Lukautim Ol Samting Bilong Bikman

¹ Long taim bilong ol man i bin raitim Baibel, wanpela wokboi em i gat bikpela wok bilong mekim. Abraham i bin givim wok long wokboi bilong em long painim meri bilong pikinini bilong em, Aisak. (Stt 24:​1-4) I olsem dispela wokboi i gat wok bilong mekim ol samting bambai lain tumbuna pikinini bilong Abraham i no ken pinis. Tru tumas, em bikpela wok tru! Olsem na aposel Pol i tok: “Man i mekim wok bilong wanpela man, em i mas bihainim gut tok bilong bikman bilong en”!​—⁠1 Ko 4:⁠2.

Wokboi Kristen

² Baibel i kolim sampela wok Kristen olsem wok yumi kisim long God. Olsem: Aposel Pol i tokim ol Efesus olsem “God i bin marimari long mi na makim mi bilong mekim dispela wok em i mekim bilong marimari long yupela tu.” (Ef 3:⁠2; Kl 1:25) Em i tingim wok bilong autim gutnius long ol manmeri bilong ol arapela lain i olsem wanpela wok em i kisim long God na em i mas mekim gut. (Ap 9:​15; 22:21) Aposel Pita i bin tokim ol brata bilong em, em spirit i makim ol: “Sapos ol arapela manmeri bilong God i kam i stap wantaim yupela, orait yupela i mas lukautim ol gut. Yupela i no ken bel nogut long mekim dispela wok. God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God.” (1 Pi 4:​9, 10; Hi 13:16) Wanem wanem ol samting bilong skin ol Kristen long taim bilong ol aposel i holim, ol i kisim long wanem Jehova i marimari long ol. Olsem na ol i gat wok long lukautim ol dispela samting na mekim wok long en bilong mekim wok Kristen.

³ Long nau, ol Witnes Bilong Jehova i gat wankain tingting long ol samting. Ol i bin dediketim ol yet long God Jehova na ol i tingim olgeta samting ol i holim​—⁠laip bilong ol, strong bilong ol, ol samting bilong skin​—⁠i olsem ‘ol kain kain presen God i marimari na givim long ol.’ Ol i gutpela wokboi, olsem na ol i save God Jehova bai skelim pasin ol i bihainim bilong mekim wok long ol dispela samting. Na tu, God i bin givim save bilong gutnius long ol. Dispela tu i wanpela wok God i putim long han bilong ol, olsem na ol i gat laik long mekim gutpela wok long en: long litimapim nem bilong Jehova na long helpim ol narapela long save long tok i tru.​—⁠Mt 28:​19, 20; 1 Ti 2:​3, 4; 2 Ti 1:​13, 14.

⁴ Olsem wanem ol Witnes Bilong Jehova i mekim wok bilong ol olsem wokboi? Ripot bilong yia i kamapim klia olsem, long yia i go pinis long olgeta hap bilong graun, ol i bin lusim wan bilion aua samting long “autim gutnius bilong kingdom” na ol i bin mekim 4,500,000 Baibel-stadi wantaim ol man i laik harim tok. (Mt 24:14) Pasin bilong ol long stap gut olsem ol wokboi bilong Jehova i kamap ples klia tu long pasin bilong ol long givim kontribusen bilong helpim wok long olgeta hap, na wok bilong lukautim ol Haus Kingdom, na mekim gut long ol wasman bilong raun na ol narapela, na mekim gutpela pasin long ol brata i sot tru long ol samting​—⁠olsem ol brata sista i kisim nogut long ol pait. Ol Kristen tru i wok olsem wanpela lain i lukautim gut ol samting bilong Bikman.

