Baibel i Tok Wanem?

Yu Gutpela Samting Tru Long Ai Bilong God!

WANPELA MERI KRISTEN I TOK: “TAIM MI YANGPELA YET I KAM INAP LONG NAU, PLANTI TAIM MI PILIM OLSEM MI NOGUT TASOL NA MI NO INAP MEKIM WANPELA GUTPELA WOK. MASKI MI LAIKIM TRU JEHOVA NA MI GIVIM BEL LONG MEKIM WOK BILONG EM, TASOL OLTAIM MI PILIM OLSEM SAMTING MI MEKIM EM I NO INAP.”

OLSEM WANEM? Yu save long wanpela man o meri i pilim olsem em i no inap mekim gut wanpela samting o em i nogut tasol? O sampela taim yu yet i pilim olsem? Planti man i save pilim olsem; sampela gutpela wokman bilong God tu. I no gat wanpela man inap abrusim ol samting dispela taim bilong “planti hevi nogut tru” i save kamapim. Planti ol i bin kisim bikpela hevi long ol man ‘i no bosim laik bilong bodi bilong ol, na ol i pait na bagarapim ol man, na ol i birua long olgeta gutpela pasin’​—⁠em ol pasin bilong ‘taim bilong las de.’ (2 Timoti 3:​1-5) Ol man i bin kisim kain bikpela hevi olsem, bel bilong ol inap bagarap tru na ol i pilim olsem ol i nogut olgeta.

Na sampela man i no amamas long ol yet, long wanem, ol mak ol i putim i antap tumas. Na taim ol i no inap winim dispela mak, dispela i strongim tingting bilong ol olsem ol i nogut tasol. Maski i gat wanem as na ol man i pilim olsem ol i nogut tasol, ol bai hatwok long save bilong wanem God o narapela man i laikim ol tru. Tru tumas, ating ol i bilip olsem i no gat wanpela man i ken laikim ol tru.

Tasol God Jehova i no gat dispela kain tingting! Long Tok bilong em, Jehova i tokim yumi long was gut long ol “trik na giaman” bilong Birua bilong em, em Satan. (Efesus 6:​11) Satan i save mekim wok long ol pasin giaman bilong em bambai yumi no lotu moa long God bilong yumi. Bilong mekim olsem, Satan i kirapim yumi long tingting olsem yumi samting nogut na Jehova i no inap laikim tru yumi. Tasol Satan em i “man bilong tok giaman” na “papa tru bilong pasin bilong tok giaman.” (Jon 8:​44) Olsem na yumi no ken larim ol trik bilong em i giamanim yumi! Long Baibel, Jehova i kamapim tingting bilong em yet, na em i tok yumi gutpela samting long ai bilong em.

Stretpela Tingting Long Yumi Yet

Baibel i tok long ol samting nogut bel hevi inap mekim long yumi. Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Sapos longpela taim yumi tingting nogut long yumi yet, dispela inap pinisim strong bilong yumi na yumi pilim olsem yumi no gat strong long sakim ol hevi. Yu ken bilip tru olsem Satan i save gut long dispela samting. I hatwok tru sapos bel bilong yumi i bagarap na yumi pilim olsem yumi samting nating. Tasol taim Satan i laik mekim wok long ol kain tingting olsem, dispela bai mekim na i hatwok moa long karim dispela hevi.

Olsem na em i bikpela samting long yumi kisim stretpela tingting long yumi yet. Aposel Pol i tok: “Mi laik givim dispela tok lukaut long yupela olgeta wan wan. Yupela i no ken ting save na pasin bilong yupela i winim ol arapela. Nogat. Yupela i mas skelim gut ol pasin bilong yupela yet na tingting stret.” (Rom 12:⁠3) Narapela Baibel, em Charles B. Williams i tanim, em i kolim dispela ves olsem: “Mi laik tokim yupela olgeta wan wan, yupela i no ken ting yupela i gutpela samting tru, tasol yupela i mas kisim stretpela tingting long yupela yet.” Olsem na dispela ves i kirapim yumi long tingting stret long yumi yet. Tasol yumi no ken hambak na ting yumi winim ol narapela, na tu, yumi no ken ting yumi samting nating, long wanem, Pol i tok taim yumi gat stretpela tingting, yumi mas ting olsem yumi gat sampela gutpela pasin. Em nau, spirit bilong Jehova i givim tingting long Pol, na em i tok yumi olgeta wan wan i gutpela samting long ai bilong Jehova.

