skin, o sampela i bin mekim pasin sem long ol taim ol i pikinini yet, na dispela i mekim na ol i ting ol i nogut pinis na i no inap wanpela man i ken laikim ol. Wanpela man i raitim pas na i tok: “Mi no save laikim wanpela man, na mi pilim olsem i no gat wanpela man i save laikim mi. Mi hatwok long bilip olsem God i save tingim mi.”
4 Tasol dispela tingting olsem yumi nogut tasol, dispela i narapela kain olgeta long tok i tru bilong Baibel, olsem Krais i bin givim laip bilong em olsem ofa bilong baim bek ol man. (Jon 3:16) Orait, sapos God inap tromoi bikpela pe tru—em laip bilong Pikinini bilong em yet—bilong baim yumi bambai yumi gat rot bilong i stap oltaim, God i mas laikim tru yumi, a? Olsem na yumi ken save, long ai bilong em yumi olsem gutpela samting!
5 Na sapos yumi ting God i no amamas long yumi, dispela bai bagarapim tru bel bilong yumi, na bai yumi ting olgeta wok bilong yumi i samting nating tasol! (Skelim wantaim Sindaun 24:10.) Sapos man i gat dispela kain tingting, orait maski wanpela man i laik strongim bel bilong em long sampela gutpela tok bilong helpim em moa long mekim wok bilong God, ating em bai ting dispela tok i bilong kotim em, olsem em i no bin mekim gut wok bilong God. Em bai ting, dispela i wankain olsem tingting bilong em yet, olsem ol wok bilong God em i mekim i no inap long mak God i laikim.
6 Sapos yu gat kain tingting olsem long yu yet, yu no ken bel hevi tumas. Planti brata sista ol i save kotim na skelim tumas ol yet long sampela taim. Tasol Tok Bilong God, em Baibel, em i bilong “stretim ol manmeri tingting bilong ol i no stret,” na bilong “brukim ol strongpela banis.” (2 Timoti 3:16; 2 Korin 10:4) Aposel Jon i tok: “Maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.” (1 Jon 3:19, 20) Orait, nau yumi ken toktok long tripela rot bilong Baibel long skulim yumi olsem yumi gutpela samting tru long ai bilong Jehova.
Tingting Bilong Jehova Long Yu
7 Namba wan rot, em Baibel i skulim yumi olsem God i tingim yumi olgeta wan wan i olsem samting i gat bikpela pe bilong en. Jisas i tok: “Yupela i save, ol man i save baim 5-pela liklik pisin long 2 toea tasol. Na God i no save lusim tingting long wanpela bilong ol dispela liklik pisin. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Luk 12:6, 7) Long dispela taim bipo, dispela kain liklik pisin em i wanpela kaikai i gat liklik pe tru, tasol Man bilong wokim ol i tingim olgeta wan wan. Orait, dispela tok bilong Jisas i givim save long yumi olsem: Yumi ol manmeri i winim tru ol liklik pisin, olsem na God i save long olgeta liklik liklik samting bilong yumi. I olsem em i kaunim pinis olgeta wan wan gras long het bilong yumi!
8 Tru God inap kaunim olgeta wan wan gras bilong yumi ol manmeri? Sapos yu ting dispela tok bilong Jisas i no inap kamap tru, tingim dispela samting: God i save tingim olgeta liklik liklik samting bilong ol gutpela wokboi bilong em, olsem na em inap kirapim bek ol long matmat—em inap wokim gen skin bilong ol i wankain stret olsem bilong pastaim, wantaim olgeta pasin bilong ol na olgeta tingting ol i bin bungim long kru bilong ol inap planti planti yia, na olgeta samting i bin painim ol na ol i bin putim long tingting bilong ol; God bai putim gen ol dispela tingting long kru bilong ol. Olsem na i no hatwok long em i kaunim olgeta gras i stap long het bilong yumi (het bilong yumi i save kamapim olsem 100,000 gras). Dispela wok em i liklik samting tasol long God!—Luk 20:37, 38.
Jehova i Lukim Wanem Gutpela Samting Long Yumi?