‘Wokboi i Gat Gutpela Tingting, na i Save Mekim Gut Wok’

⁵ God i no save givim wok long wan wan man tasol, nogat; em i save givim wok tu long lain o oganaisesen bilong em. Jisas i kolim lain Kristen God i makim na ol i stap yet long graun olsem ‘wokboi i gat gutpela tingting, na i save mekim gut wok bilong en.’ (Lu 12:42) Wok bilong dispela ‘wokboi i gat gutpela tingting’ em long givim “kaikai” na i go pas long wok bilong autim gutnius long olgeta hap. (KTH 12:17) Lain wokboi i gat gutpela tingting, na maus bilong en em Lain Bilong Bosim Ol Witnes, God i givim wok long ol bilong lukautim gut ol samting bilong skin olsem mani na ol samting bilong spirit. (Mt 25:15) Ol wan wan brens-ofis i save wok strong long mekim gutpela wok long ol mani samting bilong mekim wok bilong Kingdom i go bikpela na dispela i stret wantaim pasin bilong ‘gutpela wokboi.’ Ol brata i givim mani bambai Sosaiti i ken lukautim na mekim wok long en, na ‘wokboi i gat gutpela tingting, na i save mekim gut wok bilong en,’ em i gat wok long stretim ol samting bambai Sosaiti i mekim wok long en, bihainim savepasin taim ol i mekim wok long en na i no ken tromoi nating nating.

⁶ Wanpela samting i kamapim klia olsem ol i mekim gut wok long mani bilong ol brata, em olsem: Wok ol Witnes Bilong Jehova i save mekim bilong wokim ol buk na nius samting long taim bilong yumi em i go bikpela. Wok bilong tilim ol Baibel, magasin, buk, buklet, liklik nius, na Kingdom Nius​—⁠ol i mekim bikpela wok bilong “autim gutnius” i go long olgeta hap nau long taim bilong “las de.” (Mk 13:10; 2 Ti 3:⁠1) Na nius Wastaua em i nambawan rot bilong ‘skelim kaikai long taim bikman i makim’ na salim i go long “lain tru bilong God” na ol poroman bilong ol, em ‘planti tumas manmeri’ bilong ol ‘arapela lain sipsip.’​—⁠Mt 24:45; Ef 2:​19; KTH 7:9; Jo 10:⁠16.

⁷ Long bipo, ol kampani bilong ausait i bin wokim olgeta buk na nius samting bilong ol Witnes Bilong Jehova. Tasol long 1920, ol i ting i gutpela sapos ol wokboi bilong Jehova i gat ol masin bilong ol yet bilong prinim ol buk, na long dispela rot ol i ken mekim gutpela wok na helpim gut ol brata sista long ol samting bilong spirit. Long 1920 ol i mekim ol liklik wok tasol long prinim ol samting, na isi isi wok i go bikpela moa long Bruklin, Nu Yok, na bihain wok i kamap bikpela tru. Long 1967, ol faktori bilong prinim ol samting inapim 4-pela blok long taun. Long ol narapela kantri tu, ol i bin kirap wokim ol buk samting bilong ol yet, tasol long planti bilong ol dispela kantri, Namba Tu Pait i mekim na ol i mas pasim wok.

⁸ Maski wok bilong prinim ol samting i go bikpela long Amerika, ol i no inap wokim planti buk na nius samting bilong tilim long olgeta hap bilong graun. Olsem na long ol yia bihain long pait, ol i kirapim wok bilong prinim ol samting o wok i kirap pinis long planti narapela kantri, olsem Denmak, Grik, Inglan, Kanada, Saut Afrika, Swiselan, na Wes Jemani. Kirap long 1970 samting, Brasil, Filipin, Finlan, Gana, Japan, Naijiria, na Ostrelia, ol tu i gat masin bilong ol yet bilong prinim ol samting. Sampela bilong ol dispela kantri i wokim tu ol buk. Na long 1973 samting, ol i lainim ol misineri bilong skul Gileat long mekim wok long ol masin bilong prinim ol samting na ol i salim ol i go long ol dispela kantri long helpim ol brata long mekim dispela wok.

⁹ Long 1980 i go 1989, namba bilong ol kantri i wokim ol magasin i go bikpela inap 51.a Tru tumas, dispela olgeta samting i kamapim olsem yumi bin mekim gutpela wok long ol samting bilong Bikman! Dispela i kamapim long ples klia olsem wok bilong Kingdom i go bikpela! Na dispela i kamapim klia tru gutpela pasin bilong planti milion Witnes Bilong Jehova em ol i ‘givim ol samting long Bikpela olsem ofa, na dispela i givim biknem long em!’ (Snd 3:⁠9) Long dispela rot, ol i kamapim long ples klia olsem ol i gutpela wokboi i lukautim gut ol samting Jehova i givim long ol olsem blesing long kain kain rot.