Jisas tu i stori long pasin bilong tingting stret long yu yet taim em i tok: “Yu mas laikim ol wantok olsem yu laikim yu yet.” (Matyu 22:39) Dispela tok ‘olsem yu yet’ i makim olsem yumi mas i gat sampela gutpela tingting long yumi yet. Tru, yumi gat ol pasin kranki na yumi save popaia, tasol taim yumi laik mekim ol samting God i laikim, na yumi bel hevi long ol rong bilong yumi, na yumi askim em long lusim tingting long ol dispela rong, orait; yumi ken tingting gut long yumi yet. Bel bilong yumi inap kotim yumi na yumi ting yumi no gutpela samting, tasol tingim, God ‘i winim tru bel bilong yumi.’ (1 Jon 3:​20) Em nau, tingting bilong Jehova long yumi ating i narapela kain tru long tingting bilong yumi long yumi yet.

Bel i Bagarap

Devit i tok: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:18) Wanpela buk (Matthew Henry’s Commentary on the Whole Bible) i stori long dispela ves olsem: ‘Em pasin bilong ol stretpela man olsem ol i save bel hevi na pilim tru rong bilong ol, long wanem, sin i daunim ol na ol i no save tingting gut long ol yet. Long ai bilong ol yet, ol i no gutpela man na ol i ting olsem ol i no gat gutpela pasin.’

Ol man “i gat hevi” o bel “bilong ol i bagarap,” ol inap ting olsem Jehova i stap longwe long ol, na ol i liklik samting tru long ai bilong em na em i no save tingim ol. Tasol dispela i no stret. Devit i tokim yumi olsem Jehova i no save lusim ol man ‘i no save tingting gut long ol yet.’ God bilong yumi, em i God bilong sori na em i save em i mas helpim yumi moa yet, na tru tumas, em i stap klostu long yumi.

Tingim wanpela mama. Inap sampela yia i go pinis, dispela mama i kisim pikinini man bilong em i gat 2-pela krismas i go hariap long haus sik, long wanem, em i gat strongpela kus na em i hatwok long pulim win. Taim ol dokta i glasim pikinini pinis, ol i tokim mama olsem pikinini i mas slip long haus sik inap wanpela nait. Mama i stap we long dispela nait? Em i stap long haus sik, na em i sindaun klostu long bet bilong pikinini bilong em. Liklik pikinini bilong em i sik, na mama i laik stap klostu long em. Yumi ken ting olsem gutpela Papa bilong yumi long heven bai mekim gutpela pasin moa, na em i bin wokim yumi long kamapim wankain pasin olsem em yet! (Stat 1:​26; Aisaia 49:15) Gutpela tok bilong Song 34:18 i strongim bel bilong yumi olsem taim yumi “gat hevi,” Jehova, olsem wanpela gutpela papa, em “i save stap klostu” long yumi, na em i lukluk long yumi na i redi long helpim yumi.​—⁠Song 147:​1, 3.

‘Yupela i Winim Planti Pisin’

Taim Jisas i mekim wok bilong em long graun, em i kamapim ol tingting i stap long bel bilong Jehova, na em i kamapim tu tingting bilong Jehova long ol wokman bilong Em long graun. Planti taim Jisas i tokim ol disaipel bilong em olsem ol i gutpela samting tru long ai bilong Jehova.​—⁠Matyu 6:​26; 12:⁠12.