9 Namba tu samting, em Baibel i skulim yumi long ol samting Jehova i lukim long yumi na em i save laikim tru. Olsem: Em i save amamas long ol gutpela pasin bilong yumi na ol wok bilong em yumi save mekim. King Devit i bin tokim pikinini bilong em, Solomon: “Bikpela i save long olgeta tingting na laik bilong yumi.” (1 Stori 28:9) Nau God i wok long lukim bel bilong ol bilion bilion manmeri nau long dispela taim nogut bilong pait na birua, olsem na yumi save, em i amamas tru taim em i lukim bel bilong wanpela man i laikim tumas bel isi, na tok i tru, na stretpela pasin! (Skelim wantaim Jon 1:47; 1 Pita 3:4.) Orait, God i save mekim wanem taim em i lukim bel bilong wanpela man i save laikim em tumas, na dispela man i laik kisim save long em na givim dispela save long ol narapela man? Long Malakai 3:16 Jehova i tok, em i save putim yau taim em i harim ol man i tokim ol narapela man long em; na tu, em i gat “wanpela buk i gat nem bilong ol manmeri i save stap aninit [olsem pret] long Bikpela na i tingting long em oltaim.” Ol dispela gutpela pasin bilong ol i gutpela samting tru long ai bilong em!
10 Tasol taim bel bilong man i kotim na daunim em, ating bel bai sakim dispela tok bilong Baibel olsem yumi gutpela samting tru long ai bilong God. Ating oltaim bel bilong em bai tok: ‘I gat planti manmeri ol i save mekim moa yet ol dispela gutpela pasin, winim mi. Taim Jehova i skelim mi wantaim ol, ating em i no amamas liklik long mi!’ Tasol Jehova i no save skelim yumi wantaim ol narapela. Na em i no putim ol mak i antap tumas na bai yumi no inap winim, nogat. (Galesia 6:4) Em i save isi tru long lukim bel bilong ol man, na em i save laikim tru olgeta gutpela pasin bilong ol, maski ol i planti o i liklik tasol.
11 I olsem: Bipo Jehova i tok long ol i mas kilim i dai lain olgeta bilong King Jeroboam, em ol i lusim em na lotuim ol god giaman, na ol i mas rausim ol olsem “pekpek.” Tasol Jehova i tok long ol i mas planim gut wanpela pikinini man bilong king, em Abiya. Bilong wanem? Long wanem, Jehova, “Bikpela bilong yumi Israel, i lukim em wanpela tasol i mekim gutpela pasin namel long olgeta lain famili bilong Jeroboam.” (1 King 14:10, 13) Olsem wanem? Abiya em wanpela gutpela man bilong lotuim Jehova? Ating nogat, long wanem, em i bin i dai olsem ol narapela lain nogut bilong em. (Lo 24:16) Tasol Jehova i lukim wanpela “gutpela pasin” long bel bilong Abiya na Em i mekim dispela samting. Wanpela buk (Matthew Henry’s Commentary on the Whole Bible) i tok: “Sapos man i gat wanpela liklik hap gutpela pasin, God bai painim; God i wok long painim sampela gutpela pasin long yumi, na taim em i lukim, maski dispela gutpela pasin i liklik tasol, em i amamas long en.” Na tingim dispela: Sapos God i lukim wanpela liklik hap gutpela pasin long bel bilong yu, em inap mekim i kamap bikpela sapos yu wok strong long mekim wok bilong em na stap gut long em.
12 Na ol wok bilong Jehova yumi save mekim, em i save amamas long en. Song 139:1-3 i tok: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi. Yu save lukim mi long taim mi mekim wok na long taim mi slip. Yu save long olgeta pasin bilong mi.” Olsem na Jehova i save long olgeta samting yumi mekim. Tasol Jehova i no save tasol long en. Long tok Hibru, dispela tok “yu save long olgeta pasin bilong mi,” ol inap kolim tu olsem “olgeta pasin bilong mi i olsem gutpela samting tru long yu.” (Skelim wantaim Matyu 6:19, 20.) Tasol yumi ol sinman na yumi save popaia planti taim, na olsem wanem Jehova inap laikim tru ol pasin bilong yumi?