Taim Bilong Tingim Ol Narapela Rot

¹⁰ Kirap long 1970 i kam inap long 1983 samting, ol nupela nupela masin bilong prinim ol samting i kamap, na ol Witnes Bilong Jehova i bihainim ol dispela nupela pasin bilong mekim wok. Pastaim, ol i bihainim pasin bilong bipo long prinim ol samting ol i kolim letapres. Isi isi dispela pasin bilong prinim ol samting i senis taim ol i kirap long bihainim nupela pasin ol i kolim ofset. Long dispela rot, ol inap wokim ol naispela buk na nius samting em ol piksa i gat ol kala kala long en, na i no olsem bipo em ol piksa i gat tupela kala tasol, (blak na narapela kala) em ol i prinim long olpela masin. Na bihain moa, masin kompyuta i senisim olgeta pasin ol i save bihainim bilong redim ol samting bilong prinim. Ol Witnes Bilong Jehova i kamapim wanpela program bilong kompyuta ol i kolim MEPS (Multilanguage Electronic Phototypesetting System), na dispela program i helpim wok bilong prinim ol buk na nius samting long 370 tok ples. I no gat wanpela program bilong ol kampani inap mekim wok long planti tok ples olsem MEPS.

¹¹ Long rot bilong dispela program MEPS long kompyuta na ol narapela pasin olsem pasin bilong salim tok i go long narapela hap long rot bilong kompyuta, wok bilong givim kaikai long taim stret bilong en i kamap gutpela moa. Pastaim, taim ol i mekim wok long ol olpela masin, ol Wastaua long ol narapela tok ples i save kamapim ol tok sampela mun o wanpela yia bihain long ol i kamapim pinis long tok Inglis. Long nau, Wastaua i save kamap long wankain taim long olgeta mun long 115 tok ples, na Kirap! long 62 tok ples. Dispela i makim olsem long olgeta hap bilong graun, inap 95 pesen bilong ol man i go long Stadi Wastaua bilong ol Witnes Bilong Jehova long olgeta wik, ol i skelim wankain tok bilong Wastaua long wankain taim. Em wanpela gutpela blesing tru! Tru tumas, ol i mekim gutpela wok long ol samting bilong Bikman taim ol i baim na wokim ol nupela masin samting!

Tingim Narapela Narapela Wok Bilong Oganaisesen

¹² Ol dispela nupela masin i senisim wok bilong ol Witnes Bilong Jehova long mekim wok bilong prinim ol samting long olgeta hap. Ol nupela masin (web offset press) inap mekim wok hariap moa winim ol olpela masin, tasol i gat bikpela pe bilong en. Ol masin kompyuta bilong helpim ol wok olsem wok bilong raitim tok, tanim tok, wokim ol piksa, na putim gut ol tok na piksa, ol i gutpela na i winim ol olpela masin, tasol pe bilong en i bikpela. I no longtaim na Sosaiti i save olsem i no gutpela long prinim ol magasin long 51 narapela narapela kantri, long wanem, Sosaiti i mas tromoi bikpela mani long mekim olsem. Olsem na long 1992 samting, ‘wokboi i gat gutpela tingting’ i skelim gen ol samting. Wanem samting i kamap?

¹³ Ol i kisim save olsem, sapos ol i bungim wok bilong prinim ol buk samting na wanpela kantri i ken mekim dispela wok bilong sampela kantri, bai yumi mekim gut wok long ol ‘gutpela samting’ em ol Witnes Bilong Jehova na ol pren bilong ol i givim olsem kontribusen. Olsem na isi isi sampela brens-ofis i no moa prinim ol samting. Brens-ofis long Jemani i mekim wok bilong prinim ol magasin na buk samting bilong planti kantri long Isten na Westen Yurop, na bipo sampela bilong ol i bin prinim ol samting bilong ol yet. Brens-ofis long Itali i prinim ol magasin na buk samting bilong sampela kantri long Afrika na saut-isten Yurop, olsem Grik na Albenia. Long Afrika, brens-ofis long Naijiria na Saut Afrika tasol i save prinim ol magasin. Wankain samting olsem i kamap long sampela hap bilong graun.