Olsem: Bilong kamapim klia olsem olgeta wan wan disaipel bilong em i gutpela samting tru, Jisas i tok: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Matyu 10:​29-​31) Tingim samting dispela tok i mekim long bel bilong ol man i harim tok bilong Jisas.

Pe bilong dispela liklik pisin ol man i save baim bilong kaikai, em i daun tru. Ol i bin rausim gras bilong en, na sutim long liklik stik, na kukim long paia. Ating Jisas i bin lukim long maket ol rabismeri i kaunim toea bilong ol bambai ol i ken save hamas liklik pisin ol inap baim. Ol man i ting dispela pisin i samting nating, olsem na ol inap baim tupela pisin long wanpela liklik mani tasol.

Bihain Jisas i stori gen long dispela tok piksa, tasol em i kamapim sampela tok i narapela kain liklik. Long Luk 12:​6, Jisas i tok: “Yupela i save, ol man i save baim 5-pela liklik pisin long 2 toea tasol.” Tingim dispela samting. Long wanpela liklik mani, man inap baim tupela pisin. Tasol sapos em inap tromoi tupela liklik mani, em bai kisim 5-pela pisin na i no 4-pela tasol. I olsem dispela wanpela pisin em man i kisim nating, i olsem samting nating. Jisas i tok: “God i no save lusim tingting long wanpela bilong ol dispela liklik pisin [em i save tingim tu dispela pisin man i kisim nating].” Bilong kamapim as bilong dispela tok piksa, Jisas i tok: “Yupela i winim planti lain liklik pisin.” (Luk 12:⁠7) Ating dispela tok i strongim tru bel bilong ol man i harim tok bilong em, a?

Olsem wanem? Yu pilim bikpela tok bilong gutpela tok piksa bilong Jisas? Sapos Jehova i save tingim ol liklik pisin, orait, em i tingim moa yet ol wokman bilong em hia long graun! Yumi olgeta wan wan i gutpela samting tru long ai bilong Jehova, olsem na em i tingim olgeta liklik liklik samting bilong yumi​—⁠i olsem em i kaunim pinis olgeta wan wan gras bilong het bilong yumi.

Tru, Satan bai mekim wok yet long ol “trik na giaman” bilong em​—⁠olsem mekim wok long tingting bilong yumi na bai yumi ting yumi samting nating​—⁠bambai yumi lusim wok bilong Jehova. Tasol yu no ken larim Satan i win! Tingim meri Kristen em yumi stori pinis long em long kirap bilong dispela stori. Wanpela stori bilong nius Wastaua i helpim em. Dispela nius i mekim tok lukaut long ol wok bilong Satan bilong bagarapim bel bilong yumi.a Em i tok: “Mi no bin save olsem Satan bai mekim wok long ol tingting i stap long bel bilong mi bilong daunim mi. Dispela save i kirapim mi long daunim ol dispela kain tingting. Nau mi inap sanap strong na sakim ol dispela hevi Satan i putim long mi.”

Jehova “i save long olgeta samting.” (1 Jon 3:​20) Tru tumas, em i save long ol hevi yumi karim long nau. Em i save tu long ol samting i bin painim yumi long bipo, na ol dispela samting inap mekim na yumi no save tingting gut long yumi yet. Tingim dispela: Tingting bilong Jehova long yumi, dispela i bikpela samting! Maski yumi yet i ting i no gat wanpela man i laikim tru yumi o yumi samting nating tasol, Jehova i tok olgeta wan wan wokman bilong em i gutpela samting tru long ai bilong em. Na yumi ken bilipim tok bilong Jehova, long wanem, em i “no save giaman” olsem Birua bilong em i save mekim.​—⁠Taitus 1:⁠2.

[Futnot]

[Rait long pes 12]

Olsem wanpela gutpela papa, Jehova i save stap klostu long ol man i bel hevi

[Ol Piksa long pes 13]

Jehova i no save lusim tingting long liklik pisin, olsem na em i no inap lusim tingting long yu, a?

[Ol Kredit Lain]

Lydekker

Illustrated Natural History