13 Sampela saveman i ting, taim Devit i tok, Jehova i save “lukim” em taim em i wok na taim em i malolo, long tok Hibru dispela tok “lukim” i olsem “sipim.” Wanpela buk i tok: “Insait bilong dispela tok i olsem . . . sipim ol pipia na larim olgeta wit i stap—olsem kisim bek olgeta samting i gutpela tru. I olsem God i sipim em. . . . God i tromoi olgeta pipia, olsem olgeta samting i no gat pe bilong en, na em i lukim ol samting i stap yet i olsem samting tru.” Tasol taim bel i kotim yumi na tok yumi nogut tasol, em i save sipim ol wok na pasin bilong yumi long narapela rot—em i wok long sutim tok long yumi long ol popaia o rong yumi bin mekim bipo na daunim ol gutpela wok bilong yumi na mekim olsem i samting nating tasol. Tasol Jehova i save lusim ol rong bilong yumi sapos yumi tanim bel tru na yumi wok strong bambai yumi no ken mekim gen ol dispela rong. (Song 103:10-14; Aposel 3:19) Em i save sipim na tingim ol gutpela wok yumi mekim. Em bai ting, i no stret tru sapos em i lusim tingting long ol dispela gutpela wok—na yumi save, em i no save mekim pasin i no stret, nogat tru!—Hibru 6:10.
14 Wanem sampela gutpela wok God i save laikim tru? Em olgeta wok yumi mekim bilong bihainim pasin bilong Pikinini bilong em, Krais Jisas. (1 Pita 2:21) Na wanpela bikpela wok tru, em wok bilong autim gutnius bilong Kingdom bilong God. Rom 10:15 (NW) i tok: “Ol manmeri i autim gutnius bilong ol gutpela samting, lek bilong ol i naispela tru!” Tru, yumi no save ting lek bilong ol man i “naispela tru,” tasol tok Pol i mekim long dispela ves em i wankain olsem tok i stap long Baibel Greek Septuagint i stori long Rebeka na Resel na Josep—tripela olgeta i gat naispela skin tru. (Stat 26:7; 29:17; 39:6) Olsem na taim yumi mekim wok bilong God bilong yumi, Jehova, dispela em i naispela na gutpela samting tru long ai bilong em.—Matyu 24:14; 28:19, 20.
15 Na narapela pasin Jehova i save laikim tru, em pasin bilong yumi long sanap strong na i no les. (Matyu 24:13) No ken lusim tingting: Satan i laik bai yu givim baksait long Jehova. Olgeta wan wan de yu stap gut long Jehova, yu bin helpim Jehova long bekim tok long Satan, em i bin sutim tok giaman long Jehova. (Sindaun 27:11) Sampela taim i hatwok tru long sanap strong na no ken les. Sik, o hevi bilong mani, o bel hevi, o ol narapela samting, ol inap mekim na i hatwok long karim ol hevi long olgeta wan wan de. Tasol taim yumi karim ol dispela hevi na yumi sanap strong, dispela i gutpela samting moa yet long ai bilong Jehova. Long dispela as, King Devit i askim Jehova long tingting yet long hevi na krai bilong em, na em i tok, “Yu raitim pinis long buk bilong yu.” (Song 56:8) Tru tumas, Jehova i save tingim tru ol krai bilong yumi na ol hevi yumi karim bambai yumi ken i stap gut long em. Ol i gutpela samting tru long ai bilong em.
16 Yumi gat ol gutpela pasin na yumi wok strong long mekim laik bilong Jehova, olsem na yumi ken save, Jehova i lukim planti samting long yumi olgeta wan wan i olsem gutpela samting tru! Maski lain bilong Satan i daunim yumi, Jehova i tingim yumi i olsem ‘ol gutpela samting tru i stap insait long olgeta lain man.’—Hagai 2:7.
Samting Jehova i Bin Mekim
17 Namba 3 samting i olsem: Jehova i save mekim planti samting bilong kamapim klia olsem em i laikim yumi tru. Ofa bilong Krais bilong baim bek ol man, em i wanpela bikpela samting tru bilong bekim tok giaman em Satan i as bilong en, olsem yumi nogut tasol o God i no inap laikim yumi. Yumi no ken tru lusim tingting: Bikpela pen tru Jisas i bin karim long diwai na em i dai, na bikpela pen moa Jehova i bin karim taim em i lukim gutpela Pikinini bilong em i dai, dispela i kamapim klia olsem ol i laikim tru yumi. Na tupela i laikim yumi wan wan. Aposel Pol yet i bilip olsem, long wanem, em i tok: “Pikinini Bilong God em i bin laikim mi tru na em i lusim laip bilong em yet bilong helpim mi.”—Galesia 2:20.