Sampela Samting Bilong Skelim

¹⁴ Inap long Julai 1998, sampela kantri long Yurop bai i no prinim moa ol magasin: Denmak, Frans, Grik, Netelan, Ostria, Romenia, na Swiselan. Brens-ofis long Briten, Finlan, Itali, Jemani, Spen, na Swiden, bai mekim wok bilong prinim ol buk na nius samting long hap bilong Yurop. Long dispela rot, ol i no ken tromoi nating mani na bai ol i mekim gutpela wok long ol kontribusen bilong mekim wok bilong olgeta hap. Olsem wanem ol i skelim wanem wanem ol kantri bai mekim yet wok bilong prinim ol buk na nius samting na wanem wanem ol kantri bai i no ken mekim moa? Lain ‘wokboi i gat gutpela tingting’ ol i kisim tok long lukautim gut ol samting bilong Bikman, olsem na ol i bin skelim gut ol samting na kisim save olsem i gutpela sapos ol i lusim wok bilong prinim ol buk samting long sampela kantri.

¹⁵ Bikpela as na sampela kantri i no prinim moa ol buk samting bilong ol yet i olsem: Em rot bilong helpim gut wok. Taim wanpela kantri tasol i prinim ol buk samting bilong sampela kantri dispela i no gat hatwok long en na Sosaiti inap mekim gutpela wok long ol masin i gat bikpela pe. Long ol kantri em pe bilong ol samting i no bikpela, na i gat inap pepa samting bilong mekim wok, na i gat ol gutpela samting bilong ol sip i bringim ol samting i go, ol tasol i mekim wok bilong prinim ol samting. Long dispela rot, ol inap mekim gutpela wok long ol samting bilong Bikman. Taim wanpela kantri i no prinim moa ol samting, dispela i no makim olsem wok autim tok long dispela hap bai pinis, nogat. Bai i gat planti buk na nius samting, na planti handet tausen Witnes Bilong Jehova long ol dispela kantri bai wok strong yet long autim gutnius bilong pasin wanbel long ol narapela manmeri. (Ef 2:​17) Ol dispela senis i kamapim sampela gutpela samting moa.

¹⁶ Wanpela bilong ol dispela gutpela samting i olsem: Planti bilong ol nupela masin bilong Denmak, Grik, Netelan, na Swiselan, ol i bin salim i go long Naijiria na Filipin. Ol brata bilong ol dispela kantri long Yurop i gat save long mekim wok, ol i orait long i go na lainim ol brata long Naijiria na Filipin long pasin bilong mekim wok long ol dispela masin. Olsem na ol brata sista long dispela 2-pela kantri ol i kisim ol gutpela magasin i gat kala kala long en, wankain olsem ol narapela kantri i bin kisim.

¹⁷ Tingim narapela gutpela samting: Ol kantri i wok yet long prinim ol samting, ol dispela kantri yet i tromoi mani bilong mekim dispela wok. Olsem na long ol kantri i no prinim moa ol buk samting, ol inap tromoi mani bilong ol long mekim sampela narapela wok, olsem bilong wokim ol Haus Kingdom na long helpim ol brata bilong yumi long ol kantri i stap rabis. Olsem na taim yumi mekim gutpela wok long ol samting bilong Bikman, dispela i makim olsem yumi bihainim tok Pol i bin givim long ol Korin: “Mi no tok yupela i mas karim bikpela hevi, bai ol arapela manmeri i ken i stap gut. Nogat. Mi laik bai yumi olgeta i mas mekim wankain pasin long ol arapela. Nau long dispela taim yupela i gat planti samting, na yupela i ken givim ol samting bilong helpim ol manmeri i sot. . . . Olsem na yupela olgeta bai i mekim wankain pasin na yupela olgeta bai i stap gut.”​—⁠2 Ko 8:​13, 14.

