Pontius Pailat Em i Husat?

“MAN bilong tok bilas, man i gat tupela tingting​—⁠em pasin bilong Pailat, em wanpela man i gat nem long bipo na yumi tingim em yet. Sampela i ting em i wanpela santuman, na sampela i ting em i no gat bun, em wanpela man politik i orait long ol i kilim i dai wanpela man na bai pait i no ken kirap.”​—⁠Buk Pontius Pilate, bilong Ann Wroe.

Maski yu wanbel long wanpela bilong ol dispela tingting o nogat, Pontius Pailat i bin kisim nem long pasin em i mekim long Jisas Krais. Pailat em i husat? Ol man i gat wanem save long em? Sapos yumi save gut long wok na namba bilong em, bai yumi kliagut long sampela bikpela samting tru i bin kamap long graun.

Namba, Wok, na Strong

Empera Taiberius bilong Rom i bin makim Pailat long kamap gavena bilong provins Judia long 26 C.E. Ol ofisa i gat bikpela namba olsem, ol i bilong lain ami na ol i gat nem​—⁠tasol ol i narapela long ol lain i gat biknem na bikpela namba. I luk olsem Pailat i bin go insait long ami olsem wanpela yangpela komanda, na em i wok long kisim bikpela namba moa long ami, na em i kamap gavena taim em i no winim yet 30 krismas.

Taim Pailat i putim bilas bilong ami, ating em i bin werim klos ol i wokim long skin bilong animal na hap kapa i karamapim bros. Na taim em i sanap long ai bilong ol manmeri, em i save pasim longpela waitpela klos, arere bilong en long daunbilo em pepol. Em i gat sotpela gras na em i save sev. Sampela i ting em i bilong Spen, tasol nem bilong em i makim olsem em i bilong lain Pontii, ol Samnait i stap long hap saut bilong Itali em ol i gat nem.

Ol i save salim ol ofisa i gat namba olsem Pailat bilong i go bosim ol provins i gat ol man i no bihainim lo na i gat hatpela pasin. Ol Rom i ting Judia i kain ples olsem. Pailat i gat wok long mekim ol lain i sindaun gut na bihainim lo, na tu, em i bosim wok bilong kisim kain kain takis. Wok bilong stretim olkain tok na ol liklik rong samting long kot, em wok bilong ol haus kot bilong ol Juda yet. Tasol taim man i mekim rong inap long ol i kilim em i dai olsem strafe, gavena yet husat i holim strong olsem nambawan jas i mas kotim dispela man.

Pailat na meri bilong em i sindaun long taun Sisaria wantaim liklik lain kuskus, ol poroman, na ol lain bilong bringim tok. Pailat i bosim 5-pela lain soldia em wan wan lain i gat 500 i go inap 1,000 man, na ol soldia i sindaun long hos ol inap olsem 500. Ol soldia yet i save nilim ol raskol long pos na kilim ol i dai. Taim i no gat pait long kantri, ol i save mekim liklik kot pastaim na bihain kilim man i dai. Tasol taim ol man i kirapim pait long gavman, wantu tasol ol soldia i kilim i dai olgeta lain i bikhet na pait. Olsem: Ol Rom i bin nilim long pos na kilim i dai 6,000 lain wokboi nating em Spatakus i gopas bilong ol long bikhet na pait long gavman. Sapos pait i laik kirap long Judia, gavena i save singaut long bikman bilong ami long Siria husat i save bosim planti tausen soldia. Tasol taim Pailat i stap gavena, i no gat dispela samting long Siria, olsem na Pailat yet i mas kirap na daunim kwik ol pait.

Ol gavena i save salim tok na kisim tok long empera. Sapos sampela i tok bilas long empera o bikhet long gavman, gavena i mas salim ripot long empera na empera bai tok long ol samting em i mas mekim. Ating gavena bai laik salim hariap ripot bilong em yet long empera long ol samting i kamap long provins bilong em, paslain long sampela narapela i komplein long em. Sampela hevi i wok long kamap long Judia, olsem na Pailat i tingting planti long dispela.