18 Jehova i helpim yumi olgeta wan wan long mekim wok long ofa bilong Krais, na long dispela rot em i kamapim long ples klia olsem em i laikim tru yumi. Long Jon 6:44 Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” Long rot bilong autim tok, em ol i bin autim long yumi wan wan, na long rot bilong dispela spirit holi bilong Jehova em i save mekim wok long en bambai yumi inap kisim gut na bihainim tok i tru maski yumi gat sin na yumi save popaia, long ol dispela rot Jehova i save bringim yumi i kam long Pikinini bilong em na yumi inap tingting long kisim laip i stap oltaim. Olsem na Jehova inap mekim wankain tok long yumi olsem em i bin mekim long ol Israel: “Oltaim mi save laikim yupela tumas na mi save mekim gutpela pasin long yupela, bilong mekim yupela i kam klostu long mi.”—Jeremaia 31:3.
19 Tasol ating long rot bilong beten yumi pilim moa yet olsem Jehova i save laikim tumas yumi. Em i singautim yumi olgeta wan wan long “beten oltaim” long em. (1 Tesalonaika 5:17) Em i save putim yau long beten bilong yumi! Em i ‘Man bilong harim beten.’ (Song 65:2) Em i no bin givim dispela bikpela wok long wanpela man, na em i no givim long Pikinini bilong em tu. Tingim dispela: Man bilong wokim heven na graun na olgeta samting em i laik kirapim yumi long kam klostu long em long rot bilong beten, na yumi no ken pret long mekim. Na taim yu beten long Jehova, ating dispela bai kirapim em long mekim sampela samting em i no ken mekim sapos yu no bin beten long em.—Hibru 4:16; Jems 5:16; lukim Aisaia 38:1-16.
20 Tasol Kristen i gat gutpela tingting em i no inap ting, God i laikim em tumas na i tingim em, olsem na em i samting tru. Kristen i no ken ting olsem. Pol i tok: “Yupela i no ken ting save na pasin bilong yupela i winim ol arapela. Nogat. Yupela i mas skelim gut ol pasin bilong yupela yet na tingting stret, inap long mak bilong bilip God i givim yupela.” (Rom 12:3) Tru, yumi ken amamas long Papa bilong yumi long heven i save laikim tumas yumi, tasol yumi mas bihainim stretpela tingting na yumi mas save, yumi no bin mekim wanpela gutpela samting na bai God i mas laikim tru yumi, nogat.—Skelim wantaim Luk 17:10.
21 Olsem na yumi olgeta wan wan i mas wok strong tru long sakim olgeta tingting em Satan i wok long kirapim nau long dispela taim i laik pinis. Na yumi mas sakim tu dispela tingting olsem yumi nogut tasol na yumi no inap mekim wanpela gutpela wok, o God i no save laikim yumi. Sapos i stap bilong yu long dispela taim nogut i bin skulim yu olsem yu nogut pinis na God i no inap tru long laikim yu, maski sori bilong em i bikpela moa, o yu ting ol gutpela wok bilong yu i liklik samting tru na ai bilong Jehova i no save lukim, maski em inap lukim olgeta samting, o ol sin bilong yu i bikpela tumas na dai bilong gutpela Pikinini bilong em i no inap tekewe ol dispela sin, orait dispela skul yu bin kisim em i giaman tru! Yu mas sakim tru ol dispela tok giaman olsem ol i samting nogut tru long yu! Yumi mas tingting oltaim long tok bilong aposel Pol long Rom 8:38, 39, i tok: “Mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, . . . i no inap pasim laik bilong God, em dispela laik em i givim yumi long Krais Jisas, Bikpela bilong yumi.”