¹⁸ Ol dispela senis i kamap i mekim na ol Witnes Bilong Jehova long olgeta hap bilong graun i pas gut wantaim, winim olgeta taim bipo. Ol Witnes long Denmak i no kisim hevi, long wanem, brens-ofis long Jemani i prinim ol magasin bilong ol, maski bipo ol i bin prinim bilong ol yet. Ol i amamas long wok ol brata bilong ol long Jemani i mekim bilong helpim ol. Olsem wanem? Ol Witnes long Jemani i bel nogut, long wanem, ol i mekim wok long ol kontribusen bilong ol yet bilong wokim ol buk bilong Baibel bilong ol brata long Denmak​—⁠o bilong Rasia, Yukren, na sampela narapela kantri? Nogat tru! Ol i amamas long save, kontribusen ol brata bilong ol long ol dispela kantri i putim, ol inap mekim sampela narapela bikpela wok long en.

Lukautim Ol Samting Bilong Bikman

¹⁹ Long olgeta Haus Kingdom bilong ol Witnes Bilong Jehova long olgeta hap bilong graun, i mas i gat wanpela bokis kontribusen ol i makim olsem “Ol Kontribusen Bilong Helpim Wok Bilong Sosaiti Long Olgeta Hap​—⁠Matyu 24:14.” Ol kontribusen yumi putim long dispela bokis i bilong mekim wok long en long wanem wanem hap i gat wok bilong mekim. ‘Wokboi i gat gutpela tingting’ na ol wan wan brens-ofis ol i save skelim olsem wanem ol bai mekim wok long ol dispela kontribusen. Olsem na long ol hap em gavman i orait long en, mani ol i putim long bokis kontribusen long wanpela kantri ating bai helpim wok bilong ol Witnes Bilong Jehova long narapela kantri i stap longwe inap planti tausen kilomita. Long sampela kantri, ol i bin mekim wok long ol kontribusen bilong helpim ol wanbilip i karim hevi, long wanem, ol kain samting olsem bikpela win, guria, na pait long kantri yet i bagarapim ol. Na ol i save mekim wok long dispela mani long helpim ol misineri long 200 samting kantri. Olsem na olgeta kongrigesen long Papua Niugini i mas putim wanpela bokis kontribusen na makim klia olsem “Ol Kontribusen Bilong Helpim Wok Bilong Sosaiti Long Olgeta Hap​—⁠Matyu 24:14.” Long olgeta mun kongrigesen i mas salim mani ol i kisim long dispela bokis kontribusen i go long brens-ofis. Ating long olgeta Haus Kingdom, 2-pela bokis kontribusen i stap pinis, wanpela em bilong Mani i Go Long Sosaiti Bilong Wokim Ol Haus Kingdom, na wanpela bilong helpim kongrigesen yet.

²⁰ Long ol kongrigesen bilong ol Witnes Bilong Jehova, ol i save toktok long ol samting bilong mani wanpela taim tasol long wanpela mun​—⁠na ol i save mekim insait long sampela minit tasol. Ol i no save salim plet i go raun long ol Haus Kingdom o long ol kibung. Ol i no save salim pas samting bilong askim olgeta wan wan long salim mani i kam. Ol i no save mekim sampela wok bilong kisim mani bilong helpim Sosaiti. Long olgeta yia, Wastaua i save kamapim wanpela stori tasol bilong kamapim olsem wanem ol man i gat laik, ol i ken givim kontribusen i go long brens-ofis bilong helpim wok long olgeta hap. Nius Kirap! i save stori wan wan taim tasol long mani bilong Sosaiti. Orait olsem wanem yumi inap mekim dispela bikpela wok bilong autim gutnius long olgeta hap, wokim ol Haus Kingdom, lukautim ol brata sista i save wok long Betel na wok misineri samting, na helpim ol Kristen i sot long ol samting? Jehova i blesim gut lain bilong em wantaim wanpela gutpela pasin, em pasin bilong givim samting bilong helpim ol narapela. (2 Ko 8:⁠2) Mipela i laik tok tenkyu long yupela olgeta i bin insait long wok bilong givim ol gutpela samting bilong yupela bilong litimapim nem bilong Jehova. Yupela i ken save tru olsem ‘wokboi i gat gutpela tingting’ bai wok yet long lukautim ol samting bilong Bikman. Mipela i beten olsem Jehova i ken blesim yet olgeta wok yumi mekim bilong helpim wok autim tok long olgeta hap i go bikpela.

[Ol Futnot]