Ol Gutnius long Baibel, na ol stori em Flavius Josifas na Filo i bin raitim, ol i givim sampela save long yumi long Pailat. Na Tasitus, wanpela saveman bilong Rom, em tu i tok long Pailat i bin kilim i dai Krais, em ol Kristen i bin kisim nem bilong ol long em.

Ol Juda i Belhat

Josifas i tok ol gavena bilong Rom i tingim pasin bilong ol Juda olsem ol i no save orait long wokim ol imis, olsem na ol ami bilong ol i no save karim ol mak ol i wokim olsem piksa bilong king i go insait long Jerusalem. Tasol Pailat i no tingim dispela na em i mekim nating, olsem na ol Juda i belhat na kwiktaim ol i go long Sisaria na komplein long dispela. Pailat i no mekim wanpela samting inap 5-pela de. Long namba 6 de em i tokim ol soldia long banisim ol Juda i bikhet na tokim ol, sapos ol i no go bek long ples, orait ol soldia bai kilim ol i dai. Tasol taim ol Juda i tok maski ol i dai, ol i no laik bai ol Rom i brukim Lo bilong ol, orait nau Pailat i senisim tingting na i tokim ol soldia long rausim ol imis.

Pailat inap subim strong ol man long bihainim tok bilong em. Josifas i stori long Pailat i kirapim wok bilong wokim wanpela kain baret bilong kisim wara i kam insait long Jerusalem, na em i kisim mani long bokis mani bilong tempel long mekim dispela wok. Tasol em i no kisim nating dispela mani, long wanem, em i save dispela i brukim lo bilong God na ol Juda bai belhat na askim Taiberius long rausim em long dispela wok. Olsem na i luk olsem ol bos bilong tempel i orait long em i mekim olsem. Mani ol i bin makim bilong givim long God, lo i tok ol i ken kisim bilong wokim ol samting bilong helpim taun. Tasol planti tausen Juda i bung bilong kamapim kros bilong ol.

Pailat i tokim ol soldia long wokabaut namel long ol dispela Juda na ol i no ken mekim wok long bainat bilong ol​—⁠ol i mas paitim ol long hap diwai. Ating em i laik pasim ol, tasol em i no laik kirapim pait na kilim i dai planti man. I luk olsem samting i bin kamap olsem em i laikim, tasol sampela i bin dai long dispela taim. Sampela man husat i tokim Jisas olsem Pailat i bin mekim na blut bilong sampela Galili i kapsait antap long ofa bilong ol, ating ol i toktok long dispela samting.​—⁠Luk 13:⁠1.

“Tok Tru, Em Wanem Samting Tru?”

Samting Pailat i kisim nem nogut long en, em taim em i skelim tok ol bikpris na hetman Juda i bin sutim long Jisas, olsem Jisas i tok em i King. Pailat i harim olsem Jisas i gat wok long autim tok i tru, olsem na Pailat i ting dispela kalabusman i no inap birua long Rom. Em i askim Jisas: “Tok tru, em wanem samting tru?” Ating em i ting i no gat wanpela man i ken save tru tru long dispela samting. Orait nau em i tokaut: “Mi no painim wanpela rong long dispela man.”​—⁠Jon 18:​37, 38; Luk 23:⁠4.

Dispela inap pinisim kot bilong Jisas, tasol ol Juda i strong long tok olsem Jisas i laik daunim gavman. Ol hetpris i bel nogut long Jisas na long dispela as tasol ol i laik putim em long han bilong ol Rom. Pailat i save pinis long dispela. Na em i save tu olsem sapos em i larim Jisas i go, bikpela hevi bai kirap, na em i laik abrusim dispela. Kain hevi olsem i kamap pinis taim Barabas na sampela moa i bin kirapim pait long gavman na ol i kilim i dai sampela man na nau ol i kalabus i stap. (Mak 15:​7, 10; Luk 23:⁠2) Na bipo Pailat i bin mekim tok pait wantaim ol Juda na nau Taiberius i no amamas tumas long em. Taiberius i gat nem long mekim save tru long ol gavena i no mekim gut wok bilong ol. Tasol sapos Pailat i bihainim laik bilong ol Juda, i olsem em i no gat bun. Olsem na Pailat i tingting planti.