[Ol Futnot]
a Ol i kolim wanpela nem nogut long dispela lain, olsem “ʽam-ha·ʼaʹrets,” insait bilong en i olsem “ol pipia lain bilong graun.” Wanpela saveman i tok, ol Farisi i skulim ol man olsem: Ol i no ken bilip long dispela lain na larim ol i lukautim ol mani samting bilong ol, o bilipim tok bilong ol, o kisim ol i go long haus bilong ol, o go long haus bilong ol, o baim wanpela samting long ol. Na ol bikman bilong lotu i tok, sapos man i givim pikinini meri bilong em long wanpela man bilong dispela lain, i olsem em i pasim han lek bilong meri na givim em long wanpela animal.
Yu Ting Olsem Wanem?
◻ Bilong wanem Satan i laik givim tingting long yumi olsem yumi nogut tasol na God i no save laikim yumi?
◻ Olsem wanem Jisas i bin skulim ol man olsem Jehova i amamas long yumi wan wan?
◻ Olsem wanem yumi save, Jehova i laikim tru ol gutpela pasin bilong yumi?
◻ Olsem wanem yumi ken save, Jehova i laikim tru ol wok bilong em yumi mekim?
◻ Olsem wanem Jehova i bin kamapim long ples klia olsem em i laikim tru yumi wan wan?
[Askim Bilong Stadi]
1. Olsem wanem tingting bilong Jisas long ol manmeri long taim bilong em i narapela kain long tingting bilong ol Farisi?
2. Tripela pren bilong Jop i mekim wanem bilong givim tingting long em olsem em i nogut tasol na God i no laikim em?
3. Long nau Satan i mekim wok long wanem rot bilong givim tingting long ol man olsem ol i nogut tasol na ol i no inap mekim wanpela gutpela wok, na God i no inap laikim ol?
4, 5. (a) Sapos man i gat tingting olsem em i nogut tasol, olsem wanem dispela i narapela kain long tok bilong Baibel? (b) Sapos yumi bilip olsem olgeta wok bilong yumi i nogut tasol, dispela inap nogutim yumi olsem wanem?
6. Wanem nambawan gutpela pasin bilong daunim ol dispela tingting bilong bel i save kotim yumi?
7. Olsem wanem Jisas i bin skulim ol manmeri olsem God i tingim ol i olsem samting i gat bikpela pe bilong en?
8. Olsem wanem yumi ken bilip olsem Jehova inap tru long kaunim olgeta gras i stap long het bilong yumi?
9. (a) Wanem sampela pasin Jehova i save laikim tru? (b) Yu ting bilong wanem Jehova i save laikim tru ol dispela pasin?
10, 11. (a) Olsem wanem sampela i save sakim ol samting i stap ples klia bilong makim olsem Jehova i save laikim tru ol gutpela pasin bilong ol? (b) Samting Jehova i bin mekim long Abiya, olsem wanem dispela i kamapim klia olsem Jehova i save amamas long ol gutpela pasin bilong man, maski ol i planti o i liklik tasol?
12, 13. (a) Olsem wanem Song 139:3 i makim olsem Jehova i save amamas long ol wok yumi mekim? (b) Olsem wanem yumi ken tok, Jehova i save sipim ol wok bilong yumi?
14. Wanem samting i kamapim klia olsem Jehova i amamas long ol wok Kristen yumi mekim?
15, 16. Taim yumi sanap strong na yumi no les, bilong wanem Jehova i amamas tru long dispela samting? Olsem wanem tok bilong King Devit long Song 56:8 i kamapim klia dispela samting?
17. Olsem wanem na ofa bilong Krais i mas kirapim yumi long bilip tru olsem Jehova na Jisas i save laikim tru yumi wan wan?
18. Olsem wanem Jehova i save bringim yumi i kam long Krais?
19. Bilong wanem dispela gutpela samting yumi inap mekim, olsem beten, em i mas kirapim yumi long bilip olsem Jehova i save laikim tru yumi?
20. Tru God i save laikim tumas yumi, tasol bilong wanem yumi no ken hambak long dispela na ting yumi samting tru?
21. Wanem tok giaman em Satan i kirapim na yumi mas sakim long olgeta taim? Wanem tok i tru bilong God yumi mas tingim oltaim?