Taim Pailat i harim Jisas i bilong wanem ples, em i laik putim kot bilong Jisas long han bilong Herot Antipas husat i bosim distrik Galili. Taim dispela i no stretim hevi, Pailat i traim long kirapim ol Juda i bung ausait long haus king bilong em long askim em long larim Jisas i go​—⁠em pasin bilong ol Juda long lusim wanpela kalabusman long Pasova. Tasol ol i singaut long ol i mas larim Barabas i go.​—⁠Luk 23:​5-19.

Ating Pailat i laik mekim pasin i stret, tasol em i laik holim yet wok bilong em na amamasim ol manmeri i bung. Orait em i tingim namba em i holim, olsem na em i sakim maus bilong bel na stretpela pasin. Em i singaut long wara, na em i wasim han na tok em i no gat asua long indai bilong dispela man, nau em i givim tok orait long kilim em i dai.a Maski Pailat i bilip olsem Jisas i no gat rong, em i tokim ol soldia long wipim Jisas na tok bilas long em, paitim em, na spet long em.​—⁠Matyu 27:​24-31.

Orait Pailat i traim gen long larim Jisas i go, tasol ol man i singaut strong olsem sapos em i mekim olsem, em i no pren bilong Sisar. (Jon 19:12) Em nau, Pailat i bihainim laik bilong ol. Wanpela saveman i tok long disisen bilong Pailat olsem: “I no hatwok long stretim dispela hevi: kilim dispela man i dai. Laip bilong wanpela Juda nating tasol bai lus; i no gutpela long helpim dispela man na larim bikpela hevi i kamap.”

Wanem Samting i Painim Pailat?

Laspela stori bilong Pailat ol i bin raitim, em bilong narapela pait i bin kamap. Josifas i tok, bikpela lain Samaria i holim bainat na ol i bung long maunten Gerisim bilong kamautim ol gutpela gol samting ol i tok Moses i bin planim long dispela hap. Pailat i laik pasim ol, na ol soldia bilong em i kilim i dai planti Samaria. Ol Samaria i kotim Pailat long bos bilong em, Lusius Vitelius, em gavena bilong Siria. Buk i no tok Vitelius i ting samting Pailat i mekim i stret o nogat. Em i tokim Pailat long go long Rom bilong empera i ken kotim em long samting em i bin mekim. Tasol Pailat i no kamap yet long Rom na Taiberius i dai.

Wanpela nius i tok: “Bihain long dispela, ol buk i no gat sampela stori moa bilong Pailat, tasol i gat planti stori nating i stap.” Planti i laik kamapim sampela stori ol buk i no tok long en. Sampela i tok em i bin kamap Kristen. Ol Itiopia i tok ol i Kristen, ol i makim em i kamap “santuman.” Eusebius, em i bin raitim ol buk 300 yia samting bihain long Krais, em i namba wan bilong planti man i tok, Pailat i bin kilim i dai em yet olsem Judas Iskariot i bin mekim. Tasol wanem samting i bin painim Pailat, em yumi no save tru.

Pailat i gat strongpela het, maus bilong em i sap, na em i hatpela man. Tasol em i stap gavena inap 10-pela yia, na planti gavena bilong Judia i no bin stap planti yia olsem. Olsem na long tingting bilong ol Rom, Pailat i bin mekim gut wok bilong em. Sampela i tok em i man bilong pret na man bilong helpim em yet, em i bin tokim ol soldia long givim bikpela pen long Jisas na kilim em i dai. Tasol sampela i tok, wok bilong Pailat i no bilong holimpas stretpela pasin​—⁠wok bilong em i bilong kamapim pasin bilong i stap isi na helpim gavman Rom.

Taim bilong Pailat i narapela kain long taim bilong yumi. Tasol i no stret long wanpela jas i makim man long i dai na em i bilip olsem dispela man i no gat rong. Sapos Pontius Pailat i no bin bungim Jisas, ating em bai stap olsem wanpela nem nating long ol buk i stori long ol samting bilong bipo.

[Futnot]

[Piksa long pes 11]

Ol i bin painim long Sisaria dispela rait long ston i tokaut olsem Pailat i stap gavena bilong Judia